ئەو تەڵەیەی سۆران عومەر نایەوە،بەئاسانی نێچیرەكەی گرت

سۆران عومەر،بەهۆی وروژاندنی بابەتی بڕوانامەی سەرۆكەوە،بزوتنەوەی گۆڕانی ئیحراجكرد

ئەو تەڵەیەی سۆران عومەر نایەوە،بەئاسانی نێچیرەكەی گرت

2502 خوێندراوەتەوە

هەتائێستا زۆرینەی خەڵكی وادەزانێت لە هەمواری یاسای سەرۆكایەتی هەرێمدا كە دوێنێ‌ بە دەنگی 89 ئەندام پەرلەمانی پارتی و یەكێتی و گۆڕان و كەمایەتیەكان دەرچوو بڕگەیەكی تایبەتی تێدایە لەبارەی ئەوەی ئەكرێت سەرۆك بڕوانامەی نەبێت. راستیەكەی ئەوەیە كە هیچ بڕگەیەكی لەوجۆرە لەیاساكەدا نییە دەنگی بۆ درابێت.

لەبنەڕەتدا لە پرۆژە یاسەكەدا هیچ بڕگەیەكی تێدانەبوو بۆ داواكردنی بڕوانامە لەكاندیدی پۆستی سەرۆكی هەرێم،ئەمەش مانای ئەوەی دەگەیاند كە بڕوانامە بەمەرج نەگیراوە بۆ ئەو پۆستە.

ئەم بابەتە بەبێ‌ دەنگی و بەبێ‌ هەرای راگەیاندن دەچووە سەر، ئەگەر سۆران عومەر لە فراكسیۆنی كۆمەڵی ئیسلامی بە لێزانی خۆی تەڵەكەی نەنایەتەوە بۆگۆڕان. كاتێك پێشنیاری كرد پێویستە مەرجی بڕوانامە بۆ كاندیدی سەرۆكی هەرێم زیاد بكرێت و پێشنیارەكەش لەلایەن فراكسیۆنی نەوەی نوێ‌ و كۆمەڵ و یەكگرتوو پشتگیریكراو و بوە پێشنیارێك بۆ دەنگدان.

لەكاتی دەنگدان بۆ پێشنیارەكەدا 22 دەنگی ئۆپۆزسیۆنی بەدەستهانی و 69 ئەندامیش دژی پێشنیارەكە دەنگیاندا كە زۆرینەی ئەندامانی گۆڕانی لەگەڵدابوو. بەوهۆیەشەوە سۆران عومەر توانی لەبەردەم كامیرا و رای گشتی بزوتنەوەی گۆڕان روبەڕوی ئیحراجی گەورەبكاتەوە و بیانخاتە تەڵەكەوە.

بەتایبەتی كە بزوتنەوەی گۆڕان رێكەوتنی كردوە لەگەڵ پارتی لەسەر ئەو پۆستە و كاندیدی پارتیش نێچیرڤان بارزانییە كە دیارە بڕوانامەی بەكالۆریۆسی نییە و ئەگەر بڕگەی بڕوانامە زیادبكرایە بۆ یاساكە ئەوا نێچیرڤان بارزانی دەكەوتە دەرەوەی هاوكێشەكەوە.

بەم هۆیەشەوە بزوتنەوەی گۆڕان بەناچاری لەبەردەم كامێرا و رای گشتی دەنگی بە پێشنیاری زیادكردنی بڕوانامە نەدا و بەوهۆیەشەوە روبەڕوی ئیحراجیەكی گەورە بوییەوە.

سۆران عومەر كە هاوشانی عەلی حەمەساڵح لەخولی رابردودا یەكێك بون لە پەرلەمانتارە رەخنەگرەكانی ناو پەرلەمان، لەدوای ئەوەی بزوتنەوەی گۆڕان چوە حكومەت و ریزی ئۆپۆزسیۆنی بەجێهێشت، توانی لەرێگەی تەڵەیەكی سیاسییەوە بزوتنەوەی گۆڕان و سەرۆكەكەی ئیحراج بكات و بیانخاتە مەوقیفێكەوە كە دژی خواستی دەنگدەرانیان دەنگ بدەن لە پێناو هەڵنەوەشانەوەی ڕێكەوتنە سیاسیەكەیاندا لەگەڵ پارتی.

بەهۆی تێپەڕینی پرۆژە یاسای كاراكردنەوەی سەرۆكایەتی پەرلەمان لەلایەن پارتی و یەكێتی و گۆڕانەوە، لە دوێنیەوە بزوتنەوەی گۆڕان روبەڕوی هەڵمەتێكی گەورەی رەخنەگرتن بۆتەوە،لەدەرەوەی حیزبەكە و لەناو خودی حیزبەكەشدا چەندین كەسی دیاری ناو بزوتنەوەكە دەنگیان بەرزكردەوە و بەتوندترین شێوە رەخنەیان لە سەركرددایەتی سیاسی بزوتنەوەكە گرت.


عەبدوڵا مەلا نوری،پەرلەمانتاری پێشوی گۆڕان دەنگدانەكەی دوێنێی پەرلەمانی بە" خیانەت و 30 حوزەیرانێكی تر "شوبهاندووە و نوسیویەتی"من دەزانم رێکەوتن کراوە، بەڵام ئێوەش بزانن ئەوەی بە ناوی نەوشیروان مستەفاوە دەکرێت درۆیەکی گەورەیەو پەیوەندی بەو زاتەوە نیە، بەڵکو هاوشێوەی یەکێتی تەسلیمبونە بە پارتی، ئەوەی دەکرێت ۳٠ حوزیرانە، ئەوەی دەکرێت ناپاکیە"

هەروەها د.شێركۆ حەمەئەمین نوسیویەتی" بەکورتی ئەوەی ئەمڕۆ کرا، چەسپاندنی دەسەڵاتی نەوەی دوەم و سێیەمی ماڵباتی بارزانیە و پشتکردنە هەمو بەهاو بنەماکانی ڕابوردوی گۆڕان و یەکێتی و بەتایبەتی کاک نەوشیروان و تاڵەبانیە یادیان بەخێر بێت، هەر قسە و باسێکیش،لەسەر ئەوەبکرێت ،ئەمە بەشێکە،لەهەمواری یاسای سەرۆکایەتی و هەڵبژاردنی سەرۆکی هەرێمە،لەناو پەرلەمان و هێنانەدی بەشێک،لەئامانجەکانی گۆڕان و هەرئەوە دەکرێت و ئەوی تری،بە نوسینەوەی دەستور سپێردراوە،ئەوە،گەوجاندنە و دەستور بەدڵی پارتی دەنوسرێتەوە و سیستمی سەرۆکایەتی کۆماری بنەماڵەیی یان سوڵتانی نەوتی دەچەسپێنرێت،کەئەمە مەترسیە گەورەکەیە"

 

author photo

تایبه‌ت به‌ دیپلۆماتیك