نەوشیروان مستەفا چۆن باسی هەڵەکانی خۆی دەکات؟

یەكەمین سەرۆك حزبی باشورە دان بەهەڵەی خۆیدا دەنێت

نەوشیروان مستەفا چۆن باسی هەڵەکانی خۆی دەکات؟

2187 خوێندراوەتەوە


نەوشیروان مستەفا، رێكخەری كۆچكردوی بزووتنەوەی گۆڕان، لەنێو تۆماری مێژوی خەباتی سیاسی و پێشمەرگایەتی خۆیدا، دانی بەوەداناوە چەندین هەڵەی ئەنجامداوە، كە بەوتەی خۆی كاریگەری لەسەر رەوتی روداوەكانی رابردووی گۆڕەپانی سیاسی كوردستان دروستكردووە. رەنگە لە مێژووی سەركردە سیاسییەكانی باشووری كوردستاندا دەگمەن بێت و ناوبراو بكاتە یەكەمین سەرۆك حزب دان بەهەڵەی خۆیدا بنێت.


نەوشیروان مستەفا، كە لەدوای راپەڕین و بەدروستی لە ساڵی 1997 دەستی بەنوسینەوەی بیرەوەرییەكانی خەباتی شاخ و پێشمەرگایەتی خۆی كردووە، روداوەكانی شۆڕشی نوێی باشووری كوردستانی تۆماركردووەو لەناو ئەو روداوانەشدا باسی هەڵەكانی خۆی كردووە، بەجۆرێك هەست بە پەشیمانی دەكات و تێیدا لۆمەی خۆی دەكات

دیپلۆماتیك مەگەزین، لەم راپۆرتەدا ئەو هەڵانە دەخاتەڕوو كە نەوشیروان مستەفا لە كتێبەكانیدا ئاماژەی پێداوەو وەك بریارێكی نادروست خراپ وێنای دەكات، كە بەڕای ئەو كاریگەری خراپی هەبووە لەسەر رەوتی روداوەكان. لێرەدا بەكورتی ئەو هەڵانە دەخەینەڕوو كە ناوبراو دانی پێداناوە.

 

،،

"پێموایە ئەبو ئەوسا ئێمە هەڵوێستێكی ترمان هەبوایە بەرامبەر مردنی مەلا مستەفا، سەرەڕای هەموو دوژمنایەتییەكی لەگەڵ یەكێتی و هەموو كارە خراپەكانی، مەلا مستەفا بەگەورەترین سەركردەی كورد دائەنرا. ئەبوو ئێمەش لەو رۆژەدا لەباتی ئەوەی هێرشی بكەینە سەر، پەیامی پرسەو سەرەخۆشیمان بۆ بنەماڵەی بارزانی و ئەندام و لایەنگرانی پارتی بناردایە."

 

هەڵەی یەكەم:
نەوشیروان مستەفا، لە لاپەڕە 115ی كتێبی (پەنچەكان یەكتری ئەشكێنن) بەمجۆرە باسی یەكەمین هەڵەی خۆی دەكات: ئێستا كە بە رابردوودا ئەچمەوە، پێموایە ئەبو ئەوسا ئێمە هەڵوێستێكی ترمان هەبوایە بەرامبەر مردنی مەلا مستەفا، سەرەڕای هەموو دوژمنایەتییەكی لەگەڵ یەكێتی و هەموو كارە خراپەكانی، مەلا مستەفا بەگەورەترین سەركردەی كورد دائەنرا. ئەبوو ئێمەش لەو رۆژەدا لەباتی ئەوەی هێرشی بكەینە سەر، پەیامی پرسەو سەرەخۆشیمان بۆ بنەماڵەی بارزانی و ئەندام و لایەنگرانی پارتی بناردایە، ئەگەرچی بەدەنگەمانەوە نە ئەهاتن، بەلام ئێمە ئەوەمان بكردایە بە بۆنەیەك داوایان لێ بكەین لاپەڕەیەكی تازە بۆ پەیوەندی یەكێتی و پارتی بكەنەوەو بانگیان بكەین بۆ ئاشتبوونەوەی نەتەوەیی. بەڵام ئێمە ئەوەمان نەكرد چونكە هێشتا لەژێر تەئسیری روداوەكانی هەكاریدا كاس و تاسا بووین.

،،

كابرایەكی كۆنە شیوعی بەناوی (حەمە سەعید حەسەن) كەخۆی بەچەپێكی توندڕەوو نوسەرو شاعیرو رەخنەگر دائەنا. نامیلكەیەكی نوسی بوو، دابوی بە بەدەزگای راگەیاندنی یەكێتی بۆی چاپ بكەن، لەنامیلكەكەیدا بەزمانی سەرسەری سەرجادە دوابوو، جنێوی پیسی بەنوسەرو ئەدیبەكانی كورد دابوو. ئیتیهامی كردبوون بەترسنۆكی، جاسوسی و جاشایەتی بەعس. نامیلكەكە بڵاوبووەوە، بەڵام دەنگی ناڕەزایی لەهەموو ئەدیبەكانەوە بەرز بووەوە

 

هەڵەی دووەم:
نەوشیروان مستەفا لە لاپەڕەی 182ی هەمان سەرچاوەی پێشوودا لەبارەی كێشەكانی ئەوسای باڵەكانی یەكێتی و كارەكانی محەمەدی حاجی مەحمود كە دواتر بووە هۆی جیابوونەوەی ناوبراو، بەمجۆرە دان بەهەڵەیەكی خۆیدا دەنێت: لەناو مەكتەبی سیاسی و سەركردایەتی یەكێتیدا زۆریان رەئیان وابوو حەمەی حاجی مەحمود بەناوی یەكێتییەوە بەڕەڵایی و راورووتی زۆری كردووە. پارەیەكی زۆری كۆكردووەتەوە، پێویستە بێ سزادان وازی لێنەهێنن. بەڵام لەبەرئەوەی لەدەستی دێت یاخی ببێ و بداتە پاڵ ناحەزەكانی یەكێتی یا بچێتە پاڵ رژێم، چاكتر وایە چەكی بكەین و بیگرین، ئەگەر دەستی كردەوە بیكوژین. من بەتوندی چوم بەگژ ئەو رەئیەداو نەمهێشت هیچی لێ بكەین، چونكە پێموابوو بۆ ناوبانگی یەكێتی باش نییە بەوجۆرە رەفتار لەگەڵ كاربەدەستێكی ناسراوی خۆی بكات. ئەبێ بەنەرمی و ئامۆژگاری لەگەڵی بجوڵێینەوە. روداوەكان دەریانخست من بەهەڵەدا چو بوم و رەئی هاوڕێكانم راست بو.

،،

"لەناو مەكتەبی سیاسی و سەركردایەتی یەكێتیدا زۆریان رەئیان وابوو حەمەی حاجی مەحمود بەناوی یەكێتییەوە بەڕەڵایی و راورووتی زۆری كردووە. پارەیەكی زۆری كۆكردووەتەوە، پێویستە بێ سزادان وازی لێنەهێنن. بەڵام لەبەرئەوەی لەدەستی دێت یاخی ببێ و بداتە پاڵ ناحەزەكانی یەكێتی یا بچێتە پاڵ رژێم، چاكتر وایە چەكی بكەین و بیگرین، ئەگەر دەستی كردەوە بیكوژین."

 

هەڵەی سێهەم:
ناوبراو لەباسی دەستگیركردنەكەی لەلایەن حزبی سۆسیالیست، لە لاپەڕە 187ی هەمان سەرچاوەدا، بەمجۆرە باسی هەڵەی سێهەمی خۆی دەكات: شەو كەچومە گوندی قەویلە، لەماڵی حاجی عەلی، كە ناسیاوی حەمەی حاجی سابیر بوو دابەزین. میوانێكی كەشیان هەبوو، نامەیەكم بۆ ملازم تایەر نوسی، لەنامەكەدا ئاگادارم كردبوو كە بۆ كارێكی تایبەتی خۆم هاتومەتە ناوچەكەو ئامادەیی خۆمم دەربڕی بۆ بینینی و بۆ ئەوەی هەردوكمان هەوڵی خاوكردنەوەی گرژی نێوان پێشمەرگەكانی هەردوولا بدەین. ئەم نامە نوسینە بێ خۆ ئامادەكردنی پێشمەرگەیی پێشەكی. هەڵەیەكی گەورەو كوشندە بوو كردم، لەباتی ئەوە ئەبوو دەستبەجێ هەموو هێزەكانی یەكێتی لەناوچەكەدا كۆبكەمەوە ئەنجا نامەیان بۆ بنوسم.

  

هەڵەی چوارەم:
نەوشیروان مستەفا لەلاپەڕە 309ی هەمان سەرچاوەدا، لەباسی كتێبەكەی حەمە سەعید حەسەن، بەمجۆرە لەبارەی هەڵەی چوارەمییەوە دەدوێت: ناكۆكی دورودرێژی ناو جوڵانەوەی كوردو ناكۆكی شەخسی، لەناو نوسەرانیشدا دەنگی دابووەوە. كابرایەكی كۆنە شیوعی بەناوی (حەمە سەعید حەسەن) كەخۆی بەچەپێكی توندڕەوو نوسەرو شاعیرو رەخنەگر دائەنا. نامیلكەیەكی نوسی بوو، دابوی بە بەدەزگای راگەیاندنی یەكێتی بۆی چاپ بكەن، لەنامیلكەكەیدا بەزمانی سەرسەری سەرجادە دوابوو، جنێوی پیسی بەنوسەرو ئەدیبەكانی كورد دابوو. ئیتیهامی كردبوون بەترسنۆكی، جاسوسی و جاشایەتی بەعس. نامیلكەكە بڵاوبووەوە، بەڵام دەنگی ناڕەزایی لەهەموو ئەدیبەكانەوە بەرز بووەوە. چەندین نوێنەر نامەیان نارد، ئەوەی ئەوانی زۆر ناڕەحەت كردبوو، ئەوەبوو نامیلكەكە دەزگای راگەیاندنی یەكێتی چاپ و بلاوی كردبووەوە. لەمەدا هەڵەیەكی منی تێدا بوو، لەكاتی چاپكردنیدا ئەرسەلان بایز بە بێتەل لەمنی پرسی حەمەسەعید نامیلكەیەكی هێناوە بۆی چاپ بكەین یا نە؟ منیش بێ ئەوەی بزانم یا بپرسم ناوەڕۆكەكەی چی تێدایە، یان ئەرسەلان بۆم باس بكات وتم بڵاویبكەنەوە. تومەز ئەرسەلان خۆیشی ئەو جۆرە نوسینانەی پێخۆش بوو.

 

author photo

ڕۆژنامەنووس