‎ئاساییبوونەوەی خراپەو ستایشكردنی

‎ئاساییبوونەوەی خراپەو ستایشكردنی

634 خوێندراوەتەوە

‎ئەبوبەکر حەسەن

‎كە حەنا ئارینت لە دانشتنی دادگایی ئایخماندا ئامادەیە، زیاتر لەوەی تاوان و گوناهیكی یاسایی بببینێت دەرحەق بە جولەكە لە ئۆشفیتزدا، زیاتر لەمە مردوێتی و ئاساییبوونەوەی خراپەو شەڕێك دەبینێت لای بكەرێك كە فەرمانبەرێكی دەولەتی بووەو تەنیا جێبەجێكاری فەرمانی دەولەت بووە. بە ئەندازەیەك ساردی و ئاساییبوونەوەیە لە گێڕانەوەكەیدایە كە ئەم جێبەجێكردنە بووە بە ئەركێك، بووە بە فەرمانێك كە جێبەجێكردنی ئەركەو، ئیتر چاكەو خراپەی ئەم جێبەجێكردنەو، تەنانەت ئاساییبوونی لە گێڕانەوەی ئەوەی ئەنجامی داوە، شتێك نەماوەتەوە بە ناوەی خۆوەستاندن و هەڵوەستەكردن لە سەر ئەوەی ئەنجامیداوەو جێبەجێی كردووە.

‎ئەمە هەڵگەڕانەوەی هێڵێكی هەڵهاتنەو هەڵگەڕاوەتەوە سەر مەرگ و مەرگدۆستی. هەڵگەڕانەوەیەك كە ئارەزوو و قوڵپدانەكانی ئارەزووی كەسێك لە ناو ئایدیۆلۆژیادا كە چۆنچۆنی نەك هەر مۆراڵێك/ ئیتیكێك وندەكات، بەڵكو وەك ئەركێك ئەم جێبەجێكردنە دەبینێت و جێبەجێنەكردنی كەمتەرخەمییە لە مۆراڵێك. لێرەدا ئێمە ئارەزوویەك دەبینین كە دەكەوێتە ناو هێڵێكی مەتریسداری مەرگدۆست، وە شەرعییەت و ڕەوایەتیدان و حیكایەتگەلێك ئامادەیە لە هەڵگەڕانەوەی ئەم ئارەزوو و ئارەزووكردنە. وە ئایخمان تەنیا بكەڕێكی كەسیی نییە، بەڵكو هەلومەرجێكی سادەكراوەو ئاساییكراوەی شەڕو خراپەیەو جەماوەرو خەڵك ئارەزووی دەكەن و چیرۆك و ڕەوایەتی و حیكایەت شەرعاندنی بۆ دەهێننەوە لە ئاستی ئۆنتۆلۆژیدا. كەواتە وەك ولیام ڕایش دەڵێت ێارەزوویەكی جەماوەری بۆ فاشیزم هەیە

،،

‎ئاساییبوونەوەو ئاساییكردنەوەی دۆخێكی نەخوازراوی مۆراڵی و سیاسیی و تەنانەت وجودیش دەكرێت و بینراوە كە بووە بە ئاگاییەكی دەستەجەمعی، ئاگایی و خەیاڵدانێكی كۆلێكتیڤی لە سەر ئاشتی جڤاكێك؛ گەلی ئەڵمانیا خۆیان ئارەزووی فاشیزم و ئارەزووی هیتلەریان دەكرد نەك سەپاندنێكی زۆرە ملێی

‎كاتێك لە كوردستانی باشوور هەلومەرجێكی دروستكراو دەبینین و لە گەڵی دەژین، دۆخێكی ترسناكی خەیاڵ و خەیاڵدان و خەیاڵكردن و خەونبینینی دەستەجەمعی و گرووپی. زۆرینەیەكی بێ ئەژماری خەڵك لە ڕەوایەتیدان و شەرعییەتهێنانەوە بۆ (بێ ئەخلاقییەك): ئارەزووی خەڵك بۆ دەستگەیشتن بە سەرمایەگەلێكی ماتریالیی و نا ماتریالی، ستایشی چەتەو دزو مافیا لەوێدا كە ژیانێكی باش دەژین، وە ئاییندەی خۆیان و ماڵومناڵیان زامنكردووەو. ستایشی بە ئەرككردنی ستایلێكی ژیان كە دەبێت وا بین. لێرەوە لەوێ ماسكگەلێك دەبینین كە سەرزەنشتی دزی و چەتەیی و شەوكوتی دەكات، بەڵام دەتوانین بوێری ئەوە بكەین كە ئەم هەڵچوون و ئەم خۆدەربڕینە دژ بە گەندەڵیی مافیاو چەتەكان تەنیا لە (ئیرەیی)ەكەوە دێت كە دەستیان پێی ناگات، وە هاتوهاوارەكەش بۆ جێگۆڕكێیەو دەبێت ئەمیش بەشی هەبێت. سات نییە ئێمە بەر گوتاری سەرزەنشتكردنی كەسانێك نەكەوین كە نازانن بۆ خۆیان بژین و باش بژین، باش ژیان و خۆش ژیانیش دیارە مەبەست لەومپێگەو سەرمایەیانەیە كە بووە بە ئایدیال تایپی مرۆڤ و خێزانێكی سیاسیی لە باشووڕ.