ئەوەی دەیەوێت هاوکێشەی دەسەڵات بگۆڕێت، دەبێت کار لەسەر یەکێتی و پارتی بکات

کورسی و هەرێم

ئەوەی دەیەوێت هاوکێشەی دەسەڵات بگۆڕێت، دەبێت کار لەسەر یەکێتی و پارتی بکات

616 خوێندراوەتەوە

ئازاد قەزاز

کورسی و هەرێمهەرێمی کوردستان بە کورسی و دەنگدان بەڕێوە ناچێت، بەڵکو بە دوو دەسەڵات کە دوو زۆنیان خوڵقاندووە. جا بۆیە کورسی ئەمیان کەم ئەکا، یان کورسی ئەویتریان زیاد ئەکات، هیچ لەو هاوکێشەی دەسەڵاتە ناگۆڕێت کە هەرێمی پەرێشان کردووە. بزە کردن بە زیاد بوونی چەن کورسییەك، تەنها دڵخۆشبوونێکی مناڵانەیە وهیچ لەو واقعە دزێوە ناگۆڕێت.


ئازاد قەزاز

 ئەوەی ئەیەوێ هاوکێشەی دەسەڵات بگۆرێت، دەبێ کار لەسەر پارتی و یەکێتی بکات، ئەو دووانەیەی کە بەردەوام لە ئێرەیی بردنن بە یەکتر بێوێنەن، لە سووککردنی یەکتر پسپۆڕن و لە پاشقول گرتن لەیەکدی خەبیرن.

 

،،

زۆر هەنگاویتر ماوە بنرێن، تا بتوانرێ بە دەنگ و کورسی گۆڕانکاری بکرێت. تا پارتی و یەکێتی ئاوا دەسکراوە بن، هەرێمیش هەر ئەوان ئەتوانن بیخۆن و هەرئەوانیش ئەتوانن بەو ئاقارەدا بیبەن کە خۆیان دەیانەوی.

  

٢٥ کورسیەکەی گۆڕان، هیچی نەگۆڕی، پێنج و حەوت و دوانزە و هەشتەکەش هیچ ناگۆڕێ، ئەزانن بۆ؟ چونکە زۆر هەنگاویتر ماوە بنرێن، تا بتوانرێ بە دەنگ و کورسی گۆڕانکاری بکرێت. تا پارتی و یەکێتی ئاوا دەسکراوە بن، هەرێمیش هەر ئەوان ئەتوانن بیخۆن و هەرئەوانیش ئەتوانن بەو ئاقارەدا بیبەن کە خۆیان دەیانەوی. ئەگەر چاوسوورکردنەوەی نیودەوڵەتی نەبوایە، ئێستا زۆر شتی خراپتر لە جاران ڕوویدابوو.

 
بۆێە دەلێم ئەم دوو برا پڕ لە ئێرەیی و ئەم دووانە سەرکێش و بێباکە، لە یەکدی جیاکەنەوە با هەریەکەیان حوکمی زۆنی خۆی بکات. چاوەڕێ بن تا سەردەمێ بێ ئەقڵی سیاسی قۆناخی هەرزەیی ببڕێت، تا بتوانن پێکەوە بژین.

،،

زۆنی سەوز بکەنە هەرێمێ و زۆنی زەردیش هەرێمێك و کەرکویش بکەنە هەرێمی سێیەم، تا کەس موزایەدە بەسەر ئەویتریانەوە نەکات.

 

 

لەبەرئەوە وا بە باشی دەزانم گۆڕان و نەوەی نوێ و یەکێتی لە زۆنی سەوز بەرەیەك پێکبهێنن و ببنە مونافسی ڕاستەقینەی پارتی، چونکە یەکێتی هێزو دەسەڵاتی هەیە و هەر ئەو ئەتوانێ مونافسی ڕاستەقینەی پارتی بێت، ئەویش بە یاریدەی حزبەکانی زۆنی سەوز. ئەمەشم بۆ دژایەتی پارتی نییە، بەقەد ئەوەنەی پارتی بکەوێتە مونافەسەی ڕاستەقینە لە گۆڕەپانی گەمەی سیاسیدا، چونکە لەم چەشنە گەمەکردنەدا، گۆڕانکاری و پێشکەوتن بەدیدەهێنرێت.

زۆنی سەوز بکەنە هەرێمێ و زۆنی زەردیش هەرێمێك و کەرکویش بکەنە هەرێمی سێیەم، تا کەس موزایەدە بەسەر ئەویتریانەوە نەکات.

 
کەس باسی یەکڕیزی درۆیینەم بۆ نەکات، هەرگیز یەکڕیز نەبووین و ناشزانم کەی یەکڕیز ئەبین. کەس باسی کوفری نەتەوەییم بۆ نەکات، چونکە کوفری نەتەوەیی ئەوەیە کە نزیکەی سەدەیەکە کورد پێیەوە گیرۆدە بووە. ئەوکات لە بری مونافەسە و ڕاکەڕاکەی وەرگرتنی زۆرترین بەشی کێکێ پۆست و دەسەڵات، هەر لایە و کێكی خۆی دروست ئەکات.

 

،،

 ئەم دوو برایە کە شەڕیان ئەبێت کوردستان ئەشێوێنن، کە ئاشتیش ئەبنەوە هەر بۆ خۆیان ئاشت ئەبنەوە

ئەیهاوار، ئەم دوو برایە کە شەڕیان ئەبێت کوردستان ئەشێوێنن، کە ئاشتیش ئەبنەوە هەر بۆ خۆیان ئاشت ئەبنەوە.

 
ئەم بەیەکتر جاشکردنەی یەکتری، دزێوترین و ناقۆڵاترین ڕەفتارە ئەم دوو حیزبە بەرامبەر یەکتر و لایەن و خەڵکانیتریش بەکاریدێنن. بەڕاستی لای من نە شەست و شەش، نە سی و یەکی ئاب و نە شازدەی ئۆکتۆبەرو نە ئەوانەیتری لەو چەشنە کە بەڕیوەن ڕووبەن، هیچ مانایەکی ڕاستەقینەیان نییە.

لای من ئەوە تەنها ململانێی نێوان خۆیان و نەبوونی ستراتیژی ڕاستەقینە و بەرچاولێڵی خۆیان و بەرژەوەندی و هەلپەرستی خۆیانە، هاوکیشەیەکی وای خوڵقاندووە، بەردەوام دمێ ئەمیان و دەمێ ئەویتریان ئەکات بە جاش.

 

ببوورن؛ من خۆم بەهیچ جۆرێ خوازیاری ئەوە نیم وشەی جاش بەکاربهێنم. چونکە بە کافرکردن لە دیدی ئایینییەوە و بە جاشکردن لە دیدی کوردایەتییەوە لای من، لەیەك سەرچاوەی نەستییەوە هەڵقولاون؛ ئەویش ئەو دیدگەیەی کە دەڵێ مادەم لە من نیت، وەك من نیت، وەك من بیرناکەیەتەوە و لە پێناو بەرژەوەندی مندا ناکۆشیت، یانی تۆ پیسیت، یانی تۆ دۆزەخیت، یانی تۆ خوێنت حەڵالە.

،،

ئەگەر دووان بە خۆشی پێکەوە نەتوانن هەڵکەن، باشترە لە یەکتری جیایان بکەنەوە

 ئاستێکی زۆر تەسك و مناڵانەیە لە بیرکردنەوە، کە هەرگیز لەگەڵ سەردەمی مۆدێرنە نایێتەوە. بۆیە وای دەبینم؛ سێ هەرێم ڕەنگە ڕێگەیەك بێت ئەم دوو برایە دەستیان لە ئێخەی یەکتر بێتەوە و هەرێم لە ئاژاوەگێڕی و شەڕ بەیەکتر فرۆشتن، دوور کەوێتەوە.

  ئەگەر دووان بە خۆشی پێکەوە نەتوانن هەڵکەن، باشترە لە یەکتری جیایان بکەنەوە. زووتر گوتم: هەندێجار پەرتبوون باشترە لە یەکبوون.
دەزان ئەم بابەتە درێژەی زیاتر دەخوازێت و ڕوونکردنەوەی زیاتری دەوێ، بەڵام لێرەدا هەر هێندە دەوترێ.

 

author photo

تایبه‌ت به‌ دیپلۆماتیك