"دوژمنی دوژمنەكەم، دۆستمە"

بۆچی پارتی، نازی گۆڕان دەكێشێت؟

"دوژمنی دوژمنەكەم، دۆستمە"

1147 خوێندراوەتەوە

 
لێدوانی سەركردەكانی گۆران و یەكێتی بە ئاراستەی ئەوە دەروات كە لە ئێستادا، گۆران و پارتی خاڵی هاوبەشیان زۆرتر بێت و یەكێتی و پارتیش هێشتا لەسەرەتای جیاوازییەكاندان.

 

سەرەتای باس و خواسەكان لەبارەی پێكهێنانی كابینەی نوێ، ئەوە لەدەموچاوی سەركردەكانی یەكێتی بەدی دەكرا كە حەز ناكەن گۆران بەشداری كابینەی نوێ بكات، چونكە هەستیان بەوە كردبوو كە پارتی دەیەوێت بە بەشداریكردن و پێدانی پشكەكانی حكومەت بە گۆران پشكەكانی یەكێتی كەم بكاتەوە.

،،

پێ دەچێت كێشەی سەرەكی نێوان پارتی و یەكێتی پەیوەست بێت بە پارێزگاری كەركوكەوە، كە هەردووكیان دەیانەوێت كێشەكانیان لە ئەنجومەنی پارێزگاكە یەكلای بكەنەوە.

 

 


گۆران و پارتی خاڵی هاوبەشیان زۆرە
محمد تۆفیق رەحیم لە لێدوانێكدا بۆ دیپلۆماتیك مەگەزین ئەوەی ئاشكرا كردبوو كە گۆران و پارتی خاڵی هاوبەشیان زۆرە، و بە گەشبینیەوە لە چوار ساڵی داهاتووی حكومرانی دەروانن، لەبەرامبەردا ئەندامێكی مەكتەبی سیاسی یەكێتی ئاماژەی بەوە كردووە كە یەكێتی و پارتی دوورن لە رێكەوتن و خاڵە جیاوازەكانیان زۆرن.

هەردوو شاندی پارتی و گۆران

 

 

پێ دەچێت كێشەی سەرەكی نێوان پارتی و یەكێتی پەیوەست بێت بە پارێزگاری كەركوكەوە، كە هەردووكیان دەیانەوێت كێشەكانیان لە ئەنجومەنی پارێزگاكە یەكلای بكەنەوە و هەمان سیناریۆی هەڵبژاردنی سەرۆك كۆمار لەو شارەدا دووبارە بكەنەوە و بە دوو كاندید بەشداری هەڵبژاردنی پارێزگار بكەن.

 

،،

 دەكرێت بڵێین لەسەر بنەمای ((دوژمنی دوژمنەكەم دۆستمە)) پارتی مامەڵە لەگەڵ گۆران دەكات و دەیەوێت لەدژی یەكێتی بەكاری بهێنێت بۆیە بەزۆرێك لە مەرجەكانی و خاڵەكانی گۆڕان رازییە.

 

 
بۆیە ئەم بابەتە لە ئێستادا پرسێكی گرنگە بەلای هەردووكیانەوە، هەرچەندە سەركردەكانی پارتی نایانەوێت ئەم پرسە تێكەڵاوی پێكهێنانی حكومەت بكرێت، بەڵام سەركردەكانی یەكێتی دەیانەوێت لەسەر مێزی گفتوگۆكانیان بێت و قسەی جدی لەسەر بكەن.

 

پارتی بۆچی نازی گۆڕان دەكێشێت؟
هێندەی ئاسایبوونی پەیوەندییەكانی نێوان یەكێتی و پارتی، نزیكی نێوان گۆران و پارتی ئاسایی نییە، و دەكرێت بڵێین لەسەر بنەمای ((دوژمنی دوژمنەكەم دۆستمە)) پارتی مامەڵە لەگەڵ گۆران دەكات و دەیەوێت لەدژی یەكێتی بەكاری بهێنێت بۆیە بەزۆرێك لە مەرجەكانی و خاڵەكانی گۆڕان رازییە.

 

چونكە لەماوەی رابردوودا پارتی و گۆران، كەمیان بەیەكدی نەكردووە تاكو ئێستە لە كون فەیەكونێكدا بەبیانووی پێكهێنانی حكومەت دورییەكانیان نزیك بكەنەوە و وەك دوو برا مامەڵە بكەن.

 
دەبوو ئەم دۆخە پێچەوانە بوایە، واتە یەكێتی و پارتی بەحوكمی رێكەوتنی لەمێژینەی نێوانیان و پێكەوە بەشداریكردنیان لە تەواوی جومگەكانی دەسەڵات نزیك بوونایە، و گۆڕان دوور بوایە.

 

 


بۆیە هەتاكو یەكێتی و پارتی دوورتر بكەونەوە لەیەكدی پێكهێنانی كابینەی داهاتوو درەنگتر دەكەوێت، كە ئەگەری زۆرە وەك كابینەی پێشوو (2014) زیاد لە 8 مانگ بخایەنێت و ببێت بە حەكایەتێكی دوورو درێژ.

،،

ئەم هەفتەیە هەفتەیەكی زێرین دەبێت بۆ گۆران دەبێت ئەوە بزانێت كە چۆن و داوای چی دەكات؟ ئاگاداری ئەوەش بێت كە لە هەموو نزیكبوونەوەیەكی نێوان پارتی و یەكێتی خۆری گۆڕان ئاوا دەبێت.

 
هەفتەی زێرینی گۆڕان

وا بریارە سبەی گەرێكی دیكەی دانووستانەكان دەست پێ بكاتەوە كە لەنێوان (پارتی و یەكێتی و گۆڕان) بەرێوە دەچن، بۆیە رەنگە هەفتەیەكی زێرین بێت بۆ گۆران و دۆخەكە بقۆزێتەوە، و بە ویستی خۆی داوای ئەو پۆستانە بكات كە پێگەی بەهێز دەكات.


لەراستیدا پارتی هەر ئەمەی دەویست، گۆران داوای ئەو پۆستانە بكات كە هی یەكێتین یاخود لە غیابی گۆڕاندا دەدران بە یەكێتی، بۆ ئەوەی پارتی وەك براوەی یەكەم بمێنێتەوە و گۆران و یەكێتیش لەبەردەمیدا وەك دوو هێزی هاوسەنگ سەیر بكات.

 

بۆیە ئەم هەفتەیە هەفتەیەكی زێرین دەبێت بۆ گۆران دەبێت ئەوە بزانێت كە چۆن و داوای چی دەكات؟ ئاگاداری ئەوەش بێت كە لە هەموو نزیكبوونەوەیەكی نێوان پارتی و یەكێتی خۆری گۆڕان ئاوا دەبێت، چونكە پارتی تا ئەو شوێنە ئیشی بەگۆڕانە كە عەزیەتی یەكێتی بدات و یەكێتی لەبەردەم پارتی لاواز بكات.

 

 

 

دەبێت گۆران لەو راستیەش تێبگات هەرچەندە پارتی نازی بكێشێت و لەگەڵیدا بێتە پێشەوە و داوای هەر شتێكی كرد رێك بكەوێت لەگەڵیدا، دەبێت بەجیاش لەگەڵ یەكێتی رێكەوتنی خۆی بكات، ئەو سیگناڵە بە سەركردەكانی یەكێتی بدات كە: گۆران نایەوێت لەرقی یەكێتی بەشداری بكات، بەڵكو دەیەوێت لە حكومەتدا خۆی بپارێزێت و لەوە زیاتر بچوك نەبێتەوە.

 

120 رۆژ تێپەری بەسەر هەڵبژاردنی پەرلەمانی كوردستان، تاكو ئەمرۆ هیچ رێكەوتنێكی رەسمی لەنێوان ئەو لایەنانەی كە دەیانەوێت بەشداری كابینەی نوێ بكەن واژۆ نەكراوە.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان