عێراق‌و كوردستان لەبەردەم تۆفانی ماددەی هۆشبەردا

هێرشی ماددەی هۆشبەر عێراق وێران دەكات

عێراق‌و كوردستان لەبەردەم تۆفانی ماددەی هۆشبەردا

3214 خوێندراوەتەوە

ئەم هێرشە، مەترسییەكەی كەمتر نییە لە تیرۆر و سوپا كە ئێستا عێراقی لە ڕەگ و ڕیشەوە دەرهێناوە، ئەویش غەزوی ماددەی هۆشبەرە لە ناو كۆمەڵگەی عێراقی، گەیشتۆتە ئاستێك تەنانەت دەزگاكانی حكومەتیشی داگیر كردووەو گرتویەتییەوە، پاڵپشت بە گروپی مافیەكانی تایبەت بە ماددەی هۆشبەرو بە پاسەوانی كردنی هێزە سیاسیەكان و میلیشیاو باندەكانی تایبەت بە ماددەی هۆشبەر.

،،

هەشتا لەسەدی ماددەی هۆشبەر كە دێتە ناو شاری بەسرە لە ئێرانەوە دێت و لە سەدا بیستەكەی تر لە وڵاتی كوێتەوە 


رۆژێك نیە بڕوات‌و گوێبیستی هەواڵی دەستگیركردنی چەند كەسێك لە بازرگانان‌و باندەكانی ماددەی هۆشبەر نەبین، كە لە دوای 2003 و ڕوخانی ڕژێمی بەعس لە ئێرانەوە دێت و لە عێراقدا بڵاو دەبێتەوە، وە بەپێی وتەی پسپۆڕان، ماددەی هۆشبەر بە هەموو جۆرەكانیەوە، وەكو تۆفان‌و بارانی بەهار بەسەر عێراقدا ئەبارێت‌و هەموو توێژەكانی كۆمەڵگای عێراقی گرتۆتەوە.


ئەگەر تەماشای مەترسی بڵاوبونەوەی ماددەی هۆشبەر لە ناو كۆمەڵگەی عێراقیدا بكەین، ئەزانین كە پێشتر هیچ پێشینەیەكی نەبووە، بۆیە لەسەر ئەو ئابڕوچوونە ژمارەیەك لە رێكخراوەكان و دەزگا ئەمنیەكان و تەنانەت ئەنجومەنی نوێنەرانیش هۆشداری ئەدەن لە مەترسی دیاردەی بڵاوبونەوەی ماددەی هۆشبەرو داوای چارەسەری بەپەلە ئەكەن.


(عودەی عەواد) ئەندامی پەرلەمان و نوێنەر لەسەر شاری بەسرە لە كۆنگرەیەكی ڕۆژنامەنوسیدا كە لە ئەنجومەنی نوێنەراندا بەستی ئیعترافی كرد و وتی:" شوێن و پێگەی شاری بەسرە تاكە دەروازەی عێراقە لەسەر دەریا كە بژێوی خەڵكەكە دابین ئەكات، ئەبینین تەنها لە ماوەی سێ‌ ساڵی رابردودا بازرگانیكردن و هێنانی ماددەی هۆشبەر بە شێوەیەكی زۆر گەورە زیاد بووە، هەتا ژمارەی ئەوانەی تەنها لە ساڵی ڕابردودا لەسەر كڕین و فرۆشتن و بەكارهێنانی ماددەی هۆشبەر گیراون گەشتۆتە زیاتر لە چوار هەزار كەس".


عەواد وتیشی:"ب ێگومان ئەو دیاردەیە لەسەر خەڵك و كۆمەڵگای بەسرا كە ناسراوە بە پارێزگار و ئارام و میانڕەو نامۆیە، وە چەندین هۆكارێك هەبووە بۆ ئەوەی ماددەی هۆشبەر زۆر بە خێرایی لە ماوەی چەند ساڵەی رابردودا بڵاوببێتەوە".
عەواد داوای كردو وتی:"حكومەت ئەبێت بەرپرسیاریەتی ئەو دیاردەیە هەڵبگرێت و بیگرێتە ئەستۆی خۆی كەتوشی لاوانی وڵاتەكەمان بۆتەوە، بۆیە پێوویستە پەلە بكرێت لە دروستكردنی لیژنەیەك كە پێكهاتبێت لە حكومەت و پەرلەمان و دادگا بۆ چارەسەر كردنی كێشەكە، چونكە ئەو دیاردەیە قوتابخانە و زانكۆكانیشی گرتۆتەوە".


عەواد هۆكارەكانی بڵاوبونەوەی خێرای دیاری كرد كە بریتیە فراوانی سنوری پارێزگای بەسرە لەگەڵ ئێران و لاوازی رێكارە ئەمنیەكان و بێكاری و نەبوونی ڕۆڵی حكومەت، هەروەها بونی دەستی هەندێك حزب لەسەر سنورەكان بەتایبەتی دەروازەی ئوم قەسر، كە دەستیان بەسەر هەموو شتێكدا گرتووە.
رەشید فەلیح سەركردەی پۆلیسی بەسرە ئاشكرای دەكات كە هەشتا لەسەدی ماددەی هۆشبەر كە دێتە ناو شاری بەسرە لە ئێرانەوە دێتە ناو شاری بەسرەو لە سەدا بیستەكەیتر لە وڵاتی كوێتەوە دێتە ناو بەسڕە، ئەوەش چەند هەوڵێكە بۆ لەناو بردنی كۆمەڵگەی بەسڕە لە رێگەی بڵاوكردنەوەی ماددەی هۆشبەر.

،،

 عێراق بۆتە بازارێكی سەرەكی لە ناوچەكەدا بۆ كرین و فرۆشتن و بەكارهێنانی ماددەی هۆشبەر.


میلیشیاكان پاڵپشتی بازرگانییەكە دەكەن
فەلیح لە كۆنگرەیەكی ڕۆژنامەنوسیدا كە لە بارەگای پارێزگای بەسرە بەستی وتی:"ڕەزامەندی سەركردایەتی پرۆسەكانی هاوبەش و وەزارەتی ناوخۆی وەرگرتووە بۆ هەڵمەتێكی سەربازی فراوان لە پێناو بنەبڕكردنی دیاردەكە، لەسەر سنوری تەواوی پارێزگای بەسڕە بە درێژایی 94 كیلۆمەتر لەگەڵ ئێران، وە شەتولعەرەب ئەكەوێتە ژێر چاودێری پرۆسەیەكی پشكنینی وردەوە بۆ ئەوەی رێگری لە هاتنی ماددەی هۆشبەر لە رێگەی ئێرانەوە بكرێت".


وە پۆلیسی شاری بەسرە چەند جارێك هەڵمەتی ئەمنی بۆ بە ئامانج گرتنی بازرگانانی تایبەت بە ماددەی هۆشبەری لە شارەكە ڕاگەیاندووە، نەیتوانیوە سنورێك بۆ ماددەی هۆشبەر دابنێت، بەڵام لەو ڕێگەیەوە توانراوە ڕۆژانە (10 بۆ 15) كەس لە شارەكە دەستگیر بكەن كە لە بازرگانان و توشبوانی تایبەت بە ماددەی هۆشبەر بوون، وە لە ماوەی چەند ساڵی رابردودا توانراوە زیاتر لە چوار هەزار كەس لە بازرگانی ماددەی هۆشبەر و توشبوانی دەستگیر بكرێن.


بۆ ڕوونكردنەوەی ڕاستی دیاردەی ماددەی هۆشبەریش لە عێراقدا كۆمیسیۆنی مافەكانی مرۆڤ ڕایگەیاند:" لە ئێستادا عێراق بۆتە بازارێكی سەرەكی لە ناوچەكەدا بۆ كرین و فرۆشتن و بەكارهێنانی ماددەی هۆشبەر".

 


فازڵ غەراوی لە ڕێگەی بەیاننامەیەكەوە بەناوی كۆمیسیۆنی مافەكانی مرۆڤەوە هۆشداری ئەدات و ئەڵێت " تووشبوانی ماددەی هۆشبەر لە شاری بەسرە هەردوو ڕەگەزی بەبێ‌ جیاوازی گرتۆتەوە، ڕۆژ لە دوای ڕۆژیش لە زیادبون دایە، وە بڵاوبونەوەی ماددەی هۆشبەر لە نێوان لاوان و پیاوان و مناڵانی تەمەن (10 بۆ 15) ساڵیدا بە هەردو ڕەگەزەكەیەوە لە زیادبوندایەو بۆتە كێشەو مەترسییەكی گەورە بۆ كۆمەڵگە و دانیشتوانی شاری بەسڕە".


بەیاننامەكەی كۆمیسیۆن دووپاتی دەكاتەوە:" كە لە نیوەی یەكەمی ساڵی 2018دا ئەوانەی بەتۆمەتی تێوەگلان و بەكارهێنان و بازرگانیكردن بە ماددەی هۆشبەرەوە دەستگیركراون، لە كۆی پانزە پارێزگای عێراق جگە لە پارێزگاكانی هەرێمی كوردستان تا ئێستا ژمارەیان گەیشتۆتە (6187) كەس.
وە ئەو پارێزگایانەی تا ساڵی ڕابردو لە دەرەوەی چوارچێوەی ئەو دیاردە مەترسیدارەدابوون بریتین لە شارەكانی موسڵ و دیالەو كەركوك و ئەنبار، بەڵام ئێستا ئەوانیش كەوتوونەتە هەمان ئەو چوارچێوە مەترسیدارەی ماددەی هۆشبەرەوە" .وە تەنها شاری بەسرە نییە كەوا ئەو دیاردە مەترسیدارەی بازرگانیكردنی بە ماددەی هۆشبەری گرتۆتەوە، بەكو هەموو شارەكانی عێراق بە هەرێمی كوردستانیشی گرتۆتەوە.

،،

زۆربەی ماددەی هۆشبەر هەر لێرەوە دابەشی شارەكانی عێراق ئەكرێتەوە، بەڵام بەشی هەرە زۆری ئەڕوات بۆ وڵاتانی كەنداو بەتایبەتی لە ڕێگەی دەروازەی عەرعەری سنوریەوە بەشێكی زۆری بۆ وڵاتی سعودیە ئەڕوات

ماددەی هۆشبەر زۆر بەخێرایی لە ناو قوتابیاندا بڵاوبۆتەوە

لە سیمینارێكدا بۆ بەرێوەبەرایەتی پەروەردەو دەزگای ئاسایش لە پارێزگای زیقار، پسپۆرانی بواری لە ناوبردنی ماددەی هۆشبەر هۆشدارییاندا لە مەترسی خێرا بڵاوبونەوەی ماددەی هۆشبەر و بەكارهێنانی لە ناو توێژی لاوان بەگشتی و قوتابیانی قوتابخانەكانی زیقاردا بە تایبەتی.
پسپۆران داوایان لە گارگێرانی قوتابخانەكان و خێزانەكان و دانیشتوانی شارەكە كرد ڕۆڵی خۆیان بەخێرایی بگێرن بۆ دیاریكردنی سنورێك لەبەردەم كێشەی بەكارهێنانی ماددەی هۆشبەر كە خەریكە زۆر بە خێرایی هەموو دانیشتوان ئەگرێتەوە.


حەیدەر سەعدی بەرپرس لە وەزارەتی پەروەردە دەڵێت:"ماددەی هۆشبەر كێشەیەكی دژوارە ڕوبەڕووی كۆمەڵگا بۆتەوە، بۆیە پێوویستە ڕێگە نەدەین و رێگە بگرین تا لەوە زیاتر بڕی ماددەی هۆشبەر لە ناو قوتابیاندا بڵاونەبێتەوە".
هەروەها سەعدی وتیشی:" ماددەی هۆشبەر زۆر بە خێرایی لە عێراقدا لە بڵاوبونەوە دایە، بۆیە پێویستە ڕێگە لە باندو مافیەكانی تایبەت بە كرین و فرۆشتنی ماددەی هۆشبەر بگیرێت، چونكە بە رێكخراوی ئەو كارە دەكەن".
وە سیمینارەكە كۆمەڵێك رێنمایی دەركرد لە ناویاندا پلانی پرۆسەی زانستی و پەروەردەیی ئامادە بكرێت، كە پشت بە خولی ڕاهێنانی خێزانەكان و قوتابیان و ئیدارەی قوتابخانەكان و دانیشتوانی شارەكە و دەزگا حكومیەكان و كومەڵگەی مەدەنی ببەسترێت، و جێبەجێ‌ كردن و رێكاری بەدواداچونی ئەمنی و چاودێری كارا بۆ دادگا لەسەر بەكارهێنەرانی ماددەی هۆشبەر لە ناو قوتابخانەكاندا.


لەگەڵ هەڵمەتی ناساندنی مەترسیەكانی بەكارهێنانی ماددەی هۆشبەر، و هەروەها گرنگی ئاشكراكردنی سەرەتایی لەسەر حاڵەتەكان و چارەسەرەكانی پێش توشبون و ئاڵودەبون بە ماددەی هۆشبەر گرنگ و پێوویستە.
وە پێشتر پۆلیسی زیقار لە ڕێگەی كۆنگرەی ساڵانەی خۆی ڕایگەیاندبوو كە ڕێژەی بازرگانی كردن و بەكارهێنەرانی ماددەی هۆشبەر لە زیادبون و بەرزبونەوە دایە كە لە ساڵی 2016 بەراورد بە ساڵی 2015 (14%) زیاتر بووە، وە ئەوانەی بە تاوانی ماددەی هۆشبەر دەستگیر كراون گەیشتۆتە (237) تۆمەتبار كە لە ناویاندا بازرگان و بەكارهێنەر و ڕەواج پێدەری ماددەی هۆشبەر هەیە.
وە گۆنگرەی لەناوبردنی ماددە هۆشبەرەكان لە شاری سەماوە ئاماژە بە سەرژمێریە فەرمیەكان ئەكات كە تەنها لە دادگای سەماوە گەیشتۆتە زیاتر لە (500) بازرگانی ماددەی هۆشبەر، وە ئەوانەی بازرگانی ماددەی هۆشبەر ئەكەن زۆرینەیان بەشێوەیەكی رێكخراو لە ئێران ڕایان كردووە و ماددەی هۆشبەریش هەر لە ئێرانەوە بۆ شاری سەماوە دەهێنن.


ئەو چاودێرانەی گومانیان هەیە ئەڵێن: بەشێكی زۆری ماددەی هۆشبەر بەسەر شارەكانی عێراق بە هەرێمی كوردستانیشەوە دابەش ئەكرێتەوە، وە بەشداربوان ئەڵێن زۆربەی ماددەی هۆشبەر هەر لێرەوە دابەشی شارەكانی عێراق ئەكرێتەوە، بەڵام بەشی هەرە زۆری ئەڕوات بۆ وڵاتانی كەنداو بەتایبەتی لە ڕێگەی دەروازەی عەرعەری سنوریەوە بەشێكی زۆری بۆ وڵاتی سعودیە ئەڕوات.

 

،،

 پارێزگای دیالە جگە لە كێشەی تیرۆر بە چەندین كێشەی ترەوە توش بووە، لە پێشی هەموشیانەوە كێشەی بوونی بازرگانی ماددەی هۆشبەرە

بەكارهێنانی لاوان بۆ ڕەواج پێدان بە ماددەی هۆشبەر

بەڵام پارێزگای دیالە كە جیرانی ئێرانە، (ئەحمەد مەزهەر جبوری) ئەندامی پەرلەمان تۆڕێكی تایبەت و پسپۆڕی تایبەت بە بازرگانی ماددەی هۆشەری لە ڕێگەی بەكارهێنانی لاوانی پارێزگاكە و لە ڕێگەی پرۆسەی گواستنەوە و ڕەواج پێدانەوە ئاشكرا دەكات و دەڵێت:" پارێزگای دیالە جگە لە كێشەی تیرۆر بە چەندین كێشەی ترەوە توش بووە، لە پێشی هەموشیانەوە كێشەی بوونی بازرگانی ماددەی هۆشبەرە، كە مەترسییەكی گەورەی بۆ سەر دانیشتوانی شارەكە دروست كردووە، بەتایبەتیش لەم ساڵانەی كۆتایدا زۆر زیاتر بووە، وە لەگەڵ زیادبوونی ئامادەكاری و دروستكردنی تۆڕی تاوانی چالاك و كارا لە بواری ماددەی هۆشبەر، بۆیە پێوویستە زۆر بە تواناو بەهێزەوە بە ئاستی قەبارەی بازرگانەكانی ماددەی هۆشبەرەوە یارمەتی تیمی لەناوبردنی ماددەی هۆشبەر لە پارێزگاكە بدرێت ".
وە لە پارێزگای كەركوك بەرپرسە ئەمنیەكان ئاشكرای ئەكەن كەوا دادگا لە ساڵی 2017دا حوكمی لە سێدارەدانی بۆ حەوت بازرگانی ماددەی هۆشبەری شاری كەركوكی دەركردووە، هەروەها چەندین حوكمی تری جیاواز لەبەرامبەر (31) كەسی تردا دەرچووە كە بازرگان و بەكارهێنەری ماددەی هۆشبەر بوون.
سەرچاوە ئەمنیەكان دوپاتی ئەكەنەوە كەوا لەم كۆتاییانەدا لە شاری كەركوك بە شێوەیەكی بەربڵاو بازرگانی كردن بە ماددەی هۆشبەر بڵاوبۆتەوە، وە تەنها لە پێنج مانگی رابردودا (31) كەس دەستگیر كراون.


وە شارەزایان ئەڵێن دیارترین هۆكاری بڵاوبونەوەی ماددەی هۆشبەر و نەتوانینی ڕوبەڕوبونەوەی، بوونی یارمەتی حزب و میلیشیاكان و ئەو باندانەیە كە پارەیەكی زۆر و خەیاڵییان لەپشت بازرگانی ماددەی هۆشبەرەوە دەست دەكەوێت .
(حاكم زاملی) سەرۆكی پێشوی لیژنەی ئاسایش و بەرگری لە پەرلەمانی عێراق حزبە سیاسەكان تۆمەتبار دەكات كە لە پشت فراوان كردنی دیاردەی بازرگانی كردن بە ماددەی هۆشبەرەوەن لە عێراقدا .
وە لە چاوپێكەوتن و لێدوانە ڕۆژنامەوانیەكانیدا هەمیشە ئاماژەی بەوە كردووە كە ماددەی هۆشبەر لە ڕێگەی ئێران و ئەفغانستان و سوریا و لوبنانەوە بە ڕێژەیەكی زۆر گەورە دێتە ناو خاكی عێراقەوە.


هەروەها زاملی دەڵێت: "ژمارەیەكی زۆر گەورە لە بەرپرسان لە بازرگانی كردن بە ماددەی هۆشبەرەوە تێوەگلاون، وە بڕی 16 ملیۆن حەبی ماددەی هۆشبەر لە ڕێگەی دەروازەی مینا لە شاری بەسراوە بە بڕی 60 ملیۆن دۆلار هاتۆتە ناو خاكی عێراقەوە، بەدڵنیاییەوە بازرگانی ئاسایی ناتوانێت، و پاڵپشتی حزب و میلیشیاكانی لەپشتەوەیە ئەگەرنا ناتوانێت بەو شێوەیە بیهێنێتە ناو عێراقەوە".

،،

دەستەڵاتدارانی هەرێم لە دەوروبەری شاری هەولێر هەر لە ساڵی 2016 دەستیان كردووە بە دروستكردنی گێڵەی تایبەت بە بەرهەمهێنانی جۆرەكانی ماددەی هۆشبەر كە بە بڕی نزیكەی یەك ملیۆن دۆلار مەزەندە دەكرێت

كێڵگەی ماددەی هۆشبەر

وێنەی نارەحەتیەكانی دەردو ئافاتەكانی كێڵگەی بەرهەمهێنانی ماددەی هۆشبەر تەنها هێنانی لە وڵاتی ئێران و وڵاتانی ترەوە بۆ عێراق كورت ناكرێتەوە، بەڵكو كێشەكە ئەوەیە كە بەپێی سەرچاوە ئاگادارەكان كێڵگەی كشتوكاڵی تایبەت بە بەرهەمهێنانی ماددەی هۆشبەر لە چەند شارێكی عێراقدا بونی هەیە.
وە لە ژێر چاودێری و پاراستنی حزب و باند و میلیشیا چەكدارەكان دایە، حاكم زاملی ئاشكرای كردووە كە لە ناوەڕاست و باكوری عێراقدا كێڵگەی كشتوكاڵی تایبەت بە ماددەی هۆشبەر بونی هەیە.


جگە لەوەی كەوا كێڵگەی تایبەت بە بەرهەم هێنانی كریستاڵ لە هەندێك لە شارەكانی عێراق بەگشتی و شاری بەغدا بەتایبەتی بونی هەیە، ئەوەش بازرگانێكە بە ڕاستی بۆتە گەسك لێدەر و لەناوبەری هەموو داهاتی تاك و كۆمەڵگەو تەنانەت دەوڵەتیش.
وە (فائق شێخ عەلی) ئەندامی پەرلەمانی عێراق ڕایگەیاندووە كە كێڵگەی تایبەت بە بەرهەم هێنانی حەشیش لە شارەكانی باشوری عێراق بونی هەیە و لە ژێر چاوێری پاراستنی حزبە سیاسیەكان و باند و هێزە چەكدارەكان دایە ، ئەوەش كە كارەكەی كردووە بە دیاردەی بڵاوبونەوەی ڕەهەندی حزبایەتیە كە دەیانەوێت لە ڕێگەی بەرهەم هێنان و بازرگانی كردن بە ماددەی هۆشبەرەوە داهاتێكی زۆریان دەست بكەوێت .

هەرێمی كوردستان و كڵێگەی ماددەی هۆشبەر

هەرێمی كوردستانیش دور نیە لە بازرگانیكردن و بەرهەمهێنانی ماددەی هۆشبەر، دەستەڵاتدارانی هەرێم لە دەوروبەری شاری هەولێر هەر لە ساڵی 2016 دەستیان كردووە بە دروستكردنی گێڵەی تایبەت بە بەرهەمهێنانی جۆرەكانی ماددەی هۆشبەر كە بە بڕی نزیكەی یەك ملیۆن دۆلار مەزەندە دەكرێت، هەروەها چەندین بازرگان و ئاڵودەبوی تایبەت بە ماددەی هۆشبەریش لە شاری سلێمانیدا هەیە كە هاوسنور و جیرانە لەگەڵ وڵاتی ئێران.
هەر لەو چوارچێوەیەدا شارەزایان ئاماژە ئەكەن كەوا ساڵانە چەندین ملیۆن هاوڵاتی ئێرانی سەردانی شارەكانی عێراق ئەكەن و لەگەڵ خۆیاندا ماددەی هۆشبەر ئەهێنن، بەردەوام بەشێكی زۆریان لەسەر سنورەكانەوە بەهۆی پێبونی ماددەی هۆشبەرەوە دەستگیر ئەكرێن.

،،

 حزبە سیاسەكان لە عێراق و لە كوردستانیش خۆشحاڵن بە ئاڵودەبونی لاوان بە ماددەی هۆشبەر، بۆ ئەوەی رزگاریان بێت لە نارەزایەتیەكان و خۆپیشاندانی لاوان و ئۆپزسیۆنبونی لاوان لەبەرامبەر گەندەڵی و خراپی بژێوی ژیان

عێراق لە ئاستی جیهاندا

پێش 2003 و هاتنی ئەمریكیەكانیش عێراق لە ئاستی جیهاندا یەكێك بووە لە پاكترین وڵاتانی جیهان كە دوربووە لە بەكارهێنان و بازرگانیكردن بە ماددەی هۆشبەرەوە، ئێستا نوسینگەی تایبەت بە لەناوبردنی ماددەی هۆشبەر لە نەتەوە یەكگرتووەكان لە عێراق ئاماژە بە بونی 28 هەزار ئاڵودەبووی بەماددەی هۆشبەر ئەكات لە ساڵی 2003وە تا ساڵی 2006.
هەروەها نوسینگەی لەناوبردنی ماددەی هۆشبەری سەر بە نەتەوە یەكگرتووەكان لە عێراق دەڵێت:" عێراق بۆتە پردێكی سەرەكی بۆ بازرگانیكردن بە ماددەی هۆشبەرەوە لە نێوان وڵاتانی بەرهەم هێنەر و بەكاربەردا".


هەست كردن بە مەترسیەكە
لە عێراق هەموویان كۆكن لەسەر مەترسیەكانی ماددەی هۆشبەر و كاریگەریەكانی لەسەر توێژەكانی كۆمەڵگەی عێراقی بەگشتی و لاوان بەتایبەتی، هەروەها هاودەنگن لەسەر ئەوەی دەوڵەت لاوازە و گەندەڵی زۆر هەیە و هەمو سنورەكان بەرامبەر وڵاتانی دراوسێ‌ بەگشتی و ئێران بەتایبەتی كراوەن، وە لەگەڵ بونی هێزی میلیشیایی و سودوەرگرتنی لە بازرگانی كردنی ماددەی هۆشبەر .
زۆرێكیش لە چاودێران پێیان وایە حزبە سیاسەكان لە عێراق و لە كوردستانیش خۆشحاڵن بە ئاڵودەبونی لاوان بە ماددەی هۆشبەر، بۆ ئەوەی رزگاریان بێت لە نارەزایەتیەكان و خۆپیشاندانی لاوان و ئۆپزسیۆنبونی لاوان لەبەرامبەر گەندەڵی و خراپی بژێوی ژیان و ئازادی رادەربرین و خراپی و فەشەل و دۆرانی دەستەڵاتداران لە بواری حوكمرانی و كاروباری دەوڵەتداری لە عێراق و لە هەرێمی كوردستانیشدا.

 

author photo

شارەزای کاروباریی عێراق