تاڵەبانی،  سیاسەت لەڕێگەی نوكتەوە

چەكی بەهیز لە دیبلۆماسیەتی تاڵەبانیدا نوكتەو قسەخۆشەكانی بوو

تاڵەبانی، سیاسەت لەڕێگەی نوكتەوە

1256 خوێندراوەتەوە

لە ناو قوتابخانەكانی سیاسەتدا بێدودڵی تاڵەبانی سەر بە قوتابخانەی پراگماتیك بوو.

ئەو تاكە كەس بوو كە دەیتوانی لە دەرگایەكەوە پێشوازی لە ئەمریكاو لەدەرگاكەی تەنیشتیەوە خواحافیزی لە ئێرانیەكان بكات. لەدەرگایەكەوە بەخێرهاتنی سونەكانی دەكردوو لەدەرگایەكی دیكەوە خوا حافیزی میوانە شیعەكانی دەكرد.

تەنانەت جارێكیان باڵیۆزی ئەمریكا (وابزنم رایان كرۆكەری باڵیۆزی ئەوكاتی عێراق كە دواتر بوو بە وەزیری دەرەوە )داوای لە تاڵەبانی كردبوو حەزدەكات قاسمی سلێمانی ببینێت و لەگەڵیدا كۆبێتەوە. تاڵەبانی لە تەوێڵە هەردوكیانی بەیەك گەیاند، چەكی بەهیز لە دیبلۆماسیەتی تاڵەبانیدا نوكتەو قسەخۆشەكانی بوو.

لەو ساڵانەدا كە لە بەغدابوو كاتێك میوانەكان لەسەر بابەتێكی گەورە و هەندێك جار خوێناویش لەسەر مێزەكەی تاڵەبانی دادەنیشتن ئەو لە ڕێگەەی نوكتەو قسەخۆشەكانیەوە بەربەستە دەرونیەكانی تێكدەشكاند و كارێكی وەهای دەكرد لەسەر هەمان مێز نەیارەكان پێكەوە پیبكەنن. هەر بەو جۆرەش كێشەكەی چارەسەر دەكرد.

لە كوردستانیش هەروابوو، كاتێك هێزوو لایەنەكانی دیكە لەگەڵ یەكێتی توشی كێشەو گرفت ببونایە رویان دەكردە مام جەلال و ئەویش هەر بە نوكتەو قسەی خۆش بەڕێی دەكردن و كێشەكانیشی بۆ چارەسەر دەكردن.

وای لێهاتبوو هەندێك جار دۆستەكانی لە باڵێۆز و سەركردە سیاسیە عێراقی و كوردستانی و تەنانەت سەكردەكانی حیزبەكەی خۆشی بێتاقەتی مەجلیسەكانی تاڵەبانی دەبوون و بۆ گوێگرتن لە دوا نوكتەكانی تاڵەبانی سەردانیان دەكرد.

لەوانیە پێكەنین و ڕوخۆشی دیارترین خەسڵەتی جیاوازی نێوان تاڵەبانی و بارزانی بێت. تاڵەبانی وەستای نوكتە و قسەخۆشیی دەموچاوی پڕلەخەندە و ئومێد، بەپێچەوانەی بارزانی هەەمیشە واخۆی دەردەخات كەكەسێكی جدییە و خەمۆكیەكی قوڵ لەنێوچاووانیدا بەدی دەكرێت.

تاڵەبانی كام بارودۆخ سەخت و كام كێشە گەورەبوو لەڕێگەی نوكتەوە سادە و سانای دەكردەوە و بەسەریدا زاڵ دەبوو.

تاڵەبانی كە یەكێك بووە لە بە شیریستەكان و خۆی بە پێڕی بەشیر موشیری ڕەحمەتی زانیوە هەردەبێ‌ بەو جۆرە سەیری دونیای كردبێ‌ كە بۆخۆی نوكتەیەكی گەورەیە.

جارێكیان سكرتاریەتی مام كابرایەكیان گرتبوو هەموو گیانیان شكاندبوو ئەوجا كە مام پێی زانیبوو ووتبوی ئەم كابرایە بۆ گیراوە و بۆ فەلاقەتان كردوە.. وتبویان قوربان جنیوی بەتۆ داوە. وتبوی چی پێ‌ ووتوم . وتبویان لە ڕوماننایە باسی بكەین.


زۆریلێكردبون كە چی پێ وتراوە بیزانیت، دواجار وتبویان ئەم قسە هەڵەیەی كردوە(جنیوەكەیان پێ‌ وتبوو).مام وتبووى ئەوە كەی كێشەیە بۆ واتان لێكردوە ئێوەش جنیوەكەتان پیێ‌ بایەەتەوە. پاشان گازی كردبوو لە كابراو جنێوەكەی پێدابۆوە و وتبوی دەبڕۆ خوا حافیزت بێت.

تاڵەبانی هەر ئەوەنەبوو كە نوكتە بگێڕێتەوە بەڵكوو وەك پشدەری دەڵێن خۆشی وەستای نوكتان بوو.نوكتەی وەهای دروست دەكرد كەس نەیدەزانی لە كوێوە دەیهێنێت. لەمەدا لە سروشتی خەڵكی سلێمانی نزیك بوو. لەوانەیە یەكێكیش بوبێت لە هۆكارەكانی خۆشویستنی لە دڵی سلێمانەیەكاندا.

لەگەڵ ئەوەشدا نوكتەی لەسەر خۆی و برادەرەكانى دروستدەكرد. لەمەدا شتيكى له تەبعى شێخ رەزای شاعير تێدابوو.

تاڵەبانی بەخۆی نوكتەكانیەوە بە دیبلۆماسیەتی نەرم و مەجلیسی سیاسی پڕ لە پێكەنین و گاڵتەوگەپیەوە بەجێی هێشتین.

لەوانەیە بەمزوانە دەموچاوی پڕ لە خەندە و سەركردەی سیاسی قسەخۆش و نوكتەباز نەبینینەوە. شاید بۆ هەتا هەتایه ئەو فیگەرە لە سیاسەتی كوردیدا دوباە نەبێتەوە.

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری