پۆپۆلیزمى كوردى له‌گه‌ل دۆستیه‌وه‌ بۆ گه‌لكوژى

پۆپۆلیزم , مێژوویه‌ك له‌سه‌روه‌رى یان هه‌ڵخه‌ڵه‌تاندنى گه‌ل...؟

پۆپۆلیزمى كوردى له‌گه‌ل دۆستیه‌وه‌ بۆ گه‌لكوژى

427 خوێندراوەتەوە

له‌چەند ساڵی ڕابردودا و لەململانێی سیاسی نێوان حزبه‌ كوردیه‌كاندا زۆرجار وشه‌ی پۆپۆلیزم وه‌كو تانه‌ و ته‌شه‌ر و تۆمه‌ت به‌كارهێنراوە, له‌ئیستاشدا ئه‌م زاراوه‌یه‌ له‌لایه‌ن هەندێك لە نوسه‌ران و ڕۆژنامه‌نوسان و هه‌ندێجاریش هاوڵاتیانه‌وه‌ له‌تۆڕه‌ كۆمه‌ڵایه‌تیه‌كاندا لەدژی ئەو حزب و سەركردە و بەرپرسەی كە ڕەخنەی لێدەكرن كاتێك بەناوی گەلەوە قسەدەكات, به‌هه‌مان شێوه‌ی حزبه‌كان بۆ تۆمه‌ت و تانه‌ و ته‌شه‌ر به‌كارده‌هێنرێت, پۆپۆلیزم له‌دونیای سیاسی كوردیدا وه‌كو زۆر پرسیی تر جیاواز لای نه‌ته‌وه‌كانی تری دونیا بەكاردەهینرێت, هه‌یه‌ پشتیوانی ده‌كات و جێی شانازییه‌تی و هه‌یه‌ به‌سیاسه‌ت و ئایدۆلۆژیایه‌كی كاره‌ساتباری ده‌زانێت, لەم وتارە شیكاریەدا ورده‌كاریی بەشێكی كەم لەو ئیشكالە فیكری وسیاسیه‌ی چه‌مكی پۆپۆلیزم لەخراوەتە ڕوو.

 

 

 

دواى دروست بونى ئۆپۆزسیۆنى په‌رله‌مانى له‌كوردستان و سه‌رهه‌ڵدانى شۆڕشه‌كانى به‌هارى عه‌ره‌بى زاراوه‌ى پۆپۆلیزم له‌لایه‌ن حزبه‌ ده‌سه‌ڵاتداره‌كانه‌وه‌ له‌دژى حزبه‌ ئۆپۆزسیۆنه‌كانى پێشوو( گۆڕان , كۆمه‌ڵ, یه‌كگرتو) به‌كارهات, ئه‌مه‌ش له‌به‌ر ئه‌وه‌ى زیاتر ئه‌و حزبانه‌ جه‌ختیان له‌پاراستنى مافى گه‌ل له‌ِڕووى نه‌ته‌وه‌یى و نیشتیمانى و مرۆییه‌وه‌ ده‌كرد. له‌ئێستادا چه‌ند نوسه‌ر و ڕۆژنامه‌نوسێك ئه‌م زاراوه‌یه‌ وه‌كو ڕه‌خنه‌ گرتن و زۆرجاریش تا ئاستى تۆمه‌تباركردنى چه‌ند حزب و كه‌سایه‌تى و گروپێك به‌كار ده‌هێنن, دابه‌شبونێكى هه‌ڕه‌مه‌كى به‌سه‌ر ئه‌م زاراوه‌یه‌دا له‌فه‌زاى كوردستاندا ده‌بینرێت به‌تایبه‌ت له‌سه‌ر ئاستى ڕۆشنبیره‌كان, هه‌یه‌ پێوایه‌ پۆپۆلیزم دیارده‌یه‌كى سروشتیه‌ و ده‌بێت سه‌ركرده‌ى سیاسى پۆپۆلیزم بێت بۆ ئه‌وه‌ى به‌ڕاست دڵسۆزى گه‌له‌كه‌ى خۆى بێت, ته‌نانه‌ت په‌رله‌مانتارێكى پێشو و چالاكێكى سیاسى نوسیبوى شانازى ده‌كه‌م پۆپۆلیزم بم, نوسه‌رو ڕۆژنامه‌نوسێكى دیارى كوردیش به‌ماوه‌یه‌كى كه‌م پێش دروستبونى بزوتنه‌وه‌ى گۆڕان له‌وه‌سفێكى نه‌وشیروان مسته‌فادا نوسیبوى " ئه‌و سه‌ركرده‌یه‌ بۆیه‌ جیاوازه‌ له‌وانى تر گه‌لپه‌روه‌ره‌ و به‌ڵین و دروشمه‌كانى خۆى جێ به‌جێ ده‌كات" ئه‌ویش كاتێك بیستبوى وه‌كو پۆپۆلیزم ناوى هاتوه‌  لاى هاوڕێكانى ناخۆشحاڵى خۆى ده‌ربڕى بو, نوسه‌رێكیش پۆپۆلیزمى وه‌كو تانه‌ و ته‌شه‌ر و تۆمه‌ت بۆ حزبێكى تازه‌ دروست بو كه‌ ئیدعاى ئۆپۆزسیۆن بون ده‌كه‌ن به‌كارهێنابو.له‌گه‌ڵ ئه‌مانه‌ و ده‌یان ڕوداوى ترى هاوپه‌یوه‌ند به‌ چه‌مكى پۆپۆلیزمه‌وه‌ له‌دونیاى میدیا و سیاسى كوردیدا ده‌بینرێت به‌ڵام تا ئێستا ئه‌وه‌ى له‌په‌نهاندا به‌شێوه‌یه‌ك له‌شێوه‌كاندا ماوه‌ته‌وه‌ خودى پۆپۆلیزمه‌, ئایا پۆپۆلیزم ئه‌و دێوه‌زمه‌یه‌ كه‌ ده‌بێت لێى بترسین, یاخود ئه‌و فه‌لسه‌فه‌ فریاد ڕه‌سه‌یه‌ ده‌بێت شانازى پێوه‌ بكه‌ین..؟ 

,,

سەرەتای سەرهەڵدانی پۆپۆلیزم وەكو چەمك و زاراوە بۆ سەردەمی بەلشەفیەكانی ڕوسیا لەسەدەی نۆزدەیەم دا دەگەڕێتەوە

سه‌ره‌تاى سه‌رهه‌ڵدانى پۆپۆلیزم

پۆپۆلیزم Populism وشه‌یه‌كى ئینگلیزیه‌  به‌واتاى گه‌ل دۆستى یاخود گه‌لپه‌روه‌ریى  دێت, له‌ زمانى كوردیشدا  ئه‌گه‌ر پۆپۆلیزم بكوردێنرێت ئه‌وا هه‌ر وشه‌ى گه‌لپه‌روه‌رى له‌به‌رامبه‌ریدا به‌گونجاو ده‌زانرێت.سه‌ره‌تاى سه‌رهه‌ڵدانى پۆپۆلیزم وه‌كو جوڵانه‌وه‌ى سیاسیى و ئایدۆلۆژیا مێژوه‌كه‌ى بۆ  سه‌رده‌مى شۆڕشى به‌لشه‌فیه‌كانى ڕوسیا ده‌گه‌ریته‌وه‌, گروپێك له‌ سۆشیالیزمه‌كان پێانوانبو پێویسته‌ به‌بێ چونه‌ نێو قۆناغى سه‌رمایه‌داریه‌وه‌ بگه‌ن به‌قۆناغى سۆشیالیزم , بۆ ئه‌مه‌ش ده‌بێت سۆشیالیزمه‌كان له‌گه‌له‌‌وه‌ فێر ببن نه‌ك هه‌وڵى له‌قاڵبدانی بده‌ن و جوتیاره‌كانیش ئه‌و چینه‌ن ده‌توانن ببنه‌ داینه‌مۆى  ئه‌و شۆڕشه‌ ,له‌دواى ڕوداوى ئازادكردنى جوتیاره‌ ده‌ستگیراوه‌كان  له‌ساڵى 1870 له‌ڕوسیادا ئیدى زاراوه‌ى پۆپۆلیسم به‌شێوه‌یه‌كى ئه‌كادیمى به‌كارهێنرا, هاوكات هه‌ر له‌و سه‌رده‌مه‌دا له‌ چه‌ند لادییه‌كى ویلایه‌ته‌ یه‌كگرتوه‌كانى ئه‌مریكاش دا جوڵانه‌وه‌یه‌كى یاخییانه‌  سه‌ریهه‌ڵدا له‌دژى چه‌ند یاساییه‌كى بانكه‌كان و چه‌ند كۆمپانیایه‌كى هێڵى شه‌مه‌نده‌فه‌ر به‌پاڵپشتى حزبى گه‌لى ئه‌مریكى كه‌ له‌و ئان و ساته‌دا دامه‌زاربو, پۆپۆلیزم وه‌كو زاراوه‌ به‌كارهێنرا.

له‌سه‌ده‌ى بیسته‌میشدا پۆپۆلیزم چه‌ند سیفه‌تێكى ترى وه‌رگرت و له‌لایه‌ن خوان بیرۆن له‌ئه‌رجه‌نتین و ڕابه‌رى به‌رازیلییه‌كان له‌ئه‌مریكاى لاتین  و كاسترۆ له‌كوبا , پۆپۆلیزم به‌ دروشمى نه‌ته‌وه‌یى و نیشتیمانی و خه‌بات له‌پێناو چه‌ند چینێكى كۆمه‌ڵایه‌تى دا بارگاوى كرا كه‌ دواتر وه‌كو شۆڕش كڵپه‌ى سه‌ند و ده‌رئه‌نجامى خۆێناویان بۆ كۆمه‌ڵگه‌ لێكه‌وته‌وه‌.

,,

پۆپۆلیزم واتا جوڵاندنى هه‌ستى ناعه‌قڵانى خه‌ڵكى و ئاڕاسته‌كردنیان به‌ره‌و دژایه‌تى چینه‌ ده‌سه‌ڵاتداره‌كان به‌و شێوه‌یه‌ى خۆیان ده‌یانه‌وێت.

هه‌ر له‌سه‌ره‌تاى سه‌ده‌ى بیسته‌مدا له‌لایه‌ن زانا كۆمه‌ڵناسه‌كانه‌وه‌ پۆپۆلیزم وه‌كو سه‌ره‌تایه‌كى ئایدۆلۆژى یان بزوتنه‌وه‌یه‌كى سیاسیى ڕاڤه‌ كرا, ئیداورد شیلز كۆمه‌ڵناسیى ئه‌مریكایی, پێوابو پۆپۆلیزم جوڵانه‌وه‌یه‌كى سیاسیى نیه‌ به‌ڵكو ئایدۆلۆژیایه‌كه‌ ده‌كرێت له‌شار و له‌لادێش دا سه‌رهه‌ڵبدات و له‌هه‌مو كۆمه‌ڵگه‌یه‌ك به‌پێى پێكهاته‌ى دروستبونى به‌ده‌ر نیه‌ له‌و ڕه‌وته‌ , شلیز باسى له‌وه‌ش كردوه‌ كه‌  پۆپۆلیزم  له‌سه‌ره‌تاى سه‌رهه‌ڵدان و خۆناسینیدا وه‌كو ئایدۆلۆژیایه‌ك  ئیدعاى ئه‌وه‌ ده‌كه‌ن كار له‌سه‌ر ناڕه‌زایه‌تى له‌دژى چینه‌ ده‌سه‌ڵاتداره‌كان ده‌كه‌ن كه‌ خۆیان له‌ڕێگه‌یه‌كى ناشه‌رعیه‌وه‌ سه‌پاندوه‌ و بۆماوه‌یه‌كى دوردورێژ ده‌سه‌ڵاتیان گرتۆته‌ ده‌سته‌وه‌ و سه‌رجه‌م سه‌رچاوه‌كانى ده‌سه‌ڵاتیان بۆ خۆیان و ئه‌وانه‌ى هاوبیریانه‌ قۆرخكردوه‌  هه‌ر له‌ پاره‌ و داهات وسامان و ده‌زگایه‌كى بڕیاردان و سه‌روه‌ریه‌كه‌وه‌ خستۆته‌ خزمه‌تى خۆیانه‌وه‌, به‌ڵام كاتێك زۆربه‌ى پۆپۆلیزمه‌كان ده‌سه‌ڵاتیان گرتۆته‌ ده‌سته‌وه‌ خێرا خۆیان ڕۆڵى سیستمى پێشویان گێڕاوه‌ كه‌ له‌دژى خه‌باتیان كردوه‌ , هه‌مان ئه‌زمۆنیان دوباره‌ كردۆته‌وه‌ بۆیه‌ له‌بنه‌مادا پۆپۆلیزم واتا جوڵاندنى هه‌ستى ناعه‌قڵانى خه‌ڵكى و ئاڕاسته‌كردنیان به‌ره‌و دژایه‌تى چینه‌ ده‌سه‌ڵاتداره‌كان به‌و شێوه‌یه‌ى خۆیان ده‌یانه‌وێت.

,,

پۆپۆلیزم پرەنسیپێكە بۆ پاراستنی دیموكراتی گەل و دەرفەت بۆ سەرهەڵدانی دیكتاتۆریەت ناڕەخسێنیت

ئه‌رنست لاكلاو فه‌یله‌سوفى ئه‌رجه‌نتینى به‌ئه‌رینى سه‌یرى پۆپۆلیزم ده‌كات ,ئه‌و واى ده‌بینێت, پۆپۆلیزم ئایدلۆژیا نیه‌ به‌ڵكو لۆژیكیكى سیاسیه‌ , واتا لۆژیكى پۆپۆلیزم له‌وه‌دا به‌رجه‌سته‌ ده‌بێت كۆمه‌ڵگه‌ بۆ دو چین دابه‌ش ده‌كات ئه‌وانیش ده‌سه‌ڵاتدار (بژارده‌ ) و گه‌ل, ئه‌م دو چینه‌ش به‌شێوه‌یه‌كى سروشتى پێكداده‌ده‌ن له‌پێناو پاراستنى به‌رژه‌وه‌ندیه‌كانى خۆیاندا.

لاكلاو پێوایه‌ پۆپۆلیزم پره‌نسیپێكه‌ له‌پێناو  دو پرسى سه‌ره‌كیدا, یه‌كه‌میان: سیاسه‌ت وا لێ بكات بتوانێت دژایه‌تى گه‌نده‌ڵى و بیرۆكراتیه‌ت بكات و مه‌ترسى سه‌رهه‌ڵدانى سته‌مكارى و دیكتاتۆریش كه‌م بكاته‌وه‌, دووه‌میشیان لۆژیكى پۆپۆلیزمى ده‌رفه‌ت بۆ به‌شداریكردنى زۆرینه‌ى گه‌ل له‌سیاسه‌تتدا ده‌ڕه‌خسێنیت و به‌وه‌ش ده‌توانرێت ڕووبه‌ڕووى بژارده‌ و ده‌سه‌ڵاتداره‌ خۆسه‌پێنه‌كان ببنه‌وه‌ و ڕێگه‌یان لێبگرن حوكمى ئۆلگاریكى و دیكتاتۆرى دابمه‌زرێنن.

جان فیرنه‌ر موله‌ر زاناى ئه‌ڵمانیش له‌ كتێبه‌كه‌ى دا به‌ناوى (پۆپۆلیزم) ده‌ڵیت هیچ تێور و پێناسه‌یه‌كى ڕون و ئاشكرا بۆ پۆپۆلیزم له‌به‌رده‌ستتدا نیه‌ به‌ته‌واوه‌تى لایه‌نه‌ شاراوه‌كانى ئه‌و چه‌مكه‌ ڕونبكاته‌وه‌, به‌ڵام موله‌ر  چه‌ند تایبه‌تمه‌ندیه‌كانى پۆپۆلیزم له‌هه‌ر كۆمه‌ڵگه‌یه‌كدا به‌م شێوه‌یه‌ شیى ده‌كاته‌وه‌, پۆپۆلیزم واتا دژایه‌تى كردنى بژارده‌ ده‌سه‌ڵاتداره‌كان چونكه‌ پیانوایه‌ دیموكراتى واتا ڕاسته‌قینه‌كه‌ى خۆى گۆڕدراوه‌ و خراوه‌ته‌ خزمه‌تى ئه‌و بژارده‌یه‌وه‌, ئه‌مه‌ش به‌و واتایه‌ى نایه‌ت ئه‌گه‌ر هه‌ر كه‌س و گروپێك ڕه‌خنه‌ى له‌ ده‌سه‌ڵات گرت ئه‌وا پۆپۆلیست بێت به‌ڵام مه‌رجى یه‌كه‌مى ناسینه‌وه‌ى پۆپۆلیسته‌كان ئه‌و ڕه‌خنه‌گرتن و ڕه‌تدكردنه‌وه‌ى حوكمى بژارده‌ ده‌سه‌ڵاتداره‌كانه‌‌.

 

 به‌پێى بۆچونى موله‌ر, دوه‌م تایبه‌تمه‌ندى پۆپۆلیسته‌كان ئه‌وه‌یه‌ فره‌یى به‌هه‌موو واتایه‌ك ڕه‌تده‌كه‌نه‌وه‌,یه‌ك دیدو تیڕوانینان بۆ گه‌ل هه‌یه‌,ئه‌وه‌شى دژى یان له‌دژى سه‌ركرده‌كه‌یان بوه‌ستێته‌وه‌ ئه‌وا به‌به‌شێك له‌گه‌ل نایژمێرن,له‌به‌ر ئه‌وه‌ى ئه‌وان پێانوایه‌ ته‌نها خۆیان  ده‌توانن نوێنه‌رایه‌تى گه‌ل بكه‌ن. تایبه‌تمه‌ندى سێیه‌مى پ پۆپۆلیزمه‌كان له‌لاى موله‌ر ئه‌وه‌یه‌, دژایه‌تى دیموكراتى ده‌كات به‌و پیێه‌ى فره‌ى ڕه‌تده‌كاته‌وه‌, هه‌ندێ پێانوایه‌ پۆپۆلیزم ڕه‌وتێكه‌ بۆ چاكسازى كردن له‌سیستمى دیموكراتیدا چونكه‌ هه‌وڵى به‌شدارى كردنى زۆرینه‌ى گه‌ل له‌پرۆسه‌ى سیاسیدا ده‌ده‌ن به‌ڵام موله‌ر ئه‌وه‌ ڕه‌تده‌كاته‌وه‌ و پێوایه‌ پۆپۆلیزم به‌و تایبه‌تمه‌ندیانه‌ى هه‌یه‌تى به‌رده‌وام هه‌ڕه‌شه‌یه‌ بۆ سه‌ر دیموكراتى.

موله‌ر پێوایه‌ كاتێك پۆپۆلیسته‌كان به‌هه‌رجۆرێك له‌ڕێگه‌ى وژرواندنى هه‌ستى خه‌ڵك و دورشمه‌كانیانه‌وه‌ ده‌گه‌ن به‌ده‌سه‌ڵات ئه‌وكات مه‌ترسیه‌كانیان زیاتر بۆ سه‌ر گه‌ل( كۆمه‌ڵگه‌ ) ده‌رده‌كه‌وێت, موله‌ر ده‌ڵیت پۆپۆلیسته‌كان له‌ده‌سه‌ڵاتتدا, ده‌زگاكانى حكومه‌ت قۆرخ ده‌كه‌ن, هه‌وڵى دامه‌زراندنى كه‌سانى خۆیان له‌ پۆسته‌ گرنگه‌كاندا ده‌ده‌ن, سه‌ره‌تاش ده‌سه‌ڵاتى قه‌زایى و ده‌سه‌ڵاتى چواره‌م ( میدیاكان) و دواتریش چه‌ند ده‌زگایه‌كى تر ده‌خه‌نه‌ ژێر ڕكێفى خۆیانه‌وه‌, دوه‌م له‌ژێر دروشمى بازاڕێ ئازاددا گه‌شه‌ به‌كڕین و فرۆشتن ده‌ده‌ن, ئه‌مه‌ش ته‌نها بۆ ئه‌وه‌ى فرسه‌تێكى زیاتر بۆخۆیان بڕه‌خسێت, بره‌و  پاڵپشتى سیاسى بۆ پرۆژه‌كان ده‌ده‌ن تا خه‌ڵكى به‌ئاسانى نه‌توانێ كارى ئازاد بكات, له‌هه‌مان كاتیشدا بۆ ئه‌وه‌ى بتوانن جیاوازى له‌نێوان خه‌ڵك و هاوبیرانى خۆیاندا بكه‌ن ئه‌و لۆژیكه‌ به‌كارده‌هێنن ( هه‌مو شتێك بۆخۆم و هاوڕێكه‌م و یاساش بۆ نه‌یاره‌كانم), به‌پێى بۆچونى موله‌ر مه‌ترسیه‌كى ترى پۆپۆلیسته‌كان له‌ده‌سه‌ڵاتتدا ئه‌وه‌یه‌ ڕێكخراوه‌ ناحكومى مه‌ده‌نییه‌كان ئه‌وانه‌ى پشتیوانى خۆیان ناكه‌ن یاخود ڕه‌خنه‌یان لێى ده‌گرن توشى ته‌نگه‌ژه‌یان ده‌كه‌ن و یاسا له‌دژیان به‌كارده‌هێنن,

,,

وه‌كو چۆن حیزبه‌ كوردیه‌كان له‌زۆر تێور و قوتابخانه‌ى سیاسى و فیكرى و ترادیشنى تر به‌ده‌رنابن, له‌وانه‌ ئۆلگاریكى , حوكمى چه‌ته‌كان, برێك له‌فاشیزم, له‌دونیاى عه‌ره‌بیشدا حوكمى میر و بنه‌ماڵه‌ و خێزانیه‌كان, ئاوه‌هاش له‌ چه‌مك و تێورى پۆپۆلیزم به‌ده‌ر نین

پۆپۆلیزمى كوردى

 به‌پێى ئه‌و تێور و ڕاڤه‌ ئه‌وروپى و ئه‌مریكایانه‌ى بۆ پۆپۆلیزم كراوه‌ هه‌روه‌كو چۆن حیزبه‌ كوردیه‌كان له‌زۆر تێور و قوتابخانه‌ى سیاسى و فیكرى و ترادیشنى تر به‌ده‌رنابن, له‌وانه‌ ئۆلگاریكى , حوكمى چه‌ته‌كان, برێك له‌فاشیزم, له‌دونیاى عه‌ره‌بیشدا حوكمى میر و بنه‌ماڵه‌ و خێزانیه‌كان, ئاوه‌هاش له‌ چه‌مك و تێورى پۆپۆلیزم به‌ده‌ر نین, به‌تایبه‌ت ئه‌و حزبانه‌ى چونه‌ته‌ ده‌سه‌ڵاته‌وه‌ یان به‌شداریان له‌خواردنى كێكیى ده‌سه‌ڵاتدا كردوه‌, جیاوازیه‌كه‌ى ئه‌وه‌یه‌ پێچه‌وانه‌ى حزب و ڕه‌وت و گروپه‌كانى دونیا, حیزبه‌ كوردیه‌كان له‌ده‌سه‌ڵاتتدا باشتر توخمى پۆپۆلیزمیان تیدا ده‌ركه‌وتوه‌,گه‌رچى ئه‌گه‌ر بێتو لێكۆلێنه‌وه‌یه‌كى سایكۆسیاسى بۆ خه‌باتى سه‌رده‌مى شاخى حزبه‌ كوردیه‌كان بكرێت ئه‌وكات زیاتر ڕونده‌بێته‌وه‌ ڕه‌گ و ڕیشه‌ى پۆپۆلیزم واتا به‌كارهینانى گه‌ل بۆ گه‌یشتن به‌ خه‌ون و مه‌به‌ستى تایبه‌تى سه‌ركرده‌ و بنه‌ماڵه‌ ده‌ستوهێز ڕۆیشتوه‌كانى كورد بۆ ئه‌و سه‌رده‌مه‌ ده‌گه‌ڕێته‌وه‌, وه‌كو تێوریش سه‌یرى به‌رنامه‌ى سیاسى و میدیا و بڵاو كراوه‌ و لێدوان و گوتارى سه‌ركرده‌كانیان بكه‌یت زاراوه‌ى گه‌ل وه‌كو ئامانجێكى سه‌ره‌كى به‌كار هاتوه‌, بۆنمونه‌ له‌شاخدا جه‌خیتان له‌وه‌ كردۆته‌وه‌ له‌پێناو گه‌لدا خه‌بات له‌دژى به‌عس ده‌كه‌ن, له‌پێناو گه‌لدا شه‌ڕى یه‌كتر ده‌كه‌ن, هه‌ر له‌پێناو گه‌لدا په‌نایان بردۆته‌ به‌ر هێزى بێگانه‌, له‌ئاكامیشدا ئه‌وه‌ى كوشتویانه‌ هه‌ر گه‌ل بوه‌, ئه‌وه‌ى برسى و ده‌ربه‌ده‌ر و كردویانه‌ته‌ قوربانى هه‌ر گه‌ل بوه‌, گه‌لیش به‌نیه‌تى گه‌یشتن به‌ڕزگارى و ده‌ستكه‌وتنى مافه‌ نه‌ته‌وه‌یى و نیشتیمانى و مرۆییه‌ زه‌وتكراوه‌كانى هه‌مو چاره‌نوسێكى خۆى به‌و حزبانه‌وه‌ گرێداوه‌ و قوربانیشى له‌پێناو خه‌ونه‌كانیدا داوه‌ وه‌كو ده‌وترێت ده‌ریایه‌ك خۆێنى بۆ ڕشتوه‌.

له‌سه‌رده‌مى خه‌باتى شار و حكومڕانى حزبه‌كانى شاریشدا دیسانه‌وه‌ى زاراوه‌ى گه‌ل و له‌پێناو گه‌لدا, هه‌مو خه‌ونێكى خۆیان پێوه‌ لكاندوه‌, بۆنمونه‌ وتویانه‌ هه‌ڵبژاردنى په‌رله‌مان له‌پێناو دیارى كردنى نوێنه‌رایه‌تى گه‌ل دا ده‌كه‌ین, كاتێكیش دواى ڕاپه‌ڕین ڕێكنه‌كه‌وتون له‌سه‌ر دابه‌ش كردنى ده‌سه‌ڵات وتویانه‌ له‌پێناو گه‌لدا شه‌ڕى یه‌كتر ده‌كه‌ین, ئه‌وه‌شى كوژراوه‌ هه‌ر گه‌ل و كوڕى گه‌ل بوه‌.

له‌دواى ڕوخانى ڕژێمیشه‌وه‌ كاتێك به‌ره‌و ئاوه‌دان كردنه‌وه‌ى به‌غدا چون زۆربه‌ى حزبه‌ كوردیه‌كان به‌تایبه‌تى یه‌كێتى و پارتى جه‌خیتانكردۆته‌وه‌ له‌پێناو گه‌لى خۆیاندا ئه‌و كاره‌ ده‌كه‌ن, كاتێكیش په‌یوه‌ندیه‌كانیان له‌ گه‌ڵ به‌غدا تێكچوه‌ هه‌ر گه‌له‌و قوربانیه‌كانى داوه‌, كه‌ ڕیفراندۆمیشیان كردوه‌ پێانوابوه‌ گه‌ل ده‌گه‌یه‌نن به‌دوا ئاواتى ده‌یان ساڵه‌یان,به‌ڵام له‌و ئاكامه‌شدا هه‌ر گه‌ل بو برسى كرا و سه‌رجه‌م باجى هه‌ڵه‌كانى ئه‌وانیاندا, ئه‌وه‌ى نه‌گۆڕاوه‌ چینى بژارده‌كانه‌ وه‌كو موله‌ر ده‌لێت, له‌شوێنى خۆیاندا ماونه‌ته‌وه‌ و له‌هه‌مو ڕوویه‌كى ده‌سه‌ڵاتدارێتیه‌وه‌ به‌هێزترده‌بن, گه‌لیش تا دێت سه‌رچاوه‌ مادیى و مه‌عنه‌وییه‌كانى له‌ده‌ستده‌دات.

,,

بزوتنەوەی گۆڕانیش وەكو جوڵانەوەیەكی نزیك لەگەل و بۆ گەل دروستبو بەڵام چەڤۆكەی بۆ كةرتكردنى كێیكی دەسەڵات هەڵگرت و بەیەكجارەكی كۆتایی بە قۆناغی ئۆپۆزسیۆنبونی خۆی هێنا

دواى دروستبونى بزوتنه‌وه‌ى گۆڕان و ئۆپۆزسیۆنى په‌رله‌مانى , چینێكى زۆرى كۆمه‌ڵگه‌ پێوابو گه‌ر كۆتایى به‌ حوكمى بژارده‌كان نه‌یه‌ت سنورێكى باشى بۆداده‌نرێت, چونكه‌ ئه‌و بزوتنه‌وه‌یه‌ به‌لێنێكى به‌هه‌شتى و دروشمێكى ڕیشه‌ى به‌رزكرده‌وه‌ به‌جۆرێك ده‌ستكارى خه‌یاڵدانى تاكى كوردى كرد له‌ چه‌ق به‌ستویه‌وه‌ بۆ گه‌ڕانه‌وه‌ى جۆرێك له‌ئومێد, كاتێك گۆڕانیش چویه‌ ده‌سه‌ڵاته‌وه‌ ئه‌وه‌ى توانى بیكات نه‌یكرد و چه‌ڤۆیه‌كى بۆ له‌تكردنى كێكه‌كه‌ هه‌ڵگرت گه‌ل بو( ده‌نگده‌رانى )بێ ئومێدى حاسڵ كرد, له‌دواى مردنى ڕابه‌ره‌كه‌شیان وهه‌ڵپه‌ى به‌شداریكردنیان بۆ ده‌سه‌ڵاتێكى نه‌گۆڕى یه‌كێتى و پارتى, به‌یه‌كجاره‌كى كۆتاییان به‌ ڕۆڵى ئۆپۆزسیۆنبویان هێنا و جارێكى تریش گه‌ل كه‌وته‌ قۆناغێ نائومێدیه‌كى ترسناكتره‌وه‌, ته‌نانه‌ت بگاته‌ ئه‌و ئاسته‌ى بڕوا و متمانه‌ى به‌هیچ هێز و جوڵانه‌وه‌ و حزبێكى تر نه‌مێنیت باسى  مافى گه‌ل ( خه‌ڵك )  و خزمه‌تكردنى بكات..

 

 

 

author photo

توێژه‌ر و ڕۆژنامه‌نووس