" ده‌وڵه‌تى كوردى شتێك نییه‌ تۆ تاكى كوردى له‌ پێناودا بده‌یت به‌ كوشت"

" له‌ مێژووى مرۆڤایه‌تییدا هیچ شۆڕشگێڕێك نه‌چووه‌ته‌ سه‌ر ده‌سه‌ڵات له‌وه‌ى پێش خۆى باشتر بووبێت"

" ده‌وڵه‌تى كوردى شتێك نییه‌ تۆ تاكى كوردى له‌ پێناودا بده‌یت به‌ كوشت"

1263 خوێندراوەتەوە

دیداری سالار مه‌حمـود  ــ به‌شى دووه‌م
ته‌حسین حه‌مه‌ غه‌ریب، نوسه‌رو ڕۆشنبیرو شاره‌زاى فیكرى ئیسلامى، له‌ به‌شى دوومى دیداره‌كه‌یدا له‌گه‌ڵ دیپلۆماتیك مه‌گه‌زین، سه‌باره‌ت به‌ پرسى چاكسازى ده‌دوێت‌و باسله‌وه‌ ده‌كات كه‌ چاكسازى به‌ بێ ئایین ناكرێت‌و پێیوایه‌ ده‌بێت چاكسازى ئایینى پێشه‌كى هه‌موو چاكسازییه‌كان بێت.

دیپلۆماتیك مەگەزین: زۆركه‌س پێیانوایه‌ له‌گه‌ڵ ده‌ركه‌وتنى داعشدا ده‌بێت زۆرتر قسه‌ له‌سه‌ر كرانه‌وه‌و ڕیفۆرمى ئایینى‌و ئه‌و بابه‌تانه‌ بكرێت كه‌ په‌یوه‌نددارن به‌ به‌رهه‌مهێنان توندڕه‌وییه‌وه‌، به‌ بڕواى ئێوه‌ ئه‌م پرۆسه‌یه‌ بووه‌ته‌ واقیع، یاخود له‌مڕووه‌وه‌ سه‌رنجتان چییه‌؟
ته‌حسین حه‌مه‌ غه‌ریب: ئه‌گه‌ر له‌ ده‌ره‌وه‌ى بابه‌ته‌ ته‌قلیدی‌و فه‌رهه‌نگییه‌كانه‌وه‌ سه‌یرى پرسه‌كه‌ بكرێت، ئه‌كرێت بابه‌تى پێش داعش‌و دواى داعش لێكبدرێته‌وه‌، به‌ڵام له‌ بوارى ڕیفۆرمى ئایینیدا ئه‌و بابه‌ت پێش داعش‌و دواى داعشى نییه‌.داعش بابه‌تێكى بچووكه‌ له‌و بواره‌دا، داعش دۆخێكى دروستكراوه‌و كۆمه‌ڵێك ده‌زگاى هه‌واڵگرى وڵاتان له‌ پشتییه‌وه‌ن‌و ئه‌و دۆخه‌یان خولقاندووه‌.
بابه‌تى ڕیفۆرمى له‌ فیكرى ئیسلامیدا ده‌مێكه‌ ده‌ستى پێكردووه‌، له‌سه‌رده‌مى شێخ جه‌ماله‌دینى ئه‌فغانى‌و محه‌مه‌د عه‌بده‌و به‌تایبه‌تیتر له‌سه‌رده‌مى محه‌مه‌د ئیقبال لاهورییه‌وه‌ ده‌ستى پێكردووه‌، هه‌رچه‌نده‌ دواتر وه‌رچه‌رخاوه‌ بۆ بابه‌ته‌ سیاسییه‌كان.
ته‌نانه‌ت پێش جه‌ماله‌دینى ئه‌فغانیش، نزیكه‌ى دوو سه‌ده‌ له‌مه‌وبه‌ر بابه‌تى ڕیفۆرمى ئایینى له‌سه‌رده‌مى وه‌لیدوڵاى ده‌هله‌وییه‌وه‌ ده‌ستى پێكردووه‌، واته‌ ئه‌م بابه‌ته‌ ته‌مه‌نێكى دورو درێژى هه‌یه‌.
ئه‌م بابه‌ته‌ دووسه‌ره‌یه‌، واته‌ كرانه‌وه‌ى ئایینى ته‌نها په‌یوه‌ندى به‌ دینه‌وه‌ نییه‌، په‌یوه‌ندى به‌ ده‌ره‌وه‌ى دینیشه‌وه‌ هه‌یه‌، كه‌ چه‌ند خۆى ده‌كاته‌وه‌و له‌گه‌ڵ بابه‌ته‌ دینییه‌كاندا دێته‌وه‌، ئه‌مه‌ش وه‌رچه‌رخانێكى گه‌وره‌یه‌ له‌ ئاستى جیهانیدا، هه‌رچه‌نده‌ خه‌ڵكى ئاسایی دركى پێناكات بۆ نموونه‌ كه‌سێكى وه‌كو ( هابرماس)، تا حه‌فتاكانى سه‌ده‌ى بیسته‌م كه‌سێكى دژه‌ ئایین بوو، كاتێك نوسه‌رى به‌ناوبانگى ئه‌ڵمانى ( ئانۆ مارى سمیل) خه‌ڵاتى ئه‌وه‌ى پێده‌ده‌ن كه‌ مه‌عنه‌ویه‌تى دینیی كه‌شفكردووه‌‌و نزیكه‌ى سه‌ت كتێبى له‌سه‌ر ئه‌و بابه‌ته‌ نووسیوه‌، له‌و بۆنه‌یه‌دا هابرماس له‌وێ دانیشتووه‌و ده‌ڵێت نه‌ك نابێت خه‌ڵات بده‌ین به‌كه‌سێك كه‌ ئه‌مكاره‌ى كردووه‌، به‌ڵكو ئه‌مانه‌ توندوتیژى بڵاو ده‌كه‌نه‌وه‌و ده‌بێت نه‌هێڵین خۆیشى‌و ئاینیش له‌ناو كۆمه‌ڵگه‌دا هه‌بن، ئه‌و هابرماسه‌ ئێستا پرۆژه‌ى پۆست دیموكراسى هه‌یه‌، ئه‌و پیرترین فه‌یله‌سوفى دونیایه‌ كه‌ بانگه‌شه‌ى ئه‌وه‌ ده‌كات كه‌ ده‌بێت ئایین‌و عه‌لمانییه‌ت پێكه‌وه‌ گفتوگۆیان هه‌بێت.
ئه‌م بابه‌ت ته‌نها په‌یوه‌ست نییه‌ به‌ ئایینه‌وه‌ كه‌ ده‌بێت خۆى بكاته‌وه‌، له‌م پرسه‌دا بابه‌ته‌كانى ده‌ره‌وه‌ى ئاین گرنگترن، چونكه‌ هێز لاى ئاینییه‌كان نییه‌، ئه‌م سه‌رده‌مه‌ سه‌رده‌مێكه‌ كه‌ خه‌ڵكى نا ئایینى خاوه‌ن ماڵه‌و ئاینداره‌كان میوانن، له‌به‌ر ئه‌وه‌ ئاینییه‌كان ناچارن كه‌ خۆیان له‌گه‌ڵ ئه‌م دۆخه‌دا بگونجێنن، ته‌ماشاى حیزبه‌ ئیسلامییه‌كانى كوردستان بكه‌ بزانه‌ چه‌نده‌ گۆڕانكارییان به‌سه‌ردا هاتووه‌، له‌شه‌ڕو تفه‌نگه‌وه‌ هاتوون بۆ به‌شداریكردن له‌ پرۆسه‌ى دیموكراسیدا، له‌ به‌رانبه‌ریشدا بزانه‌ عه‌لمانییه‌كان چه‌نده‌ گۆڕاون؟.

،،

"هێز لاى ئاینییه‌كان نییه‌، ئه‌م سه‌رده‌مه‌ سه‌رده‌مێكه‌ كه‌ خه‌ڵكى نا ئایینى خاوه‌ن ماڵه‌و ئاینداره‌كان میوانن، له‌به‌ر ئه‌وه‌ ئاینییه‌كان ناچارن كه‌ خۆیان له‌گه‌ڵ ئه‌م دۆخه‌دا بگونجێنن، ته‌ماشاى حیزبه‌ ئیسلامییه‌كانى كوردستان بكه‌ بزانه‌ چه‌نده‌ گۆڕانكارییان به‌سه‌ردا هاتووه‌، له‌شه‌ڕو تفه‌نگه‌وه‌ هاتوون بۆ به‌شداریكردن له‌ پرۆسه‌ى دیموكراسیدا، له‌ به‌رانبه‌ریشدا بزانه‌ عه‌لمانییه‌كان چه‌نده‌ گۆڕاون؟ ".

dfc
تەحسین حەمە غەریب، نووسەر و رۆشنبیر


پێموایه‌ بابه‌ته‌كه‌ په‌یوه‌ندى به‌ ده‌ره‌وه‌ى ئاینه‌وه‌ هه‌یه‌، ده‌بێت جیهان بكرێته‌وه‌ بۆ ئه‌وه‌ى جێگه‌ى ئایین‌و ده‌ره‌وه‌ى ئاینیشى تێدا ببێته‌وه‌، هه‌موو شتێك به‌ ده‌ست ده‌ره‌وه‌ى ئاینه‌وه‌یه‌، زانست، فه‌لسه‌فه‌، ته‌كنه‌لۆژیا، ده‌سه‌ڵاتى سیاسى‌و پاره‌و سه‌رمایه‌، هیچ شتێكى گه‌وره‌ به‌ده‌ست ئاینییه‌كانه‌وه‌ نییه‌، ئه‌وه‌ ئه‌وانن كه‌ چۆن بیانه‌وێت ئایینه‌كان پیشان بده‌ن پیشانیده‌ده‌ن.
هه‌ندێك له‌ ڕۆژهه‌ڵاتناسى به‌ویژدان وتیان، داعش ئیسلامى ناو مه‌جازه‌، ئیسلامى ناو ئه‌نته‌رنێته‌و ئیسلامى ڕاسته‌قینه‌ نییه‌، ئه‌گه‌ر بویسترێت توندوتیژى نه‌هێڵرێت ده‌بێت ده‌ره‌وه‌ى ئاینییش خۆى بكاته‌وه‌، ئاینه‌كانیش بایی ئه‌وه‌ سه‌رمایه‌ى مه‌عنه‌وییان هه‌یه‌ كه‌ بكرێنه‌وه‌، لێبورده‌یی، پێكه‌وه‌ژیان، تواناى كرانه‌وه‌ له‌ ئاینه‌كاندا هه‌یه‌، كێشكه‌ ئه‌وه‌یه‌ كه‌ ئێستا سیستمێكى جیهانى بینراو و نه‌بینراو هه‌یه‌و ئه‌و نایه‌وێت خۆى بكاته‌وه‌، ئه‌و ده‌یه‌وێت به‌رژه‌وه‌ندییه‌كانى خۆى دابین بكات.


دیپلۆماتیك مەگەزین: له‌سه‌ر ئه‌و بنه‌مایه‌ى كه‌ له‌ ئه‌وروپا چاكسازى سیاسى له‌ چاكسازى ئاینییه‌وه‌ خه‌مڵى، چۆن ده‌توانرێت ئه‌م پرسه‌ له‌ كوردستاندا ته‌وزیف بكرێت، یاخود له‌چاكسازى ئاینییه‌وه‌ چۆن ده‌توانرێت چاكسازى سیاسى‌و ئابورى‌و ئیدارى به‌رهه‌م بهێنرێت، یان چكسازى ئایینى له‌و پێناوه‌دا ده‌توانێت چ ڕۆڵێك بگێڕێت؟
ته‌حسین حه‌مه‌ غه‌ریب: به‌ ته‌ماشاكردنى مێژووى چاكسازى سه‌رده‌مى نوێ، چ له‌ ڕۆژئاواو چ له‌ ڕۆژهه‌ڵات، به‌سه‌یركردنى مێژووه‌ جیهانییه‌كه‌، ده‌گه‌ینه‌ ئه‌و بڕوایه‌ى كه‌ چاكسازى به‌ بێ ئایین ناكرێت.
له‌ هیچ نه‌ته‌وه‌یه‌كدا، له‌ هیچ شارستانیه‌تێكدا، كێ زۆرى له‌سه‌ر مێژوو نوسیووه‌، بۆ نمونه‌ ( توینبى)، كتێبێكى هه‌یه‌ به‌ناوى ( خوێندنه‌وه‌ى مێژوو)، 63 هه‌زار لاپه‌ڕه‌یه‌، هه‌موو ئه‌وانه‌ى له‌سه‌ر مێژوویان نووسیوه‌و سه‌یرى ژیانى مرۆڤایه‌تییان كردووه‌و مرۆڤ ناسییان كردووه‌، هه‌موویان له‌سه‌ر ئه‌وه‌ كۆكن كه‌ چاكسازى ده‌بێت له‌ ئاینه‌وه‌ ده‌ستپێبكات، ئه‌وه‌ى بیه‌وێت به‌ بێ حسابكردن بۆ ئایین چاكسازى بكات، به‌دڵنیاییه‌وه‌ سه‌رى به‌ر واقیع ده‌كه‌وێت‌و له‌به‌رى ناڕوات، له‌به‌ر ئه‌وه‌ ده‌بێت چاكسازى ئایین پێشه‌كى هه‌موو چاكسازییه‌كان بێت.
بێگومان ئه‌مه‌ دژایه‌تیكردنى ئایین نییه‌، به‌داخه‌وه‌ لاى ئێمه‌ وا كه‌وتۆته‌وه‌و وا ده‌زانن چاكسازى له‌ ئایندا یانى دژایه‌تیكردنى ئاین، بابه‌ته‌كه‌ به‌وجۆره‌ نییه‌، چونكه‌ پێكهاته‌ى هه‌موو شارستانییه‌ته‌كانى گۆى زه‌وى ئایینه‌، به‌درێژایی چه‌ندین سه‌ده‌ ئاینه‌كان فه‌لسه‌فه‌ بوون، حیكه‌مه‌ت‌و پزیشكى بوون، فیزیاو كیمیا بوون، به‌ بێ حسابكردن بۆ ئه‌مه‌ كه‌ ڕۆحى هه‌موو مرۆڤایه‌تیی له‌ناو خۆیدا كۆكردووه‌ته‌وه‌و ئێستاش باوه‌ڕى مرۆڤه‌كانه‌و ژیانى ڕۆحى مرۆڤه‌كانه‌، به‌بێ چاكسازیكردن له‌م بابه‌ته‌داو قه‌ناعه‌ت پێكردنى ئایینداره‌كان به‌ چاكسازى، ناكرێت باس له‌ چاكسازى بكرێت‌و ناتوانرێت ده‌ستكارى كۆمه‌ڵگه‌ بكرێت.
ده‌مه‌وێت ئه‌وه‌ بڵێم كه‌ به‌بێ چاكسازى له‌ناو دیندا، چاكسازى ناكرێت، ڕۆژ له‌دواى ڕۆژ حه‌كیمه‌كانى مرۆڤایه‌تى، ته‌نانه‌ت ئه‌وانه‌ش كه‌ له‌ ئاستى تاكه‌ كه‌سیدا ئایندار نین به‌م باوه‌ڕه‌ گه‌شتوون.

،،

"باوه‌ڕم به‌ چاكسازى سیاسه‌ت سه‌نته‌رى نییه‌، واته‌ له‌سه‌ره‌وه‌ گۆڕانكارى به‌سه‌ر كۆمه‌ڵگه‌دا بێنى، سیاسه‌ت هه‌میشه‌ گۆڕانكارى خێرا ده‌كات، گۆڕانكارى خێراش واته‌ شۆڕش، له‌ مێژووى مرۆڤایه‌تیدا هیچ شۆڕشگێڕێك نه‌چووه‌ته‌ سه‌ر ده‌سه‌ڵات له‌وه‌ى پێش خۆى باشتر بووبێت".


دیپلۆماتیك: له‌ناو كۆمه‌ڵگه‌ى كوردیدا كه‌ ئیسلام ڕۆڵێكى گه‌وره‌ ده‌گێڕێت، ده‌توانرێت جه‌خت له‌سه‌ر ئه‌وه‌ بكرێته‌وه‌ كه‌ ئایین ده‌توانێت ڕۆڵى گه‌وره‌ له‌به‌رهه‌مهێنانى چاكسازیدا بگێڕێت؟
ته‌حسین حه‌مه‌ غه‌ریب: من بۆ خۆم له‌ بابه‌تى چاكسازیدا، باوه‌ڕم به‌ پرۆژه‌یه‌كه‌ كه‌ پێده‌گوترێت ( كلتور سه‌نته‌رى)، باوه‌ڕم به‌ چاكسازى سیاسه‌ت سه‌نته‌رى نییه‌، واته‌ له‌سه‌ره‌وه‌ گۆڕانكارى به‌سه‌ر كۆمه‌ڵگه‌دا بێنى، سیاسه‌ت هه‌میشه‌ گۆڕانكارى خێرا ده‌كات، گۆڕانكارى خێراش واته‌ شۆڕش، له‌ مێژووى مرۆڤایه‌تیدا هیچ شۆڕشگێڕێك نه‌چووه‌ته‌ سه‌ر ده‌سه‌ڵات له‌وه‌ى پێش خۆى باشتر بووبێت، له‌به‌ر ئه‌وه‌ پێوویستمان به‌ گۆڕانكارییه‌كى ئاشتیانه‌ى دیموكراسییانه‌ى هه‌نگاو به‌هه‌نگاو هه‌یه‌، واته‌ گۆڕانكارییه‌ك له‌ناوه‌ى مرۆڤه‌كانه‌وه‌ بكرێت‌و بێته‌ ده‌ره‌وه‌.
مرۆڤى سیاسه‌ت سه‌نته‌ر ئه‌و مرۆڤه‌یه‌ كه‌ ( ئه‌كشن)ى هه‌یه‌، واته‌ ته‌نها كارى هه‌یه‌و ناڕوانێت، بیركردنه‌وه‌ى نییه‌و له‌ ڕووى ڕۆحییه‌وه‌ مامه‌ڵه‌ ناكات، به‌ڵام مرۆڤى فه‌رهه‌نگ سه‌نته‌رى ئه‌و كه‌سه‌یه‌ كه‌ ته‌نها كار ناكات، به‌ڵكو سه‌یریش ده‌كات، ده‌شڕوانێت‌و تێڕامانى هه‌یه‌، هه‌تا كۆمه‌ڵگه‌ له‌ سیاسه‌ت سه‌نته‌رییه‌وه‌ نه‌گوازێته‌وه‌ بۆ فه‌رهه‌نگ سه‌نته‌رى، نه‌ گه‌شه‌سه‌ندن به‌رده‌وام ده‌بێت‌و نه‌ گۆڕانكارى به‌دی دێت، ته‌نانه‌ت بارودۆخه‌ سیاسییه‌كه‌ش جێگیر نابێت‌و ناشتوانین بگوازینه‌وه‌ بۆ دیموكراسى، بێگومان ئه‌مه‌ش به‌ بێ ئایین ناكرێت.

dfc
کۆری تەحسین حەمە غەریب دەربارەی ئاین و پێکەوەژیان ـ ناحیەی زەرایەن ـ ٢٠١٧.٥.٢٦


دیپلۆماتیك: ئه‌وه‌ى ئاماژه‌ى پێده‌ده‌یت، ده‌توانین ناوى بنێین كه‌سێتى تاك‌و كاركردن له‌سه‌ر ئه‌خلاقى تاك له‌ كۆمه‌ڵگه‌دا؟
ته‌حسین حه‌مه‌ غه‌ریب: به‌دڵنیاییه‌وه‌، به‌ڵام به‌ دیوه‌ نه‌ریتییه‌كه‌ى نا كه‌ له‌وه‌و پێش قسه‌ى له‌سه‌ر كراوه‌و به‌و مانایه‌ لێكدراوه‌ته‌وه‌ كه‌ ئیتر تۆ بڕۆ گۆشه‌گیربه‌و خه‌ریكى كلتورو هونه‌رو ئه‌و بابه‌تانه‌به‌و واز له‌ سیاسه‌ت بێنه‌.
له‌م بابه‌ته‌دا ده‌بێت كۆمه‌ڵگه‌ سه‌نته‌ر بێت نه‌ك سیاسه‌ت، ئه‌م پرۆژه‌یه‌ ده‌ڵێت خه‌ریكى كۆمه‌ڵگه‌ به‌ به‌ هه‌موو كایه‌كانییه‌وه‌، به‌شێك له‌كایه‌كانیش سیاسه‌ته‌، نه‌ك ته‌نها خه‌ریكى سیاسه‌ت بیت، ده‌بێت حساب بۆ كۆمه‌ڵگه‌ بكرێت به‌ هه‌موو ڕه‌هه‌نده‌كانییه‌وه‌، نه‌ك ته‌نها وا بزانیت كه‌ سیاسه‌تت گۆڕى ئیتر كۆمه‌ڵگه‌ش گۆڕاوه‌، ئه‌و دۆخه‌ى كه‌ له‌كوردستان دروستبووه‌ ده‌رئه‌نجامى ئه‌و كاره‌یه‌ كه‌ له‌پاش ڕاپه‌ڕینه‌وه‌ هه‌موو بابه‌ته‌كانیان له‌ سیاسه‌تدا چڕ كردووه‌ته‌وه‌.


دیپلۆماتیك مەگەزین: ئێوه‌ پێتانوایه‌ ئه‌و فه‌رهه‌نگه‌ سیاسى‌و ئیدارییه‌ى له‌ هه‌رجێگه‌یه‌ هه‌یه‌ به‌رهه‌مى ئه‌و كۆمه‌ڵگه‌یه‌یه‌، یاخود به‌ چێچه‌وانه‌وه‌ كلتورو كۆمه‌ڵگه‌ به‌رهه‌مى سیستى سیاسییه‌؟
ته‌حسین حه‌مه‌ غه‌ریب: له‌ بنه‌ڕه‌تدا سیستمى سیاسى بوونى نییه‌، كلتور بوونى نییه‌، ئه‌وه‌ هه‌ڵه‌یه‌كى لۆژیكییه‌، سیاسییه‌كانى ئه‌م هه‌رێمه‌ به‌كارى دێنن بۆ چه‌وساندنه‌وه‌ى تاكه‌كانى كۆمه‌ڵگه‌، ده‌وڵه‌تى كوردى به‌بێ تاكه‌كانى كۆمه‌ڵگه‌ بۆخۆى ماهیه‌تێكى نییه‌، ده‌وڵه‌تى كوردى شتێك نییه‌ تۆ تاكى كوردى له‌ پێناودا بده‌یت به‌ كوشت، ده‌وڵه‌ت تاكه‌كانى كۆمه‌ڵگه‌یه‌، به‌ (مۆسۆلۆن) ییان وت، خه‌ڵكى ئیتالیا هه‌موو هه‌ژار كه‌وت‌و هه‌مووى له‌ برسا مرد، وتى خۆ من خه‌ڵكى ئیتالیا نیم، سه‌رۆكى ئیتالیام، وه‌ك بڵێیت ئیتالیا جیاوازبێت له‌ خه‌ڵكه‌كه‌ى، سیاسییه‌كان به‌رده‌وام ئه‌م هه‌ڵه‌ لۆژیكییه‌ به‌كار دێنن، وه‌ك ئه‌وه‌ى كه‌ سیستم شتێكى جیاواز بێت له‌تاكه‌كانى كۆمه‌ڵگه‌، وه‌همێك دروستده‌كه‌ن بۆ ئه‌وه‌ى شه‌رعییه‌ت به‌ هه‌ندێك شتى خۆیان بده‌ن، ماهیه‌تدان به‌كلتور هه‌ڵه‌یه‌، كلتور ماهیه‌تى نییه‌، هه‌ر ئه‌وه‌یه‌ كه‌ لاى تاكه‌كان هه‌یه‌.

،،

"ده‌وڵه‌تى كوردى شتێك نییه‌ تۆ تاكى كوردى له‌ پێناودا بده‌یت به‌ كوشت، ده‌وڵه‌ت تاكه‌كانى كۆمه‌ڵگه‌یه‌، به‌ (مۆسۆلۆن) ییان وت، خه‌ڵكى ئیتالیا هه‌موو هه‌ژار كه‌وت‌و هه‌مووى له‌ برسا مرد، وتى خۆ من خه‌ڵكى ئیتالیا نیم، سه‌رۆكى ئیتالیام، وه‌ك بڵێیت ئیتالیا جیاوازبێت له‌ خه‌ڵكه‌كه‌ى، سیاسییه‌كان به‌رده‌وام ئه‌م هه‌ڵه‌ لۆژیكییه‌ به‌كار دێنن".

 


له‌سه‌رده‌مى ( كانت)ه‌وه‌، ده‌رونناسى پێن به‌شه‌ ( باوه‌ڕه‌كانى مرۆڤ، هه‌ست‌و سۆزه‌كان، ویست‌و ئیراده‌، وتنه‌كان‌و كرداره‌كان)، كلتور بریتییه‌ له‌ گۆڕانكارى له‌ سیانه‌كه‌ى سه‌ره‌تا، له‌ باوه‌ڕو هه‌ست‌و سۆزو له‌ ئیراده‌دا، دوانه‌كه‌ى تریشیان وتن‌و كرداره‌كان ده‌گه‌ڕێنه‌وه‌ بۆ باوه‌ڕه‌كان.
ئه‌گه‌ر باوه‌ڕه‌كان گۆڕانكارییان به‌سه‌ردا هات، ئیدى ڕوانینیش بۆ ژیان ده‌گۆڕێت، جۆرێكیتر مامه‌ڵه‌ له‌گه‌ڵ بابه‌ته‌كاندا ده‌كرێت، ئه‌مه‌ش شتێكى تاكه‌ كه‌سى نییه‌ تا له‌ڕووى ده‌رونییه‌وه‌ كارى له‌سه‌ر بكه‌ین، كلتور كۆمه‌ڵگه‌یه‌، به‌ڵام ئه‌و كۆمه‌ڵگه‌یه‌ جگه‌ له‌ تاكه‌كانى ناو كۆمه‌ڵگه‌كه‌ شتێكیتر نییه‌.
یه‌كێك له‌فه‌یله‌سوفه‌كان ده‌ڵێت ئه‌گه‌ر به‌ نیازن گۆڕانكارى بكه‌ن، پشت به‌ كێ ده‌به‌ستن بیبه‌ستن، به‌ڵام پشت به‌ سیاسییه‌كان مه‌به‌ستن، چونكه‌ سیاسییه‌كان هه‌میشه‌ وه‌هم دروستده‌كه‌ن، بۆیه‌ ئه‌گه‌ر به‌ ته‌نها ته‌ركیز له‌سه‌ر سیاسه‌ت بێت بۆ دروستكردنى گۆڕانكارى، به‌ دڵنییاییه‌وه‌ هیچ ئه‌نجامێكى نابێت.

بەشی یەکەمی چاوپێکەوتنەکە , (http://www.diplomaticmagazine.net/interview/546)

 

author photo

ڕۆژنامەنوسی سیاسی و دیكۆمێنتەری سیاسی و مێژویی