لە نسکۆوە بۆ عەفرین، لە عەفرینەوە بۆ ڕۆژهەڵاتی فورات

قۆناغی پۆست - ئازاکان

لە نسکۆوە بۆ عەفرین، لە عەفرینەوە بۆ ڕۆژهەڵاتی فورات

715 خوێندراوەتەوە

مێژووی کورد لەگەڵ ئەمەریکا هەرگیز پەیوەندیی نێوان دوو میللەت نەبووە، بەڵکو پەیوەندیی ئەمەریکا وەک سوپەر هێزێک لە ناوچەکەی ئێمە کاریگەریی خۆی جێهێشتووە.

 نسکۆ/ئاشبەتاڵ تەمرینی یەکەم بوو کە ئەم زلهێزە ستراتیژی خۆی لەسەر جوگرافیای بەرژەوەندی دادەڕێژێ نەک لەسەر جوگرافیای مێژوویی. ئەوەی پارەکە لە عەفرین روویدا، خوێندنەوەیەکی قووڵی بۆ نەکرا، کوردی باش ( ئەملای فورات) و کوردی خراپ ( ئەولای فورات) لێکەوتەوە کە لەبنەڕەتدا، بێموبالاتی ئەمەریکا بوو بەرامبەر بە کوردی رۆژئاوا و سەرکەوتنی ئەردوگانی لێ کەوتەوە.

 کوردانی خۆمان هەموو رۆژێک بەرامبەر بە هاڕەی لیرەی تورکی و تومانی ئێرانی هەڵدەپەڕین وایاندەزانی ئیدی خۆری بیست و یەک گۆشەکە لە ئاسۆی کوردانەوە هەڵدێ.

،،

ئێمە نابین بە قەوارە، چونکە ئەمە لە ستراتیژییەتی هیچ لایەنێک نییە ؛ نە ئەوروپا نە ئەمەریکا، تەنانەت ناوماڵی کوردی هێشتا بە ژێر ئەو رەشماڵە دەکات کە پسمامەکان چوونە بۆ راوە مامز.

 

 

  هەر دوێنێ بوو، مەعەلیمی سوریا گوتی، ئەمەریکییەکان پشت لە کوردانی رۆژئاوا دەکەن.  هەر دوێنێ بوو هەڵکردنی ئاڵای کوردستان لەسەر بارەگای حیزبی شیوعی لە کەرکووک، وەخت بوو بکرێ بە داستانی قەڵای دمدم لە شارێکدا کە زبڵخانەکانی لە قوتابخانەکانی زیاترن.  ئێمە ئامادەین لەسەر گۆفەکەکان ئاڵاکانمان بچەقێنین و هەست بە سەرکەوتنێکی بێ مانا بکەین.

هەر ئەمڕۆ لەشکری ئەمەریکی، لە رۆژئاواز دەست بە کشانەوە دەکەن، چونکە چیدی پێویستیان بە "ئازا"کان نەما و دەوڵەتی ئیسلامیان تێکشکاند، بە بێ گوێدانە سبەینێ و ئایندە کە کورد وەک نێچیرێکی بریندار دەکەوێتە ژێر بەزەیی تورک و دەسەڵاتی ئەسەد و ئێران و روسیا. ئەمە دەبێتەوە بە مەسەلەیەکی داخیلی.

 لە هەموو هاوکێشەکاندا تورکیا گرنگی زیاتری بۆ رۆژئاوا هەیە و مەحاڵە بە کوردی دۆ خۆر بیگۆڕنەوە. کورد لە دوا لاپەڕەکانی هەموو قۆناغەکاندا، ئازایەتی سەری دەخوا. تەنانەت بۆ موفاوەزاتە سوکەڵەکەی ١٩٨٣ یش، وەکو تاریق عەزیز دەیگێڕێتەوە، بە تەلەفۆنێکی تورکان تێکدرا، لە سەردەمێکدا، سەدام هەموو عێراقی بەدەستەوە بووە و بە شێوەیەکی مەعنەویش نیوەی جیهانی عەرەبی گوێڕایەڵی بوو.

 ئەمەریکا لە سەردەمی ئۆباماوە نایەوێ چیدی لە رۆژهەڵاتی ناوەند ئەوەندە ئامادەگی هەبێ کە نەوت ئیدی ئەو بابەتە زۆر گرنگە نییە کە شەڕی بۆ بکات، چونکە یەدەگێکی زۆری نەوت لە ئەمەریکا دۆزراوەتەوەو ئەمەریکا پێویستی بەوە نییە ملی خۆی بۆ بشکێنێ.

 ئێمە نابین بە قەوارە، چونکە ئەمە لە ستراتیژییەتی هیچ لایەنێک نییە ؛ نە ئەوروپا نە ئەمەریکا، تەنانەت ناوماڵی کوردی هێشتا بە ژێر ئەو رەشماڵە دەکات کە پسمامەکان چوونە بۆ راوە مامز.

 

 

،،

 کورد هیچ بژاردەیەکی نییە تەنها ٣ شت نەبێ : خاک و خەڵک و زمان. ئەم سێ پێکهاتەیە لە ژێر هەڕەشەدان

 

 کورد دەبێ لە ناوخۆی و لەگەڵ خۆی ئاشت بێتەوە، بەڵام نینۆکەکان هەندە دەرهێنراون و هیچ باگراوندێکی فیکری سیاسیی مەدەنیش لە گۆڕێدا نییە تاکو لە پەنجا ملیۆنەی کە هەین ببین بە دوو ملیۆنی خاوەن بڕیار و بارستایی و هێز.

 کورد لە مێژە وتویەتی زۆری و بۆری. ئێمە ئەو زۆر بۆرەیەن کە نە خۆمان حیساب بە خۆمان دەکەین نە کەس. هەر دوێنی نادیە موراد ئەتک کرا، هەر دوێنێش بوو چووەوە خزمەت چاوش ئۆغلو...

 هاوکێشەکانی دنیا لە بەرژەوەندی میللەتاندا نین، بە تایبەتی ئەمڕۆ، لە ناو ئەم عەولەمەیەی کە وەکو حەزیا، ئاگری نیو لیبرالیسم لە کونە لووتەکانییەوە دەردەچێ، دەوڵەتە نەتەوەییەکان بیر لە بەرژەوەندیی خۆیان دەکەنەوە لە غیابی گوتارێکی هاوئاوازی گەردوونی.

 کورد هەمیشە، کاتێک تۆپە بەردینەکە سەردەخات، خۆی هەڵدەوەرێ، چونکە هێشتا ئێمە نەبووینەتە خاوەن مقەوەماتی ناوەکی بەهێز و کۆنگرە رۆژنامەوانییەکەی ترامپی ئەم دواییە بە تەواویی هەموو ئاماژە و هێماکانی تیا روونبووەوە کە گوتبووی "کورد میللەتێکی ئازان" و ئێمەش خەنی خەنی، رۆژی دەیانجار لە یوتوب و فەیسبووکەکان لێماندەدایەوە و گەز گەز باڵامان دەگرت و هەر بە قەزمیش ماینەوە.

 کورد هیچ بژاردەیەکی نییە تەنها ٣ شت نەبێ : خاک و خەڵک و زمان. ئەم سێ پێکهاتەیە لە ژێر هەڕەشەدان، تەنها هەر جارێک بە دەستی نەیارانەوە، دەجار بە دەستی خۆمان. ئێستا قۆناغی دوای ئازاکانە کە بە ئازاکان ناخوێندرێتەوە.