دایكی هەرێم: گیانی كوڕەكەم پێشكەشی هەژاران بێت

دایكی هەرێم: گیانی كوڕەكەم پێشكەشی هەژاران بێت

815 خوێندراوەتەوە

لەپشتی گۆڕەكەی هەرێم عەلی دانیشتووم بەدیار لاواندنەوەی دایكێكی جەرگ سوتاو. دایكێك هاوارو ناڵەی لەدەستدانی كوڕەكەی، دڵ دەكات بەئاو. ئەوە دایكی هەرێم عەلی تەمەن 13 ساڵە كە لەخۆپیشاندانەكەی رۆژی 8ی ئەم مانگەی شارۆچكەی سەیدسادق بەگولەی هێزە ئەمنییەكان شەهید كرا.

هەرێم عەلی، لەدایكبووی ساڵی 2008ی شارۆچكەی سەیدسادقە، لەو كاتەی خۆپیشاندانی هاوڵاتیانی كوردستان دژی پێنەدانی مووچەو خراپی ژیان و گوزەران دەستپێكرد، لەگەڵ هاوتەمەنەكانیدا بەشداری دەكات و دژی نادادی دەوەستێتەوە.

هێمن عەلی، برای هەرێمی شەهید دەڵێت "رۆژی دوو شەممە خۆپیشاندان دەستیپێكرد، ئەو رۆژە ئێمە لەماڵی خۆمان كارمان دەكرد، شەو لەگەڵ باوكم ئامۆژگاریمان كرد كە بەشداری خۆپیشاندان نەكات، ئەوەشمان بیرخستەوە كە دەسەڵاتداران رەحم بەكەس ناكەن و بۆ بەرگری لەخۆیان تەقە دەكەن."

ئەگەرچی هەرێمی جوانەمەرگ هۆشداری پێدرا كە بەشداری خۆپیشاندان نەكات، بەڵام ئەو سوربووە لەسەر بەشداریكردن، لەو بارەوە دایكی وتی "هەمیشە نیگەران بوو بۆ دۆخی خەڵك، لەگەلًَ ئەو تەمەنە كەمەیدا بەڵام دژی ئەم دەسەڵاتە بوو."

رۆژی سێ شەممە كە دەكاتە رۆژی دووەمی خۆپیشاندانەكان، هەرێم لەگەڵ هاوتەمەنەكانیدا بەشداری دەكات، بەلام بەهۆی تەقەی هێزە ئەمنییەكان دەپێكرێت و شەهید دەبێت، هێمن عەلی دەڵێ "ئەو لەبەر دڵی ئێمە بەڵێنیدا بەشداری خۆپیشاندان نەكات، ئێمە دەمانزانی كە تەنها بۆ رازیكردنی دڵی ئێمە بریاریداوە بەشدار نەبێت، بەڵام وەك هەر گەنجێكی تر كە دژی ستەم و ستەمكاری بوو، بەشداری كردو بەداخەوە هەواڵی شەهیدبونیمان پێگەیشت."

لەنێو گۆڕستانەكەدا، چەند هاوڕێیەكی هەرێم بەدەم گریانەوە گوڵ وەفایان لەسەر گۆڕی هاوڕێكەیان دانا، ئەوان نیگەران بون بە لەدەستدانی هاوڕێیەكی خۆشەویستیان، باسی ئەوەیان كرد كە رۆژانە سەردانی گۆڕی هەرێم دەكەن و دڵی خۆیان بە مانەوە لەسەر گۆڕی هاوڕێكەیان ئەدەنەوە.

لاوانەوەی دایكی هەرێم بەردەوامی هەیەو ئەو بەدەم رشتنی فرمێسكەوە، رۆحی خۆی بەقوربانی سێ برا شەهیدەكەی دەكات، كە لەڕێی بەرگری لە خاكی كوردستان گیانیان بەخشیوە. دایكی هەرێم كە خوشكی سێ شەهیدە، دەڵێت "گیانی كوڕەكەم پێشكەشی هەژاران بێت، ئیشەڵا شەهیدبوونی ئەو دەبێتە هۆی بوژانەوەی وڵات و دورستبوونی گۆڕانكاری و رزگاربوونی خەڵك لەنەهامەتی."


لەخۆپیشاندانەكانی ئەمدواییەی هەرێم، 10 هاوڵاتی شەهیدبوون و زیاد لە 100 كەسی تر برینداربوون، بەڵام وەك هەمیشە ئامانج و داواكاری خۆپیشاندانەكان بەدینەهاتن و دەسەڵاتیش هیچ وەڵامێكی بۆ هاوڵاتیان نەبوو، جگەلە بێدەنگ كردنیان نەبێت.

 

author photo

ڕۆژنامەنووس