بێن لەسێدارەم بدەن

بێن لەسێدارەم بدەن

536 خوێندراوەتەوە

دانیپێدا دەنێم و من تاوەنبارەكەم، من دەستم هەیە لەشەڕی ناوخۆ و یەكەم فیشەك من تەقاندوومە، لەبەر گرد و بەرزییەكی ڕووتەن چەندین سەری لاوی كوردم پان كردووتەوە، گوندەكانم سوتاندووە و شەڕە پەرۆی ڕەنگەكان من هەڵمگیرساند.

بێن لەسێدارەم بدەن من بەپاساوی مانەوە دەبابەی بەعسم هێنایە هەولێر و لەشەوێكی تارێكدا كارەبای سلێمانی كوژاندەوەو حزبەكانی ڕۆژهەڵاتم خستە ژێر ڕەحمەتی تۆپخانەكانی ئێران و هەركوردێك پەنای بۆ هێنابێت تەسلیمی ئێران و توركیام كردووتەوە.
دانیپێدا دەنێم من لەبەر تۆزێك پارە بیانییەكانی دۆستی كوردم تیرۆر دەكرد. هەر من بووم لە نەوەدەكانەوە نەوت و هەرچی كەرەستەی پرۆژە گەورەكانە ئاودیوی ئێرانم كرد، هەرچی كێبڵەكانی ژێر زەوی هەیە دەرم هێنا و بەنرخێكی ناچیز و بۆ خەزێنەی حزب و گیرفانی چەتەكانی حزب فرۆشتم بەئێران.

،،

بێن لەسێدارەم بدەن، هەر من بووم وتم شەڕی ناوخۆ خەتای ئێمە نەبوو و كادیرانی حزبەكەم سەرەڕۆبوون و ئەو شەڕەیانەكرد، هەر من بووم وتم ئەگەر سۆشیاڵ میدیا بهێلێت ئێمە برای یەكین، منم تاوانی منە ڕۆژنامەنووسان تیرۆر دەكرێن و تیپڤی و ڕادیۆكان دەسوتێنرێ و ئاگریان تێ بەردەدرێت.


بێن ئەوەتا منم لاوە خوێنگەرمەكانی ئەم وڵاتە تیرۆر دەكەم و لەپشتی سیناریۆیەكی قیزەونەوە تەرمەكەی فڕێ‌ دەدەم و دۆزینەوەشی دەكەم بەچالاكی. ئەها ئەوەتا منم، من تاوانبارم و دەستم هەیە لەقاچاخچێتی نەوت و بازرگانی لەتەك داعش. ئەها ئەوەتا منم بێن و لەسێدارەم بدەن.

چیترماوە ئێوە نەیزانن؟ چیتر چاوەڕێی چی دەكەن؟، من دەستم لەهەموو گەندەڵییەكانی وڵات هەیە، من بەیارمەتی سەرانی حزب هەرچی مەواد و كەرەستەی بەسەرچوو هەیە دەیهێنمە وڵات، هەرچی دەرمانی بەسەرچوو هەیە من هێناومە، منم پێش ئەوەی پارەكە بگاتە خەزێنەی وڵات بەسەر سەرانی حزبا دابەشم كرد. دەستی دەرەكیم هێنا و بارەگام بۆكردنەوە، چاوی هەموو ئۆپراسیۆنە سەربازییەكانی بێگانە بووم. لەهەركوێی دنیا سیاسییەكی كورد تیرۆركرابێت دەستی منی تیابووە. من هەموو گەنجەكانم توشی لادانی كۆمەڵایەتی و مادەی هۆشبەر و حەپ و دەرمان كردووە، دەستم لەتەك بێگانەكان تێكەڵ كردوو و لەڕێگەی تیڤییەكانەوە خەریكی هەڵوەشاندنەوەی بنەچەی خێزانی كوردیم وا خەریكە پرۆەی هەلوەشاندنەوەم تەواو دەبێت.

بێن لەسێدارەم بدەن، من پایەكانی حكومەت و دامەزراوەكانی وڵاتم لاوازكرد و بەناوی ئۆپۆزسیۆنەوە كڵاوم نایە سەرخەڵكی و یەك لەشكر موچەخۆر و بەرژەوەندی خوازم ناردە ناوحكومەت. هەر من بووم خەڵك و فەرمانبەرانی وڵاتم برسی كردوو و ئێستاش لەڕێگەی ڕێكخراوە خێرخوازییەكەم و كۆمپانیاكانمەوە سەبەتەی خۆراك بەسەر برسیكراواندا دابەش دەكەم. دەستەكەم كەشفە منم و هەمووی لەژێر سەری مندایە.

،،

چاوەڕێی چین؟ پیلانم هەیە دەست بەسەر تەواوی شوێنە ڕاقییەكان و پاركەكانی شاردا بگرم بەناوی پرۆژەی وەبەرهێنان و هەلی كارەوە، چاوەڕێی چین گردەكانی شار نەماون، بەتامی سیاجكردنی گەڕەكەكانیشم!

بێن لەسێدارەم بدەن، من داواكاری گشتیم كردووە بەڕۆبۆت و هەرچی كەیسی حزبی هەیە پێ یەكلادەكەمەوە، چۆن بمەوێت هەڵیدەسوڕێنم. بین چیتر ماوە؟ هەمووی دەزانن، بێن لەسێدانم بدەنم. ئەها چۆن سەیرم دەكەن و هیچ ورە و تواناییەكتان نەماوە!، ئەوەش من بووم پەرتم كردن و داتانام بەگژی یەكدا، ئەوە منم وام لێكردوون لەخۆپێشاندانەكانتان پێتان بێژن مەڕ و بەدەمەوە پێبكەنن. بێن لەسێدارەم بدەن هەموو جۆرەكانی چەتەیی و تیرۆر و بازرگانی و دزی و فیڵ و خیانەتم كردووە، شكۆی هەموتانم شكاندووە، ئیتر چاوەڕێی چین؟ شتێك نەماوە بەسەرتانەوە تاقیم نەكردبێتەوە، چیتر لێم تێبگەن لەزمانی سەركردەكانی حزبەوە هەموو شتێكم پێ وتن، بێن لەسێدارەم بدەن. من وەڕس بووم ئێوە چۆن وەڕس نەبوون!

 

author photo
دەرچوی بەشی زانستە ڕامیارییەكان
بەڕێوەبەری ناوەندی حەمرین بۆ توێژینەوەی ستراتیژی