یەکێتی و پارتی لەسەردەمی لاهور جەنگی و  مەسرور بارزانیدا

یەکێتی و پارتی لەسەردەمی لاهور جەنگی و مەسرور بارزانیدا

435 خوێندراوەتەوە

شاهۆ عەبدوڵا


گومان لەوەدا نیە پارتى و یەکێتى دەسەڵاتدارى سەرەکى ئەم هەرێمەن و هیچ شتێک بەبی ڕەزامەندى ئەم دوو هێز نەڕوودەدات و نەتێپەڕ دەبێت، بەتایبەت لایەنە ئابورییەکەى ژێر دەسەڵاتى هەردوولا.


ئەگەر هەموو حزبەکانیتر بێبەرى بکرێن لەو نەهامەتییەى بەسەر ئەم هەرێمە هاتوون. ئەوا بۆ پارتى و یەکێتى شتێکى مەحاڵە بێبەرى بکرێن. ئۆباڵى زۆرینەى هەرزۆرى نەهامەتییەکانیش خودى ئەم دوو هێزە لێی بەرپرسیارن.

،،

پارتى و یەکێتى بەندازەیەک تێکەڵ بوون لەبەڕێوەبردنى لایەنى بازرگانى و داراییەکەى هەرێم، زۆر ئاستەمە بەرژەوەندییەکانیان جیابکرێنەوە.

هەندێکجار هاوشێوەى تۆڕێکى جاڵجاڵۆکەن وەها تێکئاڵاون. بەرژەوەندییە ئابورییەکانى هەردوو حزب هێندە گەورەو لەپێشن بەئاسانى ناکۆکییە سیاسییەکان وەلا دەنێنن و دەبنەوە دۆستە ستراتیژییەکەى جاران.

بەبوون بەسەرۆک وەزیرانى مەسرور بازرانى و هاوسەرۆک بوونى لاهورى شێخ جەنگى، هەرێمى کوردستان لەبرى بەرەو مەدەنیکردن، زیاتر لەمەعەسکەرێکى ئەمنى و سەربازى دەچێت. هەریەکەیان بەشێویەکى تر لەحزب و هێز دەڕوانێت. بۆیە دەبینین جیاواز لەڕابردوو، یەکێتى خەریکى بەهێزکردنى پایەکانى حزبە و هەوڵى دانانى کەسانى خاوەن نفوز و نزیک لەبنەماڵەى تاڵەبانى و شێخ جەنگى بەبەرپرسى مەڵبەندەکان، لەهەوڵیش دایە کەسایەتییەکانى ناو حزبەکەى گەورەتر لەپایەکانى پارێزگار و ئیدارە سەربەخۆکان پیشاندەدات. هەروەها لەبرى ستافى حکومەت کەسەکانى ناوحزب زیاتر لەڕاگەیاندن دەردەکەون و هاوکارى دەگەیەننە خەڵکى و سێکتەرەکانى حکومەت، وەک ئەوەى حکومەت چاوەڕێی دەستى حزبە و یەکێتیش گەورەتر لە حکومەت دەردەکەوێت. لێدوانى چەند ڕۆژە و دوێنێ هاوسەرۆکانى یەکێتى لەبارەى ڕێگرى نەکردن لەخۆپیشاندان و ڕاسپاردنى دەزگا ئەمنییەکان بەبەرکارنەهێنانى توندوتیژیی بەرامبەر بەخۆپێشاندان، ئەو پەیامەى لەتەک خۆیدا هێنا حزب و بەرپرسانى حزب گەورەترن لەپایەکانى حکومەت. لەکاتێکدا دەبوایە پارێزگار یان بەرپرسانى ئەمنى شار ئەو کەیسەیان بەدەستەوەبوایە کەنیە.

هەرچی لەبارەى مەسرور بەرزانییەوە لەسەرەتایی دەستبەرکاربوونییەوە، لەهەوڵداییە پێگەى ئەنجومەنى وەزیران و لەناویشیاندا وەزارەتى ناوخۆ بۆ کۆنترۆڵکردنى سەرجەم وەزارەتەکانى دیکەى و بچوکترین بەڕێوەبەرایەتى ئەم هەرێمە بەکاربهێنێت. ئ

،،

ەمەش بۆ جڵەوکردنى حزبییەکانى سەربە حزبەکانى دیکەى ناو حکومەت لەلایەک و کۆنترۆڵکردنى ئەو بەشەى حزبەکەى خۆى لەڕێگەى بڕیارەکانى حکومەتەوە کەوەک چاوى بەرەیەى ئامۆزاکەى سەیریان دەکات.

بەپوختى لەهەردووباردا هەرێمى کوردستان کەوتووەتە نێوان ململانێى دوو کەسایەتى حزبى و ئەمنى، کەهەریەکیان خەریکى قایمکردنى پێگە و شوێنپێىى خۆیانن چ لەناو حزبەکەیان، چ لەناوحکومەت. ڕنگە براوەش هەر خودى خۆیان بن و دۆڕاوەکەش خەڵکى ئەم هەرێمەن لەنێوان ململانێیەکى بیرتەسکى کورت مەودا، کە زۆرباش لەوە دڵنیان بێیەک نایانکرێت و ناتوانن ئیدارەى بەرژەوەندییەکانیان بدەن.