گۆران چاوه‌روانه‌ و كۆمه‌ڵ په‌له‌ی نییه‌ و یه‌كگرتوو هۆشداری ده‌دات و نه‌وه‌ی نوێ ره‌تیده‌كاته‌وه‌

هه‌ڵوێستی چوار لایه‌نه‌كه‌ پێش راگه‌یاندنی ئه‌نجامه‌ فه‌رمییه‌كانی هه‌ڵبژاردن

گۆران چاوه‌روانه‌ و كۆمه‌ڵ په‌له‌ی نییه‌ و یه‌كگرتوو هۆشداری ده‌دات و نه‌وه‌ی نوێ ره‌تیده‌كاته‌وه‌

495 خوێندراوەتەوە

هێشتا ئەنجامی بەرایی هەڵبژاردنی خولی پێنجەمی پەرلەمانی کوردستان لەلایەن کۆمسیۆنی بالای هه‌ڵبژاردن و راپرسی ڕانەگەیەنراوە و ئه‌و 72 كاتژمێره‌ش بۆ راگه‌یاندنی ئه‌نجامه‌ به‌راییه‌كان دیاریكراوه‌ كۆتایی نه‌هاتووه‌، به‌ڵام بەشێک لە هێزە سیاسییەکان پێشوه‌خته‌ ئه‌نجامه‌كان ره‌تده‌كه‌نه‌وه‌ و هه‌ڵوێستی خۆیان ده‌ربریووه‌.

 

یەکگرتووی ئیسلامی له‌ كاتێكدا له‌ خولی پێشووی په‌رله‌مان 10 كورسی هه‌بوو، به‌ڵام له‌م هه‌ڵبژاردنه‌دا بەپێی ئەنجامە نافەرمییەکان نزیكه‌ی نیوەی دەنگەکانی لەدەستداوە و ده‌ڵێن "ئەنجامەکانیان بەم شێوەیه‌ قبوڵ نییە".

عوسمان کاروانی ئەندامی سەرکردایەتی یەکگرتووی ئیسلامی و هاوكات كاندیدی حزبه‌كه‌ش بوو بۆ هه‌ڵبژاردن بە دیپلۆماتیک مەگەزینی ڕاگەیاند: " ئەگەر ئەنجامی هەڵبژاردن لە ساختەکاریی پاک نەکرێتەوە یەکگرتوو ڕەتی دەکاتەوە".

،،

یەکگرتووی ئیسلامی: ساختەکارییەکی ڕێکخراوی بێ وێنە کراوە، بە دروستکردنی بەڵگەنامەی ساختە بۆ ئەو کەسانەی کە مردوون و ناوەکانیان نەسڕاوەتەوە یان لە دەرەوەی وڵات بوون یان بۆ ئەو کەسانەی کە یەکێتی و پارتی دڵنیابوون ناچن بۆ دەنگدان.

 

وتیشی:" ساختەکارییەکی ڕێکخراوی بێ وێنە کراوە، بە دروستکردنی بەڵگەنامەی ساختە بۆ ئەو کەسانەی کە مردوون و ناوەکانیان نەسڕاوەتەوە یان لە دەرەوەی وڵات بوون یان بۆ ئەو کەسانەی کە یەکێتی و پارتی دڵنیابوون ناچن بۆ دەنگدان".

بەپێی قسه‌كانی عوسمان کاروانی، یەکگرتوو لەم هەڵبژاردنەدا نزیکەی ٧٥ هەزار دەنگی بە دەستهێناوە، لە کاتێکدا هەڵبژاردنی ڕابردوو ١٥٠ هەزار دەنگی بەدەستهێنابوو.

 

rtf
جیاكردنه‌وه‌ی ده‌نگه‌كانی هه‌ڵبژاردنی په‌رله‌مانی كوردستان ـ 2018.9.30


کۆمەڵی ئیسلامیی كوردستان، بەراورد بە هەڵبژاردنه‌كانی ڕابردوو ژمارەی دەنگەکانی به‌ رێژه‌یه‌كی به‌رچاو زیادی کردووە، بەڵام قسەی کۆتایی له‌سه‌ر ئه‌نجامه‌كانی هه‌ڵبژاردن هەڵگرتووە بۆ دوای راگەیاندنی ئەنجامی فەرمی لەلایەن کۆمسیۆنەوە.

،،

وتەبێژی کۆمەڵی ئیسلامیی: کۆمەڵ لەسەر کۆی پێشێلکارییەکان سکاڵای تۆمارکردووە و چاوەڕوانی قسەی کۆتای کۆمسیۆنە، پێمانوایە ساختەکارییەکی زۆر ئەنجامدراوە و تەواوی بەڵگەکانیشمان داوەتە کۆمسیۆن.

 

ڕێبوار حەمەد وتەبێژی کۆمەڵی ئیسلامیی بە دیپلۆماتیک مەگەزینی ڕاگەیاند:" کۆمەڵ لەسەر کۆی پێشێلکارییەکان سکاڵای تۆمارکردووە و چاوەڕوانی قسەی کۆتای کۆمسیۆنە، پێمانوایە ساختەکارییەکی زۆر ئەنجامدراوە و تەواوی بەڵگەکانیشمان داوەتە کۆمسیۆن".

سەبارەت بە جوڵانەوەی نەوەی نوێ، كه‌ به‌راورد به‌ هه‌ڵبژاردنی 12ی ئایار ده‌نگه‌كانی كه‌می كردووه‌، ئەنجامه‌كانی هەڵبژادن ره‌تده‌كه‌نه‌وه‌ و باس له‌وه‌ش ده‌كه‌ن ره‌نكه‌ نه‌چنه‌ په‌رله‌مان و بایكۆتی بكه‌ن.

کازم فاروق وتەبێژی جوڵانەوه‌ی نه‌وه‌ی نوێ بە دیپلۆماتیک مەگەزینی وت:" نەوەی نوێ ئەنجامی هەڵبژاردن ڕەتدەکاتەوە و ئەگەر بەمشێوەیە بێت بایکۆتی پەرلەمانی کوردستان دەکات و ناچیتە پەرلەمانەوە".

،،

وتەبێژی جوڵانەوەی نەوەی نوێ : ساختەکارییەکی زۆر بەرامبەر نەوەی نوێ کراوە و دەنگێکی زۆرمان پوچەڵکراوەتەوە.

 

وتەبێژی جوڵانەوەی نەوەی نوێ دەشڵێت:" ساختەکارییەکی زۆر بەرامبەر نەوەی نوێ کراوە و دەنگێکی زۆرمان پوچەڵکراوەتەوە".

 

rty
ژماردن و جیاكردنه‌وه‌ی ده‌نگه‌كانی هه‌ڵبژاردنی په‌رله‌مانی كوردستان ـ 2018.9.30

سەبارەت بە بزوتنەوەی گۆرانیش كه‌ له‌م هه‌ڵبژاردنه‌دا، لێدانێكی قورسی به‌ركه‌وت و زیاتر له‌ 10 كورسی په‌رله‌مانی له‌ ده‌ستدا، هێشتا دوایین هەڵوێستی خۆیان ڕانەگەیاندووە له‌سه‌ر پرۆسه‌ی هه‌ڵبژاردنه‌كه‌.

،،

شۆرش حاجی وته‌بێژی بزوتنەوەی گۆڕان: لەم هەڵبژاردنەدا پارتی و یەکێتی سەلماندیان کە هێزی هەڵبژاردن نین و 200 هەزار دەنگیان ساختەکردوە.

 

شۆرش حاجی، وته‌بێژی بزوتنەوەی گۆڕان ده‌ڵێت:" لەم هەڵبژاردنەدا پارتی و یەکێتی سەلماندیان کە هێزی هەڵبژاردن نین و 200 هەزار دەنگیان ساختەکردوە".

ده‌شڵێت": چاوەڕوان دەکەین دەنگە ساختەکان پوچەڵ بکرێتەوە و کۆمسیۆن رێکاری یاسایی خۆی بگرێتەبەر، بە پێچەوانەوە هەنگاوی یەکەمی گۆڕان رەتکردنەوەی کۆی پڕۆسەی هەڵبژاردنەکە دەبێت و دان بە ئەنجامەکانیدا نانێت.

 

author photo

رۆژنامەنووس

بەکالۆریۆس لە زمان و ئەدەبی کوردیی

ئەزموونی ١٠ ساڵ کارى رۆژنامەوانیی