لە"گردەکە"یت یان لەماڵەوە؟

لە"گردەکە"یت یان لەماڵەوە؟

537 خوێندراوەتەوە

"لەدوای بەستنی کۆنگرەی گشتیی یەکێتی و دامەزراندنی پارلەمانی کوردستان و دروستکردنی حکومەتی هەرێمی کوردستان لە(٤/۷/۱۹۹۲) من بە چەند حەفتەیەك چوومە لەندەن.

لەو ماوەیەدا; لە هیچ بڕیارێکی سیاسیی، لەهیچ کۆبوونەوەیەکی مەکتەبی سیاسیی یا سەرکردایەتیی، یا هیچ چالاکییەکی سیاسیی یەکێتیدا بەشدار نەبووم، خۆمم دوور ڕاگرت لە هەموو تێکەڵاوییەکی سیاسیی-حیزبیی"

بەم شێوەیە و لە لاپەڕە۲ی کتێبی #خەون_یان_مۆتەکە ـدا، کاك نەوشیروان باسی نیگەرانیی خۆی لە سیاسەتی یەکێتی ئەکات.

 کاك نەوشیروان زۆر جار کەسی دووەمی(شەریك لە بڕیاردان بووە) و هەندێ جاریش لە غیابی تاڵەبانییدا کەسی یەکەم بووە، بەڵام کاتێك کە ڕەوتی ڕووداوەکان و ئاراستەی بڕیاردان بەشێوەیەکی تەندروست و دوور لە خواستی ئەو بەڕێکراوە، بێگومان دروستترین کارێك کە کردبێتی دوورکەوتنەوە بووە لەو میتۆدی کارکردنە.

لە ئێستادا هۆشیارییەکی ساختە لەبرەودایە، چەواشەکارییەك کە کاك نەوشیروان و (ڕێبازەکەی) ئەکەن بە کراسەکەی عوسمان و هەرچی خواستە کەسییەکانی خۆیان هەیە هەڵیئەواسن بەودا، نوخبەیەکی خۆویست و بەرژەوەندیخواز و چاوچنۆك مۆنۆپۆڵی سیاسەت و بڕیاردانیان لەو گردەیە کردووە، کە ئەپرسیت لە کەسانێکی خاوەن ڕێز و سەنگین; بۆچی ئەم بارەت قەبوڵە و ماویتەوە لەناو ئەم یارییەدا؟!

خێرا وەڵامێکی ئامادەکراوی سواوت ڕووبەڕوو ئەکرێتەوە; لێرەم تا نەهێڵم لەوە وێرانتر بێت(هەڵبەت تا ئێرە هیچ ئیشکالێك نابینم، چونکە تێگەیشتنێکە و پشت ئەستورە بە کۆمەڵێك ئەرگیۆمێنت) بەڵام ئەڵێ: هێشتا ئەوانەی کە ئێوە نیگەرانن لێیان، لەخۆتان باشترن کە دوورتان گرتووە و سیاسەت و بڕیادانتان بەجێهێشتووە بۆ خەڵکیتر، بۆچی نامێننەوە و ململانێ بکەن؟! 

بێئاگا لەوەی کە سروشتی سیاسەتی ناتەندروست وایە کە پنتێك ناهێڵێتەوە بۆ ململانێ، ئەوەی وەك ململانێ دەرئەکەوێت"ملشکاندن و تەشهیر و دەرپەڕاندن...تاد"ـیە، ئەوەی لەبەردەم مرۆڤی چاکەخوازدایە یەك ئۆپشنە نەك زیاتر، ئەویش بریتییە لە پەناگیریی و دوورکەوتنەوە.

ئەوەی سەرەوە سەرەتای دوورکەوتنەوەی کاك نەوشیروانە، لە سیاسەتێك کە ناتەندروستە و گۆڕەپانی ململانێکە ناهاوسەنگە، ئەگینا لەو مێژووە بەدواوە، سیخناخە بە"دوورگرتن و گەڕانەوە" دوورگرتن بەسەدان پاساو، گەڕانەوە بە ئومێدێکی لاواز بە چاکسازیی و گۆڕینی ئەو تایپ و میتۆدە!

 یان هەندێ جار گەڕانەوەکەی ناچاریی و خۆنەویست بووە، لە غیابی ئەودا و لە سەرەتای مانگی ۵ی۱۹۹٤ کاتێك کە شەڕی ناوخۆ لە قەڵادزێ و پشدەرەوە دەست پێئەکات، تەلەفۆنی بۆ ئەکەن بۆ ئەوروپا، بەناچاریی پاش نزیکەی دوو مانگ دێتەوە بۆ ڕێگەگرتن لەو خوێنڕێژییە، نەك باوەڕی گۆڕابێت.

 

ئێستا و پاش ئەم هەمووە ڕووداوانە، کەسانێك کە کاك نەوشیروانیان بە ڕووکار کردووە بە ڕچەشکێن یان بە(ئۆلگو-مثل الأعلى) نموونەی باڵای ئەزانن، دێن و ئەم چەواشەکارییە بڵاوئەکەنەوە; گوایە ئەگەر دڵسۆزی ڕێبازی چاکسازیی و گۆڕانکارییت کە لە پڕۆژەکەی کاك نەوشیرواندا بەرجەستە بوو بوو، ئەبێت چاو داخەیت و خۆت بدەیتە دەست قەدەری بزووتنەوەی گۆڕان کە ئەوان کەسابەتی پێوە ئەکەن!

  ئێ خۆ ناکرێت نەزانن کە ئەو پیاوە ئەوەندە نیگەران کرابوو، مێژووی کاری سیاسیی پاش ڕاپەڕینی پڕیەتی لەم هاتن و چوونە، تەنانەت زۆرجاران بەگەڕانەوەی بۆ گۆڕاپانەکە بەشێك لە کادیرانی یەکێتی ئەیانووت: گەڕایەوە بۆ لەچوارچێوەنان و بچووککردنەوەی نەیارەکانی تاڵەبانیی، لەکاتێکدا دواجار دەرکەوت نیگەرانیی ڕاستەقینەی ئەو لە خودی تاڵەبانیی بوو، کە دەرفەتی زێڕینی ڕەخساند بوو بۆ نەیارانی چاکسازیی و پشتگیریان بوو!

 کاك نەوشیروان چەندە نیگەران بوو، بەڵام لە قۆناغە هەستیار و چارەنووسسازەکاندا ئەگەڕایەوە، لە نموونەی نووسینەوەی دەستووری عێراق و ئەو بابەتانەی سەرەوە، ئێ دڵسۆزانی گۆڕان چی ماوە کە بۆ گۆڕانیان نەکردبێت لەکاتە چارەنووسسازەکاندا، سەرباری هەموو تێبینیی و سەرنجێکی ناکۆکیش؟!

 بەڵام وەك چۆن لەلای کاك نەوشیروان هەمیشە سەدان پاساو هەبوو بۆ دوورکەوتنەوە و ئومێدێکی نوزە لەبەربڕاو هەبوو بۆ مانەوە، ئێ ئەمە بۆ خەڵکیتریش ڕاستە، ئەوانەی کە گوێی خۆیانیان بە پۆڵا ئاخنیوە و سەریان داخستووە و گۆڕان بۆ نادیار ئاراستە ئەکەن، دژی مەبادیئـ و سەوابیتی خۆی ئاراستەی ئەکەن، هەموو موقەدەراتی گۆڕانیان لایە و لەلای پارتی و بەشێك لەیەکێتیشەوە چییان پێویست بێت بۆ دەرپەڕاندنی هاوڕێکانیان و هەزاران هاوڕێبازی ڕاستەقینەی کاك نەوشیروان بۆیان فەراهەم ئەکرێت، ئەپرسین کام پنتە ماوە بۆ ململانێ تا لەگردەکە بین؟!!