دانا عەبدولكەریم، بەرپرسی ژوری حكومەت و پەرلەمانی گۆڕان:           بە رۆشتنەوەی هەندێ‌ كەس بۆناو یەكێتی دەنگی گۆڕان زیاتر دەكات

بەرپرسی ژوری حكومەت و پەرلەمانی گۆڕان: سەركەوتی كوبە وازی لە گۆڕان نەهێناوە

دانا عەبدولكەریم، بەرپرسی ژوری حكومەت و پەرلەمانی گۆڕان: بە رۆشتنەوەی هەندێ‌ كەس بۆناو یەكێتی دەنگی گۆڕان زیاتر دەكات

1699 خوێندراوەتەوە

 

بانگەشەی هەڵبژاردن بۆ پێنجەمین خولی پەرلەمانی كوردستان پێ دەنێتە هەفتەی زێرینەوە، بەرپرسێكی گۆرانیش،هەرچەندە كاتی هەڵبژاردن بە گونجاو نازانێت بەڵام بانگەشەی حزبەكەیان بە گەرمووگور لەقەڵەم دەدات و پێی وایە ژمارەی كورسییەكانیان مەگەر بەشداری نەكردنی هاوڵاتیان كەمی بكات، دەشڵێت: "ئەگەر بووینە زۆرینەی پەرلەمان دەچینە حكومەت، زۆرینەش نەبووین لەپەرلەمان چاودێرێكی كارا دەبین".

 

دانا عەبدولكەریم، بەرپرسی بەشی حكومەت لە ژووری حكومەت و پەرلەمانی بزووتنەوەی گۆران تایبەت بە دۆخی حزبەكەیان لە بانگەشەی هەڵبژاردن و بەشداریكردنیان لە كابینەی داهاتووی حكومەت بۆ دیپلۆماتیك مەگەزین دەدوێت.

 

دانا عەبدولكەریم، بەرپرسی بەشی حكومەت لە ژووری حكومەت و پەرلەمانی بزووتنەوەی گۆران

 

،،

هەندێ كەس و ناحەزی دەرەوەی بزووتنەوەكە ئەو دەنگۆیان بڵاو كردبوویەوە كە گوایا گۆران بەدۆخێكی زۆر خراپی ناوخۆیدا تێ دەپەرێت و بەهیچ شێوەیەك ناتوانێ كورسییەكانی پێشووی بهێنێتەوە.

 

 

 

"كاتی هەڵبژاردن گونجاو نییە و دەبوو ئامادەكاری باشتر بكرێت"


ئەو بەرپرسەی گۆران ئەوە ناشارێتەوە كە كاتی هەڵبژاردنیان بەلاوە گونجاو نەبووە چونكە پرۆسەكە ئامادەكاری باشتری دەوێت بۆ رێگەگرتن لە ساختەكاری، هەربۆیە لەسەرەتاشەوە داوایان كردووە هەڵبژاردن دوابخرێت.

 
سەبارەت بە وەڵامی ئەو پرسیارەی كە ئەم داواكارییەیان چەند پەیوەندی بە دۆخی خراپی ناوخۆیی بزووتنەوەكەیە هەیە كە باس لەوە دەكرا گۆڕان ترسی هەبووە لەوەی دەنگەكانی پێشووی نەهێنێتەوە؟

 
دانا عەبدولكەریم دەڵێت:"هەندێ كەس و ناحەزی دەرەوەی بزووتنەوەكە ئەو دەنگۆیان بڵاو كردبوویەوە كە گوایا گۆران بەدۆخێكی زۆر خراپی ناوخۆیدا تێ دەپەرێت و بەهیچ شێوەیەك ناتوانێ كورسییەكانی پێشووی بهێنێتەوە بۆیە داوای ئەنجامنەدانی هەڵبژاردن دەكات،بە پێچەوانەوە گۆران هێزێكی جەماوەرییەو پشتی بە دەنگی دەنگدەرەكانی بەستووە و هیچ كات لە هەڵبژاردن نەترساوە و راینەكردووە، ئێستەش ئامادەیی تەواوی تێدایە بۆ دەنگدان".

 
بەڵام دان بەوەشدا دەنێت ئەو دەنگۆیە كە نەیارەكانیان سەبارەت بەناوخۆیی حزبەكە بڵاویان كردووەتەوە كاریگەریشی لەسەر هەندێ ئەندام و هەڵسوراوی ناوخۆیی گۆران هەبووە.

 

،،

ئەگەر رێژەی دەنگدان لە نێوان 60% بۆ 70% بوو ئەوا گۆران كورسییەكانی خۆی دەهێنێتەوە و ئەگەر رێژەكەش لەوە كەمتر بوو ئەو گۆڕان دەنگ و كورسی كەم دەكات.

 

 

" كورسییەكانمان كەم ناكەن"


بەرپرسەكەی بەشی حكومەت لە بزووتنەوەی گۆران بەردەوام دەبێت لە باسكردنی دۆخی ناوخۆیی حزبەكەی دوای كۆچی نەوشیروان موستەفا و دەڵێت:"كورسییەكانی بزووتنەوەی گۆران ئەگەر زیاد نەكەن كەمیش ناكەن،مەگەر دەنگدەر نەچن بۆ سەر سندووقەكانی دەنگدان ئەو كاتە دەنگی هەموان بە بزووتنەوەی گۆرانیشەوە كەم دەكات".

 دانا عەبدولكەریم پێی وایە یەكێتی و پارتی بەبەرنامە كاریان كردووە بۆ ئەوەی خەڵكی سارد بێتەوە لە پرۆسەی هەڵبژاردن و بێهیوابن لە سندووقەكانی دەنگدان بۆیە مەترسی هەیە خەڵكی نەچن بۆ دەنگدان ئەمەش رەنگە ببێتە هۆكارێك بۆ ساختەكاری و كەمكردنەوەی دەنگی لایەنەكانی دەرەوەی دەسەڵات و زۆربوونی دەنگی یەكێتی و پارتی.

 
ئەو، دەڵێت:" ئەگەر رێژەی دەنگدان لە نێوان 60% بۆ 70% بوو ئەوا گۆران كورسییەكانی خۆی دەهێنێتەوە و ئەگەر رێژەكەش لەوە كەمتر بوو ئەو گۆڕان دەنگ و كورسی كەم دەكات".

 

،،

كاتێك كەسێك دەچێتەوە ناو یەكێتی نابێتە خاڵی سلبی بۆ بزووتنەوەكە بەڵكو بەپێچەوانەوە دەبێتە خاڵی ئیجابی و دەنگدەر زۆرتر دەنگ بە بزووتنەوەكە دەدات و پێیان باشە ئەو كەسە وازی لە گۆڕان هێناوە.

 

 

" هەندێ لەو كەسانەی ناو گۆڕان كە دەچنەوە ناو یەكێتی،دەبێتە هۆی زیادكردنی دەنگی گۆڕان"


سەبارەت بە وازهێنانی هەندێ لە هەڵسوراوی دیاری بزووتنەوەكە و چونیان بۆ ناو پارتی و یەكێتی، ئەو بەرپرسە دیارەی گۆران پێی وایە بە وازهێنانی هەندێ كەس لە بزووتنەوەی گۆڕان دەنگی گۆران زیاد دەكات نەك كەم .

 
" كاتێك كەسێك دەچێتەوە ناو یەكێتی نابێتە خاڵی سلبی بۆ بزووتنەوەكە بەڵكو بەپێچەوانەوە دەبێتە خاڵی ئیجابی و دەنگدەر زۆرتر دەنگ بە بزووتنەوەكە دەدات و پێیان باشە ئەو كەسە وازی لە گۆڕان هێناوە". دانا كەریم وای وت.

 
بەڵام سەبارەت بە وازهێنانی هەڵسوراوێكی دیاری بزووتنەوەكەیان وەك سەركەوتی كوبە، ئەو بەرپرسەی گۆران دەڵێت: " كاك سەركەوت بەهیچ شێوەیەك وازی لەگۆران نەهێناوە، هەواڵی وازهێنانیشی لە هەندێ پەیج و شوێنی نارەسمییەوە بوو".

 

وێنەی سەركەوتی كوبە و حاكم قادر كە ئەمرۆ لە مەكتەبی سیاسی یەكێتی گیراوە

 
سەیرەكە لەوەدایە لەكاتێكدا بەرپرسەكەی گۆڕان وادەڵێت ئەمڕۆ میدیای فەرمی یەكێتی وێنەی سەركەوت حەسەنی لە مەكتەبی سیاسی یەكێتی بڵاوكردەوە و خۆشی دان بەوەدا دەنێت كە چۆتەوە ناو یەكێتی.

 

 
"بەتەواوی رێگە لە ساختەكاری نەگیرا"


بەرپرسی بەشی حكومەت لە بزووتنەوەی گۆران باس لە ئەگەری ئەنجامدانی ساختەكاری لە هەڵبژاردنی ئەمجارە دەكات و دەڵێت:" یەكێتی و پارتی بەهەموو شێوەیەك هەوڵ ئەدەن هەمووو جۆرە ساختەكارییەك بكەن تاكو دەنگەكانیان زیاد بكەن".

 
ئاماژەش بەوەدەكات هەرچەندە كۆمسیۆن هەندێ رێگەی گرتۆتە بەر تاكو رێگە بگرێت لە ئەنجامدانی ساختەكاری بەڵام ئەگەری هەیە لە هەڵبژاردنی ئەمجارەشدا ساختەكاری ئەنجام بدرێت.

 
وتەی ئەم بەرپرسەی گۆران لەكاتێكدا دێت كە ئەوان نوێنەریان هەیە لە كۆمسیۆنی باڵای سەربەخۆی هەڵبژاردنەكان و راپرسی لە هەرێمی كوردستان، كە دەبێ هەموو كارێكیان ئەنجام دابێت تاكو بزووتنەوەكەیان رووبەروی ساختەكاری نەبێتەوە .

 

،،

ئەگەر گۆڕان دەنگی زۆرینەی هێناو بوویە زۆرینەی پەرلەمان ئەوكاتە بەشداری حكومەت دەكات و دەبێتە زۆرینەی حكومەتیش، بەڵام ئەگەر نەبووینە زۆرینە،ئەوكاتە لە پەرلەمان دەبینە چاودێرێكی كارا بۆ هەرێمێكی دادپەروەر و شەڕی مافەكانی هاوڵاتیان دەكەین.

 

 

 

"نەبینە زۆرینە ناچینە حكومەت"


گۆران دروشمی هەڵبژاردنی پێشوویان بەرەو دەسەڵات بوو بە رێبەرایەتی خودی نەوشیروان موستەفا، بەڵام درووشمی ئەمجارەیان گۆراوە و بۆ بەرەو هەرێمێكی دادپەروەر، بۆیە لە وەڵامی پرسیاری،
ئایا گۆران ئەمجارە بەشداری كابینەی داهاتووی حكومەت دەكات یاخود نا.؟

 
بەرپرسەكەی بەشی حكومەتی گۆران بە راشكاوی گوتی: " ئەگەر گۆڕان دەنگی زۆرینەی هێناو بوویە زۆرینەی پەرلەمان ئەوكاتە بەشداری حكومەت دەكات و دەبێتە زۆرینەی حكومەتیش، بەڵام ئەگەر نەبووینە زۆرینە،ئەوكاتە لە پەرلەمان دەبینە چاودێرێكی كارا بۆ هەرێمێكی دادپەروەر و شەڕی مافەكانی هاوڵاتیان دەكەین".

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان