لە هەموو ناوچەكانی كوردستانەوە دەچنە ئەوێ بۆ بەشەڕدانی سەگەكانیان

بۆچی سەگەكانیان دەدەن بەشەڕ؟

لە هەموو ناوچەكانی كوردستانەوە دەچنە ئەوێ بۆ بەشەڕدانی سەگەكانیان

796 خوێندراوەتەوە

سەگە ڕەش بازووە چوار چاوەكەی عەلی، بە بێشەڕكردن گەڕایەوە، چونكە ئەو سەگانەی هێنرابوونە ئەوێ، هیچكامیان هاوتەمەنی سەگەكەی عەلی نەبوون.
عەلی وتی:" شەش ساڵە ئەم سەگەم لایەو لەگەنجیدا هیچ شەڕێكی نەدۆڕاندووە، بەڵام ئەمڕۆ هیچ سەگێكی هاوتەمەنی سەگەكەی خۆمم دەستنەكەوت تا لەگەڵ سەگەكەی مندا شەڕ بكات".

 
سەر كانی‌و ئاوەكەی " خەراجیان"، كە بە دووریی پێنج كیلۆمەتر دەكەوێتە بەشی ڕۆژئاوای شارۆچكەی عەربەتەوە، یەكێك لە مەیدانەكانی بەشەڕدانی سەگە لە كوردستان.
لە زۆربەی شارو شارۆچكەكانی كوردستانەوە هاتبوونە ئەوێ تا سەگەكانیان لەگەڵ یەكتردا بدەن بەشەڕ، جیا لە خاوەن سەگەكان خەڵكێكی زۆری دیكەش بۆ تەماشاكردن هاتبوون.

وریا كە ڕۆڵی دادەوەری دەبینی‌و ڕێكخەری گردبوونەوەكەی ئەو ئێوارەیە بوو، لەناوەڕاستی مەیدانەكەدا دەهات‌و دەچوو، پاش تەواوبوونی شەڕی نێوان دوو سەگ‌و باسكردنی هەڵمەت‌و توانای دوو سەگەكە لەگەڵ خاوەنەكانیان، داوای لە دوو كەسیتر دەكرد، سەگەكانیان بێنن بۆ شەڕ كردن.

 
وریا وتی:" لەڕێگەی تەلەفۆن‌و تۆڕە كۆمەڵایەتییەكانەوە یەكتری ئاگادار دەكەینەوەو ڕۆژێك دیاری دەكەین‌و دێینە ئێرە بۆ بەشەڕدانی سەگەكانمان".
بە وتەی وریا، لە سلێمانی‌و كەركووك‌و پشدەرو شەقلاوەو گەرمیان‌و شارەزوورەوە، ئەوانەی سەگی شەڕكەریان هەیە دێنە ئێرە بۆ بەشەڕدانی سەگەكانیان‌و ئەمانیش بەهەمانجۆر سەردانی ناوچەكانیتر دەكەن.

 
هەموو ئەوانەی لەوێبوون، شارەزاییەكی تەواویان لە جۆری سەگ‌و شێوازی شەڕكردنی سەگەكاندا هەبوو، لەگەڵ گەرمبوونی شەڕی نێوان سەگەكانیشدا، ئەوان زۆرتر دەچوونە پێشەوەو لە سەگە شەڕكەرەكان نزیكتر دەبوونەوە.

 

 


عەلی كە لە یەكێك لە گوندەكانی شارەزوورەوە هاتبوو تا لەو مەیدانەدا سەگەكەی بەشەڕ بدات، لەگەڵ ئەوەدا تەمەنی لەزۆربەی ئەوانەی لەوێبوون كەمتر بوو، بەڵام شارەزاییەكی زۆری لە شەڕە سەگدا هەبوو، عەلی وتی:" كاتێك وەرزی سەرما دێت شەڕە سەگ ئەنجام دەدرێت، لەگەڵ دەستپێكردنی سەرمادا، ئەمجۆرە گردبوونەوانە دەستپێدەكەن بۆ بەشەڕدانی سەگ، لەكاتی گەرمادا نابێت سەگەكان بەشەڕ بدرێن، چونكە لەكاتی گەرمادا ئەو برینەی كە بەهۆی شەڕەوە لە سەگەكەدا دروستدەبێت، بە ئاسانی ساڕێژنابێت‌و كرم تێی دەدات".

 
وریا ئاماژەی بەوەدا كە لە پاییزی ئەمساڵداو لەگەڵ هاتنی سەرمادا ئەوە دەیەمین جارە كە گربوونەوە بۆ شەڕە سەگ لەو جێگەیەدا ساز دەكەن.
تۆفیق كە یەكێبوو لەوانەی سەگەكەی هێنابوو بۆ شەڕ پێكردن، ئاماژەی بەوە دا، ئەو دوو سەگەی كە بەشەڕ دەدرێن دەبێت لە ڕووی تەمەن‌و باڵاو تواناوە لە ئاستێكدابن‌و نابێت لەو ڕووانەوە جیاوازییەكی زۆریان هەبێت.

 
چەندین ساڵە، سەر كانی‌و ئاوەكەی گوندی خەراجیانی نزیك بە شارۆچكەی عەربەت بووەتە مەیدان‌و شوێنی بەشەڕدانی سەگەكان.
سەبارەت بەهۆكاری هەڵبژاردنی ئەو جێگەیە وریا وتی:" ئێرە شوێنێكی زۆرباشە، بەتایبەت كە ئاوی لێیە، چونكە لەپاش شەڕكردنیان دەبێت سەگەكان فێنك بكرێنەوەو ئاویان پێبدرێت‌و ئاویش بە برینەكانیاندا بكرێت.

 

 

 


هەموو ئەو سەگانەی كە بۆ شەڕكردن هێنرابوونە ئەوێ، لە جۆری سەگی هاوشار بوون، وەكو خاوەن سەگەكان دەیانووت، سەگی هاوشار، قیافەیەكی گەورەی هەیەو بەرگەی زۆرتری شەڕكردن دەگرێت.
تۆفیق باسیلەوە كرد، لەهەر گردبوونەوەیەكدا بۆ شەڕە سەگ، هەر سەگێك یەكجار دەدرێت بەشەڕو 25 یان 30 ڕۆژیش دوای ئەوە جارێكیتر شەڕی پێدەكرێتەوە، وەكو تۆفیق وتیشی، سەگی نانخۆر لە هەموو سەگەكانیتر باشتر شەڕ دەكات‌و ئەو سەگەی تەمرینیشی زۆرتر پێكرا بێت بردنەوەی مسۆگەرتر دەبێت.
لەگەڵ بەشەڕدانی هەردوو سەگێكدا، خاوەنی سەگەكان لەنزیك سەگەكانیانەوە بانگیان لە سەگی خۆیان دەكردو بە " بۆرەو جیڕەو شێرەو ڕووتە" ناویان دەهێنان‌و هانیان دەدان‌و زۆرجاریش دەستیان بە پشت‌و سەریاندا دەهێنا.

 
تۆفیق وتی، ئەگەر سەگەكان لەكاتی شەڕدا گوێیان لە دەنگی خاوەنەكانیان بێت‌و بزانن لە نزیكیانەوەن باشتر شەڕ دەكەن‌و ئەگەری بردنەوەیان زۆرتر دەبێت.
لەڕووی شەریعەتی ئیسلامەوە، شەڕە سەگ بە كارێكی نادروست دادەنرێت‌و ڕێكخراوەكانی تایبەت بە پاراستنی ئاژەڵان‌و چالاكانی ئەو بوارە دژی دەوەستنەوەو بەكارێكی نا مرۆڤانەی وەسف دەكەن.

 

كامەران ئەو ئێوارەیە لە قەڵادزێ وە بۆ دیتنی شەڕی سەگەكان هاتبووە ئەوێ، باسیلەوە كرد كە ئەوان وەكو " خۆیان" خزمەتی سەگەكانیان دەكەن‌و باشترین خواردنیان پێدەدەن‌و ئەمكارەش وەكو هیوایەتێك دەكەن‌و مەبەستیان نییە كە سەگەكانیان ئازار بدەن.

 

author photo

ڕۆژنامەنوسی سیاسی و دیكۆمێنتەری سیاسی و مێژویی