نامەكانی نێوان مەلا مستەفاو ئامۆزاكەی قازی محەمەد

مەلا مستەفا: كتێبەكانی ماركس‌و لینین تەرجەمە بكەن

نامەكانی نێوان مەلا مستەفاو ئامۆزاكەی قازی محەمەد

894 خوێندراوەتەوە

ئەو كاتەی كە مەلا مستەفا لە ڕووسیا بووە لەگەڵ ئامۆزایەكی قازی محەمەددا شەش نامە لە نێوان یەكدا ئاڵوگۆڕ دەكەن‌و لە یەكێك لە نامەكاندا، مەلا مستەفا داوا لە ئامۆزاكەی قازی محەمەد دەكات كە كتێبەكانی ماركس‌و لینین وەربگێڕنە سەر زمانی كوردی.


ئەوان، مەلا مستەفاو ڕەحیمی قازی كە ئامۆزای قازی محەمەدە شەش نامە لە نێوانیاندا ئاڵوگۆڕ دەكەن، سەرباری ئەحواڵپرسین‌و تاوتوێكردنی پەیوەندی نێوان خۆیان، لەنامەكاندا سەبارەت بە پرسی كوردان لە هەردوو وڵاتی سۆڤییەتی ئەوكاتەو وڵاتی ئازەربایجان گفتوگۆیان كردووە.

نامەكانی نێوان مەلا مستەفاو ئامۆزاكەی قازی محەمەد لە نێوان ساڵانی 1955 – 1957 نوسراون، ئەو كاتەی كە مەلا مستەفا لە یەكێتی سۆڤییەت بووەو ڕەحیمی قازیش لە " باكۆ"ی پایتەختی ئازەربایجان بووە.

،،

بارزانی لەنامەكەیدا بۆ لابردنی گلەییەكان، خوازیاری یەكتر بینین بۆ ئامۆزاكەی قازی محەمەد دەر دەبڕێت


ڕەحیمی قازی، لە ساڵی 1925 لە دایكبووە، یەكێبووە لەو كەسانەی كە لە لایەن كۆماری كوردستانەوە بۆ خوێندن نێردراوە بۆ ئازەربایجان‌و لە زانكۆی " كرۆڤێ‌" لە بەشی مێژوو دەخوێنێت‌و ساڵی 1954 دكتۆرا لە مێژوودا بەدەست دێنێت‌و ماوەیەكی زۆریش لە هەمان زانكۆ وەكو مامۆستا وانە دەڵێتەوە.
ئەو، ڕەحیمی قازی لە ساڵی 1958 یەكەمین ڕۆمانی كوردی بە شێوەزاری سۆرانی بەناوی " پێشمەرگە دەنووسێت، ساڵی 1991 لە ئازەربایجان كۆچی دوایی دەكات.

 


13 - 2 -1955، مەلا مستەفا وەڵامی نامەی یەكەمی ڕەحیمی قازی دەداتەوە، وەكو لە ناوەرۆكی نامەكەی مەلا مستەفاوە دەردەكەوێت ڕەحیمی قازی ئەوەی بۆ مەلا مستەفا نووسیوە كە بارزانی گلەیی لەو هەیەو بۆچوونی بەرانبەری باش نییە.


بارزانی لە وەڵامی نامەكەی ڕەحیمی قازیدا، ڕوون كردنەوەی دەداتێ‌و بەو دەڵێت كە هیچ گلەییم لە تۆ نییەو لێشت عاجز نیم.
بارزانی لەنامەكەیدا بۆ لابردنی گلەییەكان، خوازیاری یەكتر بینین بۆ ئامۆزاكەی قازی محەمەد دەر دەبڕێت.

،،

مەلا مستەفا:خۆم شەخسەن لیاقەتی نەسیحەت‌و تەربییەتم نییە، خۆم دەزانم كە میللەت كوردو كوردستان بە ئینسانییەتی خۆیانەوە حورمەتی من دەگرن، ئەوەش لە ڕووی شەرەفی خۆیانەوەیە نەك لیاقەتی من

 

لە نامەیەكی دیكەشدا كە دوو ساڵ دواترو لە 7 – 3- 1957، واتە ساڵێك بەر لەگەڕانەوەی مەلا مستەفا لە سۆڤییەتەوە بۆ عێراق بۆی نووسیوە، ڕەحیمی قازی ئەوە بە مەلا مستەفا دەڵێت كە دڵی بەرانبەری خاوێن نییە.

پێدەچێت گلەیی‌و نیگەرانییەكانی ڕەحیمی قازی لە مەلا مستەفا بۆ ساڵی 1948 بگەڕێتەوە، ئەو دەمەی كە " باقرۆف"ی سەرۆككۆماری ئەوكاتەی ئازەربایجان پێشنیار بۆ مەلا مستەفا دەكات كە حكومەتێكی كاتی كوردی لە كوردەكانی یەكیەتی سۆڤییەت دابمەزرێنێت‌و ڕەحیمی قازیش بكاتە جێگری حكومەتەكە، بەڵام بارزانی بەبیانووی ئەوەی كە ئەو ڕەحیم تەمەنی كەمە داواكەی باقرۆف ڕەتدەكاتەوە.



19 – 2 – 1955، ڕەحیمی قازی نامەیەكیتر بۆ مەلا مستەفا دەنێرێت‌و بارزانی شەش ڕۆژ پاش بەرواری نووسینی نامەكە، لە 25 – 2 – 1955دا وەڵامی دەداتەوەو بە خەتی خۆی بەمجۆرە بۆ ڕەحیمی قازی دەنووسێت:" حاڵی من لەسایەی حكومەتی عەزیمی شورەویی زۆر زۆر باشەو هیچ قسوری لە من نییە لە هیچ لایەكەوە".


پێدەچێت ڕەحیمی قازی لەو نامەیەییدا داوای ڕاسپاردەو ئامۆژگاری لە مەلا مستەفا كردبێت، بۆیە بارزانی بەمجۆرەی بۆ نووسیووەو دەڵێت:" خۆم شەخسەن لیاقەتی نەسیحەت‌و تەربییەتم نییە، خۆم دەزانم كە میللەت كوردو كوردستان بە ئینسانییەتی خۆیانەوە حورمەتی من دەگرن، ئەوەش لە ڕووی شەرەفی خۆیانەوەیە نەك لیاقەتی من".


وەكو لە ناوەرۆكی نامەكەی مەلا مستەفادا دەردەكەوێت، ڕەحیمی قازی پێشنیاری تەرجەمەكردنی "ماركسیزم‌و لینینزم"ی بۆ كوردی بۆ مەلا مستەفا كردووەو مەلا مستەفاش بەمجۆرە وەڵامی داوەتەوە:" بۆ مەسەلەی ماركسیزم‌و لینینزم تەرجەمە بكرێن بە زمانی كوردی ئەوە زۆرباشەو لەوە باشتر نابێت".

 

author photo

ڕۆژنامەنوسی سیاسی و دیكۆمێنتەری سیاسی و مێژویی