شێخ جەعفەر بۆ دیبلۆماتیک: خۆزگە بمردمایە، نەک 16ى ئۆکتۆبەرم بدیایە

شێخ جەعفەر بۆ دیبلۆماتیک: خۆزگە بمردمایە، نەک 16ى ئۆکتۆبەرم بدیایە

1971 خوێندراوەتەوە

ساڵێک بەسەر ئەو رۆژەدا تێدەپەرێت کە هەندێ بە خیانەت و هەندێکى دیکەش بە سەروەرى لە قەڵەمى دەدەن، چونکە لەمرۆژەدا کە 16ى ئۆکتۆبەرە نزیکەى ٥٠%ى خاکى کوردستان بە کەرکووکیشەوە رادەستى هێزە عێراقیەکان کراو شکست بە پرۆسەى ریفراندۆمیش هێنرا، بەرپرسى هێزەکانى حەفتاى سەر بەیەکێتى نیشتمانیش، لەبرى ئەم رۆژە ئاوات بە مەرگى دەخوازێت و دەشڵێت" ئەگەر لێکۆڵینەوەیەکى ورد بکرێت، دەستى خیانەت دەردەکەوێت".


جەعفەر شێخ موستەفا، وەزیرى پێشوى پێشمەرگەو بەرپرسى هێزەکانى حەفتاى سەر بەیەکێتى نیشتمانى و یەکێک لە فەرماندەکانى رۆژەکانى 16ى ئۆکتۆبەر، تایبەت بەم رۆژەو کاریگەرییەکانى، بۆ دیپلۆماتیک مەگەزین دەدوێت و بۆ یەکەمین جار هەندێ زانیارى دەخاتە روو.

 

" بۆ پێشمەرگە کتوپر بوو، گەرنا شەرى خۆى دەکرد"
ئەو بەرپرسە باڵایەى هێزەکانى پێشمەرگە دان بەوەدا دەنێت کە هێرشەکانى حەشدى شەعبى بۆ سەر پێشمەرگەو هاتنە پێشەوەیان، شتێکى کت و پربووە بۆیان، گەرنا پێشمەرگە بەهێزەو دەیتوانى بۆ ماوەیەکیش بێت شەرى خۆى بکات.


"پێشمەرگە دەیان داستانى گەورەى تۆمار کردووە و قەد لە شەر راینەکردووە، و دەشمانزانى هەر دەبێت رۆژێک شەرى هێزە عێراقیەکانیش بکەین و بەغدا پەلامارمان دەدات، بەڵام بەداخەوە نەمانزانى بەو کتوپرە شتێک روو دەدات و بەرگەى مقاومە ناگرین". شێخ جەعفەر وایگووت.


ئەو بەرپرسە سەربازییە باڵایە وتیشى" بەداخەوە پێشمەرگە ئەو رۆژە دۆرا، شکستى هێنا، چونکە هێزە عێراقییەکان بەهێز بوون و لەناکاو هەموو لایەکیان لێگرتین، بۆیە نامانتوانى ئەو شەرە کتوپر و نابەرامبەرە بکەین".


شێخ مستەفا دەشڵێت" ئەو قسەیە زۆر هەڵەیە کە هەندێ 16ى ئۆکتۆبەر بە سەروەرى دەزانن ، چونکە لەو رۆژەدا هێزى پێشمەرگە شکا و لە مەندەلى تا شەنگال را دەستى هێزى حەشدى شەعبى و عێراق کرا".

،،

"یەک فەرماندەى هێزەکانى پێشمەرگە نە کەمووکورى هەبووە و نە لەگەڵ بەغداش رێک کەوتووە، بەڵام دەکرێت کەسانێک هەبن لەدەرەوەى پێشمەرگە و لە ئاستى باڵا، چووبن لەگەڵ بەغدا رێک کەوتبن و 16ى ئۆکتۆبەریان خوڵقاندبێت، بەڵام من ناو ناهێنم، با لێکۆڵینەوەکان ئەمە دەر بخەن".

 

"ئەگەر لێکۆڵینەوە بکرێت، دەردەکەوێت کەسانێک لەگەڵ بەغدا رێک کەوتوون"
جەعفەر شێخ موستەفا، کە یەکێک بوو لە قسەکەرە دیارەکانى رۆژەکانى 16ى ئۆکتۆبەرو دواتر، لەرێگەى دیپلۆماتیکەوە ئەوە رادەگەیەنێت: " ئەگەر لێکۆڵینەوەیەکى عادلانە و بێ لایەنانە بکرێت، من ئامادەم وەک بەرپرسێکى پێشمەرگەو بەناوى هێزەکانى حەفتاو هەشتا و مەکتەبى سیاسی یەکێتیشتەوە بچمە بەردەم دادگاو شایەتى بۆ ئەوە بدەم کە هێزەکانى پێشمەرگە خیانەتیان نەکردووە و کەموکوریان نەبووە".


ئەو تەحەفوزى هەیە لەسەر ناوهێنانى هەندێ کەس و لایەن بەڵام بە ناراستەوخۆ ئەوە دەڵێت کە لەدەرەوەى مەکتەبى سیاسی یەکێتى و هێزەکانى پێشمەرگە کەسانێک هەبوون چوون لەگەڵ بەغدا رێکەوتیان کردووە و کەرکووکیان رادەستى حەشدى شەعبى کردووە.


"یەک فەرماندەى هێزەکانى پێشمەرگە نە کەمووکورى هەبووە و نە لەگەڵ بەغداش رێک کەوتووە، بەڵام دەکرێت کەسانێک هەبن لەدەرەوەى پێشمەرگە و لە ئاستى باڵا، چووبن لەگەڵ بەغدا رێک کەوتبن و 16ى ئۆکتۆبەریان خوڵقاندبێت، بەڵام من ناو ناهێنم، با لێکۆڵینەوەکان ئەمە دەر بخەن".

ئەو بەرپرسەى هێزەکانى حەفتا راشکاوانە تر قسە دەکات و شتى وردتر دەدرکێنێت و پێى وایە هەڵەیە بڵێین لەسەداسەد هەموو کەسە دیارو باڵاکانى یەکێتى و خودى یەکێتى بێ تاوانن و دەستیان لەم شکستەدا نەبووە.


بۆیە دەشڵێت: "ناتوانین بڵێین یەکێتى و هەندێ لە کەسە باڵاکانى بێ تاوانن و لە لێکۆڵینەوەیەکى وردا دەرباز دەبن و دەستیان نابێت لەم شکستە گەورەى بەسەر پێشمەرگەدا هاتووە".


بۆیە پێى وایە دەبێت بەزوورترین کات لێکۆڵینەوە بکرێت و هەموو ئەوانەى خیانەتیان کردووە بۆ راى گشتى ئاشکرا بکرێن تاکو پێشمەرگە لاى خەڵکى ناشرین نەکرێت.

لەم ڕوەوە شێخ جەعفەر وتى"خۆزگە ئەوکاتەى پەرلەمانمان هەبوو بە زووترین کات لێکۆڵینەوە دەکرا و دەردەکەوت کێ ئەمەى بەسەر پێشمەرگەدا هێنا،من رازیم نییە کەس پێشمەرگە تۆمەتبار بکات و پەنجەى بۆ راکێشن، چونکە پێشمەرگە لەهەموان ماندووترە".

،،

"خۆزگە ئەو رۆژە من دەمردم و دەکوژرام نەک 16ى ئۆکتۆبەرم بدیایە، چونکە گیان لەدەستدان زۆر باشترو خۆشترە لەوەى پێشمەرگەو هاورێکانت بەو شێوەیە ببینیت".

 

"خۆزگە بمردمایە نەک 16ى ئۆکتۆبەرم بدیایە"
شێخ جەعفەر شێخ موستەفا بەحەسرەوەتەوە بە دیپلۆماتیکى ووت کە مردنى پێ باشتر بووە لەو رۆژەدا نەک پێشمەرگەى بەو شێوەیە بدیایە.

ئەو فەرماندە سەربازیە داواکاریەکى هەیە لە خەڵکى کوردستان و داوادەکات کەس بە پێشمەرگە نەڵێت خائین و خۆفرۆش تا لێکۆڵینەوەیەک بکرێت و دەربکەوێت کێ لەپشتى پێشمەرگەوە ئەم خیانەتە گەورەیەی کردووە.

ئەمڕۆ ساڵێک بەسەر 16ى ئۆکتۆبەرى ساڵى 2017 تێپەڕدەبێت کە حەشى شەعبى هێرشى کردە سەر کەرکوک و هێزەکانى پێشمەرگە لە شارەکە کشانەوە تا دەرەنجام کەرکووک رادەستى هێزە عێراقییەکان کراو هەتاکو ئەمرۆش کاریگەرییەکانى ئەو رۆژە لەسەر هەرێمى کوردستان و هاوڵاتییەکانى ماوە.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان