بۆچی جەواد زەریفی نامەی دەستلەكاركێشانەوەی پێشكەشكردووە؟

ئایا زمانی هەڕەشە جیگەی دیالۆگ دەگرێتەوە؟

بۆچی جەواد زەریفی نامەی دەستلەكاركێشانەوەی پێشكەشكردووە؟

402 خوێندراوەتەوە

و.عەلی ڕەشید
درەنگانێكی شەوی سێشەممە جەواد زەریفی وەزیری دەرەوەی ئێران،لەڕێگەی ئینیستاگرامەوە دەستلەكاركێشانەوەی لەپۆستەكەی ڕاگەیاند بەبێ‌ ئەوەی ئاماژە بۆ هیچ هۆكارێك بكات، بەڵام بڕیارەكەی زەریف هاوكات بوو لەگەڵ سەردانەكەی بەشار ئەسەدی سەرۆكی سوریا و پێشوازی لێكردنی لەلایەن عەلی خامنەیی ڕێبەری شۆڕش لەئێران و حەسەن ڕۆحانی هاوتا ئێرانیەكەیەوە.


ئامادەنەبونی زەریف لەو پێشوازی و دیدارانەی خامنەیی و ڕۆحانی لەگەڵ بەشار ئەسەد یەكێكە لەو هۆكارانەی چاودێرانی سیاسی ئاماژەی بۆ دەكەن، بەڵام شیكارێكی وردتر هەیە پێمان دەڵێ‌ دیبلۆماسە دەم بەخەندەكەی ئێران و لایەنگری دیالۆگ، لەكاتێكی زۆر نالەباردا پۆستەكەی بەجێدەهێڵێت و داوای لێبوردنیش لەگەلی ئێران دەكات واتە كاری سیاسەتی دەرەوە جڵەوی لەدەستی ئەمدا نەماوەو وەزارەتی دەرەوەی ئێران ستراتیژی كاركردنی سەرەو ژێر دەبێتەوە.
لەمبارەیەوە واشنتۆن پۆست نوسیوەتی دەستلەكاركێشانەوەی وەزیری دەرەوەی ئێران لەكاتێكدایە تاران بەدۆخێكی ناڕەحەتدا تێپەڕدەبێت و نەمانی زەریفیش سیاسەتی دەرەوەی ئەو وڵاتە بەتەواوی ئاوەژو دەكاتەوە.

،،

هەریەك لەڕوحانی و زەریفی لەدوای كشانەوەی ئەمەریكا لەڕێكەوتنەكە كێشە هەبوە لەنێوانیاندا

 

واشنتۆن ئاماژەی بەڕۆڵی دیبلۆماسی جەواد زەریفیش كردووەو نوسیویەتی:" زەریفی بە دیبلۆماسیەكی بەتواناو بەهێز بەناوبانگ بوو، ئەویش توانی ڕێكەوتن لەگەڵ وڵاتانی نێودەوڵەتی بكات لەبارەی بەرنامە ئەتۆمیەكەی وڵاتەكەیەوە، بەمەش تاران ئاهێكی لەروِوی ئابورییەوە بەبەردا هاتەوە".
واشنتۆن ئاماژەی بەوەش كردووە تا ئێستە هۆكاری دەستلەكار كێشانەوەكەی زەریف ئاشكرا نییە، هەروەك ناشزانرێ‌ گەورە بەرپرسانی تاران ئەم دەستلەكاركێشانەوەیە پەسەند دەكەن یاخود ڕەدی دەكەنەوە.


لەمبارەیەوە تریتا پارسی سەرۆكی ئەنجومەنی گەلی ئێرانی ئەمەریكی لە واشنتۆن دەڵێت:" زەریفی بەشێوەیەكی ئاشكراو فەرمی دەستلەكار كێشانەوەی خۆی لەپۆستەكەی ڕاگەیاندووە، بەڵام ئەمە بەواتای كۆتایی چیرۆكەكە نایەت، پارسی ئەوەشی وتووە كە ڕەنگە لەئایندەیەكی نزیكدا پەرچەكرداری جەماوەری ببینرێت لەبەرامبەر ئەم بڕیارەدا".
ئەوەی شیاوی ئاماژە بۆ كردن بێت ئەوەیە كەهەریەك لەڕوحانی و زەریفی لەدوای كشانەوەی ئەمەریكا لەڕێكەوتنەكە كێشە هەبوە لەنێوانیاندا، ساڵی ڕابردو دۆناڵد ترەمپی سەرۆكی ئەمەریكا تاك لایەنە لەڕێكەوتنەكەی ساڵی 2015 كشایەوە كە تێیدا هاتبوو تاران دەستبەرداری بەرنامە ئەوتۆمیەكەی ئەبێت‌و لەبەرامبەردا واشنتۆن سزا سەپێنراوەكانی سەر ئێران سوك دەكات.
ڕۆحانی كەوەك دەستكەوتێك بۆكابینەكەی دەیڕوانیە ئەو ڕێكەوتنەو پشتگیری دەكرد ئەو ڕێكەوتنەش بە لێزانی و زەریفی كە بە (دبلۆماسە ڕوخۆشە ناسراوە بەدەستهات.

 

لەلایەكی ترەوە مایكڵ سینج بەڕێوەبەری كارگێڕی لەپەیمانگای واشنتۆن پۆست بۆسیاسەتی ڕۆژهەڵاتی ناوین ڕایگەیاند كە دەستلەكاركێشانەوەی زەریف شۆك نەبوو، بەڵكو چاوەڕوانكراو بوو، ئەویش دوای كشانەوەی ئەمەریكا لەو ڕێكەوتنامەیەی كە بەنەخشەی كاری هاوبەشی گشتگیر ناسراوبوو.
وەك واشنتۆن پۆست ئاماژەی بۆ كردوە سینج ئەوەشی وتووە كەعەلی خامنەیی ڕێبەری شۆڕش و مەرجەعی باڵا لەئێران بە توندی لەدژی نەخشەی كاری هاوبەش و پەیوەندی دروستكردن لەگەڵ ڕۆژئاوایە، بەتایبەتی دوای كشانەوەی واشنتۆن، ئەم ڕەخنانەی خامنەییش ڕوبەڕوی زەریفی دەبنەوە، چونكە ئەو بانگەشەی بۆ نەخشەی هاوبەش كردوە.

،،

چەند كاتژمێرێك دوای نامە كتوپڕەكەی زەریف ڕۆحانی ڕایگەیاند بەشار ئەسەد سوپاسی موحەمەد جەواد زەریفی كردووە.


ڕۆحانی دەستلەكاركێشانەوە ڕەد دەكاتەوە

سایتی ئەلعەرەبیە لەبارەی هەڵوێستی حەسەن ڕۆحانی بەرامبەر دەستلەكاركێشانەوەی زەریفەوە نوسیویەتی، ئەمڕۆ چوار شەمە سایتی فەرمی حكومەتی ئێران دەڵێ‌ حەسەن ڕۆحانی سەرۆكۆماری ئیسلامی ئێران لەوەڵامی نامەی دەستلەكاركێشانەوەی جەواد زەریفیدا نوسیویەتی بڕواموایە ئەم داوایە دژە لەگەڵ لەگەڵ بەرژەوەندیەكانی وڵاتدا بۆیە من داواكەت ڕەد دەكەمەوە.
ئاژانسە ئێرانیەكان نووسیوویانە، سەرۆكی وڵات بۆ زەریف، تۆ ڕێبەری مەزنی شۆڕش پێت دەڵێت ئەمین و ئازاو باوكێكە بەرامبەر فشارە گشتگیرەكانی ئەمەریكا ڕاوەستاوە.

لای خۆشیەوە قاسم سولەیمانی سەرۆكی سوپای قودسی ئێرانی ڕایگەیاند موحەمەد جەواد زەریفی وەزیری دەرەوەی ئێرانەو بەرپرسە لەسیاسەتی دەرەوەی وڵات و پشتیوانیەكی تەواوی لەلایەن رێبەری باڵاوە لێدەكرێت و ئامادەنەبوونی زەریفی لەپێشوازی بەشار ئەسەدی سەرۆكی سوریا ئەنقەست نەبووە، بەڵكو ئەگەڕێتەوە بۆ ئەو نا هەماهەنگیكەی نوسینگەی سەرۆككۆمار لەگەڵ وەزارەتی دەرەوە هەیەتی.

 


چەند كاتژمێرێك دوای نامە كتوپڕەكەی زەریف ڕۆحانی ڕایگەیاند بەشار ئەسەد سوپاسی موحەمەد جەواد زەریفی كردووە.
لەنامەكەیدا نوسیبوی داوای لێبوردنم هەیە لەهەموو كەموكوڕییەك كەلەماوەی خزمەتمدا هەمبێت، وەسوپاسی گەلی ئێران و بەرپرسان دەكەم.
بی بی سی عەرەبی نوسیوویەتی، عەباس موسەوی وتەبێژی وەزرارەتی دەرەوەی ئێران دەڵێت، بەڕێز زەریف لە ساڵی 2002 – 2007 نوێنەری ئێران بووە لەنەتەوە یەكگرتوەكان و لەمانگی ئابی 2013 دەبێتە وەزیری دەرەوەی ئێران و لەساڵی 2015 وەك دەستكەوتێكی گەورە بۆ وڵاتەكەی ڕێكەوتنامەی ئەتۆمی وڵاتەكەی ئەوروپاو ئەمەریكا واژۆ دەكات، بەڵام لەدوای كشانەوەی ئەمەریكا گومان لەسەر توانای زەریف (كە دكتۆرای لەیاسای نێو دەوڵەتی لەزانكۆی دنفەری ئەمەریكا بەدەست هێناوە) دروست دەبێت.

 

author photo

ماستەر لە زمانی عەرەبی