بۆچی بانگەشەی هەڵبژاردن بەساردوسری دەستی پێكرد؟

"یەكێتی و پارتی هۆكاری ئەم ساردوسریەن"

بۆچی بانگەشەی هەڵبژاردن بەساردوسری دەستی پێكرد؟

356 خوێندراوەتەوە

 شەوی رابردوو كاتژمێر 12، بە رەسمی بانگەشەی هەڵبژاردن بۆ پێنجەمین خولی پەرلەمانی كوردستان دەستی پێكردو بەراورد بە هەڵبژاردنەكانی پێشوو، تاكو ئێستا پرۆسەكە ساردوسرییەكی زۆری پێوە دیارە، لایەنە نارازییەكانیش بێ هیوایی دەنگدەروهاوڵاتیان و نیگەرانیان لە دەسەڵات بەهۆكاری سەرەكی دەزانن.

 
هەرچەندە بریار بوو 5ی ئەم مانگە بانگەشەی هەڵبژاردن دەست پێ بكات بەڵام بەهۆی رێك نەكەوتنی سیاسی لایەنەكان لەمەڕ دواخستن و دوانەخستنی هەڵبژاردن بۆ ماوەی شەش رۆژ بانگەشەكە دوا كەوت، ئەم هۆكارەش وایكرد لایەنەكان بە دوو دڵییەكی زۆرەوە بچنە نێو پرۆسەكە هەر بۆیە لەمبارەوە حزبەكان بۆ دیپلۆماتیك مەگەزین دەدوێن و هۆكارەكە ئاشكرا دەكەن.

 

،،

ئەمجارە رێژەیەكی كەمی هاوڵاتیان بەشداری دەنگدان دەكەن، كە زەرەرمەندی یەكەم تیایدا پارتەكانی دەرەوەی دەسەڵاتن.

 

 

گۆران: ئێمەشی گرتۆتەوە


عەبدولرەزاق شەریف، ئەندامی جڤاتی نیشتمانی بزووتنەوەی گۆران، سەبارەت بەم بابەتە دەدوێت و دەڵێت:" ساردو سری بانگەشەی هەڵبژاردن راستەوخۆ پەیوەندی بە نائومێدی هاوڵاتیان و دەنگدەرەوە هەیە، چونكە بێ هیوا بوون لەوەی هەڵبژاردن بتوانێ گۆرانكارییەكی ئەوتۆ بهێنێـتە كایەوە".

 

عەبدولرەزاق شەریف، ئەندامی جڤاتی نیشتیمانی بزووتنەوەی گۆران

 

 
ئەو ئەندامەی بزووتنەوەی گۆران هەرچەندە ئەوەش ناشارێتەوە كە ساردوسری بانگەشەی هەڵبژاردن بزووتنەوەی گۆرانیشی گرتۆتەوە بەڵام دەشڵێت:" دەبێت كاری جدی بكرێت بۆ ئەوەی كاریگەری لەسەر رێژەی دەنگدان و بەشداری هاوڵاتیان دانەنێت." چونكە ئەو پێی وایە ئەمجارە رێژەیەكی كەمی هاوڵاتیان بەشداری دەنگدان دەكەن، كە زەرەرمەندی یەكەم تیایدا پارتەكانی دەرەوەی دەسەڵاتن.

 

،،

ئێمە هەر زوو بەم تاكتیكەی یەكێتی و پارتیمان زانی و نەمانهێشت ئەندام و لایەنگرانمان سار ببنەوە لە هەڵبژاردن بۆیە بە گروتینێكی زۆرەوە چووینە نێو بانگەشەی هەڵبژاردن.

 

 
یەكگرتوو: كاریگەری لەسەر ئێمە دانەناوە


هەر لەمبارەوە عوسمان كاروانی كاندیدی ژمارە 10 لە لیستی ((بەرەو ئیصلاح)) پێی وایە دەنگۆی ئەنجامدانی هەڵبژاردن و ئەنجامنەدانی چەواشەكارییەك بوو دوو هێزی دەسەڵات بەرامبەر هاوڵاتیان و هێزەكانی دیكە گرتیانە بەر بۆ ئەوەی خەڵكی سارد ببنەوە لە هەڵبژاردن.

 

عوسمان كاروانی كاندیدی ژمارەی 10ی لیستی بەرەو ئیصڵاح

 

 ئەو كاندیدەی یەكگرتوو دەشڵێت: " ئێمە هەر زوو بەم تاكتیكەی یەكێتی و پارتیمان زانی و نەمانهێشت ئەندام و لایەنگرانمان سار ببنەوە لە هەڵبژاردن بۆیە بە گروتینێكی زۆرەوە چووینە نێو بانگەشەی هەڵبژاردن".

 
كاروانی ئەوەش ناشارێتەوە كە بانگەشەی ئەمجارەی لیست و لایەنەكان بەراورد بە جارانی پێشوو تا رادەیەكی زۆر ساردوسری پێوە دیارەو لە ئاستی پێویستدا نییە، چونكە هاوڵاتیان نیگەرانن لەو دۆخەی كەوا تێی كەوتوون.

،،

 گۆران داوای دواخستنی كردو پارتیش لەرێگەی حكومەت و كۆمسیۆنەوە بانگەشەی هەڵبژاردنی دواخست، ئەمەش هۆكاری دوودڵی لایەنەكان بوو.

 

 كۆمەڵ: كاندیدەكانمان توانای مادیان كەمە


هاوژین عومەر كاندیدی ژمارە 5 لە لیستی كۆمەڵی ئیسلامی ژمارە 194 هۆكاری ساردو سری بانگەشەی هەڵبژاردن دەگەرێنێتەوە بۆ چەند خاڵێك لەوانە:
یەكەم: بارودۆخی سیاسی لە ماوەی رابردوودا وایكرد حزبەكان دوودڵبن لەوەی هەڵبژاردن دەكرێـت یاخود نا.!

 
دووەم: گۆران داوای دواخستنی كردو پارتیش لەرێگەی حكومەت و كۆمسیۆنەوە بانگەشەی هەڵبژاردنی دواخست، ئەمەش هۆكاری دوودڵی لایەنەكان بوو.

 
سێیە: لایەنی مادی ئیسلامییەكان زۆر خراپە و ناتوانن بە پارەو بانگەشەیەكی زۆرەوە دابەزن و بانگەشە دەست پێ بكەن.

 

هاوژین عومەر، كاندیدی ژمارە 5ی لیستی كۆمەڵی ئیسلامی

 

،،

كاندیدەكانی كۆمەڵ توانای مادیان زۆر كەمە كە هەر كەسێكیان تەنها 750 هەزار دیناری عێراقی پێ دراوە بۆ ئەوەی بانگەشەی هەڵبژاردنی پێ بكات.

 

 
" هەر كاندیدێكمان 750 هەزاری هەیە"


ئەو كاندیدەی كۆمەڵ لەرێگەی دیپلۆماتیكەوە شتێكی تایبەت ئاشكرا دەكات و دەڵێت:" كاندیدەكانی كۆمەڵ توانای مادیان زۆر كەمە كە هەر كەسێكیان تەنها 750 هەزار دیناری عێراقی پێ دراوە بۆ ئەوەی بانگەشەی هەڵبژاردنی پێ بكات".
بەرای هاوژین عومەر ئەم هۆكارە وا دەكات جەنجاڵییەكی زۆر بە بانگەشەكەوە دیار نەبێت و ساردو سربێت، كە پێشی وایە پارە هەموو شتێك ناكات لە كاتی بانگەشەدا.

 
"بێهیوایەكە زۆرتر سلێمانی دەگرێتەوە"


كاندیدەكەی یەكگرتووش عوسمان كاروانی، بەهەمان شێوەی كاندیدەكەی كۆمەڵ دەڵێت: رووداوەكانی ئەم مانگە وایكرد كە حزبەكان سارد ببنەوە لە هەڵبژاردن چونكە یەكێتی و پارتی هەموانیان سەرقاڵكردبوو بە ئەگەرەكانی ئەنجامدانی هەڵبژاردن، بۆیە ئەمەش دەكرێت راستەوخۆ پەیوەندی هەبێت بە رێژەی بەشداری هاوڵاتیانەوە".

 

ئەندامەكەی جڤاتی نیشتمانی بزووتنەوەی گۆران لەم بارەوە دەڵێت: ئەو بێهیوایەی رووی كردووەتە هاوڵاتیان زۆرتر شاری سلێمانی دەگرێتەوە كە باجەكەشی دەبێت ئۆپۆزسیۆن بیدات و لەبەرامبەردا دەسەڵات دەنگی زۆرینە بەدەست بهێنێت و گۆرانكارییەكی ئەوتۆ نەیەتە ئاراوە.

 

،،

بۆ هەڵبژاردنی پەرلەمانی كوردستان كە بریارە 30ی ئەم مانگە لەسەرتاسەری هەرێم ئەنجام بدرێت، 3 ملیۆن و 85 هەزارو 461 كەس مافی دەنگدانیان هەیە، 174 هەزار و 148 كەس دەنگدەری تایبەتن، 29 قەوارەو 776 كاندید كێبركێ بۆ 111 كورسی پەرلەمانی كوردستان دەكەن.

 

 كاندیدەكەی كۆمەڵیش پێیوایە دەبێت لایەنەكان بەتایبەت لە سلێمانی بایكۆتی بێهیوای خەڵك بكەن و نەهێڵرێت لەوە زیاتر هاوڵاتیان نیگەران و بێتاقەت ببن لە پرۆسەی هەڵبژاردن.

 
هەروەها دەشڵێت: كۆمەڵی ئیسلامی هەر لەسەرەتاوە ئیشی لەسەر ئەمە كردو نەچووە ئەو بێنەوبەردەیەوە كە هەڵبژاردن دەكرێت یاخود نا، چونكە هەر لەسەرەتاوە یەك قسەی هەبوو كە نابێت هەڵبژاردن دوا بخرێت.

 
بۆ هەڵبژاردنی پەرلەمانی كوردستان كە بریارە 30ی ئەم مانگە لەسەرتاسەری هەرێم ئەنجام بدرێت، 3 ملیۆن و 85 هەزارو 461 كەس مافی دەنگدانیان هەیە، 174 هەزار و 148 كەس دەنگدەری تایبەتن، 29 قەوارەو 776 كاندید كێبركێ بۆ 111 كورسی پەرلەمانی كوردستان دەكەن.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان