"نە دەنگدان بە عەلمانییەكان كوفرە، نەدەنگدان بە ئیسلامییەكان تاوانە"

تازەترین هەڵوێستی سەلەفییەكانی كوردستان لەبارەی هەڵبژاردنەوە چییە؟

"نە دەنگدان بە عەلمانییەكان كوفرە، نەدەنگدان بە ئیسلامییەكان تاوانە"

3794 خوێندراوەتەوە

 هەرچەندە رەوتی سەلەفی لە هەرێمی كوردستان وا وێناكراون كە پشتگیری تەواو لە دەسەڵاتی یەكێتی و پارتی دەكەن، بەڵام رێبەرێكی ئەم رەوتە لە ئێستادا پێی وایە چۆن دەنگدان بە عەلمانییەكان كوفر نییە بەهەمانشێوەش دەنگدان بە ئیسلامییەكان تاوان نییە.

 
د.خالید ئەحمەد سەلەفی، برای د. عەبدولەتیف ئەحمەد سەلەفی كە دوو رێبەری دیاری رەوتی سەلەفین لە هەرێمی كوردستان، لەكاتی رووداو و پێشهاتە سیاسییەكان لایەنگران و هەوادارانیان چاویان لە دەمی ئەمانە تاكو بزانن چ فتوایەك دەدەن تاكو بەگوێیان بكەن.!

 
خالید ئەحمەد سەلەفی، كە هەژموونی رۆحی بەسەر سەلەفییەكانی كوردستاندا، پێ ناچێت لەئێستادا كەمتر بێت لە د.عەبدولەتیفی برای، بۆیە تایبەت بە راو بیروبۆچۆنی سەلەفییەكان لەبارەی هەڵبژاردنەوە بۆ دیپلۆماتیك مەگەزین دەدوێت.

 

 

،،

ئەمرۆ لە دونیای سیاسیدا بەبێ رێگەی پەرلەمان ناتوانی بەشداری سیاسیی بكەیت و بچیتە حكومەت، بۆیە رێگەیەكی ناچارییە.

 

 

 

د.خالید ئەحمەد سەلەفی، رێبەرێكی دیاری سەلەفییەكان لەكوردستان

 

 

"رێگەی پەرلەمان و هەڵبژاردن ناشەرعی و ناچارییە"


ئەو رێبەرەی رەوتی سەلەفی لە هەرێمی كوردستان، ئەوە ناشارێتەوە كە ئەوان وەك سەلەفییەكان هەڵبژاردن و ئەزموونی پەرلەمانی بە ناشەرعی دەزانن بۆیە دەڵێت:" هەڵبژاردن لە بنەرەتدا ناشەرعییە و ئەزموونی پەرلەمانی دژی بنەما باڵاكانی ئایینی پیرۆزی ئیسلامە چونكە هەموان دەزانین باسی حوكمی خەڵك دەكات نەك حوكمی خوا".

 
خالید سەلەفی، ئەوەش ئاشكرا دەكات كە " ئەمرۆ لە دونیای سیاسیدا بەبێ رێگەی پەرلەمان ناتوانی بەشداری سیاسیی بكەیت و بچیتە حكومەت، بۆیە رێگەیەكی ناچارییە".

 
هەربۆیە رێبەرەكەی رەوتی سەلەفی لەهەرێمی كوردستان دان بەوەشدا دەنێت هەركەسێك بەشداری پرۆسەی سیاسی بكات لەهەرێمی كوردستان ئەمان دژی ناوەستنەوە.

 

،،

بەشداری سیاسی و سەرقاڵ بوون بە كاری پەرلەمانی نەك دینداری ئاسایی بەڵكو زۆر بانگخوازو كەسی گەورەی عەیبدار كردین، كە دەبوو ئەوان خەڵكی پەروەردە بكەن و دینیی ئیسلامیان بەتەواوی پێ بگەیەنن، بۆیە دەڵێین لەبری كاری سیاسی سەرقاڵی پەروەردەكردنی خەڵكی بن.

 

 
" با دەوڵەتی كوردی لەناختدا بێت"

 
هەروەك چۆن دژی ئەو كەسە ناوەستنەوە سیاسەت دەكەن، لەگەڵ ئەوەشدا نین هەموان سەرقاڵی سیاسەت و هەڵبژاردن بن هەر بۆیە د.خالید ئەحمەد دەشڵێت:" ئێمە بروامان وایە هەركەسێك دەیەوێت خزمەت بە ئیسلام بكات و خەڵكی پەروەدە بكات، با واز لە دەسەڵات بێنێت بۆ ئەو كەسانەی كە وڵات بەرێوە دەبەن، و لەبری ئەوە سەرقاڵی پەروەردەو پێگەیاندنی تاكەكانی كۆمەڵگا بن".

 
هەربۆیە ئاماژە بەوەش دەكات كە ئەگەر لایەنێك یاخود رەوتێك بەناوی ئیسلامییەوە ویستی لەكۆمەڵگادا خزمەت بكات با تاكەكانی كۆمەڵگا پەروەردە بكات و لەسەر شتی باش رایان بهێنێ چونكە دواتر هەر ئەندامەكانی ئەم كۆمەڵگایەن دەبن بە حوكمران و بەرێوەبەری وڵات.

 
بۆیە دەشڵێت:" بەشداری سیاسی و سەرقاڵ بوون بە كاری پەرلەمانی نەك دینداری ئاسایی بەڵكو زۆر بانگخوازو كەسی گەورەی عەیبدار كردین، كە دەبوو ئەوان خەڵكی پەروەردە بكەن و دینیی ئیسلامیان بەتەواوی پێ بگەیەنن، بۆیە دەڵێین لەبری كاری سیاسی سەرقاڵی پەروەردەكردنی خەڵكی بن".

 
هەربۆیە رێبەرەكەی رەوتی سەلەفی دەڵێت:" با دەوڵەتی ئیسلامی لەناخی دڵدا بێت و خۆت لەسەر بەها باڵاكانی ئیسلام پەروەردە بكەو با خەڵكی چاوت لێ بكەن".

 

،،

هەروەك چۆن دەنگدان بە عەلمانییەكان كوفر نییە و مرۆڤی پێ كافر نابێت، بەهەمانشێوەیش دەنگدان بە ئیسلامییەكان تاوان نییە، بەڵام دەنگدان پێشیان شایەتیدان نییە بۆ ئیسلام.

 

 "ئیسلامییەكان لە هەرێمی كوردستان كەمینەن"


د.خالید سەلەفی باس لە ئیسلامییەكانی هەرێمی كوردستان دەكات و گلەییان لێ دەكات كە ئەوان كەمینەن لە پەرلەمانی كوردستان و ناتوانن كاریگەری تەواویان هەبێت بۆیە دەڵێت:" من رێزم هەیە بۆ ئیسلامییەكانی هەرێمی كوردستان بەڵام دەبێت ئەوەش بزانن كە كەمینەن و هەندێ كاتیش وێنەیەكی خراپیان نیشانی بەرامبەر داوە، بەڵام كەسی شیاوو بەرێزو رۆشنبیریان زۆر تێدایە".

 
بەڵام ئەو رێبەرەی رەوتی سەلەفی رەئییەكی تایبەت و جیاوازی هەیە سەبارەت بە دەنگدان بە ئیسلامییەكان، بۆیە دەڵێـت: هەروەك چۆن دەنگدان بە عەلمانییەكان كوفر نییە و مرۆڤی پێ كافر نابێت، بەهەمانشێوەیش دەنگدان بە ئیسلامییەكان تاوان نییە، بەڵام دەنگدان پێشیان شایەتیدان نییە بۆ ئیسلام".

 
ئەم رایەی د.خالید پێچەوانەی رای زۆرینەی سەلەفەییەكانە بەتایبەت د.عەبدولەتیفی برای كە لەماوەی رابردوودا لە چەند گرتەڤیدۆیەكدا ئەوەی رایگەیاندبوو كە" دەنگدان بە ئیسلامییەكان تاوانە و نابێت دەنگیان پێ بدرێت."

 

د.عەبدولەتیف ئەحمەد سەلەفی، رێبەرێكی دیكەی سەلەفییەكان لە كوردستان

 

 
هەرچەندە د.خالید رەدی ئەوە دەداتەوە كە د.عەبدولەتیفی برای شتێكی لەو بابەتەی گوتبێت، بەڵام ئەمە رەئییەكی تازەی ئەوانەو جۆرێك لە رەحمكردن و نەرمی نواندانە بەرامبەر ئیسلامییەكان. چونكە ئەوان لەماوەی رابردوودا بە لایەنگری عەلمانییەكان و دژی ئیسلامییەكان ناوبانگیان دەركردبوو.

 

،،

ئێمە پەیوەندی سری و نهێنیمان لەگەڵ پارتی یاخود یەكێتی نییە و هیچ بەڵگەیەكیش نییە كە ئێمە دەنگ بەوان بدەین، بەڵكو تەنها پرسیارو قسەی خەڵكییە.

 

 

"دەست بەدەست نوێژێك نادەم بەهەزار عەلمانی"


سەبارەت بەوەی كە ئەوان هەمیشە وا وێناكراون لەگەڵ عەلمانییەكاندان و دژی ئیسلامییەكانن، رێبەرەكەی رەوتی سەلەفی دەڵێت:" پێمان سەیرە خەڵكی وا بزانن ئێمە جیاكاری ناكەین لەنێوان عەلمانی و ئیسلامی یاخود عەلمانی و موسڵمان، و هەموویان بەیەك چاو سەیر بكەین، چونكە ئێمە دەست بەدەست نوێژو روو لەخوایەك نادەین بەهەرچی نوێژ نەخوێن و عەلمانی هەیە".

 
هەروەها دەشڵێت:" ئێمە پەیوەندی سری و نهێنیمان لەگەڵ پارتی یاخود یەكێتی نییە و هیچ بەڵگەیەكیش نییە كە ئێمە دەنگ بەوان بدەین، بەڵكو تەنها پرسیارو قسەی خەڵكییە".

 

 

،،

رۆژ بەرۆژ لە تەواوی جیهان ئەزموونی پەرلەمانی لە پاشەكشەدایە كە تەمەنا دەكەین هەر نەمێنێت و ئەهلی حەل و حەقد بە رێكەوتن وڵات بەرێوەبەرن و پێویست بە هەڵبژاردن نەكات.

 

لەداهاتوودا نابنە حزبی سیاسیی؟


لە كۆتایدا، لە وەڵامی ئەو پرسیارەی دیپلۆماتیك كە ئایا ئەوان لە داهاتوودا نابنە حزبی سیاسی یاخود وەك ئەزموونی سەلەفییەكانی میسر ناچنە نێو پرۆسەی هەڵبژاردن؟


رێبەرەكەی رەوتی سەلەفی لەهەرێمی كوردستان دەڵێت:" رۆژ بەرۆژ لە تەواوی جیهان ئەزموونی پەرلەمانی لە پاشەكشەدایە كە تەمەنا دەكەین هەر نەمێنێت و ئەهلی حەل و حەقد بە رێكەوتن وڵات بەرێوەبەرن و پێویست بە هەڵبژاردن نەكات".

 
بۆیە دەشڵێت: سەلەفییەكان لە هەرێمی كوردستان بیریان لەوە نەكردووەتەوە وەك حزبی سیاسی بانگەشە بۆ خۆیان یان بۆ لایەنێكی دیكەى بكەن و بچنە كێبركێی سیاسی و هەڵبژاردن.

 

بانگەشەی هەڵبژاردن بۆ پێنجەمین خولی پەرلەمانی كوردستان، پێ دەنێتە رۆژە زێرینەكانی، و سەلەفییەكانی هەرێمی كوردستانیش تا ئێستا بەرەسمی خۆیان بۆ هیچ لایەنێكی سیاسی نەكاندید كردووە نە پشتگیریشیان دەكەن.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان