ئایا ئەمەریكا هێرش دەكاتە سەر ئێران؟

ئایا ئەمەریكا هێرش دەكاتە سەر ئێران؟

562 خوێندراوەتەوە

د. سەنگەر سەید قادر

هێرشەكەی سەر دامەزراوە نەوتییەكانی پارێزگای بەقیقی سعودیە لە خاكی عێراق و ئێران. و لە سنورەكانی ئەهوازی ئێران و بەسرەوە، بە ١٨ فڕۆكەی بێ فڕۆكەوان و ٧ موشەكی بالیستی جۆری قودس، بە فەرمانی خودی عەلی خامنەیی ئەنجامدراوە.

،،

هێرشەكە دەكرێت بە ١١سێبتەمبەرێكی نوێ ناوببرێت

 

 

هێرشەكەی ئەمجارە زۆر جیاواز ترە لە هێرشەكانی ڕابردووی ئێران بۆسەر سعودیەو كەشتییە نەوتییە جیهانییەكان چونكە:

١- هێرشەكانی ڕابردووی ئێران لە دەرەوەی خاكی ئێرانەوە ئەنجامی دەدا و زۆر جاریش بەناڕاستەوخۆ لە ڕێگەی میلیشیا هاوپەیمانەكانیەوە ئەنجامی دەدا، بەڵام هێرشەكەی ئەمجارە لەناوخاكی ئێرانەوە ئەنجامدراوە.

٢-هێرشەكانی ڕابردوو كاریگەریی و مەترسی ڕاستەوخۆی دروست نەكرد بۆسەر ئاسایشی وزەی جیهان، بەڵام هێرشەكانی ئەمجارە بە جۆرێك كاریگەر بوو كە قەیرانێكی سوتەمەنی لە جیهاندا دروست كرد و نرخی سوتەمەنی لە ئەمەریكا بەڕێژەی سەدا ١٢% بەرز كردەوە.

٣- مایك پۆمپیۆ و بەشێك لە سەركردەی وڵاتان ئەم هێرشەیان بە ڕاگەیاندنی شەڕ ناوبردووە، ئەمەش لەڕووە سیاسییەكەوە بەمانای ئەوەدێت كە ئێران سنوری هێڵی سوری بەزاندووە.

٤- ئەم هێرشە ترەمپی بە ئاگا هێنایەوە كە بردنەوەی لە هەڵبژاردندا لە ژێر مەترسی ئێراندایە، چونكە ئەگەر بە ماوەیەكی كەم پێش هەڵبژاردنەكانی ئەمەریكا ئێران هێرشێكی هاوشێوەی هێرشەكەی بەقیق ئەنجام بدات، دۆڕاندنی لە هەڵبژاردنەكەدا ئەگەرێكی زۆر بەهێزە.

٥- هێرشەكە دەكرێت بە ١١سێبتەمبەرێكی نوێ ناوببرێت چونكە بە نێودەوڵەتی كراوەو نەتەوە یەكگرتووەكان و فەرەنسا و بەریتانیا و ڕوسیا و ئەمەریكا و ئەڵمانیا و ٢٧ دەوڵەت بەشداری لە لێكۆڵینەوەكاندا دەكەن.

 

 

 

،،

ترەمپ بڕیاری ئەنجامدانی هیچ هێرشێكی سەربازی بۆسەر ئێران نادات

هەربۆیە هەروەك چۆن هێرشەكەی سەر بەقیق جیاواز بووە لە هێرشەكانی بەهەمان شێوەش كاردانەوەكان جیاواز دەبێت، بۆیە بەڕای من:

١- ترەمپ بڕیاری ئەنجامدانی هیچ هێرشێكی سەربازی بۆسەر ئێران نادات، بەهۆی مەترسی وەڵامدانەوەی ئێران، لەبەر ئەوە لەپشت پەردەو بەنهێنی ڕەنگە هێرشی ئەلیكترۆنی یان هەرهێرشێكی ناسەربازی ئەنجامبدات.

٢- ئاراستە كردنی ئیسرائیل بۆ ئەنجامدانی هێرشی سەبارزی بۆسەر ئێران و دام ودەزگا نەوتی و سەربازیی و ئەتۆمییەكانی و كردنە ئامانجی هاوپەیمانەكانی لە عێراق و سوریا و لوبنان یەكێكیترە لە ئەگەرو بژاردەكان.

٣- لەسەر ئاستی سیاسیش ئێران دەرفەتێكی ئاڵتونی لەكاتێكی گونجاودا بەخشییە ئەمەریكا، چونكە هێرشەكە وایكرد هاوپەیمانێتییەكی نێودەوڵەتی دژی ئێران پێكبهێنرێت و زۆرینەی وڵاتانی جیهان بەشداری تێدابكەن.

٤- هەروەها كۆبونەوەی ساڵانەی نەتەوەیەكگرتووەكان كە هەفتەی داهاتوو لەنیۆرك ئەنجامدەدرێت دەرفەتێكی زێڕینە بۆ ئەمەریكا كەلە ڕێگەی نەتەوە یەكگرتووەكانەوە بڕیار دژی ئێران دەربكرێت، بەوەش باز بەسەر ڤیتۆی چین و ڕوسیا لە ئەنجومەنی ئاسایشدا دەدات.

٥- ئەڵمانیا و بەریتانیا بە ئاشكرا ڕایانگەیاند كە دەبێت وەڵامێكی توندی هاوبەشی جیهانی هەبێت بۆ هێرشەكە.

 

بۆیە لە هەموو ئەگەرەكاندا دەكرێت هێرشە هاوشێوەی هێرشەكەی ١١ سێبتەمبەر، یان داگیركردنی كوەیت لەلایەن سەددامەوە پێناسە بكەین و دەبێتە دەستپێكی قۆناغێكی نوێ و گۆڕانكاری گرنگ، بۆمبەكەی ئێران گەرم تر دەكات، بەجۆرێك ڕەنگە لەهەر سات و چركەیەكدا بتەقێتەوە.

 

author photo

لێكۆڵەر لە ناوەندی ئیمارات بۆ لێكۆڵینەوەی ستراتیژی