ئیدریس بارزانی و نەوشیروان موستەفا  بەگێڕانەوەی موحەمەدی مەلاقادر

ئیدریس بارزانی و نەوشیروان موستەفا بەگێڕانەوەی موحەمەدی مەلاقادر

3507 خوێندراوەتەوە


ئەمڕۆ، 32 ساڵ تێدەپەڕێت بەسەر كۆچی دوایی ئیدریس بارزانی، یەكێك لەكوڕەكانی مەلا مستەفای بارزانی و زڕ برای مەسعود بارزانی سەرۆكی ئێستای پارتی دیموكراتی كوردستان. كە لەڕوداوێكی تەمومژاویدا لەئۆردوگایەكی ئێران كۆچی دوایی كرد.


هەرچەند قسەو مشتوموڕی زۆر لەبارەی چۆنیەتی مردنی ناوبراوەوە هەیە، بەلام محەمەدی مەلا قادر ئەندامی پێشوی مەكتەبی سیاسی پارتی، چەند نهێنییەك لەوبارەوە ئاشكرا دەكات و باسی روداوێكی مێژوییش دەكات كە تێیدا پەیوەندی نێوان ئیدریس بارزانی و نەوشیروان مستەفای رێكخەری كۆچكردوی بزووتنەوەی گۆڕان دەردەخات.

،،

 كاك نەوشیروان قسەی لەگەڵ كاك ئیدریس كردو گوتی: كاك ئیدریس هەقیقەت من زۆر زوڵمم لەتۆ كردووەو لەدورەوە دژی تۆ زۆر شتم وتووەو زۆر شتم كردووە، بەلام لێرە ئیعتراف دەكەم زۆر بەهەڵەدا چووم و غەڵەتم كردووە، تۆ كەسێكی موستەحەقی ئەوە نەبوویت كە من كردوومە،


ئیدریس بارزانی لەساڵی 1944 لەبارزان لەدایك بووە كوڕی تاقانەیە لەژنی دووەمی مەلا مستەفای بارزانی، پێشمەرگەی شۆڕشەكانی ئەیلول و گوڵانی پارتی دیموكراتی كوردستان بووەو لە 31ی كانونی دووەمی ساڵی 1987 لەناحیەی سلێڤانە سەربە پارێزگای ورمێی ئێران لەروداوێكی تەمومژاویدا كۆچی دوایی كرد. مشت و مڕو قسەی زۆر لەبارەی شێوازی كۆچی دوایی ئیدریس بارزانییەوە دەكرێت، بەڵام تا ئێستا بەڵگەیەكی پێویست لەبەردەست نییە تا راستی و دروستی روداوی مردنی ناوبراو بسەلمێنێت، بۆیە تا ئێستا ساغ نەبووەتەوە كە هۆكاری كۆچكردنی باوكی نێچیرڤان بارزانی چییە.

بەپێی گیڕانەوە مێژوییەكان، ئیدریس بارزانی بەهۆی بۆردومانی فرۆكە جەنگییەكانی عێراقەوە كۆچی دوایی كردووە، بەڵام ئەوەی گومان لەسەر راستی و دروستی ئەو روداوە دروست دەكات، ئەوەیە هیچ شوێنەوارێكی بەركەوتنی گوللە یان پارچە گوللە بەلاشەی ناوبراوەوە نەبینراوە، هەروەك ئەوەی محەمەدی مەلا قادر ئەندامی پێشووی مەكتەبی سیاسی پارتی دیموكراتی كوردستان لەكتێبەكەیدا بەناوی (سەربردە) دەڵێت: "پاش رۆژێك لەمردنی ئیدریس بارزانی، عێراق ئیعلانی كردو گوتی كە ئێمە كوشتومانەو بە باڵەفڕ لێمانداوە، بەڵام درۆیەكی شاخداربوو هیچ ئەسڵ و ئەساسێكی نەبوو، كاك نێچیرڤان خۆیشی لەگەڵیدا بوو."

ئەوەی گومانی زیاتر لەسەر چیرۆكی كۆچی دوایی ئیدریس بارزانی دروست دەكات، ئەوەیە كە ناوەندەكانی راگەیاندی پارتی دیموكراتی كوردستان، بەشەهیدی جوانەمەرگ ناوبراو لەقەڵەم ئەدەن، بەو پێیە بێت راگەیاندنەكەی ئەودەمەی حكومەتی عێراقی راستەو باوكی نێچیرڤان بارزانی بە بۆردومانی فرۆكە گیانی لەدەستداوە، لەكاتێكدا ئەو سەركردەیەی پارتی كە لەودەمەدا لە ئێران بووەو ئاگاداری رووداوەكە بووە، ئەوە رەتدەكاتەوە كە ئیدریس بارزانی بە بۆردومان گیانی لەدەستدا بێت، هەروەك ئەوەی لەبەشێكی تری كتێبەكەیدا دەڵێت: "سەرقاڵی كۆبوونەوەی نێوانمان بووین لەگەڵ یەكێتی، لەو سەروبەندەدا بوو كاتێك تەلەفۆنی نێوان راژان و سلێڤانە لێیدا، بانگیان كردم كە چوم یەكێك قسەی كردو وتی باری تەندروستی كاك ئیدریس زۆر خراپەو بردیان بۆ ورمێ. لەدواییدا زۆری پێنەچو ئاگاداریان كردمەو وتیان ئەجەل دەرفەتی نەدا.

،،

كاتێك تەلەفۆنی نێوان راژان و سلێڤانە لێیدا، بانگیان كردم كە چوم یەكێك قسەی كردو وتی باری تەندروستی كاك ئیدریس زۆر خراپەو بردیان بۆ ورمێ. لەدواییدا زۆری پێنەچو ئاگاداریان كردمەو وتیان ئەجەل دەرفەتی نەدا.


" ئەگەرچی زۆرێك لەسەركردەی هیًزە سیاسییەكانی تری كوردستان، نێوانیان لەگەڵ ئیدریس بارزانیدا خۆش نەبووە، بەو پێیەی لەروداوەكانی شەڕی ناوخۆدا رۆڵێكی خراپی هەبووە، بەڵام بەپێی گێڕانەوەیەكی محەمەدی مەلا قادر، نەوشیروان مستەفا رێكخەری كۆچكردوی بزووتنەوەی گۆڕان دانی بەوەدا ناوە هەڵە بووە بەرامبەر ئیدریس بارزانی و لەبەردەم ناوبراودا دانی بەهەڵەی خۆیدا ناوەو داوای لێبوردنی لێكردووە، هەروەك ئەوەی لەكتێبەكەیدا باسی دەكات و دەڵێت: "لەو كۆنگرەیەی كە كۆماری ئیسلامی ئێران لەساڵی 1986 بۆ هێزە عێراقییەكانی سازدابوو.

ئێمەو یەكێتی و سۆسیالیست بەشداربووین، لەبەینی خۆماندا كۆبوینەوەو یەكمان گرت، پێشنیارمان كرد سێ تەرحمان هەبێ، یەكەم مافی چارەنوس ئەگەر قبوڵ نەكرا رێكەوتنامەی یازدەی ئازار لەگەڵ هەندێ پێشڤەچوون و هەندێ تەعدیلات، ئەگەر ئەوەش قبوڵ نەكرا بڵێن مافە رەواكانی خەڵكی كوردستان. ئەگەر هەموو ئەوانە نەبوو، موقاتەعەی كۆنگرە بكەین. كە دەست بەكۆنگرە كرا گوێمان لێبوو كاك ئیدریس قسەی كرد، زانیمان و یەكسەر چووین ، ئەویش چاوی بەئێمە كەوت و بوینە هێزێك، ئیتر دەستكرا بەگفتوگۆو داوای مافی چارەنوسمان كرد، بەڵام سودی نەبوو، نەگەیشتنە بڕوا. گوتمان ئاخر بڕیارمان مافە رەواكانی خەڵكی كوردستانە، ئەگینا بەجێی دێڵین، ئیتر هەندێك راوێژیان كردو قبوڵیان كرد. پاش كۆنگرە كاك نەوشیروان هاتەلامان و گوتی حەزدەكەم پێكەوە بچینە لای كاك ئیدریس، سەرێكی لێ ئەدەم و خواحافیزی لێ دەكەم. ئەوەبوو كاك فازیڵ میرانیش هات و لەگەڵی رۆیشتین، پاشان كاك نەوشیروان قسەی لەگەڵ كاك ئیدریس كردو گوتی: كاك ئیدریس هەقیقەت من زۆر زوڵمم لەتۆ كردووەو لەدورەوە دژی تۆ زۆر شتم وتووەو زۆر شتم كردووە، بەلام لێرە ئیعتراف دەكەم زۆر بەهەڵەدا چووم و غەڵەتم كردووە، تۆ كەسێكی موستەحەقی ئەوە نەبوویت كە من كردوومە، تۆ مستەحەقی ئەوەی كە كورد خەڵاتت بكات، چونكە ئەو دەورەی كە تۆ بینیت لەكۆنگرەكەدا بەخوا لەم رۆژگارە بەكەس نابینرێت، دەورێكت دیت كە بەهەموو جورئەت و تەقەلات لێبوردەییەك گفتوگۆت كردو ئەوەت كرد تا ئێمە توانیمان شێتك بكەین و ئابڕوی خۆمان بپارێزین. تۆ ئێمەت رزگاركرد لەبەرئەوە من داوای لێبوردنم لێ دەكەم تكا دەكەم بمبوری لەم شتانەی كە دژی تۆ گوتومە. لەمەودوا وەك هەڤاڵێكی خۆت و پێشمەرگەیەكی كوردستان من قبوڵ بكە." ئیدریس بارزانی، لەپاش خۆی دوو كوڕی بەناوەكانی نێچیرڤان و دلۆڤان بەجێهێشتووە، كە ئەمەی دواترین لە رۆژی 2ی مانگی نیسانی ساڵی رابردوو بەنەخۆشی سەكتەی دڵ كۆچی دوایی كرد.

 

author photo

ڕۆژنامەنووس