خاوەندارێتیKNN  پشكۆی ناكۆكییەكانی ناو گۆڕان دەگەشێنێتەوە

ململانێكانی ناو گۆڕان سەرهەڵدەداتەوە

خاوەندارێتیKNN پشكۆی ناكۆكییەكانی ناو گۆڕان دەگەشێنێتەوە

7035 خوێندراوەتەوە

پزیسكی كێشەكانی ناو كەناڵی knn خەریكە ئاگرێكی گەورەی ناكۆكی لەناو بزوتنەوەی گۆڕان دەكاتەوە.

ئەو گۆڕانكاریانەی لە ناو كەناڵی knn كران، جارێكی دیكە ناكۆكییەكانی ناو بزوتنەوەكەی هێنایەوە پێشەوە.

 

لەكاتێكدا پارتە سیاسییەكانی كوردستان نزیكدەبنەوە لە هەڵمەتەكانی هەڵبژاردن و تای بەر لە هەڵبژاردن ووردە ووردە دەردەكەوێت، بزوتنەوەی گۆڕان ڕوبەڕووی جەولەیەكی دیكەی ململانێ‌ ناوخۆییەكانی دەبێتەوە.

 

دوای ئەوەی بزوتنەوەی گۆڕان كەناڵی knnی داخست، عومەر سەید عەلی، ڕێكخەری گشتی بزوتنەوەكە بە فەرمانێك عەبدولرەزاق شەریفی لە پۆستی بەڕێوەبەر لاداو ئاكۆ د.حەمە كەریمی كردە بەڕێوەبەری كەناڵەكە.


لەدوای دەستەبەكاربوونی د.ئاكۆوە بڕیاری هەڵوەشاندنەوەی گرێبەستی سەرجەم كارمەندان و پۆستەكانیان درا، بەو ئامانجەی جارێكی دیكە سەرلەبەری كەناڵەكە بە گرێبەستی نوێ و ئەركی نوێوە دابڕێژرێتەوە.


پلانە نوێیەكە، کە وادەردەكەوێت لە شوێنێكی تایبەتەوە ئاراستە كرابێت بەدەرنەبوو لە تەسفیە حساباتی كۆن و لابردنی هەندێ‌ كارەكتەر و ڕۆڵ بەخشین بە هەندێكی تر.

 

،،

یەكێك لەوبابەتانەی كە عوسمانی حاجی مەحمود دەیەوێت لە جڤاتی نیشتیمانیدا یەكلایی بكرێتەوە بریتیە لە كێشەی خاوەندارێتی knnو ئەو گۆڕانكارییانەی كە ڕێكخەری گشتی كردویەتی بەڵام گروپەكەی دیكە سورن لەسەر ئەوەی ئەوە كاری ڕێكخەری گشتییە.

 

هەرزوو بەشێك لە كارمەندانی كەناڵەكە ناڕەزایەتیان دەربڕی لە پلانە نوێەكە و بەرپرسانی بزوتنەوەكەیان ئاگاداركردەوە لەو جوڵانەوە و ئەوەی لەپشتیەوە دەگوزەرێت.

 

فەرمانەكەی عومەری سەید عەلی بۆ دەستبەكاربوونی د.ئاكۆ حەمە كریم هەرزوو نیگەرانی لێكەوتەوە، بەتایبەتی لە لایەن عوسمانی حاجی مەحمود سەركردەی دیاری بزوتنەوەكە و ئەندامی خانەی راپەڕاندن و بەرپرسی كاروباری باژێڕوانەكان.

 

بەبڕوای ئەو سەركردەیەی گۆڕان ئەو بابەتە لە دەسەڵاتی ڕێكخەردا نییە و  پێویستە جڤاتی نیشتیمانی بڕیاری لە بارەوە بدات.

 

بەپێی مادەی 1 لە بەشی نۆیەمی دەستوری ناوخۆی بزوتنەوەی گۆڕان" جڤاتی نیشتیمانی بەرپرسیارێتی رامیاری و كارگێڕی و میدیای و ئابوری بزوتنەكەی لەئەستۆیە و بەرزترین دەسەڵاتە لە نێوانی دوو كونگرەدا".

 

بەم پێیەش دەبێت، جڤاتی نیشتیمانی كێشەی كەناڵی knn یەكلایی بكاتەوە نەك رێكخەر و خانەی ڕاپەڕاندن.

 

عوسمانی حاجی مەحمود جەخت لەسەر ئەوە دەكات كە دەبێت جڤاتی نیشتیمانی ببێتە مەرجەعی یەكلاكردنەوەی كێشەكان و ڕۆڵی تەواوەتی پێبدرێت لەناو بزوتنەوەی گۆڕاندا، نەك بڕیاری حیزبەكە بە زۆرینەوە كەمینەی ناو خانەی ڕاپەڕاندن تێپەڕێت.

،،

لەپشتی ئەم ململانێیەوە یاریەكی گەورەتر بەڕێوە دەچێت كە پەیوەندی بە كوڕەكانی نەوشیروان مستەفا و خاوەندارێتی كۆمپانیای وشەوە هەیە، كە هەفتەیەك دوای مردنی نەوشیروان مستەفا لە دادگا گواسترایەوە سەر چیا و نما.

 

لەكاتێكدا بزوتنەوەی گۆڕان بەدەست ئەم جەولەیەی كێشە ناوخۆیەكانەوە دەناڵێنێت، ڕۆژ بە رۆژ هەڵبژاردنەكان نزیكدەبنەوە.

هاوكێشەكە لەناو بزوتنەوەی گۆڕاندا بەو جۆرەیە كە عوسمانی حاجی مەحمود لەناو جڤاتی نیشتیمانیدا زۆرینەی لەگەڵدایە بەڵام لە خانەی ڕاپەڕاندا كەمینەن. بەم هۆیەوە ئەگەر پەیڕەوی دەستوری بزوتنەوەكە بكرێت و جڤات بكرێتە مەرجەعی یەكلاكردنەوەی كێشەكان، ئەوا ئاراستەی بڕیارەكان لەناو بزوتنەوەی گۆڕاندا بەشێوەیەكی دیكە دەبێت.

 

یەكێك لە نیگەرانییەكان ئەوەیە كە گروپە باڵا دەستەكەی ناو خانەی راپەڕندن بەر لە هەر كۆبوونەوەیەكی جڤات، ئەجێندای كۆبوونەوەكە دیاری دەكەن و ناهێڵن هەموو بابەتێك لە جڤاتدا گفتوگۆی لەسەر بكرێت.

 

یەكێك لەو بابەتانەی كە عوسمانی حاجی مەحمود دەیەوێت لە جڤاتی نیشتیمانیدا یەكلایی بكرێتەوە بریتییە لە كێشەی خاوەندارێتی knnو ئەو گۆڕانكارییانەی كە ڕێكخەری گشتی كردویەتی بەڵام گروپەكەی دیكە سورن لەسەر ئەوەی ئەوە كاری ڕێكخەری گشتییە.

 

لەپشتی ئەم ململانێیەوە یاریەكی گەورەتر بەڕێوە دەچێت، كە پەیوەندی بە كوڕەكانی نەوشیروان مستەفا و خاوەندارێتی كۆمپانیای وشەوە هەیە، كە هەفتەیەك دوای مردنی نەوشیروان مستەفا لە دادگا گواسترایەوە سەر نماو چیا، كوڕەكانی نەوشیروان مستەفا.

 

ئێستا مشتومڕی گەرم لەناو گۆڕان ئەوەیە، ئایا knn بەشێكە لە كۆمپانیای وشە كە منداڵەكانی نەوشیروان مستەفا خاوەندارێتی دەكەن، یان دامەزراوەی میدیای گۆڕانە و سەر بە بزوتنەوەكەیە وەك ئەوەی گروپی فشار بانگەشەی بۆ دەكەن.

  

،،

لەسەر ئەو بنەمایە نەوشیروان مستەفا لە بەرواری 1/3/2015 بە فەرمانێكی نوسراو عەبدولرەزاق شەریفی كردووەتە بەرپرسی دەزگاكانی راگەیاندنی بزوتنەوەی گۆڕان كە لەنوسراوەكەدا هاتوە پێكدێت لە ( knn، سایتی knnc ، سایتی سبەی، ژوری ڕۆژنامەوانی بزوتنەوەی گۆڕان، ڕادیۆی گۆڕان).

 

هەر لەو سۆنگەیەوە كوڕەكانی نەوشیروان مستەفا بە مافی خۆیانی دەزانن كە ئەو تەلەڤزیۆنە ڕێكبخەنەوە و خۆشیان ئیماكانیاتی مادی بۆ پەیدا بكەن، بەڵام كاتێك ئەمە دەكەن كە لە ڕ،وی سیاسیی و میدیاییەوە لەژێر دەسەڵاتی خۆیاندا بێت.

 

دانانی د.ئاكۆ حەمە كەریم هەر لەو چوارچێوەدایە و پەیوەندی هەیە بۆ ئۆكەی كوڕەكانەوە بۆ بەڕێوەبەرێكی نوێ‌.

  

هەر لەو چوارچێوەیەدا، عومەری سەید عەلی بە نوسراوێكی فەرمی د. ئاكۆی كردووە بە بەڕێوەبەری كەناڵەكە و عەبدولرەزاق شەریفیی گواستووەتەوە بۆ ژووری ڕۆژنامەوانی، بەم هۆیەشەوە د.ئاكۆ حەمە کەریم راستەوخۆ دەبێتە ئەندامی جڤات لەبری عەبدولرەزاق شەریف. ئەمەش بۆنی ئەوەی لێدەكرێت بۆ تێكدانی هاوسەنگی هێز بێت لەناو جڤاتەكەدا بە ئاراستەیەكی دیاریكراو.

 

ململانێكان گەیشتووەتە ئەو ڕادەیەی، بۆ یەكلاكردنەوەی ئەم پرسە دەست بۆ هەڵدانەوەی ئەرشیفی نەوشیروان مستەفا ببرێت.

 

ئەوانەی دەیانەوێت تەلەڤزیۆنەكە بچێتە سەر كۆمپانیای وشە و ژێردەستی كوڕەكانی نەوشیروان مستەفا، گرتەیەكی ڤیدیۆیی نەوشیروان مستەفا بڵاودەكەنەوە كە باس لەوە دەكات تەلەڤزیۆنی knn بە سەربەخۆیی لە بزوتنەوەكە دەمێنێتەوە و نایكەن بە تەلەڤزیۆنێكی حیزبی.

 
هەرچی ئاراستەكەی ترە، باس لەوە دەكەن كە لە دوای هەڵمەتی هەڵبژاردنی بزوتنەوەی گۆڕان، نەوشیروان مستەفا وتویەتی "ئەمە میدیای گۆڕانە و هەڵمەتی راگەیاندنی خۆمانی لێوە ئەنجام دەدەین".

 

هەروەها باس لەوە دەكەن لە یەكەم كۆنگرەی گۆڕاندا كاتێك باس لە ڕێكخستنەوەی میدیاكان كراوە، لە لیژنەی میدیا پێشنیازی ئەوە كراوە كە میدیاكانی گۆڕان بچنەوە ژێر چەتری كۆمپانیای وشە.بەڵام نەوشیروان مستەفا ئەوەی بەدڵ نەبووە و وتویەتی ئەو پێشنیازە سیفەتی ئیلزامی نییە بۆمان، هەر بۆیە لەسەر راسپاردەی ئەو، پرۆژەیەك بۆ رێكخستنەوەی میدیا نوسراوە و بۆ خۆی تایتڵی پرۆژەكەی داڕشتووە و كردویەتی بە پرۆژەی دامەزراوەی میدیای گۆڕان، پڕۆژەكەش لە ئەرشیفی نەوشیروان مستەفادا پارێزراوە.

 

لەسەر ئەو بنەمایە نەوشیروان مستەفا، لە بەرواری 1/3/2015 بە فەرمانێكی نوسراو عەبدولرەزاق شەریفی كردووەتە بەرپرسی دەزگاكانی راگەیاندنی بزوتنەوەی گۆڕان، كە لەنوسراوەكەدا هاتووە پێكدێت لە ( knn، سایتی knnc ، سایتی سبەی، ژوری ڕۆژنامەوانی بزوتنەوەی گۆڕان، ڕادیۆی گۆڕان).

 

ئەو فەرمانەی كە عومەر سەید عەلی دەریكردووە بۆ ئاكۆ حەمە كەریم، فەرمانەكەی پێشتری نەوشیروان مستەفای هەڵوەشاندووەتەوە بەبێ‌ ئەوەی ئاماژەی پێ‌ بكات.

 

لەسەر ئەم بابەتە دابەشبوونێكی گەورە لەسەرەوە تا خوارەوە لەناو بزوتنەوەكە سەری هەڵداوە و چەند بابەتێكی دیكەشی بەدوای خۆیدا وروژاندووە، وەك مەسەلەی داهاتی كۆمپانیاكان و خاوەندارێتی موڵكەكانی بزوتنەوەكە، كە لە دوای نەوشیروان مستەفاوە هەمووی گواستراوەتەوە بۆ چیا و نما، بەو هۆیەشەوە وەك ناوەندی هێز و ئاراستەكردنی بڕیار و ڕووداوەكان دەردەكەون، هەر بەم هۆیەشەوە حاشیەیەك بەچواردەوریاندا دروستبووە لە گەنجەكان، كە هانیان ئەدەن بۆ كۆنترۆڵكردنی زیاتری بزوتنەوەكە، بەئامانجی ئەوەی لەپاڵ ئەواندا خۆیان پلە و پۆستێكیان دەست بكەوێت.

،،

خەریكە كاردەگاتە هەڵدانەوەی دۆسیەی داهاتەكانی كۆمپانیای ووشە و ئەو شەریكانەی كەلەناو ئەو پڕۆژانەدان، بەو كۆمپانیایانەشەوە كە لەدوای مردنی نەوشیروان مستەفا دروست كراون و لە سێكتەرەكانی كارەبا و نەوت و كوالێتی كۆنتڕۆڵ و چەند بوارێكی دیكەشدا كاردەكەن.

 

تەنانەت خەریكە كار دەگاتە هەڵدانەوەی دۆسیەی داهاتەكانی كۆمپانیای وشە و ئەو شەریكانەی كەلەناو ئەو پڕۆژانەدان، بەو كۆمپانیایانەشەوە كە لە دوای مردنی نەوشیروان مستەفا دروست كراون و لە سێكتەرەكانی كارەبا و نەوت و كوالێتی كۆنترۆڵ و چەند بوارێكی دیكەشدا كار دەكەن.

 

گروپی ناڕازییەكان دەڵێن، ناكرێت سامانی مادی و مەعنەوی بزوتنەوەكە كۆنتڕۆڵ كرابێت لەلایەن ئەوانەوە و بیانەوێت دەستبەسەر راگەیاندنەكەشیدا بگرن، ئەگەر دەیانەوێت لەناو بزوتنەوەكە كاری سیاسی بكەن با ئەو شتانە بگێڕنەوە بۆ بزوتنەوەكە و دەستەبەرداریان ببن، ئەگەر ناشیانەوێت دەستبەرداری كۆمپانیا و بەرژەوەندیەكانیان ببن با كۆمپانیاكانیان ببەنە دەرەوە و تەداخولی سیاسەت نەكەن.

 

هەروەها باس لەوە دەكرێت كە قادری حاجی عەلی، سەرپەرشتیاری گشتی هەڵمەتی هەڵبژاردنی گۆڕان وتویەتی ئەگەر كەناڵی knn ی ڕادەست نەكرێت ئەوا دەكشێتەوە و ئەو ئەركە لە ئەستۆ ناگرێت.

 

ناڕەزاییەكانی ناو گۆڕان لەسەر ئەم پرسە ب ەجۆرێك كەوتووەتەوە،  كە هەندێ‌ دەنگی ناو بزوتنەوەکە داوای هەڵوەشاندنەوەی گۆڕانكارییەكان بكەن.

 

وەك دوا پەرەسەندنی ئەو بابەتەش كێشەكە خراوەتە بەردەم ژووری یاسایی بزوتنەوەی گۆڕان، تا لەڕووی یاساییەوە یەكلایی بكاتەوە ئایا كەناڵەكە سەر بە بزوتنەوەی گۆڕانە یان كۆمپانیای وشە.

 

بۆ ئەندام و دەنگەری گۆڕان ئەوە كێشە نییە كە ئایا د.ئاكۆ  حەمە کەریم بەڕێوەبەری كەناڵەكە بێت یان عەبدولرەزاق شەریف، سەر بە كۆمپانیای وشە بێت یان بزوتنەوەكە.

  

كاتی ئەوەنەبوو بزوتنەوەی گۆڕان بەم كێشانەوە سەرقاڵ بكرێت، دەكرا ئەم گۆڕانكارییانە بخرانایەتە دوای هەڵبژاردنەكان، هەرچەندە بە دڵنیاییەوە كێشەكانی ناو گۆڕان هەر تەنها پەیوەست نییە بە كەناڵەكەوە بەڵام لەوەدا تەقیوەتەوە.

هاوپێچ:

گرتەیەكی ڤیدیۆی نەوشیروان مستەفا كە باس لەوە دەكات knnسەر بە كۆمپانیای ووشەیە و لەدەرەوەی بزوتنەوەكە دەمێنێتەوە. لە ئەكاونتی د.ئاكۆ حەمەكەریم وەرگیراوە

https://www.facebook.com/ako.hama.3/videos/1589655551071453/

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری