کورد و جاشایەتی 

  ئەو هەموو جاش و سیخوڕ و بەعسی و فایل دارە، کوێوە چوون؟

کورد و جاشایەتی 

455 خوێندراوەتەوە

شوان ئەحمەد

  (ستەمکار) بەیەکێک لەسەرچاوە گرنگەکانی بەعسناسی ئەژمار دەکرێت. پێموایە لەگەڵ(کۆماری ترسی کەنعان مەکییەو حیزبی بەعسی مەتاع سەفەدی و بەعسی عێراقی حازم ساغیە)دا، گرنگترین چوار سەرچاوەیەک بن بۆ ئاشنابوون بەبەعس و بۆ ئاگاداربوون لەمێژووی بەعسیزم (بەتایبەت لەتایپە عێراقیەکەی)دا.

 (ستەمکار) نوسەر و ڕۆماننوس زوهێر جەزائیری نوسیویەتی و ساڵی ٢٠٠٦ چاپی یەکەمی لەبەغدا – بەیروت لەلایەن پەیمانگای لێکۆڵینەوەی ستراتیژیەوە، بەقەوارەی ٣٤١ لاپەڕە بڵاوکراوەتەوەو سەرۆکی پەیمانگاکەش (فالح عەبدولجەبار)ی کۆچکردوو، پێشەکی بۆ نووسیوە.

 

،،

عەلی حەسەن مەجید کرا بەفەرمان ڕەوای یەکەم و بکوژ و ببڕی کوردستان... ئەو پیاوە بەئەندازەیەک ڕقی لەکورد بوو ، وێنەی نەبوو.

 

 هەرچەندە کتێبەکە هەڵەی زۆری چاپ و هەڵەی بەروار و هەڵەی مێژوویی تێدایە، بەڵام لەگەڵ ئەوەشدا پڕ زانیاری وردو باس و خواسی گرنگە، لەسەر بەعس و لەسەر قۆناغێکی گرنگ و پڕ ڕووداوی مێژووی هاوچەرخی عێراق.

 

 لەلاپەڕە (١٨٠ – بۆ ٢٠٣ )، باس دێتە سەر کارەساتی هەڵەبجەو ئەنفال و کورد بەگشتی و زوهێر جەزائیری بەپیتی درشت دەنووسێت : ( لەبەرواری ١٨ / ٣ / ١٩٨٧ بەبڕیاری ئەنجومەنی سەرکردایەتی شۆڕش ، عەلی حەسەن مەجید کرا بەفەرمان ڕەوای یەکەم و بکوژ و ببڕی کوردستان... ئەو پیاوە بەئەندازەیەک ڕقی لەکورد بوو ، وێنەی نەبوو.

 

،،

ئەو کوردانەی لەوسەردەم و زەمانەدا، لە ئەفواج خەفیفەکان دا شان بەشانی سوپای عێراق شەڕیان دەکردو ماڵ و حاڵی خۆیان دەکردە سوتماک، لەدوو سەدو پەنجا هەزار چەکدار زیاتر بوون.

 

 کاسێتی تۆمار کراوی کۆبوونەوەکانی، پڕن لەو ناو و ناتۆرانەی سوکایەتی پێکردنێکی زۆری بەکورد تێدایەو بەڕوون و ڕەوانی پێیان دەڵێت : وڵاخ ، بزن ، گوێ درێژ ، خائین و خۆفرۆش و.....هتد.

 کەچی لەگەڵ ئەوەشدا ژمارەی ئەو کوردانەی لەوسەردەم و زەمانەدا، لە ئەفواج خەفیفەکان دا شان بەشانی سوپای عێراق شەڕیان دەکردو ماڵ و حاڵی خۆیان دەکردە سوتماک، لەدوو سەدو پەنجا هەزار چەکدار زیاتر بوون.

  بەباسک و بازووی گاردی کۆماری و جاشە کوردەکان، توانرا لەماوەی سێ مانگی سەرەتای ئەنفال دا ٩١٢ گوند و شارەدێ، لەگەڵ زەویدا تەخت بکرێن و سەرەنجام ١٨٢ هەزار هاوڵاتی سڤیلیش ، بەبێدەنگی گۆڕ بزر بکرێن.

 بەبڕیارێک کە ژمارە – س . ف . ٤٠٠٨ – لەسەرەو بەواژۆی عەلی حەسەن مەجیدەوەیە ، تێیدا هاتووە جگە لەچەکە قورسەکان هەرچی شتێکی دیکە کەموستەشارو چەکدارانی ئەفواج خەفیفەکان دەستیان دەکەوێت ، بۆ خۆیانە).

 

،،

بەڕاست ئەو حەشامەتە زۆرەی جاش و بەعسی و جاسوس و فایلدارە بەڕێزانە، چییان لێهات و کوێوە چووەن؟

 کۆمەڵگەی کوردی جمەی دەهات لەجاش و سیخوڕ و بەعسی و دواتر لەشکرێ فایلداری شۆڕشگێڕیشی تێدا دەرکەوت، کەچی لەدوای ڕاپەڕینەوە تائێستا هەرچی دەم دەکاتەوەو هەرچی دەستی قەڵەم دەگرێت، باسی خەبات و قارەمانێتی و نیشتیمان پەروەری و کوردایەتی دەکات و هەست دەکەیت کورد یەک دوا بەیەکی، جەنگاوەر و زیندانی سیاسی و ڕێکخستنی نهێنی و تەتەری شۆڕش بووە.

بەڵام کەسێک نادۆزینەوە باس لەو هەموو خەجاڵەتی و ئابڕوو چوونانە بکات و بیان نوسێتەوە.

 

 

هەر بەڕاست ئەو حەشامەتە زۆرەی جاش و بەعسی و جاسوس و فایلدارە بەڕێزانە، چییان لێهات و کوێوە چووەن؟ وەڵامەکەی ڕوون و ئاشکرایە ، هەر هەموویان یەکە یەکەو دەستە دەستە سوک و باریک دوای ڕاپەڕین ، لەژێر ناوی ئاشتەوایی نیشتمانی و لێبوردنی گشتی ، بەموبارەکەی حیزبە کوردییەکان، هاتنەوە ڕیزی بەناو نیشتمانی و بوون بە: (........). ئاخر پەردەپۆش کردنی ڕابردوو، هەروەها نیشاندانی پەرێز پاکی و کوردایەتی، هەر بەوە مەیسەر دەبوو.

 

author photo

تایبه‌ت به‌ دیپلۆماتیك