کەس بەگوێتان ناکات، چالێنجی چی دەکەن؟

کەس بەگوێتان ناکات، چالێنجی چی دەکەن؟

338 خوێندراوەتەوە

خۆزگە بەرپرسانی ئەم وڵاتە جارێك لە چاوی میللەتەوە سەیری خۆیان بكردایە، تا بزانن لە چاوی میللەتدا چۆنن ، پاشان تێدەگەیشتن بەم ڕوخسارەوە كەڵكی ئەوەیان نیە، داوای هەڵمەت و هاشتاگ بكەن.


ئێمە تەنها لەبەر تەندروستی خۆمان و كەسوكار و خۆشەویستانمان پابەندی خۆپارێزی لە كۆرۆناین،خۆی هەر لە سەرەتاوە بە باشی پابەند بووین، وابزانم لەم كۆتایی كۆرۆنایەدا، پێویستیمان بە كەسانێكی ناپسپۆڕ نیە، ڕێنماییمان بكات و پێمان بڵێت هۆ خەڵكینە هۆشیاربن ،چونكە خەڵكی خۆیان لەوان هۆشیارترن كە داوای هۆشیاری دەكەن ، بەڵام ئەوەی خەڵكی ئێستا نایزانێت و هۆشیاری لەسەری نیە، هۆكارەكانی نەبوونی موچە و ناڕوونی داهات و عەقدی دەیان ساڵە و فرۆشتنی بۆری نەوت و نەمانی ئۆكسجین و سوتانی دەروازەكانە،پێویستیان بە كەسیانێك هەیە بە ڕاستگۆیانە ئەمانەیان بۆ شی بكاتەوە، نەك تازە بە تازە بێیت باسی شتانێك بكەیت، كە خەڵكی لە مێژەوە خویان پێوەی گرتووە.

،،

ڕاستیەكەی كێشەكە لەوەدا نیە كەلەم ناوەختە و درەنگانەدا پێمان بڵێن ماسك ببەستن، بەڵكو كێشەكە لە كاردانەوەی خەڵكیدایە،چونكە كاردانەوەی هاوڵاتیان بۆ بەرپرسێك یان شازادەیەك دەبێت چی بێت، كە هۆكاری نەهامەتیەكانیەتی،بۆیە وەك چاوەڕوان دەكرا، كاردانەوەكان پێچەوانەبوونەوە، ئێستا خەڵكی هاشتاگی موچەیان دەست پێكردووە،كە لەسایەی ئەواندا خەریكە دەبێتە وەرزی.


زۆرجار بەرپرسانی ئەم وڵاتە لە كاتێكی دیاری كراودا، بەمەبەست دێن بابەتێك دەوروژێنن وماوەیەك هاوڵاتیانی پێوەسەرقاڵ دەكەن،ئەم جۆرە مامەڵەیە خەریكە باوی نامێنێت، چونكە لە ئێستادا كە باسی شتێك دەكەن، كاردانەوەكان بەپێچەوانەوە دەبێت، هاوڵاتیان باسی كێشەكانی خۆیان دەكەن و بیریان بۆ بابەتەكەی ئەوان ناچێت، باڕوونتر بیڵێم، بۆ نموونە كە ئێستا باسی بەستنی ماسك دەكەن، موچەخۆر و هاوڵاتیانی ئەم وڵاتە لەبری هاشتاگەكەی ئەوان، هاشتاگی پێدانی موچەیان دەستپێكردووە، واتە كارەكە بەویستی ئەوان ناڕوات، هۆكاری ئەم پەرچەكردارەش هەر ئەوەیە كە لەسەرەتاوە ئاماژەم پێكرد، ئەوان لە چاوی میللەتەوە خۆشەویست نین، تا بەقسەیان بكرێت،بۆیە چاوەڕوان ناكرێت،لەمەودوا جگە لە كۆمەڵێك كەسایەتی حزبی یان وەزیرێك، بە قسەی ئەم بەرپرسانە بكەن.


لە كۆتاییدا پێشنیار دەكەم، كە بەرپرسانی باڵای وڵات، هیچ داوایەك لە هاوڵاتیان نەكەن، چونكە وەك دەبینن كاردانەوەكان پێچەوانەیە،بۆ ئەمجارەش خوا بكات لەوە خراپتر نەشكێتەوە و هاوڵاتیان هەڵمەتی فڕێدانی ماسك دەست پێنەكەن و بە هاشتاگی پێدانی موچە كۆتایی پێبهێن.

 

author photo

نوسەر و رۆژنامەنوس

 بروانامەی بەکالۆریۆس لە زمان و ئەدەبی عەرەبی