بۆچی کاکەییەکان کورسی کۆتایان نیە؟

بۆچی کاکەییەکان کورسی کۆتایان نیە؟

3268 خوێندراوەتەوە

کاکەییەکان وەک پێکهاتەیەکی ئاینی لە عێراق و هەرێمی کوردستان هاوشانی پێکهاتە ئاینیەکانی تر، بونیان هەیە،بەڵام تا ئێستا کورسی کۆتایان نیە لە پەڕلەمانی عێراق و پەڕلەمانی کوردستاندا.

لە ڕۆژانی داهاتوودا، بۆ دروستکردنی "ئەنجومەنی باڵایی کاکەییەکان لە هەرێمی کوردستان – عێراق" بە بەشداری کاکەییەکانی هەرێـمی کوردستان و ناوچە جێناکۆکەکان و سەرجەم ناوچەکانی تری عێراق،کۆنفرانسێک لە شاری سلێمانی ساز دەکرێت.

،،

نوێنەری کاکەییەکانی هەڵەبجە: "تا ئێستا کاکەییەکان کورسی کۆتایان لە پەرلەمانی عێراق نیە، لەبەر ئەوەی کاکەییەکان دڵسۆزێكی وایان نەبووە کە لەکاتی نوسینەوەی دەستوری عێراقدا ناوی کاکەیی لە دەستورەکەدا بچەسپێنێت".

بە پێی ڕەشنوسێكی پێشنیازکراو بۆ کۆنفڕانسەکە یەکێك لەو ئامانجانەی کە ئەنجومەنە باڵاکە هەوڵی بەدیهێنانی دەدات،جێگیرکردنی ناوی کاکەییەکانە لە دەستوری هەرێمی کوردستاندا.تا لە ڕێگەیەوە بتوانن کورسی کۆتا بۆکاکەییەکان لە پەڕلەمانی کوردستان و دواتر لە پەڕلەمانی عێراقیش بەدەست بهێنن.

ئاکۆ شاوەیس، نوێنەری کاکەییەکانی هەڵەبجە و کاندیدی هەڵبژێردراوی کاکەییەکان بۆ ئەنجومەنی پارێزگای هەڵەبجە، بە دیبلۆماتیک مەگەزینی وت: "تا ئێستا کاکەییەکان کورسی کۆتایان لە پەڕلەمانی عێراق نیە لەبەر ئەوەی کاکەییەکان دڵسۆزێكی وایان نەبووە کە لەکاتی نوسینەوەی دەستوری عێراقدا ناوی کاکەیی لە دەستورەکەدا بچەسپێنێت".

وتیشی: "سەبارەت بە پەرلەمانی کوردستانیش کاکەییەکان کورسی کۆتایان نیە ئەگەر لەداهاتوودا نوسینەوەی دەستوری هەرێمی کوردستان کەوتەوە کار ئەوا ئەم ئەنجومەنە کە دروست دەکرێت نوێنەری دەنێرێتە پەڕلەمان بۆ ئەوەی داواکاریەکانی کاکەیی کە یەکێکیان بەدەستهێنانی کورسی کۆتایە بۆ کاکەییەکان، لە دەستوری هەرێمی کوردستاندا بچەسپێنێت".

،،

د.بەهار محمود: " مادام دەستوری هەرێمی کوردستان تەواو نەکراوە، پێویستە کاکەییەکان ناویان لە یاسای هەڵبژاردنی هەرێمی کوردستاندا جێگیر بکرێت،بۆ ئەوەی بتوانن کورسی کۆتا بەدەست بهێنن لە هەڵبژاردنەکانی داهاتووی هەرێمی کوردستاندا".

لەمیانەی ئەو هەوڵانەی کە کاکەییەکان بۆ بەدەستهێنانی مافەکانیان داویانە توانیویانە ناویان لە دەستوری تەواونەکراوی هەرێمی کوردستاندا و لە یاسای ژمارە ١ ی ساڵی ٢٠١٥ ی تایبەت بە پێکهاتەکان بچەسپێنن.بەڵام بارودۆخ و ململانێ سیاسیەکان لە هەرێمی کوردستان لە چانسی کاکەییەکان نەبوو بەوەی کە دەستوری هەرێمی کوردستان تەواو نەکرا هەتا ئەوان بتوانن لەو ڕێگەیەوە زۆرێك لە مافەکانیان بەدەست بهێنن.


د.بەهار محمود، جێگری سەرۆکی لیژنەی کاروباری یاسایی لە پەڕلەمانی کوردستان و ئەندامی لیژنەی نوسینەوەی دەستوری تەواو نەکراوی هەرێمی کوردستان، بە دیبلۆماتیک مەگەزینی وت: " لەماوەی ڕابردوودا،من کە ئەندامی لیژنەی نوسینەوەی دەستوری هەرێـمی کوردستان بووم، ئەوکات لەگەڵ نوێنەری کاکەییەکان کۆبوینەوە بۆ ئەو مەبەستە،بەداخەوە کاکەییەکان بۆ خۆیان لە ناو خۆیاندا، بووبوون بە دوو بەشەوە کە هەریەکەیان دەیان وت ئێمە نوێنەری کاکەییەکانین، بەڵام ئێمە ناوی کاکەییەکانمان لە پڕۆژەی دەستورە تەواو نەکراوەکەدا جێگیر کردبوو کە کورسیەکی کۆتا بدرێت بەوانیش لە پەرلەمانی کوردستان کە مافی خۆیانە وەک پێکهاتەیەکی ئاینی لە هەرێمی کوردستان کورسی کۆتایان هەبێت".

د.بەهار محمود، وتیشی : " مادام دەستوری هەرێمی کوردستان تەواو نەکراوە، پێویستە کاکەییەکان ناویان لە یاسای هەڵبژاردنی هەرێمی کوردستاندا جێگیر بکرێت،بۆ ئەوەی بتوانن کورسی کۆتا بەدەست بهێنن لە هەڵبژاردنەکانی داهاتووی هەرێمی کوردستاندا".

ئەگەر چی تا ئێستا ئامارێكی دروست و فەرمی تایبەت بە سەرژمێری کاکەییەکان لەسەر ئاستی عێراق و هەرێـمی کوردستان لە بەردەستدا نیە، بەڵام نوێنەری کاکەییەکانی هەڵەبجە دەڵێت: بە پێی هەندێک خەمڵاندن نزیکەی ١٥٠ هەزار بۆ ٢٠٠ هەزار کاکەیی لە عێراق و هەرێمی کوردستان بونیان هەیە.

 

author photo

 بەکالۆریۆس لە زمانی کوردی، ئەزمونی شەش ساڵ کاری ڕۆژنامەوانی لە میدیای نوسرا و بیستراودا