ئایا لە پێکهێنانى حکومەتدا، پارتى حەق لەیەکێتى دەکاتەوە؟

"هەرەشەکانى بارزانى لە پێکهێنانى حکومەتدا رەنگ دەداتەوە"

ئایا لە پێکهێنانى حکومەتدا، پارتى حەق لەیەکێتى دەکاتەوە؟

833 خوێندراوەتەوە

 بەنزیکى دواى ساڵێک لە 16ى ئۆکتۆبەرو شکستى ریفراندۆم ، قسەیەکى دیکەى بارزانى دەشکێنرێت و پۆستى سەرۆک کۆمار نادرێت بە پارتى، بۆیە هەرەشەکانى پارتى بەجیاو بارزانى بەتایبەتى پێ دەچێت پێکهێنانى کابینەى نوێى حکومەت لە کابینەى پێشوو ئاڵۆزتربکات، وەک نێچیرڤان بارزانیش رایگەیاند: " دەبێت خەڵکى باجى ئەمەش بدات".

 

،،

بارزانى بەوە ناسراوە کە زۆرترین هەرەشە دەکات وەک (قبوڵى ناکەم ،حساب بۆ یەک بەشەر ناکەم، وەڵامى توندمان دەبێت .. هتد) بەڵام کەمترین هەرەشەکانى جێ بەجێ دەکات.

 

بارزانى لەکاتى یەکێک لە هەرەشەکانیدا

 

 

 

شکاندنى قسەى بارزانى چى دەشکێنێت؟


بارزانى بەوە ناسراوە کە زۆرترین هەرەشە دەکات وەک (قبوڵى ناکەم ،حساب بۆ یەک بەشەر ناکەم، وەڵامى توندمان دەبێت .. هتد) بەڵام کەمترین هەرەشەکانى جێ بەجێ دەکات.

 
دواین هەرەشەشى لە پارتە هاوستراتیژە چەند ساڵەکەى بوو کە یەکێتى نیشتمانییە، دواى ئەوە لە بەغدا سەرکردە گەنجەکانى یەکێتى توانیان یارییەکە لە بارزانى ببەنەوەو پۆستى سەرۆک کۆمار نەدەن بەپارتى، ئەمە بارزانى نیگەرانکردوو لە راگەیەندراوێکدا ووتى: ئەم کارە بەهیچ شێوەیەک قابیلى قبوڵکردن نییە.

 
هەرەشەکەى بارزانى لەوەوە هات کە قسەکەى شکێنراوەو کاندیدەکەى کە فواد حسێن بوو نەکراوە بە سەرۆک کۆمار.

 
خێرا تورەبوونى بارزانى پێ ناچێت تەنها پەیوەندى هەبێت بە پۆستى سەرۆک کۆمارەوە، بەڵکو کۆنە قینى ساڵى رابردووى 16ى ئۆکتۆبەریشى لەدڵدابوو کە لەوێش پشتى لێکراو قسەى شکێنرا.

 

،،

بۆیە پێ دەچێت هەرەشەکانى بارزانى لە گفتوگۆکانى پێکهێنانى حکومەتدا رەنگ بدەنەوە و سەر ئێشە بۆ یەکێتى درووست بکەن.

 

 

 

 

 

پرسیارى سەرەکى ئەوەیە ئایا شکاندنى قسەى بارزانى چى بەدواى خۆیدا دەهێنێت و چى دەشکێنێت؟

 
لەبەردەم یەکێتى و پارتى چوار ساڵى چارەنووسساز هەیە، کە بە دەروازەى پێکهێنانى حکومەتدا تێدەپەرن، بۆیە ئەوەى لە ئێستادا ئەم دوانە پێکەوە کۆدەکاتەوە و رێکیان دەخات پێکهێنانى کابینەیەکى نوێى حکومەتە.

 
بۆیە پێ دەچێت هەرەشەکانى بارزانى لە گفتوگۆکانى پێکهێنانى حکومەتدا رەنگ بدەنەوە و سەر ئێشە بۆ یەکێتى درووست بکەن.

 

 

،،

وەرگرتنى پۆستى سەرۆک کۆمار بەو شێوەیە و شکاندنى رێکەوتنى نێوان پارتى و یەکێتى دەبێت هاوڵاتى کوردستان باجەکەى بدەن و پارتى وەڵامى توندى دەبێت.

 

 

 
نێچیرڤان بارزانى لە کۆنفرانسە رۆژنامەوانییەکەى کە رۆژێک دواى هەرەشەکانى بارزانى مامى لە هەولێر ئەنجامیدا، بە تورەیی و بە راستەوخۆ هێرشى کردە سەر بەرهەم ساڵح وەک سەرۆک کۆمارى عێراق و رایگەیاند:" بەرهەم ساڵح لە رابردوودا وەفاى بۆ یەکێتى نەبوو و ئێستاش وەفاى بۆ هاودیدانى نەبووە، هیوادارین لەداهاتوودا وەفاى بۆ کورد هەبێت"

  

 

 

 
ئاماژەشى بەوە کرد:" وەرگرتنى پۆستى سەرۆک کۆمار بەو شێوەیە و شکاندنى رێکەوتنى نێوان پارتى و یەکێتى دەبێت هاوڵاتى کوردستان باجەکەى بدەن و پارتى وەڵامى توندى دەبێت".

 

،،

هەرچەندە پارتى چاوى لە گۆرینى تەرازوى هێزە بۆ گۆرینى نەخشەى سیاسى، بەڵام هێشتا پەراوێزخستنى یەکێتى نزیکە لە مەحاڵەوە.

 

 

 

پارتى چى لەیەکێتى دەوێت.؟


پێ دەچێت چوار ساڵى داهاتوو چوار ساڵى زێرین بێت بۆ پارتى، چونکە دەنگێکى زۆرى هێناوەو کورسییەکانى پەرلەمانى لەچاو لایەنەکانى دیکە زۆر زۆرترن.
بۆیە رەنگە بیەوێت نەخشەى سیاسی لە بەرژەوەندى خۆى بگۆرێت، هەروەک لە زارى وتەبێژەکەیانەوە لە سلێمانى عەتا شێخ حەسەن لە چاوپێکەوتێنکیدا لەگەڵ دیپلۆماتیک مەگەزین، دوورۆژ پێش ئەنجامدانى هەڵبژاردنى 30ى ئەیلول ئاماژەى بەوە کرد پارتى دەیەوێت 50+1 کورسییەکانى پەرلەمان بەدەست بهێنێت و نەخشەى سیاسی بگۆرێت.

 

ئایا پارتى دەتوانێت نەخشەى سیاسى بگۆرێت؟


هەرچەندە پارتى چاوى لە گۆرینى تەرازوى هێزە بۆ گۆرینى نەخشەى سیاسى، بەڵام هێشتا پەراوێزخستنى یەکێتى نزیکە لە مەحاڵەوە.


پارتى لە هەموو حاڵەتێکدا بۆ حوکمڕانى کوردستان پێویستى بەیەکێتى دەبێت، واتە بێ یەکێتى ئەگەر بیەوێ هەرکارێک بکات گەورەترین سەر ئێشەى بۆ درووست دەبێت. هەرچەندە زۆرینەى کورسییەکانى پەرلەمانیشى بەدەستهێنابێت.

 

،،

بەهۆى گەزرانى پارتى بەدەست یەکێتییەوە، پێ ناچێت ئەمجارە پارتى وا بە ئاسانى رێکەوتن لەگەڵ یەکێتى ئەنجام بدات، رەنگە ئیدى واژۆى قورسترى پێ بکات کە شکاندنى ئاسایی نەبێت و هەر هەنگاوێکیش پێچەوانەى ئەمە پارتى، هەرێم بەرەو دوو ئیدارەیی و تێکدانى دۆخەکە ببات وەک چۆن خولى پێشوو پەرلەمانى پەکخست.

 

 
بۆیە یەکێتى لە ئێستەوە پێدەچێت چارەسەرى سەرئێشەکەى بە پارتى دابێت، ئەویش ئەوەیە پارتى بە کۆمەڵێک مەرجەوە یەکێتى قبوڵ دەکات لە کابینەى نوێ.

 
ئەگەرى زۆرە یەکێک لە مەرجە سەرەکییەکانى پارتى گۆرینى سیستەمى سیاسی بێت کە لە چوار ساڵى داهاتوودا لەنێو پەرلەمانەوە یەکلایى دەکرێتەوە و دەیەوێت ئەو بابەتە لەبەرژەوەندى بارزانى بشکێتەوەو مەرجى سەرەکى پارتیش ئەوە دەبێت کە یەکێتى نابێت رێگرى بۆ درووست بکات.

 

 

 

 
بەهۆى گەزرانى پارتى بەدەست یەکێتییەوە، پێ ناچێت ئەمجارە پارتى وا بە ئاسانى رێکەوتن لەگەڵ یەکێتى ئەنجام بدات، رەنگە ئیدى واژۆى قورسترى پێ بکات کە شکاندنى ئاسایی نەبێت و هەر هەنگاوێکیش پێچەوانەى ئەمە پارتى، هەرێم بەرەو دوو ئیدارەیی و تێکدانى دۆخەکە ببات وەک چۆن خولى پێشوو پەرلەمانى پەکخست.

 

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان