نامەیەكی مام جەلال بۆ مەلا مستەفا

مام جەلال لەنامەكەدا چی بە مەلا مستەفا دەڵێت؟

نامەیەكی مام جەلال بۆ مەلا مستەفا

888 خوێندراوەتەوە

دوای ڕووخانی دەسەڵاتی عەبدولكەریم قاسم‌و گرتنە دەستی دەسەڵات لەلایەن بەعسییەكانەوە‌و بوونی عەبدولسەلام عارف بە سەرۆكۆماری عێراق، پارتی دیموكراتی كوردستان لەگەڵ ڕژێمی تازەدا سەبارەت بە مافەكانی كورد لە عێراقدا دەكەونە گفتوگۆ.

،،

چوونی مام جەلال بۆ بەغداد بۆ بەدواداچوونی ئەو بەڵینانە بووە كە مانگی پێشتر وەفدی حكومەتی عێراقی بە مەلا مستەفایان داوە.

 


ڕۆژی 8ی شوباتی 1963 حیزبی بەعسی عەرەبی بەهاوبەشی ئەفسەرو فەرماندە نەتەوە پەرستە عێراقییەكان‌و بەهاوكاری پارتی‌و سەركردەكانی شۆڕی ئەیلوول، كودەتای بەسەر حكومڕانی عەبدولكەریم قاسمدا كرد.

كەمتر لە دوو مانگ لە خستنی عەبدولكەریم قاسم‌و هاتنە سەر دەسەڵاتی بەعسییەكان، پارتی‌و مەلا مستەفا وەفدێك بەسەركردایەتی مام جەلال كە ئەوكات ئەندامی كۆمیتەی ناوەندی پارتی بووە، دەنێرنە بەغداد بۆ گفتوگۆكردن لەگەڵ دەسەڵاتدارانی نوێی عێراقدا.

لە 4ی مانگی ئازاری 1963 وەفدێكی حكومەت كە پێكهاتبوون لە تاهیر یەحیا سەرۆكی ئەركانی سوپاو فواد عارف وەزیری دەوڵەت‌و بابا عەلی شێخ مەحمودو كۆمەڵێك كاربەدەستی دیكەی عێراق، لە ناوچەی بتوێن چوونەتە لای مەلا مستەفاو سێ ڕۆژ دوای هاتنی ئەو وەفدەش لە ڕادیۆی بەغدادەوە ئەوە بڵاو كراوەتەوە كە حكومەتی عێراقی لە سەر بنەمای لامەركەزیەت دان بە مافی كورددا دەنێت.


چوونی مام جەلال بۆ بەغداد بۆ بەدواداچوونی ئەو بەڵینانە بووە كە مانگی پێشتر وەفدی حكومەتی عێراقی بە مەلا مستەفایان داوە.
لە ڕێكەوتی 6 – 4 – 1963، مام جەلال كە سەرۆكی وەفدی كورد بووە، لە نامەیەكداو لە میانی پێنج خاڵدا ڕەوشی گفتوگۆو دانووستان‌و هەڵوێستی كاربەدەستانی ئەوكاتەی عێراق بۆ مەلا مستەفای سەرۆكی پارتی ڕوون دەكاتەوەو داوای لێدەكات كە هەرچی زووە وەڵامیان بداتەوە كە چی بكەن‌و چۆن بجوڵێنەوەو هەڵوێستیان چیبێت، ئایا بمێننەوە یاخود بگەڕێنەوە.

،،

مام جەلال بۆ گفتوگۆكردن لەگەڵ بەرپرسانی حكومەتی بەعسی عێراقی، كە دوو مانگ لەوەوبەر كودەتایان بەسەر عەبدولكەریم قاسمدا كردبوو، هاوڕێ لەگەڵ ساڵح یوسفیدا چوو بووە بەغداد.

 


وەكو لە سەرەتای نامەكەوە ئاماژەی پێدەدات، ئەوە نامەی دووەمی مام جەلالە كە 56 لەمەوبەر بۆ مەلا مستەفای ناردووەو پێشتریش سەبارەت بە ڕەوشی گفتوگۆ زانیاری دیكەی بۆ ناردووە.
مام جەلال بۆ گفتوگۆكردن لەگەڵ بەرپرسانی حكومەتی بەعسی عێراقی، كە دوو مانگ لەوەوبەر كودەتایان بەسەر عەبدولكەریم قاسمدا كردبوو، هاوڕێ لەگەڵ ساڵح یوسفیدا چوو بووە بەغداد.


لە خاڵی یەكەمی نامە پێنج خاڵییەكەیدا، مام جەلال مەلا مستەفا ئاگادار دەكاتەوە كە مفاوەزات ڕاوەستاوەو حكومەت وەفدی شەعبی ناردووە بۆ لایان‌و حكومەت نایەوێت یەكسەر خۆی بیان بینێت.
مام جەلال گومانی خۆیشی سەبارەت بەم هەڵوێستەی بەرپرسانی باڵای ئەو كاتەی حكومەتی عێراقی بۆ مەلا مستەفا ئاماژە پێداوەو نووسیوویەتی:" حكومەت دەیەوێت بەوانە بسەلمێنێ كەوا مەتالیبی ئێمە زۆرەو تەحەمول ناكرێت، تا ئەگەر شەڕ دەستی پێكردەوە ئۆباڵی بخەنە ئەستۆی ئێمە".


هەر سەبارەت بە نەبینینی كاربەدەستانی باڵای حكومەت، لە خاڵی دووەمی نامەكەیدا، باسی لەوە كردووە كە قەرار بووە شەوێك بەر لە نووسینی نامەكە سەرۆكوەزیران ببین، بەڵام ئیعتزاریان خواستووەو وتوویانە لە ڕۆژی شەممە سەرۆكوەزیران بۆ ئێوە تەرخان دەبێت‌و هەموو وەختی بۆ مەسەلەی ئێمە دەبێت، كەچی بۆ بەیانی زانیمان ئەچێتە قاهیرە.


لە خاڵی سێیەمی نامەكەی مام جەلالدا بۆ مەلا مستەفا ئاماژە بەوە دراوە كە لەناو حكومەت‌و حیزب‌و كەسایەتییەكاندا دیعایەیان لەبارەوە كراوە كە وەفدی كوردی مەتالیبیان زۆرەو توندن، مام جەلال نووسیوویەتیشی:" حسێن جەمیل زۆر دیعایەی لەسەر من كردووە كە گوایە من توندو مەغرورم‌و بە زمانی خەنجەر قسە دەكەم".


هەر لەنامەكەدا مام جەلال زانیاری بە مەلا مستەفا دەدات كە ڕۆژی پێشتر سەفیری عەرەبییەی موتەحیدەیان دیوەو سڵاوی ئەویان " واتە سڵاوی مەلا مستەفا" پێدا ناردووە بۆ جەمال عەبدولناسرو ئاگاداریان كردووە كە حكومەتی عێراقی بەناوی كوردەوە قسە ناكات‌و دەبێت بۆچوونی كورد وەربگرن.
پاش پێدانی زانیاری بە مەلا مستەفا لەسەر ڕەوشی دانووستان‌و هەڵوێستی كاربەدەستانی حكومەت، مام جەلال پێشنیار بۆ مەلا مستەفا دەكات كە پێوویستە مەشروع تەقدیم بكەن بۆ لامەركەزیەت‌و پەیوەندیش بە جەمال عەبدولناسرەوە بكەن.

 

author photo

ڕۆژنامەنوسی سیاسی و دیكۆمێنتەری سیاسی و مێژویی