هونەرمەندانی هەڵەبجە شێوازی بانگەشەی هەڵبژاردن دەگۆڕن

هونەرمەندانی هەڵەبجە لە ڕێگەی پرۆژەی 100 كاندیدەوە ماڵی كلتوری‌و هونەری دروستدەكەن

هونەرمەندانی هەڵەبجە شێوازی بانگەشەی هەڵبژاردن دەگۆڕن

1293 خوێندراوەتەوە

ئەگەر لە هەڵبژاردنەكانی پێشوودا پانتایی بانگەشەی هەڵمەتی هەڵبژاردن بە چەندین دیاردەی ناشیرن لە لایەن هەندێك حیزبەوە داگیركرابێت، ئەوا بۆ ئەم هەڵبژاردنە چەند هونەرمەندێك بیریان لە ئەنجامدانی پڕۆژەیەك كردۆتەوە كە پێیانوایە كاریگەری لە سەر گۆڕینی شێوازی بانگەشەی هەڵبژاردن بۆ شێوەیەكی شارستانی و مۆدێرن دروست دەكات .

  
11ی ئەم مانگە هەڵمەتی بانگەشەی هەڵبژاردن بۆ هەڵبژاردنەكانی خولی پێنجەمی پەرلەمانی كوردستان كە بڕیارە لە 30ی ئەیلولی 2018 بەڕێوە بچێت، دەستی پێكرد. وەك هەوڵێك بۆ هێنانەكایەیی مۆدێلێكی نوێ‌ لە شێوازی بانگەشەی هەڵبژاردندا كۆمەڵێك هونەرمەند هەستاون بە ئەنجامدانی پرۆژەی 100 كاندید بۆ كردنەوەی ماڵێكی كلتوری و هونەری لە پارێزگای هەڵەبجە.

خاتوو سەبا ئەحمەد، كە نوسەرێكی شاری هەڵەبجەیە دڵخۆش بوو بە بیستنی هەواڵی ئەنجامدانی پرۆژەی 100 كاندید بۆ كردنەوەی ماڵێكی كلتوری لە هەڵەبجەدا، چونكە هەبوونی ماڵێكی وا بۆ شارەكە بە پێویست دەزانێت بۆ كۆكردنەوەی ڕۆشنبیرانی شارەكەو خولقاندنی كەشێكی ڕۆشنبیریی تێیدا.

سەبا ئەحمەد، بە دیپلۆماتیك مەگەزینی وت:" گەلێك دڵخۆشم بە كردنەوەی وەها پرۆژەیەك و بەڵێنی هەموو هاوكاریەكم بەو هاوڕێیانەم داوە، چونكە پرۆژەكە هەڵمەتی هەڵبژاردن لەشێوازی هات و هاوار و بچوكردنەوەی تاكەوە دەگۆڕێت بۆ گەورەكردنی ململانێكان لە خزمەتكردن، پێش ئەوەی هەڵبژاردنەكان ئەنجامبدرێت ".

،،

بۆ ئەنجامدانی پڕۆژەكە هەر كاندیدێكی بەشدار بوو بە بڕی 100 دۆلار هاوكاری‌و پاڵپشتی پڕۆژەكە دە كات بۆ یەكجار، كە ماوەی ساڵ و نیوێك بۆ دوو ساڵ پرۆژەكەی پێ بەڕێوە دەبرێت

وتیشی:" بەبڕوایی من ئەم شێوازە لەبانگەشەو هەماهەنگی نێوان كاندید و هاوڵاتی نوێترین شێوازە كە كاندید لە بری ئەوەی بە كارتێكی مۆبایل، یان ماكسییەك، یان دەمانچە، یا وێنەو پۆستەر كە بیكاتە ئامرازێك بۆ دەنگ كۆكردنەوە، ئەم شێوازە بە كار ببرێت باشترە لەڕووی سود بۆ هەردوولا، گەرچی لەڕووی مادییەوە بەهایەكی كەمی هەیە، بەڵام سودی گشتی خەڵكی تێدایەو لە بری بەڵێن بۆ پاش هەڵبژاردن پێش هەڵبژاردن هەڵدەستێت بەئەنجامدانی كارێك" .


ڕێبین مەحمود، مامۆستای بەشی شانۆ لە پەیمانگای هونەرە جوانەكانی هەڵەبجەو ڕێكخەری پڕۆژەكە بە دیپلۆماتیك مەگەزینی وت:"پرۆژەكەمان پڕۆژەیەكی كلتوری و هونەرییە، بۆ كردنەوەی ماڵێكی كلتوری و هونەری لە هەڵەبجەدا، ئێمە بە سێ‌ ئامانجی سەرەكی ئەم پرۆژەیەمان ڕاگەیاندووە: مەبەستمانە كلتوری بانگەشەی هەڵبژاردن لە كلتوری بەخشینەوەی چەك‌و پارە و شتی زیان بەخش ئەوەی كە ئێتسا مۆدێلە بگۆڕین بە كلتوری پرۆژە كردن، لامانوایە جوانترە كاندید بە پرۆژەوە بچێتە پەرلەمان، چونكە پەرلەمان شوێنی پرۆژە دروستكردنە، هەروەها دەمانەوێت ماڵێكی كلتوری ڕۆشنبیری سەردەمیانە بۆ هەموو كەس و لایەنێك لە هەڵەبجە بكەینەوە لە رێگەی ئەم پرۆژەیەوە كە كاندیدی هەموو لیستە جیاوازەكانی تێدایە، ئاشتەواییەكی نیشتیمانی ڕابگەیەنین" .

 

 

بۆ ئەنجامدانی پڕۆژەكە هەر كاندیدێكی بەشدار بوو بە بڕی 100 دۆلار هاوكاری‌و پاڵپشتی پڕۆژەكە دە كات بۆ یەكجار، كە ماوەی ساڵ و نیوێك بۆ دوو ساڵ پرۆژەكەی پێ بەڕێوە دەبرێت، بۆ درێژەدان بە پرۆژەكەش بۆ ئەوەی بتوانێت خۆی خۆی بژیەنێت وا بڕیارە ماڵەكە لە شێوەی كتێبخانەیەكداو كافێیەكی تێدا دروست بكرێت‌و بەشێكیش تەرخان بكرێت بە كەلەپوری كوردی شارەكەو ناوچەكە و ماڵەكە بتوانێت میوانداری خەڵك بكات بۆ سەردانیكردنی بەشەكانی ناوی و لەو ڕێگەیەوە ماڵەكە بتوانێت خۆی خۆی بژیەنێت .


بۆ بەردەوامبوونی كاندیدە بەشداربووەكان بە تایبەت ئەوانەی دەردەچن بۆ پەرلەمانی كوردستان ڕێكخەرانی پرۆژەكە گرێبەستێكی مەعنەوی لەگەڵ كاندیدە بەشدار بووەكان دەكات، كە دەبێت كاندید بە مەعنەوی هاوكاری ماڵەكە بێت لە دواتریشدا.

،،

ئەوان دەڵێن، ناوی ئەم پرۆژیەمان حیجز كردووە بۆ خولەكانیترو كاندیدانی خولەكانی تریش، بۆ ئەوەی ئەوەی ببێتە كلتور


ئەوان بۆ سەركەوتنی پڕۆژەكەیان بە گونجاوی دەزانن لە پرۆژەكەدا كە 100 كاندید بەشدار بێت تێیدا، دواتر 100 چاو بەسەر پرۆژەكەوە بێت‌و چاودێری بكات .
ڕێكخەرانی پرۆژەكە وابڕیاریانداوە هەر كاندیدێكی دەرچوو بۆ پەرلەمان لە هەر لیستێك 15 ڕۆژ جارێك لەو هۆڵەدا سیمیناری هەبێت، بەم پێوەرە دەتوانرێت هەر چوار ساڵەكە كاندیدە دەرچووەكانی بەشدار بوو لە پڕۆژەكە 15 ڕۆژ جارێك سیمیناریان هەبێت و تێیدا دەتوانن كار و پرۆژەكانی خۆیان بخەنە ڕوو، وە بە هۆیەوە دەنگدەری ئەو كاندیدانە دەزانن نوێنەرەكانیان لە پەرلەمان لە ماوەی چوار ساڵدا خەریكی چی بووە و چ كار و پڕۆژەیەكیان ئەنجامداوە .


ئەوان دەڵێن، ناوی ئەم پرۆژیەمان حیجز كردووە بۆ خولەكانیترو كاندیدانی خولەكانی تریش، بۆ ئەوەی ئەوەی ببێتە كلتور، دەشڵێن:" ئێمە كاری لەسەر دەكەینەوە بە بەردەوامی، هەر لە ناو ئەم پرۆژەیەدا ڕێگە و بەرنامەی ترمان داناوە، بۆ نموونە لە دواتردا ماڵە كلتوریەكە پرۆژەی 100 بەرپرس ڕادەگەیەنێت كە 100 بەربرس سەردانی هەڵەبجە بكەن".
ڕێبین مەحمود، ڕێكخەری پرۆژەكە بۆ دیپلۆماتیك مەگەزین وتی:" تا ئێستا نزیكەی 85 كاندید لە پرۆژەكە بەشدارەو بەبەردەوامی پەیوەندیمان لەگەڵ كاندیدەكان هەیەو هەندێك كاندید جوابیان نەداوینەتەوە، بە داخەوە لە سنوری پارێزگای هەڵەبجە تا ئێستا یەك كاندید بەشداریكردووەو سەرجەم كاندیدەكانی تر لە سنوری پارێزگاكانی هەولێرو سلێمانین، ئێمە تەمەننا ئەكەین لە خولەكانی تری هەڵبژاردندا بتوانین ئەم پرۆژەیە فراوانتر بكەین و لقی ماڵە كلتورییەكە ببەینە ئەو شارانەیتریش كە زیاتر پەراوێزخراون".

تا ئێستا هیچ هاوكاریەكی دارایی لە هیچ كاندیدێك وەرنەگیراوە، وا بڕیارە ڕۆژی 15 ی ئەم مانگە هاوكاریە داراییەكانی سنوری پارێزگای هەولێر لە ڕێگەی لیژنەیەكەوە دەست بە كۆكردنەوەی بكرێت و ڕۆژی 18ی مانگیش هاوكارییە داراییەكانی سنوری پارێزگای سلێمانی دەست بە كۆكردنەوەی بكرێت".

ڕێكخەرانی پرۆژەكە بڕیاریانداوە ئەگەر ڕێژەی بەشداری كاندیدان لە پارێزگای هەڵەبجەش زیادی كرد ڕۆژی 20ی مانگیش دوای كۆكردنەوەی هاوكارییە داراییەكانی سنوری هەڵەبجە، لە ناو ماڵە كلتوریەكەدا لە هەڵەبجە كونگرەیەكی ڕۆژنامەوانی ببەستن و ناوی هەموو كاندیدە بەشدار بووەكان بە خەڵك و میدیاكان ئاشنا بكەن‌و دواتریش لە ڕۆژی كردنەوەی پرۆژەكەش دووبارە بانگیان دەكەنەوەو پێیان دەڵێن كە ماڵەكە بووە بە چی.
ئەوان لەبەرنامەشیاندایە ئەلبوومێكی 100 كاندیدی دروست بكەن و لە سەر دیواری ماڵەكە وێنەی هەر سەد كاندیدەكە هەڵبواسن بۆ ئەوەی بۆ مێژوو بمێنێتەوە

شەهرام نامیق، یەكێك لەو كاندیدانەی یەكێتی كە لە شاری هەولێرەوە بەشداریی پرۆژەكەی كردووە، بە دیپلۆماتیك مەگەزینی وت:" ئەو پرۆژەیە پرۆژەیەكی هونەرییە منیش وەك هونەرمەند كە لە لیستەكەمدا كاندید كراوم، پێمخۆش بوو پرۆژەیەكی وا ئەنجام بدرێت و یەكەم كەس بووم بەشداریم تێدا كردو پاڵپشتی مادی و مەعنەویم بۆ دەربڕی".

،،

لە ئەگەری فەشەل هێنانی پرۆژەكەدا، ڕێكخەرانی پرۆژەكە بڕیاریانداوە پێداویستیەكانی ناو ماڵەكە كە بە پارەی كاندیدەكان كڕدراوە، ببەخشن بە دەزگایەكیتر لە شارەكەدا، بۆ نموونە ڕێكخراوی منداڵە ونبووەكانی هەڵەبجە، یان هەر دەزگایەكیتر لە شارەكەدا كە پێویستی بەو پێداویستیانە هەبێت


وتیشی:" ئەم پرۆژەیە پرۆژەیەكی باشە بۆ ئێمەی هونەرمەندان، كە بەداخەوە پرۆژە یاسا هەبووە لە پەرلەمان بۆ خزمەتی هونەرمەندان و مافەكانیان بەڵام كاری پێنەكراوە، هەر بۆیە هیوادارین ئەم پرۆژەیە سەركەوتووبێت و ئێمەی هونەرمەندان بتوانین سودی لێوەربگرین، هیوادارین ئەم پرۆژەیە ببێتە نەریتێك لە شێوازی بانگەشەی هەڵبژاردندا".


لە ئەگەری فەشەل هێنانی پرۆژەكەدا، ڕێكخەرانی پرۆژەكە بڕیاریانداوە پێداویستیەكانی ناو ماڵەكە كە بە پارەی كاندیدەكان كڕدراوە، ببەخشن بە دەزگایەكیتر لە شارەكەدا، بۆ نموونە ڕێكخراوی منداڵە ونبووەكانی هەڵەبجە، یان هەر دەزگایەكیتر لە شارەكەدا كە پێویستی بەو پێداویستیانە هەبێت".


سەبا ئەحمەد، كە هەمیشە چاوی لە زیادبوونی ئەم جۆرە پرۆژانەیە لە شارەكەداو لایوایە ئەم پرۆژانە بۆ شارەكە بەسوودن و ئەخوازێت ئەو كەسانەی هەڵدەستن بەكارەكە بتوانن بەنەفەسێكی درێژەوە بچنەپێشەوە لەكارەكەیانداو ماندونەبن و زوو كۆڵنەدەن، بۆ ئەوەی ئەم پرۆژەیەش وەك هەندێك لە پڕۆژەكانی تر شكست نەهێنێت، چونكە وەك ئەو دەڵێت:" لە تا ئێستا لە هەڵەبجەدا جێگایەك نییە گەنجان بتوانن تیایدا كۆببنەوە، یان كۆڕێك بگرن، یان سەیری فیلمێكی سینەمایی بكەن.

 

author photo

 بەکالۆریۆس لە زمانی کوردی، ئەزمونی شەش ساڵ کاری ڕۆژنامەوانی لە میدیای نوسرا و بیستراودا