بانگەشەی هەڵبژاردن مانگی هەنگوینی یەكێتی و پارتی شێواند

بۆچی هێرش دەكەنە سەر یەكدی.؟

بانگەشەی هەڵبژاردن مانگی هەنگوینی یەكێتی و پارتی شێواند

3032 خوێندراوەتەوە

مانگی هەنگوینی نێوان پارتی و یەكێتی و سەفاو مەروای نێوان ئەو دوو حزبە نەیتوانی لەبەردەم تای هەڵبژاردنەكاندا خۆی بگرێت.

 
وتارەكەی بورهانی سەعید سۆفی ئەندامی سەركردایەتی یەكێتی نیشتیمانی كوردستان لە ئاهەنگی بانگەشەی یەكێتی لە كۆیە، هەموو شتێكی شێواند. زۆری نەخایاند پارتی دیموكراتی كوردستان لەسەر زاری فازڵ میرانیەوە بەتوندی وەڵامی دایەوە.

 
هێرشەكانی چەند رۆژی رابردووی بورهانی سەعید سۆفی بەرپرسی مەڵبەندی كۆیەی یەكێـتی نیشتمانی كوردستان كە راستەوخۆ كردییە سەر پارتی دیموكراتی كوردستان، بوون بەسەرەتای جەنگێكی سارد لەنێوان یەكێتی و پارتی لە بانگەشەی هەڵبژاردندا. كاتێك لە ناو ئاپۆرەی لایەنگرانی حیزبەكەیدا وتی" دەنگ بدەن بە یەكێتی با پارتی بە تەنها حوكمی هەرێمی كوردستان نەكات" و " دەنگ بەپارتی مەدەن با هێزی بێگانە نەهێنێتە سەر هەرێمی كوردستان."

 

،،

لە سپێدەی بەیانی ڕۆژی دابێ‌، فازڵ میرانی، سكرتێری مەكتەبی سیاسی پارتی دیموكراتی كوردستان وەڵامێكی توندی دایەوە و ووتی" ئێمە جارێك 31 ئابمان كردووە، ئەوان پەنجا جار 31 ئابیان ئەنجام داوە".

 

 

بورهانی سەعید سۆفی

 

قسەكانی سۆفی 24 كاتژمێری نەخایاند وەڵامێكی توندی لە پیرمامەوە بۆ هاتەوە:


لە سپێدەی بەیانی ڕۆژی دابێ‌، فازڵ میرانی، سكرتێری مەكتەبی سیاسی پارتی دیموكراتی كوردستان وەڵامێكی توندی دایەوە و ووتی" ئێمە جارێك 31 ئابمان كردووە، ئەوان پەنجا جار 31 ئابیان ئەنجام داوە"

 

میرانی ئاماژەی بە ڕوداوەكانی 16ی ئۆكتۆبەر كردو ئاماژەی بەوەكرد 31ی ئاب ساڵی 1996 بوو بەڵام 16ی ئۆكتۆبەر دوێنێ‌ بوو.

 

قسەكانی بورهانی سەعید سۆفی تەنها شتێك نەبون كە پارتی توڕە كردبێت. ئەوان لە قسەكانی قوباد تاڵەبانی جێگری سەرۆكی حكومەتیش ناڕازی بون كە رەخنەی لە مەركەزیەتی حكومەت و كەمی خزمەنگوزاریەكان گرت لە سەردەمی كابینەی پێشودا.

 
لە وتارەكەیدا میرانی لابەلا پلارێكیشی گرتە قوباد تاڵەبانی و ووتی" هەندێ كەس نێچیرڤان بارزانی كردوویەتی بەشت و پۆست و پلەی پێداوە كەچی ئێستا قسە لەسەر حكومەت دەكات".

 

،،

لەماوەی رابردوودا ئەم دوو هێزە چەندین جار رووبەرووی یەكدی وەستاونەتەوە و یەكتریان شكاندووە، تەنانەت كار گەشتۆتە شەری براكوژی، دواتر بەناچاری رێكەوتوون وڵاتیان بەرێوەبردووە.

 

 

فازڵ میرانی

 

 

یەكێتی و پارتی، یار و نەیاری هەمیشەیی:


هەرچەندە یەكێتی و پارتی وەك دوو حزبی باڵادەست لە هەرێمی كوردستان لە ماوەی 27ساڵی رابردوودا،بەهاوبەشی وڵاتیان بەرێوەبردووە و رێكەوتنامەی ستراتیژی لەنێوانیان نوسراوە، بەڵام بەئاسانیش لەسەر سادەترین شت پەیوەندیەكانیان گرژی تێكەوتوە.

 
لەماوەی رابردوودا ئەم دوو هێزە چەندین جار رووبەرووی یەكدی وەستاونەتەوە و یەكتریان شكاندووە، تەنانەت كار گەشتۆتە شەری براكوژی، دواتر بەناچاری رێكەوتوون وڵاتیان بەرێوەبردووە، بەڵام شەری سارد لەنێوانیان كۆتایی نەهاتووە و لێرەو لەوێ سەركردەكانیان هێرشیان كردۆتە سەر یەكدی.

 
زەواجی یەكێتی و پارتی لەماوەی رابردووشدا زۆربەی كات هێندەی نەخایاندووە و ئەوەی بەردەوامی داوە بە پەیوەندییەكانیان تەنها بەرژەوەندیی حزبی و شەخسی بووە، هەركاتێك ئەم بەرژەوەندیانە كەوتبنە مەترسی لە لایەن لایەنێكیانەوە دەستیان كردووەتەوە بە هێرشكردن و شكاندنی یەكدی.

 

،،

شەری ساردی نێوان ئەم دوو هێزە تەنها بەوە نەوەستاوە كە سەركردە دیارەكانیان دژی یەك قسە بكەن، بەڵكو سەرۆك لیستەكانیشیان هێرش دەكەنە سەر یەكدی و وەڵامی یەكدیش دەدەنەوە.

 

 
بۆچی یەكێتی و پارتی لە بانگەشەی هەڵبژاردن لەیەكدی ئەدەن؟


ئەوەی جێگەی پرسیارو لەسەر نووسینە، لێدوانە توندەكانی نێوانیانە لەو بانگەشەیەی كە ئەمرۆ بۆ هەڵبژاردنی پەرلەمانی كوردستان هاوڵاتیانی هەرێم تێیكەوتوون. كە پێدەچێت پەیوەندی بە بێ منەتی پارتی و نیگەرانی یەكێتییەوە هەبێت كە هەڵبژاردنی بۆ دوا نەخرا.

بۆچی سەرۆك لیستەكانیشیان لەشەردان؟

شەری ساردی نێوان ئەم دوو هێزە تەنها بەوە نەوەستاوە كە سەركردە دیارەكانیان دژی یەك قسە بكەن، بەڵكو سەرۆك لیستەكانیشیان هێرش دەكەنە سەر یەكدی و وەڵامی یەكدیش دەدەنەوە.

 
چەند رۆژێك لەمەوبەر لە بانگەشەی حزبەكەیان بۆ پەرلەمانی كوردستان قوباد تاڵەبانی رایگەیاند:" دەنگ بدەن بە یەكێتی با رۆتینات لە حكومەت نەهێڵێت و دەسەڵاتەكان لە هەولێر قۆرغ نەكرێن و دابەزێنرێن بۆ قەزاو ناحییەكان."

 
ئەمە هێرشی راستەوخۆ بوو بۆ سەر پارتی دیموكراتی كوردستان، دوای چەند كاتژمێرێك هێمن هەورامی سەرۆكی لیستی پارتی دیموكراتی كوردستان بۆ پەرلەمان وەڵامی توندی تاڵەبانی دایەوە.

 

قوباد تاڵەبانی

 

 
پێ دەچێت هەر ئەم قسانەی قوباد تاڵەبانی بووبنە هۆكار كە فازڵ میرانیان هێندە تورە كردبێت، تا یەكێتی تۆمەتبار بكات بە فرۆشتنی خاك و وڵاتی كوردستان.

 

،،

چەندین پرس و بابەتی گرنگی وەك سەرۆك كۆمار و بابەتی سەرۆكایەتی هەرێم و داواكردنی پارێزگاری كەركوك لەلایەن پارتی و چەند شتی دیكەش بەتایبەت پۆستە سیادییەكان لەهەرێم لەبەردەم یەكێتی و پارتی قوت بۆتەوە و پێ ناچێت بەئاسانی چارەسەر ببن.

 

 زەواجی یەكێتی و پارتی لە غیابی تاڵەبانی باوكدا؟


پێ دەچێت لە غیابی تاڵەبانی زۆر بەئاسانی پەیوەندیەكانی نێوان یەكێتی و پارتی درزی تێكەوێت و دوریش نیە ئەو برینەی دروست دەبێت بەئاسانی ساڕێژ نەبێتەوە.

 

لە ئێستادا چەندین پرس و بابەتی گرنگی وەك سەرۆك كۆمار و بابەتی سەرۆكایەتی هەرێم و داواكردنی پارێزگاری كەركوك لەلایەن پارتی و چەند شتی دیكەش بەتایبەت پۆستە سیادییەكان لەهەرێم لەبەردەم یەكێتی و پارتی قوت بۆتەوە و پێ ناچێت بەئاسانی چارەسەر ببن.

 

لە ئەگەری بەدەستهێنانی پەنجا زاید یەكی كورسییەكانی پەرلەمانیش لەلایەن پارتییەوە كە سەركردەكانیان بۆی دەجەنگن، پارتی بێ منەتتربێت بەرامبەر هاوپەیمانە چەند ساڵەكەی و تۆڵەی لێدوانە توندەكانی كاتی بانگەشەی هەڵبژاردن لە یەكێتی بكاتەوە و مانگە هەنگوینییەكەیان زۆرتر بشێوێت.