پارتی‌و یەكێتی تۆپی پێ بەرەو لەتبوون دەبەنەوە

پارتی‌و یەكێتی تۆپی پێ بەرەو لەتبوون دەبەنەوە

713 خوێندراوەتەوە

بڕیاردان لە چارەنووسی خولی تۆپی پێی یانە پلە نایابەكانی كوردستان بارگرژی لە نێوان ئەندامانی یەكێتی تۆپی پێی كوردستاندا دروست دەكات‌و تۆپی پێ بەرەو دابەشبوون بەسەر هەرێمی زەردو هەرێمی سەوزدا دەباتەوە.

ناكۆكییەكانی ناو یەكێتی تۆپی پێی كوردستان لەسەر بڕیاردان لە چارەنووسی خولی تۆپی پێی یانە پلە نایابەكان كە بەهۆی ڤایرۆسی كۆرۆناوە ڕاگیراوە، دەنگوباسی گەرمی نێو شەقامی وەرزشی كوردستانەو ئەندامانی هەردوو لیستی سەوزو لیستی زەردی ناو یەكێتییەكە دابەشی دوو بەرە بوون‌و لەناكۆكی توند دان.

ڕۆژی 25ی مانگی ڕابردوو، لە كۆبوونەوەی ئەندامانی یەكێتی تۆپی پێی كوردستاندا، بە بەشداری "هادی كەریم"ی جێگری سەرۆكی یەكێتییەكەو چوار ئەندامی یەكێتییەكە كە لەسەر لیستی سەوزن‌و بە بەشداری سێ ئەندامی پارتی لە یەكێتییەكەدا، پێنج ئەندامەكەی لیستی سەوز بڕیار دەدەن كە یانەی " نەورۆز"ی سلێمانی كە " لاهوری شێخ جەنگی" سەرۆكی یانەكەیە بە پاڵەوانی خولی یانە پلە نایابەكانی كوردستان بۆ ساڵی 2019 – 2020 دیاری بكرێت.

سەفین کانەبی و هادی کەریم، سەرۆک و جێگری سەرۆکی یەکێتی تۆپی پێی کوردستان


هەر زوو بڕیارەكەی پێنج ئەندامەكەی لیستی سەوز لەناو یەكێتی تۆپی پێداو كردنی یانەی نەورۆز بە پاڵەوان، ناڕەزایی ئەندامەكانی لیستی زەردی ناو یەكێتییەكەو یانەكانی دەڤەری زەردی لێكەوتەوەو ئەوان بڕیارەكەیان بە نا داپەروەرانەو نا یاسایی ناوزەند كرد.

،،

بە وتەی " سەفین كانەبی" سەرۆكی یەكێتی تۆپی پێی كوردستان كە لەكاتی ئەو كۆبوونەوەیەدا بۆ چارەسەری نەخۆشی لە توركیا بووە، بارگرژییەكە لەسەر دیاریكردنی چارەنووسی خولی یانە پلە نایابەكان لە لێدوانە دژ بە یەكەكانی" هادی كەریم"ی جێگری سەرۆك‌و " سەلام حسەین" سكرتێری یەكێتییەكەوە كە یەكەمیان یەكێتییەو دووەمیان پارتییە، دروستبووەو تەشەنەی سەندووە.


جیاواز لە كایەكانی دی، خوول‌و چالاكییەكانی تۆپی پێ‌و جموجووڵە وەرزشییەكان تا ئاستێكی باش نەخش‌و سیمای دوو ئیدارەیی‌و دەڤەری سەوزو زەردیان كاڵكردبوویەوە، بەڵام میدكاران‌و چاودێرانی وەرزشی‌و شارەزایانی تۆپی پێ، ئاماژە بەوە دەدەن كە ناكۆكییەكانی ناو ئەندامانی یەكێتی تۆپی پێی كوردستان، پێدەچێت بزاوتی وەرزشی‌و بەتایبەت تۆپی پێ بەرەو لەتبوون‌و دوو ئیدارەی‌و دوو هەرێمی ببەنەوە.

یانەی نەورۆز


لەپاش گەڕانەوەی لە توركیا كە بۆ چارەسەری نەخۆشی چووبوویە ئەوێ، بۆ بڕیاردان‌و دیاریكردنی چارەنووسی خولی یانە نایابەكانی كوردستان‌و ڕەواندنەوەی گرژییەكان، سەفین كانەبی، چەندجار بانگەوازی بۆ كۆبوونەوەی ئەندامانی یەكێتی تۆپی پێ كرد، بەڵام هیچكام لە ئەندامانی لیستی سەوز نەچوون بەدەم داواكەیەوەو ئەوان جەختدەكەنەوەو ڕایدەگەیەنن كە سازش لەسەر پاڵەوانبوونی یانەی نەورۆز ناكەن‌و دەشڵێن لە كۆبوونەوەی 25ی تەمموزی یەكێتی تۆپی پێ دا، بەشێوەیەكی یاسایی بڕیار لەسەر ئەوە دراوە كە " نەورۆز" پاڵەوانی خولی یانە پلە نایابەكانی كوردستانەو ئەوە دوا بڕیاری ئەوانەو " هادی كەریم"ی جێگری سەرۆكی یەكیەتییەكەش ڕایگەیاند كە بەشداری هیچ كۆبوونەوەیەكی یەكێتی تۆپی پێ ناكەن.

لە كۆبوونەوەی 25ی تەمووزی یەكێتی تۆپی پێی كوردستاندا، كە پێنج ئەندامەكەی لیستی سەوزو سێ ئەندامی لیستی زەرد بەشدارییان تێدا كرد، لەبەرانبەر نەیاری سێ ئەندامەكەی لیستی زەرددا، پێنج ئەندامەكەی لیستی سەوز بڕیاریاندا كە یانەی نەورۆز وەكو پاڵەوانی خولی یانە نایابەكان بۆ وەرزی 2019- 2020 دیاری بكرێت، لەگەڵ جەختكردنەوەی ئەندامانی لیستی سەوز لە یاساییبوونی بڕیارەكەیان، ئەندامانی لیستی زەردی ناو یەكێتی تۆپی پێ لە زاری " سەلام حسەین"ی سكرتێری یەكێتی تۆپی پێوە ڕایانگەیاند كە ئەو بڕیارە نا یاسایی‌و نا دادپەروەرانەیەو ئەوان ئەم كۆبوونەوەشیان بۆ ئەوە ئەنجام نەداوە كە بڕیاری تێدا بدەن لەسەر چارەنووسی خولی یانە پلە نایابەكانی كوردستان، سكرتێری یەكێتی تۆپی پێ ڕایشیگەیاند كە ئەندامانی لیستی سەوز فشاریان لەسەر بووە كە ئەو بڕیارە بدەن‌و یانەی نەورۆز بكەنە پاڵەوان.


ڕیزبەندی یانە پلە نایابەكانی كوردستان تا ئەو كاتەی كە بەهۆی ڤایرۆسی كۆرۆناوە ڕاگیرا لە هەفتەی حەڤدەیەمدا بوو، بە كۆكردنەوەی 26 خاڵ‌و بە جیاوازی گۆڵكردن یانەی نەورۆز لە پلەی یەكەمی ڕیزبەندییەكدا بوو، هاوكات هەردوو یانەی برایەتی‌و پێشمەرگەی هەولێریش بە كۆكردنەوەی 26 خاڵ لە ڕیزبەندی دووەم‌و سێیەمی ڕیزبەندییەكەدا بوون.

کۆتا ڕیزبەندی خولی یانە پلە نایابەکان


بەپێی بڕیارەكەی پێنج ئەندامەكەی لیستی سەوز لە یەكێتی تۆپی پێ كە یانەی نەورۆزی بە پاڵەوان دەستنیشان كردووە، هیچ یانەیەك لە یانە پلە نایابەكان بۆ پلە یەك دانابەزن‌و یانەكانی كۆتایی ڕیزبەندییەكەش لە ڕیزی پلە نایابەكاندا دەمێننەوە.


ئەندامانی لیستی زەردی ناو یەكێتی تۆپی پێ‌و یانەكانی دەڤەری زەرد، داوا دەكەن كە مادام پاڵەوانی خول دیاریكراوە، دەبێت دوو یانەی ڕیزبەندی كۆتاییش كە هەردوو یانەی "دەربەندیخان‌و شێروانە"ی دەڤەری سەوزن دابەزن بۆ ڕیزی یانە پلە یەكەكان.


پێنج ئەندامەكەی لیستی سەوز لە یەكێتی تۆپی پێی كوردستان، كە لە كۆبوونەوەی 25ی تەمووزی یەكێتییەكەدا بڕیاری پاڵەوانبوونی یانەی نەورۆزیان داوە پێكدێن لە " هادی كەریم – جێگری سەرۆكی یەكێتی تۆپی پێ، عەدنان عەبدولڕەحمان ئەمینداری یەكێتییەكەو كرێكار زرارو تەڵعەت سەعدوڵاو لەتیف ئەمین، ئەندامانی یەكێتی تۆپی پێ.


ئەوان، ئەندامانی لیستی سەوز، لە بەیاننامەیەكدا ڕایانگەیاند كە بە هەموو شێوەیەك لەگەڵ یاسادان‌و بە یاسای یەكێتی تۆپی پێی نێودەوڵەتی‌و عێراق‌و كوردستانیش ڕازین‌و كۆبوونەوەكەی 25ی تەمووزیش زۆر یاسایی بووەو بەپێی ڕێكارە یاساییەكانیش بەڕێوە چووەو هەموو ئەندامان بە ویستی خۆیان بەشداری كۆبوونەوەكەیان كردووە.


ئەو پێنج ئەندامەی لیستی سەوز لە بەیاننامەكەشیاندا دەڵێن:" هەندێك بە هەڵە تێگەشتوون‌و وا دەزانن كە لە كۆبوونەوەكەدا ئێمە چووین‌و وتوومانە خول تەواو و یەكەم‌و دووەم دیاریكراوە، ئەمە ڕاست نییە، بەڵكو پاش چەند كاتژمێرێك لە گفتوگۆكردن گەشتینە ئەوەی ئەم بڕیارە بدەین، هەندێك وا دەزانن بە زۆرو بە مەبەست نەورۆز كراوەتە یەكەم‌و برایەتی كراوە بە دووەم، ڕاستییەكەی ئەوەیە كە بە گوێرەی ڕیزبەندی چەند مانگ پێش ئێستا دانراوەو ئەم دوو یانەیە كراوەنەتە یەكەم‌و دووەم، ئایا ئەگەر هەولێرو دهۆك لە لە پلەی یەكەم‌و دووەمدا بوونایە ئێمە دەمانتوانی دەستكارییان بكەین، بێگومان نەخێر".

،،

ئەندامەكانی لیستی سەوزی ناو یەكێتی تۆپی پێ، لە بەیاننامەكەشیاندا ئاماژە بەوە دەكەن كە بە فشاری دەرەوەی یەكێتی تۆپی پێ، ئەندامانی لیستی زەرد كەوتوونەتە دژایەتیكردنی كۆبوونەوەكەو بڕیارەكانی یەكێتی تۆپی پێ‌و دەشڵێن:" ماوەی چواردە ساڵە ئێمە بەرگەی چەندین هەڵەی زەق‌و بڕیاری چەوتی ئەوانمان گرتووەو تەنانەت لەناو خەڵكیشدا لۆمەو سەرزەنشتكراوین، ئەویش بەخاتری سەروەری پیرۆزی یەكێتی تۆپی پێی كوردستان، بەڵام بەداخەوە ئەو برادەرانە نەیانتوانی بەرگەی یەك بڕیاری ئێمە بگرن".


پاش ئەوەی ئەندامانی لیستی سەوز بڕیاری بەشدارینەكردنی كۆبوونەوەكانی یەكێتی تۆپی پێیاندا، كت‌و مت مانگێك پاش ئەو كۆبوونەوەیەی كە ئەندامانی لیستی سەوز دەڵێن بەپێی ڕێساو یاساكان بڕیاری بە پاڵەوانبوونی یانەی نەورۆزیان تێدا داوە، لە 25ی ئابدا، بە ئامادەبوونی سەرۆكی یەكێتی تۆپی پێ‌و ئەندامانی لیستی زەردی ناو یەكێتییەكەو نوێنەرانی یانەكانی "هەولێر، هەندرێن، ئارارات، زاخۆ، سۆران، زێرەڤانی، دهۆك، سیروانی نوێ، پێشمەرگەی هەولێر" بڕیاری هەڵوەشاندنەوەی خوولی یانە پلە نایابەكانی كوردستان درا، بەبێ ئەوەی یانەی پاڵەوان دیاریبكرێت.

چەند یاریزانێکی یانەی نەورۆز


سەفین كانەبی، كە لەسەر حسابی پارتی سەرۆكی یەكێتییەكەیە، لەگەڵ ئەندامانی لیستی زەردی ناو یەكێتی تۆپی پێ، بۆ شەرعییەتدان‌و بەهێزكردنی بڕیارەكەی خۆیان‌و لاواز نیشاندانی ئەندامانی لیستی سەوزی ناو یەكێتی تۆپی پێ‌و هەڵوەشاندنەوەی بڕیارەكەیان، یانەكانیشیان هێنایە ناو كێشەكەوە، ئەوە لەكاتێكدا پرسەكە تەنها پەیوەستە بە سەرۆك‌و جێگرو ئەندامانی یەكێتی تۆپی پێوە.


لە سەرەتای دروستبوونی كێشەكەوە، سەفین كانەبی چەندینجار ڕایگەیاندووە كە ئەو گوناهی نییە لەوەی ڕوویداوەو لەوەشی كە لەداهاتوودا ڕوودەدات‌و هاوكات جەختیشی لەوە دەكردەوە كە بەهیچ شێوەیەك ناڵێت هەڵەیە كە یانەی نەورۆز كراوەتە پاڵەوانی خولەكە، بەڵام لە 25ی ئابدا سەرۆكایەتی‌و سەرپەرشتی ئەو كۆبوونەوەیەی ئەندامانی لیستی زەردو نوێنەرانی نۆ یانەی پلە نایابی كرد كە بڕیاری هەڵوەشاندنەوەی خولی یانە پلە نایابەكانی تێدا درا، بەبێ ئەوەی یانەی نەورۆز وەكو پاڵەوان دەستنیشان بكرێت.

ئەوەی دەربارەی چارەنووسی خولی یانە پلە نایابەکانی کوردستان لە نێوان ئەندامانی لیستی سەوزو زەردی ناو یەکێتی تۆپی پێی کوردستاندا ڕوویداوە، ئەگەر نەبێتە سەرەتای چیرۆکی لەتبوونی بزاوتی وەرزشی لە هەرێمی کوردستان، ئەوا پێناچێت بەئاسانی بخرێتەوە سەر هێڵ، چونکە یانەی نەورۆز، لاهوری شێخ جەنگی سەرۆکیەتی و ئەستەمە ئەندامانی لیستی سەوزی ناو یەکێتی تۆپی پێ سازش لەسەر ئەوە بکەن کە ئەو یانەیە نەکرێتە پاڵەوان و هاوکات پێیشناچێت ئەندامانی لیستی زەردی ناو یەکێتی تۆپی پێ بە ئاسانی مل بۆ ئەو خواستەی ئەندامانی لیستی سەوز بدەن و ڕازی ببن یانەکەی لاهوری شێح جەنگی وەکو پاڵەوان دیاری بکرێت.

 

 

author photo

ڕۆژنامەنوسی سیاسی و دیكۆمێنتەری سیاسی و مێژویی