یەكێتی بە دروشمێكی تەمومژاوییەوە دەچێتە كەمپینی هەڵبژاردنەوە

ئایا یەكێتی بێ‌ ساحێبە؟

یەكێتی بە دروشمێكی تەمومژاوییەوە دەچێتە كەمپینی هەڵبژاردنەوە

6754 خوێندراوەتەوە

هەفتەی یەكەمی هەڵمەتەكانی هەڵبژاردنەكان لە هەرێمی كوردستان بە گەرموگوڕی بەڕێوەچوو، بەڵام ئەوانەی تا ئێستا یەكێتی و پارتی بەساردی بەشداریی هەڵمەتەكە دەكەن.

لەكاتێكدا بزووتنەوەی گۆڕان لەهەفتەی یەكەمی كەمپینەكەدا گەرموگوڕترین هەڵمەت بەڕێوەدەبات، یەكێتی نیشتیمانی كوردستان هێشتا دەستی پێنەكردووە،تەنها كۆمەڵێك تابلۆی گەورە نەبێت كە لێی نوسراوە"بەدەستهێنانەوەی ئایندە".

وادەردەكەوێت یەكێتی نیشتیمانی خەڵەتێنرابێت لەلایەن ئەو كۆمپانیا بەریتانییەوە كە بۆ راوێژی هەڵمەتی هەڵبژاردن هێناویانەتە كوردستان. چونكە وا دێتە بەرچاو تیمەكە خۆیان ماندوو نەكردووە و زانیارییان لەسەر ململانێكانی یەكێتی و ركابەرەكانی نییە. بەو پێیەی ئەوەش دیارنییە كە یەكێتی حیسابی بۆ كەمپینی ركابەرەكانی كردبێت، بەتایبەتی پارتی.

پارتی دیموكراتی كوردستان لە یەكێك لە ڤیدیۆ ریكلامییەكاندا كە لە تۆڕە كۆمەڵایەتییەكان بڵاوبووەتەوە، هێرشێكی راستەوخۆ دەكاتە سەر یەكێتی. ڤیدیۆكە باس لە یەكگرتویی خێزانێكی كوردە دەكات و دەڵێت "خێزانی یەكڕیز باشترە لە خێزانی پەرتەوازە، هەروەك چۆن حیزبی یەكڕیز باشترە لە حیزبی پەرتەوازە."

لەكاتێكدا، بزوتنەوەی گۆڕان دروشمە سەرەكیەكەی بریتییە لەم رستەیە" بە ئیرادەیەكی پۆڵایینەوە بەردەوام دەبین لە گۆڕانكاری" كەچی كۆمپانیا راوێژكاریە بەریتانیەكە دروشمی "بەدەستهێنانەوەی ئایندە"ی بۆ یەكێتی دیاری كردووە.

دروشمەكە وا دێتە پێش چاو كە ئایندەی كوردستان لە بەغدایە و یەكێتی دەیەوێت بەهۆی ئامادەبونیەوە لەبەغدا ئەم ئایندەیە بگیڕێتەوە.

دروشمەكە جگە لەوەی سەرنج راكێش نییە بۆ دەنگدەر، لەهەمان كاتیشدا كەمتر لەگەڵ حیزبی باڵادەست و حوكمڕان دەگونجێت، بەتایبەتی كەئەو حیزبە لە هەرێم حیزبی حوكمڕانە و لەبەغداش خاوەنی پۆستی سەرۆكی كۆمارە. ئەگەر بەم هەموو دەسەڵاتەوە ئایندەی لەدەست دابێت ئەبێت چۆن بتوانێت بیگێڕێتەوە.

لەڕویەكی دیكەوە كەمپینەكەی یەكێتی لەلایەن ئەو گروپە راوێژكارییەوە لەئاستێكی گشتیدا دانراوە، تەنها رەچاوی ململانێی هەرێم و بەغدای تێدا كراوە، و رەچاوی ململانێ‌ ناوخۆیەكانی هەرێم و كێشە ناوخۆییەكانی تێدا نەكراوە.

ئەوەی كارەساتەكەی زیاتر كردوە ئەوەیە دوای ئەوەی بۆیان دەركەوتووە كە دروشمەكانیان گشتییە و شتێكی ئەوتۆی تیا نییە دەنگدەر بەخۆیەوە گرێ‌بدات. لەهەوڵی ئەوەدان لە هەر ناوچەیەك، ناوی ناوچەكە بۆ دروشمەكە زیاد بكەن.

بەپێی ئەو دۆكیۆمینتانەی لەبەردەستدان یەكێتی لە قەزای كەلار ئەو پۆستەرەی هەڵواسیوە و لێی نوسیوە "بەدەستهێنانەوەی ئایندەی كەلار" . مرۆڤ هەرچەند بیری لێدەكاتەوە نازانێت بەدەستهێنانەوەی ئایندەی كەلار مانای چییە.

یەكێتی وەك چۆن شپرەزیی بە دۆخی سیاسیەوە دەبینرێت بەهەمان شێوە شپرزەیی بە وتارە میدیایەكەشیەوە دیارە و دروشمی كەمپینەكەشی باشترین بەڵگەیە لەسەر ئەو بابەتە.

مرۆڤ كە ئەو دروشمانە دەبینێت ئەو پرسیارە بە مێشكیدا دێت كە ئایا یەكێتی بێ‌ ساحێبە؟ ئایا كەسێكی دڵسۆزی نییە بەزەیی پیدابێتەوە و پێیان بڵێت خەریكی چین؟

جاران یەكێتی بە میدیای بەهێز و كاریگەر دەناسرا، وادیارە یەكێتی ئەو كاریگەریەشی لەدەست دابێت و چیتر نەتوانێت نەك خەڵكانی دی بەڵكو نەتوانێت سەرنجی جەماوەرەكەی خۆشی رابكێشێت.

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری