نەوشیروان مستەفا چۆن بوویە سكرتێری كۆمەڵە؟

چیرۆكی دامەزراندنی كۆمەڵەی ڕەنجدەران

نەوشیروان مستەفا چۆن بوویە سكرتێری كۆمەڵە؟

993 خوێندراوەتەوە

ڕابەر حەسەن


(ڕەفعەتی مەلا) دەڵێت: ( تا ساڵی 1971 كە دواین كۆنگرەی باڵی مەكتەبی سیاسی لە بەغدا گیرا، ئێمە كارمان بۆ ئەوە دەكرد كە ئەو باڵە حەلبكەین، ئەوە بوو بەیانی 11ی ئازار هاتبووە پێشەوە، (نەوشیروان مستەفا) یەكێك بوو كە چالاكانە بۆ ئەو مەبەستە كاری دەكرد، چونكە پێمانوابوو چارەسەركردنی ئەو باڵە ڕێگە خۆشدەكات بۆ ڕێكخستنێكی تازە كە ئیشمان بۆ دەكرد، ئەویش كۆمەڵەی ڕەنجەدەران بوو، فیعلەن لەو كۆنگرەیەدا توانیمان باڵی مەكتەبی سیاسی حەلبكەین ئەوە بوو چوون تێكەڵ بوونەوە لەگەڵ پارتی دیموكراتی كوردستاندا).

 


بە بڕوای ڕەفعەتی مەلا، چیرۆكی دروستبوونی كۆمەڵەی ڕەنجدەران دەگەڕێتەوە بۆ گۆڤاری ڕزڤاری:(ڕەگ و ڕیشەی دەگەڕێتەوە بۆ ناو گۆڤاری ڕزگاری كە لە ساڵی 1969 دا دەرچووە (نەوشیروان مستەفا) خاوەنی ئیمتیازی ئەو گۆڤارە مانگانەیە بووە)، لێرەوە كار و چالاكی سیاسی (نەوشیروان مستەفا) لە دوای ڕێككەوتننامەی 11ی ئازار دەستپێدەكات، ئەویش بە دروستكردنی و پێكهێنانی ڕێكخستنێكی نوێ‌ بەناوی (كۆمەڵەی ماركسی - لینینی- كوردستان).

،،

گیرانی كۆمەلێك سەركردەكانی كۆمەڵە بۆ ماوەیەك بووە هۆی لێكبچڕانی شیرازەی ڕێكخستنە نهێنییەكان لەوێ بە دواوە ڕۆڵی جوامێرانەی ( شاسوار جەلال ـ ئارام ) بە دیار دەكەوێت، ( كە یەكێك بووە لە ئەندامە پێشكەوتوەكانی گروپەكەی نەوشیروان )

 

 
گەڵاڵەبوونی بیرۆكەی دامەزراندنی كۆمەڵەی ماركسی لینینی كوردستان


سەرەتای بیرۆكەی دامەزراندنی ( كۆمەڵەی ماركسی - لینینی كوردستان ) بۆ سەردەمی جیابوونەوەی (باڵی مەكتەبی سیاسی / پ.د.ك) دەگەڕێتەوە، بە تایبەتی بۆ كەسایەتی (مام جەلال) كە ئەو كاتە ئایدۆلۆژییای ماویزم و پەرەنسیپەكانی سۆسیالیزمی چین كاری تێكردبوون. (مام جەلال) پێیوابوو ( ئەو ڕێبازە گونجاوترە لەگەڵ بارودۆخی باشوری كوردستان و باشترە لە ئەزمونی سۆڤیەت كە زیاتر پشت بەچینی كرێكار دەبەستێت، چونكە بەلای ئەوەوە كۆمەڵی كوردەواری سروشتێكی جوتیارانەی هەیە و زیاتر لە كۆمەڵگای چینی دەچێت، سەرەتا (مام جەلال) بۆ جێبەجێكردنی ئەم بۆ چوونە لە كاری سیاسیی و ڕێكخستندا چەند ڕۆشنبیرێكی هەڵبژارد لەوانەی كە لایەنگر یان ئەندامی ( باڵی مەكتەبی سیاسی / پ.د.ك ) بوون و ئەڵقەی ماركسی لێپێكهێنان بۆ كۆبونەوەی ڕۆشنبیران لە دەوروبەرییان گرنگترین ئەو كەسانەی كە ئەو سەردەمە ڕۆڵییان بینی ( نەوشیروان مستەفا، شازاد سائیب، محمودی ملا عێزەت، ڕەفعەتی مەلا، مەحمود عبدالرحمن ) بوون ).

 
سەرەتا ئەو ڕێكخراوە بە ناوی ( كۆمەڵەی ماركسی ـ لینینی بیروباوەڕی ماوتسی تۆنگ) هاتە مەیدان، بە نهێنی دەستی بەخەباتی ژێرزەمینی كرد، لە ئەنجامی یەكگرتنی سێ گروپ لە (10 / 6 / 1970) دامەزرا، هەریەكە لەو گروپانە پێشتر لە لایەن بەڕێزان ( جەلال تاڵەبانی، نەوشیروان مستەفا، شەهابی شێخ نوری ) سەرپەرشتی دەكرا، بۆیە دەكرێت بڵێین هەرسێكییان لە دامەزرێنەرە سەرەكییەكانی ڕێكخراوەكەبوون.

 
لە پێنج ساڵی یەكەمی دامەزراندنی (كۆمەڵە)دا ڕێكخراوەكە زۆر نهێنی بووە و ژمارەی ئەندامەكانی بەپەنجەكانی دەست دەژمێردران و چالاكییەكی ئەو تۆیان نەبووەو بیر و باوەڕەكانی ( ماوتسی تۆنگ ) بە سەر ڕێكخراوەكەدا بەتەواوەتی زاڵبوە و هەتا پێنجەم ساڵی تەمەنی توانی بووی ( تەنها دوو ژمارەی گۆڤاری تیۆری كەمترین باسی تیۆریان تێدا بوو دەربكات، هەروەها چەند بەیاننامەیەكیشی دەركردبوو كەبەشی زۆرییان كۆپیكردنی هەڵوێستەكانی چینی‌و ماوتسی تۆنگ بوون ).
لە سەرەتای دامەزراندنی كۆمەڵەدا (مام جەلال)یەكەم سكرتێری ڕێكخراوەكە بووە و لەساڵی (1971) دا چوەتە دەرەوەی وڵات لە دوای ئەو ( نەوشیروان مستەفا )دووەم سكرتێری ڕێكخراوەكە بووە، تا ساڵی (1973)
ئەویش چۆتە دەرەوەی وڵات، لە دوای ئەویش ( شەهابی شێخ نوری ) سێیەم سكرتێر ڕێكخراوەكە بووە.

 
گیرانی كۆمەلێك سەركردەكانی كۆمەڵە بۆ ماوەیەك بووە هۆی لێكبچڕانی شیرازەی ڕێكخستنە نهێنییەكان لەوێ بە دواوە ڕۆڵی جوامێرانەی ( شاسوار جەلال ـ ئارام ) بە دیار دەكەوێت، ( كە یەكێك بووە لە ئەندامە پێشكەوتوەكانی گروپەكەی نەوشیروان ) و لە ئابی ساڵی (1975) بەدواوە دەتوانێت سەركەوتوانە سەرەداوی ڕێكخستنە بچڕاوەكان لەیەكتر گرێبداتەوە و ( كۆمیتەی هەرێمەكان ) ی لێپێكهێنان، كە لەجیاتی سەركردایەتی كۆمەڵە بوو خۆی وەك سكرتێری گشتی سەرپەرشتی دەكردن.

 

 

 

،،

لەڕووی ئایدۆلۆژیەوە بیروباوەڕی زاڵ بەسەر ڕێكخراوەكەدا لەكاتی دامەزراندنیدا بیروباوەڕی ماوتسی تۆنگ بوو

 

 
دامەزراندنی كۆمەڵەی ڕەنجدەرانی كوردستان


هیچ حیزب و ڕێكخراوێك نییە لە دونیا، جیاوازی لەنێو ئەندامەكانیدا نەبێت، جا ئەو جیاوازیانە لە حیزبێك تا حیزبێك، لە ڕێكخراوێك تا ڕێكخراوێك دوور و نزیك هەیە، كۆمەڵە لە هەلومەرجێكی نهێنی لە ساڵی (1970) دامەزراوە، كۆمەڵە لە سەرەتادا خۆی بە ماركسی- لینینی و هەڵگری بیروباوەڕی (ماو تسی تۆنگ) دەزانی هەر زوو لە نێو ئەندامەكانی ناكۆكی توند و تیژ دروستبو، بەڵام لەبەرئەوەی لە خەباتی ژێرزەمینیدابو ئەوەندە نەبووبووە جێگەی باس و لێكۆڵینەوە، كۆمەڵە لە سەرەتادا وەك ڕێكخراوێكی بچووك هاتە مەیدان، دەوری كاریگەری ئەوەندە لەسەر ڕووداوەكانی كوردستان نەبوو تا كۆمەڵانی خەڵك بەپەرۆشەوە سەیری ئاڵگۆڕەكانی ناو خودی ڕێكخستنەكانی كۆمەڵە بكەن.


لە (31/1/1978)، (ئارام) سكرتێری كۆمەڵە لە ناوچەی قەرەداغ شەهیدكرا، ئەو زەبرە یەكجار زۆر كاریگەر بوو لە كۆمەڵە كەوت هێشتا ئەو برینە قوڵ و سامناكەی ساڕێژ نەكردبوو، هێشتا خوێنی شەهید (شەهاب، جەعفەر) گەرم بوو، خوێنی (ئارام)یش ڕژا، پاش ئەوەی شەهید (ئارام) شەهید بوو، (نەوشیروان مستەفا) لە كۆبوونەوەی فراوانی (نۆكان) بەزۆرینەی دەنگ بە سكرتێری كۆمەڵە هەڵبژێردرا، پاشان لە كۆبوونەوەی فراوانی (شێنێ‌)دا دیسان بەزۆرینەی دەنگ كرایە سكرتێری كۆمەڵە.


(( كۆمەڵە لە سێ‌ دەستەی بەشێوە لەیەك جودا و بە ناوەڕۆك لێك نزیك پێكهات، دەستەیەكیان بە نوێنەرایەتی (شەهاب شێخ نوری)، دەستەیەكیان بە نوێنەرایەتی (مام جەلال)، دەستەی سێهەمیش بە نوێنەرایەتی (نەوشیروان مستەفا) و هاوڕێكانی)).
كۆمەڵەی ڕەنجدەرانی كوردستان ڕێكخراوێكی چەپی بیروباوەڕی ماركسیست – لینینیستە، ساڵی (1970) لەسەروبەندی تێكشكانی باڵی مەكتەبی سیاسی پارتی دیموكراتی كوردستان، لە تێكەڵبوونی ڕەوتە بیروباوەڕە لێكنزیكەكان پێكهاتووە.


لەڕووی ئایدۆلۆژیەوە بیروباوەڕی زاڵ بەسەر ڕێكخراوەكەدا لەكاتی دامەزراندنیدا بیروباوەڕی ماوتسی تۆنگ بوو، ئەمەش بە ئاشكرا بە ناوەكەیەوە دیارە كە بریتی بوو لە كۆمەڵەی ماركسی – لینینی – ماوتسی تۆنگ، لەڕووی شێوەی كاركردنەوە بڕیاردرا ڕێكخراوەكە بەشێوەیەكی نهێنی كار بكات و خۆی ڕابگەیەنێت، بۆیە نە كۆنگرە بەسترا و نە بەیاننامەی دامەزراندن دەركرا.

 
تاڵەبانی بە ڕابەری دیفاكتۆی ڕێكخراوەكە دیاریكرا، ئەگەر چی نوسینەكانی دواتر دەستەواژەی ( سكرتێر) بۆ ڕابەری كۆمەڵە بەكاردێنن، بەڵام لەڕاستیدا ئەم دەستەواژەیە پاش (11) ساڵ لە دامەزراندنی كۆمەڵە دەست بە بەكارهێنانی كراوە.
لە قۆناغی بەرایی دەمەزراندنی كۆمەڵەدا ( شەهاب شێخ نوری) ئەركی سكرتێری كۆمەڵەی گرتە ئەستۆ و توانی گەشەیەكی زۆر بە ڕێكخستنەكانی بدات.
لە سەروبەندی یەكەم كۆبونەوەی سەركردایەتی یەكێتی نیشتیمانی كوردستان لەناو وڵات لەساڵی (1977)، ( نەوشیروان مستەفا) ئەركی بڕیاردەری كۆمەڵەی گرتە ئەستۆ، مێژووی كۆمەڵە سێ‌ كۆنفرانسی لەخۆ گرتووە، یەكەمین كۆنفرانس ساڵی (1981) لە (مالیمۆس) بەسترا، دووەمین كۆنفرانس لە ساڵی (1982) لەناو زەنگ و سێیەمین كۆنفرانس لە مێرگەپان لە ساڵی (1984) بەسترا، لە هەر سێ‌ كۆنفرانسەكەدا ( نەوشیروان مستەفا) بە سكرتێر هەڵبژێردرا.

 

 

 

 

،،

بڕیارماندا خۆمان بناسێنین و كۆمەڵە ڕابگەیەنین لە ڕێگەی هەڵواسینی چەند دروشمێكەوە، كە زۆربەیان لەسەر كاغەز نوسرابون، ئەمەش وەك هەنگاوێكی سەرەتای تا بیر و ڕاكانمان بگەیەنینە جەماوەر بەوەی كارێكی نوێ‌ بە ڕێوەیە

 

بەژداریكردنی كۆمەڵە لە شۆڕشی ئەیلول، هەڵوێست و ئاكامەكانی


بە تەنگەوە نەهاتنی حكومەتی عێراق لە جێبەجێكردنی بەندەكانی بەیاننامەی (11 ی مارتی 1970)، هەوڵدان بۆ خۆدزینەوە لێی، جارێكی دیكە پەیوەندییەكانی حكومەتی عێراق و سەركردایەتی شۆڕشی ئەیلولی ئاڵۆز كردەوە. لێرەدا بۆ مەبەستی تاوتوێكردنی پێشهاتەكان و بەژداریكردن، یان بەژداری نەكردن لە شەڕ، سەركردایەتی كۆمەڵە سەرباری جیاوازییەكانی لە ڕوی ئایدۆلۆژی و سیاسییەوە لەگەڵ سەركردایەتی شۆڕشی ئەیلول، بە ماوەیەك بەر لە دەستپێكردنەوەی شەڕ لە (11 ی مارتی 974) كۆبونەوەیەك لە كەركوك دەكات.

تەوەری سەرەكی كۆبونەوەكە بۆ هەڵوێست وەرگرتنی كۆمەڵە بو، لە ئەگەری دەستپێكردنەوەی شەڕدا، لەبەرئەوەی بەهۆی هاتنە پێشەوەی ڕوداوەكان و بە ئاكام نەگەشتنی بەندەكانی بەیاننامەكە، كۆمەڵە لە بەیانێكدا ئاماژەی بە شكستی دانوستانەكان و دوبارە دەستپێكردنەوەی شەڕ كردبو. لە كاتێكدا شەڕ دەستیپێكردەوە، كۆمەڵە لە بەیاننامەیەكدا بڕیاری ئەوە دەدات بەژداری شەڕبكات. لێرەشدا سەرچاوەیەك پێی وایە مەسەلەی بەژداریكردنی كۆمەڵە، پەیوەنی بە ئایدۆلۆژیای ئەوكاتەی كۆمەڵەوە هەبوە. لەبەرئەوەی ئەوكاتە كۆمەڵە رێكخراویكی (ماوی) بوە، بەمەش بەپێی بەشێك لە پێكهاتەكانی بیری ماویزم، هەر بزوتنەوەیەك ئامانجی ڕزگاری نیشتیمانی هەبێـت، ئەوە ئەو شەڕەی ئەنجامی دەدات شەڕێكی ڕەوایە. لێرەوە بەپێی ئەو لێكدانەوەیە، لەبەرئەوەی شۆڕشی ئەیلول بزوتنەوەیەكی ڕزگاریخوازی نیشتیمانییە، ئەو شەڕەی كە حكومەتی عێراقی ئەنجامی دەدات شەڕێكی ناڕوایە، لەبەرئەوە پێویست دەكات كۆمەڵە بەشداری بكات لە بەرەی شەڕی ڕەوادا.

 
سەكردایەتی كۆمەڵە كاتێك بڕیاری بەژداریكردنی لە شەڕ دەدات، داوا لە ئەندامەكانی دەكات ئەوەی توانای چونە دەرەوەی هەیە، با بچێتە دەرەوە، ئەوانەی تریش لەشارەكاندا بمێننەوە، لە كاری ڕێكخراوەی خۆیاندا بەردەوامبن.

بۆ ئەو مەبەستە لە كۆبونەوەیەكدا لە (مارتی 1974) بڕیاری دامەزراندنی سەركردایەتییەك بۆ ڕێكخستنەكانی ناوخۆ دەدات، لە ژێر ناوی (كۆمیتەی سور)، كە ئەندامەكانی پێكهاتبون لە ( جەعفەر عەبدولواحید، سەرپەرشتیار و لێپرسراوی ڕێكخستنەكانی هەولێر و موسڵ)، (ئەنوەر زۆراب، لێپرسراوی ڕێكخستنەكانی بەغدا و خانەقین)، (ئیحسان نەجم، (ئەبوشەهاب) لێپرسراوی ڕێكخستنەكانی كەركوك)، (ئاسۆ شێخ نوری، لێپرسراوی ڕێكخستنەكانی سلێمانی). ئەوە سەرباری ئەوەی لەو كۆبونەوەیەدا بڕیاری ئەوە دەدرێت (شەهاب شێخ نوری) وەك بازنەی پەیوەندی نێوان ڕێكخستنەكانی شار و شاخ لە ناوەوە لە چالاكییەكانی بەردەوامبێت و نەچێتە دەرەوە، بەڵام دوای ماوەیەك لەگەڵ هاتنەپێشەوەی ڕوداوەكان، ناوبراویش بڕیاری چونە دەرەوە دەدات، لە ناو شاردا نامێنێتەوە.

دوای ئەو هەنگاوانە ئاماژەی بۆكرا، لە چوارچێوەی چالاكییەكانی ناوشار لەو ماوەیەدا ڕێكخستنەكانی سلێمانی دەستدەكەن بە نوسینی دروشم و دواتر هەڵواسینی لە ناو شاردا. لەم بارەوە یەكێك لە سەرچاوەكان ئاماژە بەوە دەكات و دەڵێت: (( بڕیارماندا خۆمان بناسێنین و كۆمەڵە ڕابگەیەنین لە ڕێگەی هەڵواسینی چەند دروشمێكەوە، كە زۆربەیان لەسەر كاغەز نوسرابون، ئەمەش وەك هەنگاوێكی سەرەتای تا بیر و ڕاكانمان بگەیەنینە جەماوەر بەوەی كارێكی نوێ‌ بە ڕێوەیە)، بەڵام ئەوەی لێرەدا لە وتەی ئەو سەرچاوە تێبینی دەكرێت، مەسەلەی خۆ ئاشكراكردنی كۆمەڵەیە لە ڕێگەی دروشمەكانییەوە، چونكە یەكێك لە كەسایەتییە بەژداربوەكان ئاماژە بۆ ئەوە دەكات، دروشمەكان ڕاستە نوسراون، لە زۆربەی ناوچەكانی شاری سلێمانی بڵاوكراونەتەوە، بەڵام بێ ناویشانبون، واتە لە دروشمەكاندا ئاماژە بۆ ناوی ڕێكخراوی كۆمەڵە نەكراوە، لەبەر ئەوە هەلومەرجەكە بۆ ڕێكخراوێكی وەك كۆمەڵە لەبار نە بوە، كە تیایدا ڕابگەیەنرێت

 

 

 

سەركردایەتی نوێی كۆمەڵە


كوژرانی (شاسوار جەلال) ناسراو بە (ئارام)، كاریگەری و ڕەنگدانەوەی بەسەر ئەندامان و پێشمەرگەكانی كۆمەڵە لە شار و شاخدا نەخشاند، بەو هۆیەشەوە جارێكی دیكە بۆشای لە سەركردایەتی كۆمەڵە دروستكردەوە، كە بە ئەندامانی دیكەی كۆمیتەی هەرێمەكان، كە بریتیبوون لە (سالار عەزیز، مەلا بەختیار، ئازاد هەورامی) پڕ نەدەكرایەوە، چونكە گەنجی تازە پێگەستوبون، خاوەن ئەزمونێكی سیاسی و ڕێكخراوەیی و پێشمەرگایەتی وەها نەبون و لە ناو خەڵكیشدا ئەوەندە ناسراو نەبون، لەبەر ئەوە دەبو ڕێكخستنەكان بیر لە جێگرەوەی دوای (ئارام) بكەنەوە. (نەوشیروان مستەفا)، لە یاداشتەكانیدا ئاماژە بە ئەوە دەكات لە دوای شەهیدكردنی (ئارام)، كۆمیتەی (هەڵمەت) لە سلێمانی لە نامەیەكدا داوایان لە ناوبراو كردوە، تا سەرپەرشتی ئەركی كۆمەڵە بگرێتە ئەستۆ، ڕاستەوخۆ پەیوەندییان لەگەڵدا بكرێت. ئەوە لەلایەك، لەلایەكی دیكەوە، (مەلا بەختیار) لە دیمانەیەكدا ئاماژە بۆ ئەوە دەكات، لە دوای لێكۆڵینەوە لە ڕوداوەكانی شەهیدكردنی (ئارام)، ناوبراو گەڕاوەتەوە سلێمانی بۆ ئەوەی سەرپەرشتی كۆبونەوەی ڕێكخستنەكانی شاربكات، بەمەش لەلایەن هەیەك لە (شازاد سائیب، جەمال تاهیر) داوا لە ناوبراو كراوە كە ئەركی سكرتێری كۆمەڵە بگرێتە ئەستۆ، بەڵام ناوبراو ڕەتی كردوەتەوە بە بیانوی ئەوەی نە تەمەنی خۆیی و نە تەمەنی سیاسی، نە ئاستی تیۆری لەئاست ئەو بەرپرسیارێتیەدا نین، بۆیە لە نامەیەكدا بۆ (جەلال تاڵەبانی) ناردوە، پێشنیازی ئەوەیكردوە (نەوشیروان مستەفا) بكرێت بە سكرتێری كۆمەڵە. هەروەها (ئاوات قارەمان) یش دەڵێت: ((لە ناو شارەوە هەم لەوانەی كە لە دەرەوەبون، داوایانكردبو (نەوشیروان مستەفا)، جێگای شەهید (ئارام) بگرێتەوە)). كواتە دەتوانرێت بوترێت زۆربەی ئەندامانی كۆمەڵە لە شار و شاخ ڕەزامەندییان لەسەر ئەوە نیشانداوە، (نەوشیروان مستەفا) سەرپەرشتی ڕێكخستنەكانی كۆمەڵە بكات، تەنها (سالار عەزیز) نەبێت ناڕەزای بەرامبەر ئەو هەنگاوانە دەربڕیوە.

 
دوای ئەوەی لەلایەن زۆربەی ئەندامان و ڕێكخستنەكانی كۆمەڵە، (نەوشیروان مستەفا) دەستنیشان دەكرێت، بۆ ئەوەی سەرپەرشتی كار و بارەكانی كۆمەڵە بگرێتە ئەستۆ، ناوبراو بەستنی كۆبونەوەیەكی بەرفراوان بە پێویست دەزانێت. ئەوەی یارمەتیدەریش دەبێت بۆ ئەم كۆبونەوەیە، گردكردنەوەی كادیرەكان، بەستنی كۆبونەوەی سەركردایەتی یەكێتیی نیشتیمانیی كوردستان دەبێت، كە بە هۆیەوە زۆربەی كادیرانی كۆمەڵە لە دەور و بەری سەركردایەتی یەكێتی، لە نۆكان كۆبونەوە.

 
ئەنجام لەبارەی پێشنیازی ناوبراو بەر لەوەی كۆبونەوەی سەركردایەتیی یەكێتی دەست بە كارەكانی بكات، كۆمەڵ بە ئامادەبونی ژمارەیەك لە كادیرەكانی لە نۆكان لە (مارتی 1978)، كۆبونەوەی خۆی دەستپێدەكات، دواجاریش ئەو كۆبونەوەیە لە مێژوی كۆمەڵدا بە (كۆبونەوەی كادیرانی كۆمەڵە) دەناسێنرێت.

لێرەشدا دەتوانرێت بوترێت كۆمەڵە بەهۆی ئەو هەلومەرجەی تێیدا دامەزرابو، لەگەڵ ئەو پێشهات و ڕوداوانەی ڕوبەڕوی ببونەوە، نەیتوانیبو لە تەمەنی ڕێكخراوەی خۆیدا كۆبونەوەی لەم شێوەیە ببەستێت، لەبەرئەوە ئەم كۆبونەوەیە بە یەكەمین كۆبونەوەی بەرفراوانی كادیرانی كۆمەڵە دادەنرێت. كۆبونەوەكان لەسەر شێوازی سیمینار و بە مەبەستی لێكۆڵینەوە لە هەلومەرجی ناوخۆی، ناوچەییی و جیهانی، لەگەڵ چۆنێتی گەشەپێدانی سیاسیی رێكخراوەیی، پێشمەرگایەتیی كۆمەڵە و بەهێزكردنی پەیوەندییەكانی لەگەڵ باڵەكانی دیكەی ناو یەكێتیی نیشتیمانیی كوردستان دەستی بە كارەكانی كردوە.

 

دواتریش لە كۆتایی كارەكانیدا ژمارەیەك بڕیاری ڕیچكخراوەیی و سیاسی داوە، كە بریتین لە:

یەكەم: دامەزراندنی ناوەندێك بۆ كۆمەڵە، بۆ ئەوەی هەمو ڕێكخستنەكان و پێشمەرگەمانی فەرمان و ڕاسپاردەكان لەو ناوەندەوە وەربگرن، هەروەها كار بۆ دەركردنی ئۆرگانێك یاخود بڵاوكراوەیەكی پۆست بكات.
دوەم: هەمو ئەو كەسانەی، كە پێشتر سەركردایەتیی كۆمەڵە بون، بە هۆی خەباتی سیاسیەوە زیندانی كرابون، لە هەمان پلەی پێشوی خۆیاندا بمێننەوە.
سێیەم: دامەزراندنی سەركردایەتییەكی تایبەت بۆ ڕێكخستنی شارەكان.
چوارەم: بەهێزكردنی یەكێتیی و تەبایی لەگەڵ بزوتنەوەی سۆسیالیستی كوردستان، تا لەو ڕێگەیەوە ڕیزەكانی یەكێتی بەهێزتربن.
بە كۆتایی هاتنی كۆبونەوەكان، كۆمیتەی هەرێمەكان هەڵوەشێنرایەوە، سەركردایەتییەكی تازە بۆ كۆمەڵە دەستنیشانكرا، كە پێكهاتبوون لە (نەوشیروان مستەفا، سالار عەزیز، مەلا بەختیار، ئازاد هەورامی، ئاوات قارەمانی، بەكر حاجی سەفەر، شێخ عەلی، مامۆستا جەعفەر، ئەحمەد كرێكار) كە تیایدا هەریەك لە ( نەوشیروان مەستەفا، ئازاد هەورامی، مامۆستا جەعفەر) بون بە ئەندامی ناوەندی كۆمەڵە، (سالار عەزیز، ئازاد هەورامی) بە نوێنەرایەتی كۆمەڵە وەك ئەندامی مەكتەبی سیاسی یەكێتیی نیشتیمانیی كوردستان دەستنیشانكران. بەمەش یەكێك لە كادیرەكان پێی وایە لێرەوە سەرەتای قۆناغێكی تازە دەستپێدەكات، بە وێستگەی سێیەمی سەركردایەتی كۆمەڵە ناوی دەبات، كە بە هۆیەوە دامودەزگایەكی نوێ بۆ ڕابەرایەتیكردنی كۆمەڵە و كار و بارەكانی دیكەی خەباتی چەكداری هاتوەتەئاراوە.

 

سوود لەم سەرچاوانە وەرگیراوە:
- ڕەوتی چەپ لە باشوری كوردستان - د. ئەحمەد حەمەدئەمین.
- ژیان و نهێنیەكانی نەوشیروان مستەفا - لیژنەیەك لە ڕۆژنامەنووسان.
- یەكێتی نیشتمانی كوردستان - سەروەر عبدالڕەحمان عومەر.
- قەندیل بەغدای هەژاند - ڕێباز.
- چۆن چەپكێك و كام مێژووی كۆمەڵە - مەلا بەختیار.
- ئینسكلۆپیدیای یەكێتیی نیشتیمانیی كوردستان - فەرید ئەسەسەرد.

 

author photo

تایبه‌ت به‌ دیپلۆماتیك