حاجى ئاغا لە سلێمانی چى دەکات؟

یەکێتى، سیناریۆکەى پارتى لە کەرکوک دوبارە دەکاتەوە

حاجى ئاغا لە سلێمانی چى دەکات؟

2081 خوێندراوەتەوە

 

 

یەکێتى دواى بێهیوابونى لەسەرى رەش، روو دەکاتە بەغدا، دەیەوێت لەوێوە پۆستى پارێزگارى کەرکوک بەدەستبهێنێت، قاسم سلێمانیش بۆ ئەم مەبەستە لە سلێمانییەوە چاودێرى بارودۆخەکە دەکات.

 

 

پارتى و یەکێتى دواى چەند جار کۆبوونەوەو روودانى بەرزونزمى لە پەیوەندى و رێکەوتنەکانیان دواجار لەسەر هیچ خاڵێک رێک نەکەوتن.

 نەشیانتوانى رێکەوتنامەیەک واژۆ بکەن کە ببێتە سەرەتاى پێکهێنانى کابینەى نوێ، چونکە یەکێتى داواى یەکخستنى هەرسێ پۆستەکانى بەغداد و کەرکوک و هەرێمى دەکرد بەیەک پاکێج، پارتیش دەیویست تێکەڵاو نەکرێن.

،،

یەکێتى دەیوست پارێزگار بۆ ئەو کاندیدە بێت کە مەکتەبى سیاسی یەکێتى دیارى دەکات، پارتیش بەمە رازى نەبوو داواى کاندیدێکى بێ لایەن یاخود کەسێکى دەکرد کە جێگەى دڵخوازى ماڵى بارزانى بێت.

 

 

"کەرکوک، کەرکوک، کەرکوک"

ئەم ناونیشانە وتەى باڤڵ تاڵەبانى کورە گەورەى مام جەلال بوو  بۆ کەناڵەکانى راگەیاندن وەک ئاماژەیەک کە کەرکوک بۆ ئەوان هێڵى سورەو گرنگە.

 

ئیدى لێرەوە جیاوازییەکانى نێوان پارتى و یەکێتى لەسەر نزیکبوونەوەیان بۆ کابینەى نوێ زۆرتر بوو، چونکە یەکێتى دەیوست پارێزگار بۆ ئەو کاندیدە بێت کە مەکتەبى سیاسی یەکێتى دیارى دەکات، پارتیش بەمە رازى نەبوو داواى کاندیدێکى بێ لایەن یاخود کەسێکى دەکرد کە جێگەى دڵخوازى ماڵى بارزانى بێت.

 

 

 

لە وتارێکدا لە دیپلۆماتیک مەگەزین، هەفتەى رابردوو ئاماژەمان بەوە کردبوو کە کێشەکانى نێوان پارتى و یەکێتى رەنگە بگەنە بەغدا چونکە یەکێتى قۆناغى C  داناوە کە لەرێگەى بافڵ تاڵەبانییەوە دواى بێهیوابونیان لە پارتى دەچنە بەغدادو بە پاڵپشتى بەرهەم ساڵح وەک سەرۆک کۆمار قسە لەگەڵ لیستە عەرەبییەکان دەکرێت بۆ یەکلاکردنەوەى پۆستى پارێزگار لە بەرژەوەندى یەکێتى.

 

 

 

یەکێتى بە پرۆژەکەى مام جەلالەوە گەشتە بەغدا

شەوى رابردوو وەفدێک بە سەرۆکایەتى کۆسرەت رەسوڵ گەشتنە بەغداد، کە بریارە ئەمرۆژانە بەهاوکارى بەرهەم ساڵح کۆبوونەوە لەگەڵ نورى مالیکى و حەلبوسى و چەند لایەنێکى دیکەى کاریگەرى عەرەبیدا بکەن.

 

وەفدەکە بافڵ تاڵەبانى لەگەڵ نەبوو، چونکە قاسم سولەیمانى کە بە پیاوە مەترسیدارەکە ناسراوە، وا باس دەکرێت کە لە ئێستادا لە سلێمانییە و بۆ هاوکارى یەکێتى خۆى گەیاندبێتە ئێرە، بافڵ تاڵەبانى لەگەڵ ناوبراو لە سلێمانى لە کۆبوونەوە و پەیوەندیدا دەبێت تاکو وەڵامێک لە وەفدەکەى یەکێتى وەر دەگرن لە بەغدا، کە ئەگەر ئیجابى بوو باڤل تاڵەبانیش سەردانى بەغدا دەکات.(دواتر  باس لەم خاڵە دەکەین).

 

،،

یەکێتى هەمان سیناریۆى پارتى دووبارە دەکاتەوە و پۆستەکانى بۆ پاشەکەوت دەکات وەک چۆن پارتى ئەمرۆ پۆستەکانى یەکێتى لە پەرلەمان و حکومەت بۆ یەکێتى پاشەکەوت دەکات تاکو دێت بەسەردەمیانەوە.

 

 

 

پرۆژەى یەکێتى بۆ لایەنە عەرەبییەکان ئەوەیە کە داوایان لێ دەکات بۆ چارەسەرکردنى کێشەى کەرکوک لەنێوان ئەوان و پارتى بگەرێنەوە بۆ پرۆژەکەى کۆچکردوو جەلال تاڵەبانی، کاتێک دواى پرۆسەى ئازادکردنى عێراق پشکەکانى لەنێوان لایەن و پێکهاتە عەرەبییەکان بەمشێوەى خوارەوە دابەش کرد:

یەکەم: کوردەکان ٣٢

دووەم: تورکمانەکان ٣٢

سێیەم: عەرەبەکان ٣٢

چوارەم: مەسیحییەکان ٤

 

واتە لەسەر ئەم بنەمایەى سەرەوە پۆستەکان دابەش بکرێنەوە تا هەڵبژاردن بۆ ئەنجومەنى پارێزگاى کەرکوک دەکرێتەوە، ئەوکاتە یەکێتى لەگەڵ یەکێک لەو پێکهاتانە بەتایبەت لیستە عەرەبییەکان رێک دەکەوێت و زۆرینە بەدەست دەهێنێت دواتر پۆستى پارێزگار بۆ خۆى مسۆگەر دەکات و هەرچى سەرۆکى ئەنجومەن و جێگرەکانیش هەیە بۆ لایەنەکانى دیکە.

ئەوەى پەیوەندى بە پارتییەوە هەیە یەکێتى هەمان سیناریۆى پارتى دووبارە دەکاتەوە و پۆستەکانى بۆ پاشەکەوت دەکات وەک چۆن پارتى ئەمرۆ پۆستەکانى یەکێتى لە پەرلەمان و حکومەت بۆ یەکێتى پاشەکەوت دەکات تاکو دێت بەسەردەمیانەوە.

 

،،

پارتى و یەکێتى کۆببنەوە و لەسەر پۆستەکانى حکومەت و پەرلەمان رێک بکەون، بەڵام ئەمەش کاتێکى زۆرى دەوێت و بەبێ ئاڵۆزى کۆتایی نایەت.

 

 

حاجى ئاغا چى دەکات لە سلێمانى؟

پێ دەچێت هاتنى ناوبراو پەیوەندى هەبێت بە خراپى دۆخى یەکێتى و فەرامۆشکردنى لەلایەن پارتییەوە، چونکە یەکێتى دەیەوێت لەرێگەى حاجاى ئاغاوە لە بەغدا شەفاعەتى بۆ بکرێت تاکو پۆستى پارێزگارى کەرکوک وەربگرێت.

 

دیار نییە تەلەفۆنەکانى قاسم سولەیمانى بۆ بەغدا چەند کاریگەریان دەبێت و دەتوانێ لیستە عەرەبییەکان بەتایبەت شیعەکان ناچار بکات کە پاڵپشتى یەکێتى بکەن، چونکە پارتى لە ئێستادا پەیوەندییەکى توندو تۆڵى لەگەڵ حکومەتى ناوەندى و سەرکردە عەرەبەکان هەیە، وەهەروەها حاجى ئاغا پێش بەرژەوەندى یەکێتى بەرژەوەندى ئێرانى لەبەرچاوە.

 

 

قاسمى سلێمانى لەسەر گڵکۆى کۆچکردوو جەلال تاڵەبانى

 

 

پێشبنى دەکرێت ئەم قۆناغەش بۆ یەکێتى زۆر سەرکەوتو نەبێت و دواتر بە نێوەندگیرى ئێرانییەکان و ئەمریکییەکان پارتى و یەکێتى کۆببنەوە و لەسەر پۆستەکانى حکومەت و پەرلەمان رێک بکەون، بەڵام ئەمەش کاتێکى زۆرى دەوێت و بەبێ ئاڵۆزى کۆتایی نایەت.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان