ئەتەوێت بكەویتە پاقلەكەوە؟

خاڵە فاروق هەم پاقلەی لایە و هەم قسەی خۆش

ئەتەوێت بكەویتە پاقلەكەوە؟

288 خوێندراوەتەوە

 24 ساڵ لەمەوبەر واتە لەدوای تەنها سێ ساڵ لە ئازادكردنی كوردستان بەگشتی و سلێمانی بەتایبەتی لە دەستی رژێمی بەعس، و لە گەرمەی شەری براكوژی نێوان یەكێتی و پارتی، كە كوردستان وەك ئێستە بەدۆخێكی ئابوری خراپدا تێ دەپەری. خاڵە فاروقی پەقلە فرۆش بەخۆی و مەنجەڵێك پاقلەوە دێتە تەنیشتی دیوارەكەی سەرۆكایەتی زانكۆی سلێمانی لە سەرەتای شەقامی مەولەوی.

 
دەیەوێت لێرەوە چی دی چاوەروانی ئەو حكومەتە كوردییە نەكات كە لەسەر قوربانی و ماندووبونی چەندانی وەك ئەو و هاورێكانی پێكهێنراوە، و بەدەستی خۆی ژیانی خۆی دابین بكات.

 

خاڵە فاروق لە تەنیشت دیوارەكەی سەرۆكایەتی زانكۆی سلێمانی لە سەرەتای شەقامی مەولەوی

 

تیمی دیپلۆماتیك مەگەزین، پێی باشە بوو لەسەرەتای وەرزی سەرما و سۆڵەو زیادبوونی موشتەری پاقلەو شێلمی كوڵیو، سەردانی خاڵە فاروق بكات و بەدەم خواردنی پاقلەو گێرانەوەی هەندێ بەسەرهاتەوە باسی خۆی و كارەكەیمان بۆ بكات.

 

 

،،

من زیندانی سیاسی بووم، سێ ساڵی تەواو لە ئەبوغرێب بەدەست جەلادەكانی بەعسەوە ئازارم چەشت، بەڵام ئێستا ناتوانم شانازی بكەم بەو رۆژانەوە كە پێشمەرگەی نهێنی ناو شار بووم

 

 

 

"سێ ساڵ لە ئەبوغرێب بووم"


ئەو هەناسەی قوڵی هەڵنەدەمژی بۆ لەدەستدانی ئەوەی كە نەبووەتە موچەخۆری حكومەت و هیچی بۆ نەكراوە، بەڵكو خەفەتی بۆ ئەو چەندین ساڵە دەخوارد كە لەسەردەمی رژێمی بەعس، لە رێكخستنە نهێنییەكاندا، پێشمەرگە بووە.

 

 

 

 
" من زیندانی سیاسی بووم، سێ ساڵی تەواو لە ئەبوغرێب بەدەست جەلادەكانی بەعسەوە ئازارم چەشت، بەڵام ئێستا ناتوانم شانازی بكەم بەو رۆژانەوە كە پێشمەرگەی نهێنی ناو شار بووم". خاڵە فاروق وایوت.

،،

قوتی ماڵ و منداڵم لەسەر ئەم پاقلە فرۆشتنەیە، ناهێڵم منداڵەكانم موحتاجی كەس ببن، 24 ساڵە بەسەرماو بە گەرما من لەتەنیشتی ئەم دیوارەدا وەستاوم و كاسپی خۆم دەكەم.

 
ئەو پیاوە كۆڵنەدەرو پاقلە فرۆشە، بەشانازییەوە باس لە پیشەكەی دەكات و دەڵێت:" حكومەتی هەرێمی كوردستان بۆ چەند كەسێك بوو بە مایەی خێر، بەڵام من نامەوێ نانخۆری ئەوانە بم، شانازی بەئیشەكەی خۆمەوە دەكەم و پێی سەر بەرزم".

 

خاڵە فاروق ناوی تەواوی (فاروق ئیبراهیم)ە، و خاوەنی پێنج سەر خێزانە و سێ لە منداڵەكانی خوێندكارن.


"قوتی ماڵ و منداڵم لەسەر ئەم پاقلە فرۆشتنەیە، ناهێڵم منداڵەكانم موحتاجی كەس ببن، 24 ساڵە بەسەرماو بە گەرما من لەتەنیشتی ئەم دیوارەدا وەستاوم و كاسپی خۆم دەكەم". فاروقی پاقلە فرۆش وای بە ئێمە گووت.

هێدی هێدی لەگەڵ ئەو بارانە بەخورەی كە دەباری، خەڵكی دەهاتن و لەژێر چەترەكەی خاڵە فاروقدا دەوەستان و داوای قاپێك پاقلەیان دەكرد. " ئا خاڵە فاروق بایی هەزاریش پاقلەم بۆ بكە بە سەفەری" موشتەرییەك وایوت.

 

 

،،

ساڵێكیان دوو گەنج هاتن هەمان پرسیاریان كرد، كە بۆچی پاقلەكەم هێندە بەتامە؟، منیش بۆ خۆشی وتوومە ئەچم لە بازار ((سڕی میهنە)) ئەكڕم و تێی ئەكەم بۆیە خۆشە، یەكێك لە گەنجەكان بروای بە قسەكەم كردوو و وتی: منیش ئەچم ئەو سری میهنەیە ئەهێنم و لەماڵەوە ئەیكەمە پاقلەكەوە با خۆش دەرچێت، هاورێكەی دیكەی دەستی كرد بە پێكەنین و وتی: بەخوا سوعبەتمان لەگەڵ ئەكات".

 

 

"پاقلەكەم موشتەری خۆی هەیە"


تامی پاقلەكەی تایبەت بوو، بۆیە پرسیارەكەمان پێ دەچوو سەد بارە بوو بێت بۆی كاتێك گووتمان، چی دەكەیتە ناو پاقلەكەت هێندە خۆشە؟


لە كوردەواریدا زۆرجار دەوترێت " خستیە پاقلەكەوە"، چەندین جار رویداوە خاڵە فاروقیش بۆ خۆشی موشتەریەكانی بخاتە پاقلەكەوە:

 
"ساڵێكیان دوو گەنج هاتن هەمان پرسیاریان كرد، كە بۆچی پاقلەكەم هێندە بەتامە؟، منیش بۆ خۆشی وتوومە ئەچم لە بازار ((سڕی میهنە)) ئەكڕم و تێی ئەكەم بۆیە خۆشە، یەكێك لە گەنجەكان بروای بە قسەكەم كردوو و وتی: منیش ئەچم ئەو سری میهنەیە ئەهێنم و لەماڵەوە ئەیكەمە پاقلەكەوە با خۆش دەرچێت، هاورێكەی دیكەی دەستی كرد بە پێكەنین و وتی: بەخوا سوعبەتمان لەگەڵ ئەكات".

ئەو لەگەڵ وەرزی سەرماو سۆڵە چوار دەوری پر دەبێت لەخەڵك، لە ژن و پیاو گەنج و پیر و منداڵ ، وەك خۆشی دەیوت: "خەڵكی سەرمایان دەبێت دێن تاكو گەرمیان بكەمەوە"

 

،،

ئەو لەكۆتایدا دەیەوێت ئەم چەندین ساڵەی ژیانی كە ماویەتی، هەر بەدەم پاقلە فرۆشتنەوە بەرێی بكات و نە چاوەروانی حكومەتی بنكە فراوان بێت نە دەست لە هیچ حزب و مەسولێك راگرێت.

 

 

خاڵە فاروق كە دەموو چاوی لەبەر هەڵم و هاڵاوی پاقلەكە دیار نەبوو، ئەوەشی بە دیپلۆماتیك گووت:" من ئەوەنە كۆنم لێرەدا، منداڵ هەبووە پاقلەم پێ دەفرۆشت، بەڵام ئێستە منداڵەكەی دێت پاقلەم لا دەكرێت".

 

ئەو لەكۆتایدا دەیەوێت ئەم چەندین ساڵەی ژیانی كە ماویەتی، هەر بەدەم پاقلە فرۆشتنەوە بەرێی بكات و نە چاوەروانی حكومەتی بنكە فراوان بێت نە دەست لە هیچ حزب و مەسولێك راگرێت.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان