سه‌لاحه‌دین بابه‌كر: یه‌كگرتوو ده‌به‌ینه‌وه‌ سه‌رده‌مى زێڕینى

زۆرینه‌ى خه‌ڵك له‌ بڕیارو هه‌ڵوێسته‌كانى یه‌كگرتوو تێنه‌گه‌شتن

سه‌لاحه‌دین بابه‌كر: یه‌كگرتوو ده‌به‌ینه‌وه‌ سه‌رده‌مى زێڕینى

563 خوێندراوەتەوە

د. سه‌لاحه‌دین بابه‌کر کارگێری ئەنجومەنی جێبەجێکردنی یەکگرتووی ئیسلامی کودستان لەم دیدارەدا لەگەڵ " دیبلۆماتیک مەگەزین" باس لەقۆناغی ئۆپۆزیسیۆنبوونی یەکگرتووی ئیسلامی دەکات‌و ئاماژه‌ به‌وه‌ ده‌دات كه‌ به‌ به‌رنامه‌و پلانه‌وه‌ كارى ئۆپۆزیسیۆن بوون ئه‌نجام ده‌ده‌ن‌و چاودێرى حكومه‌ت ده‌كه‌ن.


دیبلۆماتیک: یەکگرتووی ئیسلامی کوردستان هەر لەدوای ئەنجامی هەڵبژاردنەکان بڕیاری بوون بە ئۆپۆزیسیۆنیدا، ئایە ئەم بڕیارە بە فشاری جەماوەری حیزەبەکەتان بوو؟


سه‌لاحه‌دین بابه‌کر: دوای هەڵبژاردنەکانی پەڕلەمانی کوردستان و بەغداد لەساڵی ٢٠١٨ و داکشانی دەنگەکانی یەکگرتوو، سەرکردایەتی یەکگرتوو بڕیاری بەخۆداچوونەوەیدا و کۆنفرانسی بەست لە (٢٠١٨/١٠/٢٥ ) وپلانی هەستانەوەی دانا، پاشی ڕاپرسی بەڕێكخستنەکان، سەرکردایەتی بەزۆرینەیەکی زۆر بڕیاری ئۆپۆزسیۆنیدا، کە زۆربەی هەرەزۆری ڕێكخستنەکانیش لەگەڵ ئەوبڕیارەبوون.
کەواتە دەتوانین بڵێن بڕیارەکە وەڵامدانەوەی خواستی زۆرینەی سەرکردایەتی و ڕێخستنەکان بوو، هەرلەبەر ئەوە بڕیاری ئۆپۆزیسیۆن بوون بەسود دەگەڕێتەوە بۆ ئێستاو داهاتووی یەکگرتوو.

دیبلۆماتیک: بەشێک پییانوایە ئۆپۆزسیۆنی ئەم جارەی کابینەی نوێ، هیچ سەنگ‌و قورسایەکی نابێ لەسەر دەسەڵات، چونکە بەرەی ئۆپۆزیسیۆن کەمینەیەو بەرەی دەسەڵات زۆرترن، لەم ڕوەوە سەرنجی ئێوە چییە ؟

سه‌لاحه‌دین بابه‌کر: ئاساییە کەبەرەی دەسەڵات زۆرینەبێت، چونکە ئەگەر وانەبێت چۆن حکومەت پێکدەهێنێت، لەبەرامبەریشدا بەهەمان شێوە بەرەی ئۆپۆزیسیۆن کەمینەیە، بەڵام ئەمە مانای ئەمە نییە کە ئۆپۆزسیۆن سەنگ و قورسایی و کاریگەری نابێت لەسەر دەسەڵات، یەکگرتووی ئیسلامی کوردستان پڕۆژەیەکی هەمەلایەنەی ئامادە کردووە بۆچۆنێتی مومارەسەکردنی ئۆپۆزیسیۆن بەشێوەیەکی کاراو کاریگەر، ئۆپۆزیسیۆن لەڕێگەی چاودێریکردنی وردی دەسەڵات‌و بەدەرخستنی کەموکورتییەکانی‌و پێشکەشکردنی پڕۆژەی یاسایی جێگیرەوەو بەدواداچوونی بەردەوام بۆکارو پرۆژەکانی دەسەڵات و ڕێگریکردن لە گەندەڵی‌و بەکارهێنانی میدیاو ڕایگشتی بۆ بەرچاوڕوونی هاوڵاتیان‌و جەماوەر، ئۆپۆزسیۆن لەو رێگانەوە دەتوانێت کاریگەری لەسەر دەسەڵات دروست بکات و سەنگ و قورسایی بخاتە سەر.

,,

 سه‌لاحه‌دین بابه‌کر: ئێمە وەک ئۆپۆزیسیۆن چاودێری ئەداو چۆنیەتی ڕاپەڕاندنی کارو پڕۆژەکانی دەکەین، ئومێد دەکەین بتوانێی کێشەو گرفەتەکانی خەڵک چارەسەربکات و خزمەتی پێوویست پێشکەش بەجەماوەری کوردستان بکات.

دیبلۆماتیک: وەک یەکگرتووی ئیسلامی کوردستان تێڕوانینتان چۆنە بۆکاینەی نوێی حکومەتی هەرێم، ئایە ئەم کابینەیە کۆتایی به‌کێشەکانى خەڵکی دێنێت؟

سه‌لاحه‌دین بابه‌کر: ئەرکی حکومەت لەهەر وەڵاتێکدا وەک دەسەڵاتی جێبەجێکار چارەسەرکردنی کێشەو گرفتەکان‌و، خزمەتی خەڵک‌و جەماوەره‌، سەبارەت بەکابینەی نوێی حکومەت ئێمە وەک ئۆپۆزیسیۆن چاودێری ئەداو چۆنیەتی ڕاپەڕاندنی کارو پڕۆژەکانی دەکەین، ئومێد دەکەین بتوانێی کێشەو گرفەتەکانی خەڵک چارەسەربکات و خزمەتی پێوویست پێشکەش بەجەماوەری کوردستان بکات.

دیبلۆماتیک: لەدوای ئەو پاشەکشەیەی کە لەهەڵبژاردنەکان ڕووى له‌ یه‌كگرتوو كرد، ده‌تانه‌وێت چۆن گوڕ بدەنەوە بەخۆتان؟


سه‌لاحه‌دین بابه‌کر: ڕاستە ئێمە وەک یەکگرتووی ئیسلامی کوردستان لەهەڵبژاردنەکان دەنگو کورسیمان کەمی کرد، بەڵام سەنگو قورسایی سیاسی یەکگرتوو کەمی نەکردوەو کاریگەری یەکگرتوو لەهاوکێشە سیاسیەکانی هەرێم هەروەکو خۆیەتی، یەکگرتوو لە هاوکیشەکاندا ژمارەیەکی حساب بۆکراوەو قورسایی خۆیی هەیە.
لەکۆنفرانسی دهۆک لە (٢٠١٨/١٠/٢٥) وپاشان لەچەند کۆبونەوەیەکی یەک لەدواییەک ئەنجومەنی سەرکردایەتی کارنامەو پلانی هەستانەوەمان دانا، ئێستا لەسەر هەموو ئاستەکاندا ئەوپلانە بەگەرموگوڕییەوە چۆتە بواری جێبەجێکردنەوەو پشت بەخوا یەکگرتوو دەخەینەوە سەردەمی زێڕینی‌و هەموو ئەودەنگ‌و کورسیانەی لەدەستمان داوە لەهەلبژاردنەکانی داهاتوو بەزیادەوە بەدەستیان دەهێنینەوە، چونکە یەکگرتوو خاوەنی سەرمایەکی مرۆیی بێ وێنەیە لەکوردستانداو بنەماکانی بەردەوام بوون و هەستانەوەی تێدایە .

,,

سه‌لاحه‌دین بابه‌کر: لەکۆنگرەدا سێ کاری سەرەکی دەکرێ، پێداچوونەوە بە پەیڕەو پڕۆگرامی حزب‌و دانانی ستراتیژیەتێکی نوێ ‌وهەڵبژاردنی سەرکردایەتی نوێ، بێگومان ئامادەکاری تەواو دەکرێت بۆ کۆنگرەو ئەو کەموکورتی‌و بوارانە دیاریدەکرێت کە پێووستیان بەگۆڕانکاری وچاکسازی هەیە

دیبلۆماتیک: بەشێک پییانوایە هۆکاری دابەزینی دەنگەکانی یەکگرتوو دەگەڕێتەوە بۆ ئەوەی کە یەکگرتوو جورئەتی بڕیاردانی سیاسی نەبووە لە ڕابردودا، له‌م ڕووه‌وه‌ ڕاتان چییه‌؟

سه‌لاحه‌دین بابه‌کر: ئەوقسەیە ڕاست نییە، یەکگرتوو هەموو کات جورئەتی بڕیار وەرگرتنی هەبووەو هەیە، یەکگرتوو خاوەنی بڕیارو هەڵوێستی خۆیەتی، بنەمایەکی سەرەکی وەرگرتنی بڕیارو هەڵوێست لای یەکگرتوو بەرژەوەندی گشتی‌و چەسپاندنی ئارامی سیاسی‌و کۆمەڵایەتییە لەهەرێمی کوردستاندا، هەر لەبەر ئەوەی هەندێكجار لەو بڕیارو هەڵوێستانەی یەکگرتوو لای هەندێ لایەن و بەشێک لەجەماوەر وەک پێویست تێگەیشتنی بۆنەکراوە، تەشویش‌و موزایداتی سیاسیش ڕێگر بووە لەتێگەیشتنە، بەڵام دوای تێپەڕبوونی کات‌و ڕونبوونەوەی ڕووداوەکان، ڕاستی‌و دروستی هەڵوسێت‌و بڕیارەکانی یەکگرتوو بەدەرکەوتن .


دیبلۆماتیک: یەکگرتوو بڕیاریدا کە کۆنگرە پێشبخات‌و پێش وادەی خۆی کۆنگرە ببەستێت، ئایە کەموکورتیەکانی یەکگرتوو چییەو دەتانەوێ لەکوێى یەکگرتوودا چاکسازی بکەن؟

سه‌لاحه‌دین بابه‌کر: لەکۆنگرەدا سێ کاری سەرەکی دەکرێ، پێداچوونەوە بە پەیڕەو پڕۆگرامی حزب‌و دانانی ستراتیژیەتێکی نوێ ‌وهەڵبژاردنی سەرکردایەتی نوێ، بێگومان ئامادەکاری تەواو دەکرێت بۆ کۆنگرەو ئەو کەموکورتی‌و بوارانە دیاریدەکرێت کە پێووستیان بەگۆڕانکاری وچاکسازی هەیەو پشت بەخوا لەکۆنگرەدا ئەنجامیان دەدەین.

دیبلۆماتیک: ئایە بۆئەم جارە لەکۆنگرە مامۆستا سەلاحەدین محەمەد بەهادین ئەمینداری گشتی یەکگرتوو بڕیاریداوە کە خۆی هەڵبژێرێتەوە بۆ پۆستی ئەمینداری؟


سه‌لاحه‌دین بابه‌کر:وەڵامی ئەم پرسیارە لای بەرێز ئەمینداری گشتی مامۆستا سەلاحه‌دین خۆیەتی.

دیبلۆماتیک: پرۆژەی یەکگرتنەوەی ئیسلامییەکان بۆچی شکستی هێناو نەتوانرا ماڵی ئیسلامیەکان لەو پەرتەوازەییه‌ ده‌رباز بكرێت؟

سه‌لاحه‌دین بابه‌کر: پڕۆژەکە ناوی پرۆژەی کاری ئیسلامیەکان بوو، ڕاستە بۆ هەڵبژاردنەکان ئەم پڕۆژەیە سەرکەوتنی بەدەست نەهێنا، بەڵام ئەسڵی پڕۆژەکە کە کاری هاوبەشی نێوان ئیسلامییەکانە شکستی نەهێناوەو پشت بەخوا بەردەوام دەبێت.


دیبلۆماتیک : دەگوترێت هۆکاری یەکنەگرتنی هێزە ئیسلامییەکان نێوخۆی خۆیان نەبوو، بەڵکو کاریگەری‌و هەژموونی هەندێک وەڵاتی ئیقلیمی بەسەرەوە بوو، ئایە تاچەند ئەم قسەیە ڕاستە؟

سلاحه‌دین بابه‌کر: ئەو قسەیە ڕاست نیە، بەڵکو پرۆژەی کاری هاوبەشی ئیسلامیەکان بڕیاری لایەنە ئیسلامیەکان خۆیان بوو، بەڵام هەموو پێیوابوو بۆهەڵبژاردنەکان بەجیا دابەزین باشترە، کاتێک نەتوانرا لیستێکی هاوبەش بۆهەڵبژاردن بۆئیسلامیەکان دروست بکرێت، پڕۆژەکە ساردی تێکەوت و سەرکەوتنی بەدەست نەهێنا، بەڵام کاری هاوبەشی نێوان ئیسلامیەکان هەر ماوە و دەمێنێت.

 

author photo

ڕۆژنامەنوس