بریاردەری كۆمسیۆن: ئێمە تەنها لە دەنگی نێو سندوقەكان بەرپرسین

ئەو پیاوەی هەڵبژاردنی پێشوو مەترسییە گەورەكەی ئاشكرا كرد ئەمجارەش هۆشداری دەدات

بریاردەری كۆمسیۆن: ئێمە تەنها لە دەنگی نێو سندوقەكان بەرپرسین

2990 خوێندراوەتەوە

 هەرچەندە بە بیانووی ساختەكاری و پاك نەبوونەوەی تۆماری دەنگدەران هەندێ لایەن بە دوودڵییەوە چوونە نێو بانگەشەی هەڵبژاردن، بەڵام بریاردەری كۆمسیۆنی هەرێم ئاماژە بەوە دەكات هەموو دەرگاكانی ساختەكاریان گرتووە و ناهێڵن ئەوەی لە 12ی ئایار روویدا لێرە دووبارە ببێتەوە.

 

"هەوڵی تەواو دەدەین ساختەكاری نەكرێت"

 
ئیسماعیل خورماڵی، بریاردەری كۆمسیۆنی باڵای سەربەخۆی هەڵبژاردنەكان و راپرسی لەهەرێمی كوردستان تایبەت بەم بابەتە بۆ دیپلۆماتیك مەگەزین دەدوێت و دەڵێت:" لە ئەنجوومەنی كۆمسیاران لەماوەی رابردوودا هەوڵی تەواومانداوە و بە وردی لێكۆڵینەوەمان بۆ ئەوە كردووە كە بەهەموو شێوەیەك رێگە لە ساختەكاری بگرین و دەرگاكانی ساختەكاری دابخەین".

 

ئیسماعیل خورماڵی

 

،،

 هێشتا تۆماری دەنگدەران بەتەواوی پاك نەكراوەتەوە و ئەگەری هەیە لایەنێك بیەوێ لەبەرژەوەندی خۆی بەكاری بهێنێت.

 

 
بەڵام ئەو ئەندامەی كۆمسیۆن ئەوەش ناشارێتەوە كە ساختەكاری بە چەندین شێوەو لە چەندین شوێن بوونی خۆی هەیە و كۆمسیۆن رەنگە نەتوانێ كۆنترۆڵی بكات بۆیە دەشڵێت: " هەندێ كات ئەم ساختەكارییە بە یاسا رێكخراوە ئەمرۆ كۆمسیۆن ناتوانێ رێی لێبگرێت چونكە پەیوەندی بە تۆماری دەنگدان و فۆرمی خۆراكی هاوڵاتیانەوە هەیە".

 
"تۆماری دەنگدەران هێشتا پاك نەكراوەتەوە"

 
خورماڵی، هەرچەندە دەڵێت "دەرگاكانی ساختەكاریمان گرتوون" بەڵام ئەوەش ناشارێتەوە هێشتا تۆماری دەنگدەران بەتەواوی پاك نەكراوەتەوە و ئەگەری هەیە لایەنێك بیەوێ لەبەرژەوەندی خۆی بەكاری بهێنێت.

 

 

،،

كەس ناتوانێ گرێنتی هەڵبژاردنێكی لەسەدا سەد پاك و بێگەرد بدات و بەڵێنی ئەوە بدات كە بەهیچ شێوەیەك ساختەكاری ئەنجام نادرێت.

 


بریاردەرەكەی كۆمسیۆن دەشڵێت:" هەتاكو ئێستا داتایەكی فەرمی و نیشتمانی و درووست لەبەردەست كۆمسیۆندا نییە بۆ رێژەی دانیشتوان و دەنگدەر لە هەرێمی كوردستان، كە ئەمەش كێشەی بۆ ئێمە درووست كردووە."

 
هەربۆیە خورماڵی پێی وایە كەس ناتوانێ گرێنتی هەڵبژاردنێكی لەسەدا سەد پاك و بێگەرد بدات و بەڵێنی ئەوە بدات كە بەهیچ شێوەیەك ساختەكاری ئەنجام نادرێت.

 
بەڵام ئەوەش بۆ دیپلۆماتیك ئاشكرا دەكات ئەگەر لایەنێك ساختەكاری ئەنجامدا یاخود كۆمسیۆن گوومانی لە دەرەنجامەكانی هەڵبژاردن هەبوو، ئەوكاتە یان دەرەنجامەكان راناگەیەنن یاخود هەرچی راستییە بۆ رای گشتی و خەڵكی ئاشكرا دەكەن تاكو هاوڵاتیان و دەنگدەران بزانن كێ ساختەكار بووە.

 

 

 
"ئەمجارە هەڵبژاردن یەدەوییە، و بە ئومێدین هیچ روو نەدات"

 
لە هەڵبژاردنی 12ی ئایار بۆ پەرلەمانی عێراق، خورماڵی ئەو ناوە بوو كە زۆرترین دەركەوتنی هەبوو چونكە مەترسی ساختەكاری گەورەی بۆ رای گشتی ئاشكرا كرد بە بیانووی ئەوەی كە دەنگدان ئەلكترۆنییە و ئەگەر لایەنێك بیەوێت ساختەكاری بكات بە لێشاو ئەنجامی دەدات، بۆیە داوای كرد لە هەڵبژاردنی هەرێم ئەمە دووبارە نەبێتەوە و لەبری ئەلكترۆنی با دەنگدان یەدەوی بێت.

 

،،

هاوڵاتیان لەرێگەی دەنگدانی دەستییەوە دەنگ دەدەن و دواتر هەر هەوڵدانێك بۆ دەستكاری كردنی دەنگەكانیان ئاسان نابێت.

 

 

بۆیە ئەو بریادەری كۆمسیۆن دەڵێت: جاری پێشوو مەترسییەكانی دەنگدانمان بە رێگەی ئەلكترۆنی خستەروو، و شەری تەواومان كرد لە هەرێم ئەمە دووبارە نەبێتەوە، بۆیە لە هەڵبژاردنی 30ی ئەم مانگەدا ئەلكترۆنی تەنها بۆ هەندێ رێكاری وردی گواستنەوەی دەنگەكان بەكار دێت و بەهیچ شێوەیەك پرۆسەكە بەرێوە نابات.

 
بۆیە هاوڵاتیان لەرێگەی دەنگدانی دەستییەوە دەنگ دەدەن و دواتر هەر هەوڵدانێك بۆ دەستكاری كردنی دەنگەكانیان ئاسان نابێت.

 
" دەنگەكان بگەیەننە ئێمەو وازی لێ بێنن"


بریاردەرەكەی كۆمسیۆن دەڵێت: هەر ئەوەندەی دەنگەكان گەشتە دەستی ئەوان ئیدی بەرگری تەواو لە دەنگەكانیان دەكەن و ناهێڵێن هیچ لایەنێك دەستكاری سندووقەكان بكات.


خورماڵی ئەوەش دەڵێت: ئەوان تەنها بەرپرسن لە دەنگی نێو سندوقەكان، بەڵام لەرێگەیەكی دیكە و بەشێوەیكەی دیكە ساختەكاری بكرێت ئەوان بەرپرس نین لێی، بەڵام بۆ خەڵكی ئاشكرا دەكەن كە كێ دەستكاری سندووقەكانی كردووە.

 
بۆیە داوا لە هاوڵاتیان دەكات رەشبین نەبن و بچنە سەر سندووقەكانی دەنگدان و دەنگەكانیان بگەیەنن بە كۆمسیۆن و نەترسن لە لەناوچوونی دەنگەكانیان.

،،

هەر لەسەرەتای پرۆسەكەوە لە دیاریكردنی چاودێرو فەرمانبەرانی سەر سندووقەكانی دەنگدان هەوڵی ئەوەیان داوە رێگری لە ساختەكاری بگرن و بەپێی ((سی ڤی)) فەرمانبەر دابمەزرێنن، بەهیچ شێوەیەك لەرێگەی حزب و كەسایەتییەوە نەبێت تاكو دواتر بەكاریان بهێنن.

 

 گرێنتییەكانی كۆمسیۆن چین؟


لەكۆتایی وتەكانیدا بریاردەرەكەی كۆمسیۆن چەند گرێنتییەك لە رێگەی دیپلۆماتیك مەگەزینەوە دەخاتە روو ئەوانیش:

 
یەكەم: هەر لەسەرەتای پرۆسەكەوە لە دیاریكردنی چاودێرو فەرمانبەرانی سەر سندووقەكانی دەنگدان هەوڵی ئەوەیان داوە رێگری لە ساختەكاری بگرن و بەپێی ((سی ڤی)) فەرمانبەر دابمەزرێنن، بەهیچ شێوەیەك لەرێگەی حزب و كەسایەتییەوە نەبێت تاكو دواتر بەكاریان بهێنن.

 
دووەم: ئەو پەرەیەی كەوا دەنگی پێ دەدرێت، ناتوانرێت كۆپی بكرێت و وێنەی لەبەر بگیرێتەوە و هەر دەنگدەرێك تەنها مافی یەك دانە لەو پەرانەی هەیە.


سێیەم: فۆرمی دەنگدان بەواژۆی هەموو لایەنەكان دەدرێت و دەبێت هەموان ئاگاداری ئەو فۆرمە بن و كەس ناتوانێ دەستكاری بكات.

 
چوارەم: هەندێ وردەكاری كارگێری دیكە كە وا دەكات دەرەنجەمەكانی هەڵبژاردن تەنها لەلای ئەوان بێت و بەماوەیەكی كەم ئاشكرا بكرێت و كەس نەتوانێ دەستكاریان بكات.

 

هەرچەندە بانگەشەی هەڵبژاردن بۆ پەرلەمانی كوردستان بە ساردوسری دەستی پێكرد بەڵام ئەمرۆ پێ دەنێتە رۆژی دووەمیەوە، حزب و لایەنەكانیش دەیانەوێ ئەو چەند رۆژەی لەبەردەمیاندا ماوە پەیام و ئامانجی خۆیان بگەیەنن بە دەنگدەرو هاوڵاتیان.

 

df
ريـــــكــــــلام

 

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان