سى ساڵه‌ له‌به‌رانبه‌ر میندا ده‌جه‌نگێت

دوو ملیۆن و سێ سەد و هەشتا و شەش هەزار مینی لەخاکی کوردستان هەڵگرتۆتەوە

سى ساڵه‌ له‌به‌رانبه‌ر میندا ده‌جه‌نگێت

1250 خوێندراوەتەوە

 زانکۆ بورهان 

هه‌ردوو قاچى به‌هۆى مینه‌وه‌ له‌ ده‌ستداوه‌، سی ساڵه‌ له‌گه‌ڵ میندا له‌ جه‌نگدایه‌و، به‌ته‌نها خۆى، دوو ملیۆن و سێ سەدو هەشتاو شەش هەزار مینی لەخاکی کوردستاندا هەڵگرتۆتەوەو مینی لەژیر پێی (١٦٠) کەسدا پوچەڵکردۆتەوەو ژیانیانی لەمردن ڕزگار کردووه‌.

 

،،

پیاوێك له‌پارێزگای شه‌هیدان، زیاتر له‌چاره‌كه‌ سه‌ده‌یه‌كه‌ خزمه‌ت بەهاوڵاتیانی سنوره‌كه‌ی ده‌كات.

 

 _هۆشیار عەلی ناسراو بە هۆشیار بیاوێڵه‌یی، یان هۆشیارى مین هەڵگر، لەساڵی (١٩٦٣) لە گوندی بیاوێڵەی سەربە پارێزگای هەڵەبجە لەدایکبووە، و هەتا پۆلی (٧)ی ناوەندی خوێندووە، دواتر وازی لەخوێندن هێناوە.

 

هۆشیار علی له‌كاتی هه‌ڵگرتنه‌وه‌ی مین

 

_لەساڵی (١٩٨٦) بۆتە پێشمەرگەی یەکێتی نیشتیمانی کوردستان.

 

_لەسەردەمی پێشمەرگایەتیدا پلەی ئامر مەفرەزەی هەبووە.

 

_لەئێستادا پلەی سەربازی لیوا ڕووکنی هەیە.

 

_لەساڵی (١٩٨٩) لەکاتی پێشمەرگایەتیدا بەهۆی میینەوە قاچی چەپی لەدەست دەدات.

 

_لەساڵی (١٩٩٤) بەهۆی هەڵگرتنەوەی میینەوە قاچی ڕاستی لەدەست دەدات.

 

قاچه‌ ده‌ستكرده‌كان بوونه‌ته‌، هاوڕێی به‌رده‌وامی هۆشیار بیاوێڵه‌ی

 

 

_هۆشیار دانیشتووی هەڵەبجەیە و خێزاندارە و خاوەن چەن منداڵێکە.

 

_بەشێوەی پراکتیکی وانەی ئاگایی میین و تەقەمەنی لە (١٣٧) خوێندنگەی سنوری هەڵەبجە و شارەزوور و دەوروبەری وتووەتەوە.

،،

به‌هۆی خزمه‌ته‌كانی هۆشیار به‌قه‌زای پێنجوێن، له‌ئێستادا به‌شێك له‌ڕێگاو فه‌رمانگه‌كانی ئه‌و قه‌زایه‌  كراون به‌ناوی ناوبراوه‌وه‌.

 

_ بەتەنیا (١،١٣٠،٠٠٠) یەک ملیۆن و سەد و سی هەزار میینی لەسنوری پێنجوێن هەڵگرتۆتەوە.

 

_خەڵکی پێنجوێن خۆشیان دەوێت و بنکەی پۆلیس و خوێندنگەیەک و نەخۆشخانەیەک و مزگەوتێک و گوندێک و مەرزێکی بازرگانیان بەناوی هۆشیارە ناو ناوە.

 

_هۆشیار ماوەی (٣٣)ساڵە و لەساڵی (١٩٨٩) خۆبەخشانە و بێ دابڕان دەستی کردووە بە هەڵگرتنەوەی میین و پاککردنەوەی خاكی کوردستان لەمیین.

 

 

 

 

-هۆشیار ماوەی (١٨)ساڵە بەتابلۆی ژمارە (١)ی ( هەڵەبجە کوردستان)ەوە زۆربەی ناوچەکانی کوردستان گەڕاوە بەمەبەستی هەڵگرتنەوە و پاکردنەوەی خاکی کوردستان لەمیین.

 

_هۆشیار بەدوو قاچی دەستکردەوە نزیکی (٢٠) تەن میین و تەقەمەنی لەخاکی کوردستاندا دەرهێناوە. _بەژمارە (٢،٣٨٦،٠٠٠) دوو ملیۆن و سێ سەد و هەشتا و شەش هەزار مینی لەخاکی کوردستان هەڵگرتۆتەوە.

 

_هۆشیار (٥٤٠،٠٠٠) پێنج سەد و چل هەزار دۆنم زەوی لەمیین پاک کردۆتەوە.

_هۆشیارمیینی لەژیر پێی (١٦٠) کەس پوچەڵکردۆتەوە و ژیانیانی لەمردن ڕزگار کردووه‌.

 

author photo

تایبه‌ت به‌ دیپلۆماتیك