دوانەی (رەخنەو گۆڕان)؛ پێشکەشە بەوانەی کاک نەوشیروانیان هەر نەناسی

دوانەی (رەخنەو گۆڕان)؛ پێشکەشە بەوانەی کاک نەوشیروانیان هەر نەناسی

438 خوێندراوەتەوە

كاوە محەمەد

جارێ قسەم لەسەر رێککەوتنەکەی گۆڕان و پارتی نییەو حەواڵەی رۆژگاری دەکەم، بەڵام ئەو هەمو بەشانوباڵ هەڵدان و شانامەیەی میدیای گۆڕان بەسەر رێککەوتنەکەدا دەیهۆنێتەوە (لەکاتێکدا پارتی و میدیاکەی مێش میوانی نییە)، لەڕوی سایکۆلۆژیای راگەیاندنەوە دەتوانین بڵێین دەرخەری ئەوەیە گۆڕان خۆی بەدگومانە لەڕێککەوتنەکە.

هەم گومان لەوەی بڕیارەکەی لەگەڵ پرەنسیپ و ئامانجە سیاسییە دورمەوداکانی تەبابێت و هەم گومان لەوەیش پارتی راستگۆیانە هاتۆتەپێش و دەیەوێت رێککەوتنەکە جێبەجێی بکات. سەیرەکەیش لەوەدایە کە زۆربەی ئەوانەی مەدح و سەنایەکی زۆری رێککەوتنەکە دەکەن و تیۆریزەی دەکەن، ئەو فیگەرانەن کە پێشتر لەهەموان دژە پارتی-تر بون و هەمیشە کە قسەیان لەسەر دۆخی هەرێم دەکرد، بەقەد سەری دەرزیش مەجالی نزیکبونەوە لەپارتی-یان نەدەهێشتەوە، ئێستاش تەواو پێچەوانە، دنیایەکی هاوبەشی گوڵگوڵینی وایان لەنێوان گۆڕان و پارتی نەخشاندوە، کە قەد پێشبینی نەکرێت ئەو دنیایە تۆزی لێ بنیشێت. واتە نە لەشەڕدا بواری ئاشتی دەهێڵنەوە و نە لەئاشتیشدا، بواری شەڕ دەهێڵنەوە، هەر بۆیەش ئێستا لەتۆڕە کۆمەڵایەتیەکاندا هەر بە بەراوردکردنی قسە و لێدوانەکانی پێشو و ئێستایان، جیاوازیی جەوهەری و مەبدەئی لەهەڵوێستەکانیان دەردەخەن.

،،

 رەوانشاد نەشیروان مستەفا لەهەمو کەس زیاتر قەدری ئەو رۆشنبیرانەی دەزانی و بە کەسانی هەرە نزیکی خۆی و گۆڕانی دادەنان و بە را و رەخنەکانیان خۆشحاڵ دەبو.

 

 

ئینجا ئەوەی لەو هەڵمەتە ئیعلامیەدا مەترسیدارە، ئەو نەفەسەیە کە بەشێک لەو هاوڕێیانە رێک وەک پارتی و یەکێتی قسەی پێ دەکەن و هەرچی نوسەر و رۆشنبیر و رۆژنامەنوس و کەناڵی میدیایی هەیە لێیان بۆتە دوژمنی گۆڕان و پێیانوایە ئەوانەی رەخنە لەرێککەوتنەکە دەگرن، دەستی خەڵکانی دیکە لەپشتیانەوەیە و پیلان لەگۆڕان دەگێڕن و بونەتە پیاوی ئەم لایەن و ئەو لایەن !

لەکاتێکدا بەشێکی دیاری ئەو نوسەر و رۆشنبیرانە نەک هەر لەسەرەتاوە پشتیوان و رێنیشاندەری گۆڕان بون، بەڵکو ئەسڵەن گۆڕان لەسەر زەمینەی فکریی ئەوان دروستبو کە هەر لەسەرەتای نەوەدەکانەوە خاوەنی خوێندنەوەیەکی رەخنەگرانەی کایەی سیاسی و کاری حزبی بون و رۆژ بەرۆژ بە پرۆژەی فکری وەک (رەهەند) و میدیای ئازادی وەک (هاوڵاتی و دواتریش ئاوێنە و هیدیکە) برەویان بە گیانی رەخنەگرانەی ناو کۆمەڵگای کوردستانی دا، هەر بۆیەش رەوانشاد نەشیروان مستەفا لەهەمو کەس زیاتر قەدری ئەو رۆشنبیرانەی دەزانی و بە کەسانی هەرە نزیکی خۆی و گۆڕانی دادەنان و بە را و رەخنەکانیان خۆشحاڵ دەبو.

،،

بەشێکی ئەو رەخنانەی ئەو رۆشنبیر و گۆڕانخوازانە لەگۆڕان و رێککەوتنەکەی دەگرن، لەخەم و پەرۆشییانە بۆ گۆڕان (وەک گەورەترین پرۆژەی رەخنەگرانەی کوردی)

بەڵام بەداخەوە بە ماوەیەکی کەم دوای کۆچی دوایی ئەو، میدیای گۆڕان بە رێنمایی هەندێ ناوەندی بڕیاربەدەستی بزوتنەوەکە، کەوتنە کاردانەوەی ناجۆر بەرامبەر رەخنەی هەندێ لەرۆشنبیر و رۆژنامەنوسانی ئازاد و ئەهلی و دیوارێکیان لەنێوان گۆڕان و ئەواندا هەڵچنی، ئەویش لەبەرئەوەی ئەوانەی لەدوای کۆچی دوایی رەوانشادەوە بڕیاری بزوتنەوەکەیان کەوتە دەست (چ هاوڕێ کۆنەکانی، چ کوڕەکانی و چ ئەو گەنجانەی بە ئێستاشەوە خۆیان بە نەوشیروانی ناوزەد دەکەن) لەکاک نەوشیروان (وەک فکر و دنیابینی) نەگەیشتن کە بۆ چی سیاسەت دەکات و دەیەوێ بە چی بگات..

باشترین و سادەترین بەڵگەش ئەو هەناسەسواریەیە کە ئەو گروپە لەگۆڕانخوازان تێیکەوتون بەرامبەر بەو رەخنانەی لەگۆڕان و بەتایبەت لەرێککەوتنەکەی لەگەڵ پارتی دەگیرێت، لەکاتێکدا کاک نەوشیروان نەک بە رەخنە توڕە نەدەبو، بەڵکو بەردەوام خەریکی دروستکرنی رەخنەگر بو و ئەوەیشی بە وەزیفەی گۆڕان دەزانی، چونکە بەلای ئەوەوە (رەخنە و گۆڕان) دوانەی راستەوانەی یەکتر بون (هەریەکەیان ئەویدیکە بەهێز دەکات و هێزی لێ وەردەگرێت)، ئەوانەی هەمنشینی بون باش دەزانن کە ئەو هێندە بە رەخنە خۆشحاڵ دەبو و گوێی لەکەسانی رەخنەگر دەگرت، هێندە دڵی بە موجامەلە نەدەکرایەوە و گوێی لەکەسانی ماستاوچی نەدەگرت.

بۆیە هیوادارم ئەو هاوڕێ گۆڕانخوازانە، ئەگەر رێککەوتنەکەی گۆڕان و پارتی-یان زۆر پێ باشە، ئاساییە با دور لەزیادەڕۆیی و خۆشخەیاڵی-ەوە باسی( باشییەکان)ی بکەن، بەڵام گوێش لەرەخنە و راکانی دیکە بگرن و نەیانکەن بە شەیتان و موئامەرەچی، ئاخر بەدڵنیاییەوە بەشێکی ئەو رەخنانەی ئەو رۆشنبیر و گۆڕانخوازانە لەگۆڕان و رێککەوتنەکەی دەگرن، لەخەم و پەرۆشییانە بۆ گۆڕان (وەک گەورەترین پرۆژەی رەخنەگرانەی کوردی)، وەکچۆن بەشێکیش لەپیاهەڵدانەکان بە رێککەوتنەکە، لەخەمی شەخسی-ەوە سەرچاوە دەگرن، نەک خەمی گشتی.

 

author photo

تایبه‌ت به‌ دیپلۆماتیك