شازادەیەك لە فەیسبوكدا

"دیكتاتۆرێكی بچكۆلە بەڕێوەیە"

شازادەیەك لە فەیسبوكدا

5455 خوێندراوەتەوە

دیمەنێك كە سەرنج رادەكێشێت، سێڵفیەكە كە لەدوای بەربونی لە زیندان لەناو كۆشكەكەی خۆی چركاندویەتی، تا كاتی نوسینی ئەم وتارە، 136 هەزار لایك كراوە و 186جار شەیر كراوە و 19 هەزار كۆمێنتیشی لەسەر نوسراوە.

پۆستەكە نیشانی دەدات كە بە بڕەپارەیەك سپۆنسەركراوە لە نیوان 100-200 دۆلاری ئەمریكی.

مەغزای وێنەكە ویڕای نیشانەی بەردەوامی، نیشانەی باوەڕبەخۆبونیشی تیدابەدی دەكرێت.

،،

 ئەوكاتەی خەونی تاكەكەسی بەسەر خەونی گشتی و چاكەی گشتیدا زاڵ دەبێت هیچی لێ‌ سەوز نابێت جگە لە "دیكتاتۆرێكی بچكۆلە" نەبێت.

ئەوانەی لەسەر شاسوار دەنوسن، كەمیان توانای ئەوەیان هەیە بەشێوەیەكی بابەتیانە بنوسن، بەگشتی یان نەیاری سەرسەختی ئەون كەوەك پەرچەكردار ئەنوسن، یان لە بازنەكەی چواردەوری خۆین كە شانامەی بەسەردا دەخوێننەوە.


شاسوار عەبدولواحید، هێشتا وەرەقەیەكی ئاشكرانەبوە لە نەخشەی سیاسی داهاتوی هەرێمی كوردستاندا. تەنانەت هێشتا وەرەقەیەكی لێڵە لە هەڵبژاردنەكانی داهاتودا، كە بەتەواوی نازانرێت ئایا لەو هەڵبژاردنەدا بەدەستی پڕەوە دێتەدەرەوە یان دوو دەستی بەتاڵ.

ئەوەی لە ئێستادا دیارە، شاسوار، كوڕێكی پڕ لە ووزەی چوستوچالاكە، كه زیاتر حەزی بە دروستكردنی شۆیە.

سیاسەتكردن لەڕێگەی شۆی میدیاییەوە، ئەو ڕێگەیەیە كە شاسواری پێدەناسرێتەوە لەكاری سیاسیدا.


واباوەڕدەكات خەڵك لەڕێگەی ئەو شۆیانەوە سەرسامی دەبن و دواجاریش متمانەی پێدەكەن.

،،

سیاسەتكردن لەڕێگەی شۆی میدیاییەوە، ئەو ڕێگەیەیە كە شاسواری پێدەناسرێتەوە لەكاری سیاسیدا.

شاسوار، لەم بابەتەدا ڕۆڵی خۆی بە باشی دەگێرێت، بە بەردەوامی لەڕێگەی تۆڕەكۆمەڵایەتیەكانەوە شۆیەكی تازەی هەیە. تەنها هەڵەیەك لە كارەكەیدا هەبێت ئەوەیە كە ئەو هێشتا لەناو دونیا تایبەتەكەی خۆیدایە لە فەیسبوكدا، لەكاتێكدا لەدەیان پەیجی نەناسراوەوە بانگ دەكرێت بە " سەرۆك شاسوار"، خەڵك چاوەڕێی سەركردەیەكە لە ئەرزی واقیعدا بتوانێت ڕزگاری بكات، نەك پاڵەوانێك كە بەخۆیەوە سەرقاڵە لەناو فەیسبوكدا.

ئەوەی سەبارەت بە شاسوار ئەبێت دانی پێدابنرێت ئازایەتی و چاونەتەترسیی و حەزی سەركێشییە، كردنی ئەوشتانەیە كە ئەوانی دیكە ناوێرن بیكەن. بەڵام هێشتا ترسى ئەوە هەيە ئەو پاڵنەرەی كە دەیجوڵێنێت زیاتر لە وەی چاكەی گشتی بێت حەزێكی شەخسی بێت. حەزی بە پاڵەوان بوون.

بەدڵنیایەوە دەبێت ڕێز لەخەونی تاكەكەسی هەر مرۆڤێك بگیرێت، بەڵام ئەوكاتەی خەونی تاكەكەسی بەسەر خەونی گشتی و چاكەی گشتیدا زاڵ دەبێت هیچی لێ‌ سەوز نابێت جگە لە "دیكتاتۆرێكی بچكۆلە" نەبێت.

لەناخی شاسواردا هەستێك هەیە كە ئەو لە ئابوری و پەیداكردنی پارە سەركەوتووبوە و ئەتوانێت ئەم سەركەوتنە بگوازێتەوە بۆ ناو كایەی سیاسەت. لەكاتێكدا هێشتا كۆتایی چیرۆكە ئابوریەكەشی بەتەواوی دیار نییە.

ئەو، جیهانێكی تایبەت بەخۆی دروستكردووە لەناو تۆڕە كۆمەڵایەتیەكاندا، بەتایبەتی تۆڕی كۆمەڵایەتی فەیسبوك،لەم ڕوەوە دامودەزگایەكی تایبەتی دروستكردووە كە بەدەیان كەسی تێدایە و لەم پرۆسەیەدا هاوكاری دەكەن.

ژمارەی ئەو پەیجانەی فەیسبوك كە لەناو كەمپینەكەی شاسواردان زیاتر لە 70 پەیج دەبێت، لە بەشی زۆریشیاندا خۆی ئەدمینە.

لەماوەی رابردودا ژمارەیەك پەیجی كڕیەوە، هەندێك لەو پەیجانە لەپێشتردا نزیكبوون لە بزوتنەوەی گۆڕان.

زۆرجار خودی خۆی پۆست لەو پەیجانە ئەكات و بەگشتیش ڕۆژانە زیاتر لە 200 دۆلار بۆ ڕیكلامی پۆستەكانی خەرجدەكات كە بەشی زۆریان لەو پۆستانەی خەرجدەكات كە لەڕێگەی فەیسبوكەكەی خۆیەوە دەڕوات.

هەرچەندە شاسوار خاوەنی كەناڵێكی بەهێزی ڕیكلامییە، بەڵام هێشتا چاوی لەسەر فەیسبوكە و پێی وایە ئەوەی بە فەیسبوك دەكرێت بە تەلەفزیۆن ناكرێت.
بەتایبەت كە ئەو چاوی لەسەر دەنگی گەنجانە و گەنجانیش لە كوردستان بەگشتی بەكارهێنەری فەیسبوك و ئینستا گرام و سناپ چاتن و بەبەردەوامی چەند كاتژمێرێك لەسەر خەتن.

،،

هەرچییەك بێت ئیستا شاسوار دیاردەیەكی نوێیە لەناو دونیای سیاسەتی كوردیدا،بەڵام هێشتا زیاتر لەوەی پێیەكانی لەسەر زەوی بن لەناو ئیمپراتۆریەتەكەی خۆیدا دەژی لە فەیسبوكدا.

شاسوار بڕوای وایە لەڕێگەی فەیسبوكەوە دەتوانێت دونیا بگۆڕێت، یان لانی كەم خەونە تایبەتیەكانی خۆی بەدی بهێنێت.

بە هەموو پێوانەیەك شاسوار كوڕێكە خەونی هەیە و ئامادەشە لەپێناو خەونەكانیدا قوربانی بدات، بەڵام وادەرئەكەوێت خەونەكانی زیاتر لەوەی خەونی گشتی بن تاكەكەسیبن، لەوانەیە پەنابردنی شاسوار بۆ فەیسبوك لەوەشەوە سەرچاوەی گرتبێت تۆڕە كۆمەڵایەتیەكان دەتوانن بەشێك لە ئەنگێزە تایبەتەكانی تێربكەن.

هەرچییەك بێت ئیستا شاسوار دیاردەیەكی نوێیە لەناو دونیای سیاسەتی كوردیدا،بەڵام هێشتا زیاتر لەوەی پێیەكانی لەسەر زەوی بن لەناو ئیمپراتۆریەتەكەی خۆیدا دەژی لە فەیسبوكدا.

ئەو، چاوی لەسەر نەوەیەكی دیاریكراوە بەتایبەت 18-25 ساڵی و بەتایبەت تریش ئەو گەنجانەی یەكمجاریانە بەشداری دەنگدان بكەن، زیاتر لەوەی لەگەڵ عەقڵیان قسەبكات دەیەوێت موخاتەبەی گیرفانیان بكات."وەك من دەوڵەمەند دەبن" " پارەی خۆتان ئەبێت"

ئەوەی شاسوار نەیتوانیوە لێی تێبگات، سۆسیۆلۆژیای دەنگدانە لە هەرێمی كوردستان كە زیاتر تایبتمەندیەكی بەكۆمەڵی و خێزانی هەیە و بەگشتی ئەندامانی یەك خێزان دەكەونە ناو یەك خولگەی سیاسییەوە.

گوتاری جوڵانەوەكەی شاسوار خاوەنی دوو تایبەتمەندی سەرەكییە، یەكەمیان ئەوەیە پۆپۆلیستییە و دووەمیشیان ڕادیكاڵانەیە، تەنانەت لەم ڕوەوە بزوتنەوەی گۆڕانیشی تێپەڕاندووە، هەربۆیە سەرنجراكێَشتریشە بۆ گەنجان.

پۆپۆلیست بونی گوتاری شاسوار گەشتۆتە ئەو ڕادەیەی بڵێت" هەموتان ئەبنە خاوەنی كۆمپانیا و بزنسی خۆتان".

بەبێ‌ ئەوەی بتوانێت پێمان بڵێت ئەو سیستمە ئابورییە جیهانییە ناوی چییە كە تیایدا هەموان خاوەنی كۆمپانیای خۆمانین.

ئەگەر بە فەیسبوك بێت شاسوار گرەوی شازادەیی لە حیزبە ركابەرەكانی بردۆتەوە. ماوەتەوە بیسەلمێنێت كەئەو تەنها شازادەی ناو فەیسبوك نییە بەڵكو شازادەیەكی حەقیقییە لە مەیداندا

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری