لەل و نیو لەل

لە ڕۆژهەڵاتدا، حیزب هی خێزانەکانە

لەل و نیو لەل

1172 خوێندراوەتەوە

سەردار مەحمو

بەڕێزان ... کاک بافڵ تاڵەبانی سکرتێری فیعلی یەکێتی نیشتیمانی کوردستان . کاک چیا مستەفا، ڕێکخەری گشتی - فیعلی بزوتنەوەی گۆڕان . کاک مەسرور بارزانی، سەرۆکی حکومەت و سەرۆکی داهاتوی پارتی دیموکراتی کوردستان ... ڕێزی بێ ئەندازەم بۆ ئێوەی زۆر بەڕیز ... .

 

،،

تائێستاش شەڕی ناوخۆ هەیە، بەڵام خۆشبەختانە نەوەكانی هەردوو بنەماڵە سەلامەتن!

 

بارزانییەكان

 + لە ساڵی ١٩٦٤ ەوە تا ئەمڕۆ شەڕی نێوان (جەلالی و مەلایی) ڕوویداوە، شکور بۆ خودا، نە کەسێک لە خێزانی بارزانی و نە کەسێک لە خێزانی تاڵەبانی لە(شەڕی براکوژی) دا خوێن لە پەنجەیان نەهاتوە ! .

+ لە پاش ئەوەی (پیرەژنە قژ سورەکە) مادلین ئۆلبرایت، پاش ساڵەها شەڕ، جەنابی مام جەلال و جەنابی کاک مەسعودیان ئاشت کردەوە، جەنابی کاک مەسعود فەرمووی: ئەگەر دادگایەکی عادیلانە هەبێت، من و جەنابی مام جەلال لەم شەڕەدا بێ گوناه دەردەچین !

 

،،

دە ڕۆڵەی ئەم شارە(سلێمانی) لەخۆپیشاندانەكانی 2011 شەهید كران، نەقەرەبووی مادی نەمەعنەوی بنەماڵەكانیان نەكرایەوە.

 

 ئەمە لە کاتێکدا بەڕێزیان دەیفەرموو: ئەو پەنجە دەبڕم لەگەڵ یەکێتی ئیتفاق بکەم، جەنابی مام جەلالیش نەفیر عامی بۆ پارتی کوشتن دەرکردبوو! .

  + پاش چەند ساڵێک جەنابی کاک مەسعود، حەملەیەکی گەورەی کرد، بۆ ئەوەی جەنابی مام جەلال ببێت بە سەرەك کۆماری عێراق، جەنابی مام جەلالیش دەیفەرموو: نەك هەر ئەم دەورە، دەورەی داهاتووش جەنابی کاک مەسعود سەرۆکی هەرێمی کوردستانە ! .

 

بافڵ تاڵەبانی كوڕە گەورەی جلال تاڵەبانی

 

 + کە نەوشیروان مستەفا گۆڕانی دروستکرد، مام جەلال فەرمووی: نەوشیروان بەرپرسە لە کیمیابارانی هەڵەبجە، کاک نەوشیروانیش فەرمووی: مام جەلال خۆزگەی خواستووە دووهەڵەبجەی تریش ڕووبدات، بۆ ئەوەی لەدەرەوە کەیسی کورد بە هێز ببێت ! دواتریش یەکێتی مانگی چارەکە ملیۆنێک دۆلاری دەدا بە گٶڕان و گۆڕانیش قەت نەیتوانی سێبەری یەکێتی نەبێت بەو حاڵەشەوە ! .

 + کە خۆپیشاندانەکانی حەڤدەی شوبات ڕویدا، (دە )کوڕی خەڵکی تێدا بوو بە قوربانی، ڕاگەیاندنەکانی پارتی و یەکێتی و گۆڕان بە شێوەیەك بەربوبونە یەکتر ئەو سەری دیار نەبێت، تەنانەت گۆڕان نەیانهێشت، پارتی (لایەك) لە خێزانی قوربانیەکانیش بکاتەوە .

 شەو ڕۆژ، باس باسی پاکێج و دادگایی تاوانباران بوو، کەچی کە حکومەت پێکهات جەنابی کاک نەوشیروان فەرمووی: چوارساڵی داهاتوو چوار ساڵی ئاشتی و پێکەوە ژیانە ! جا خوا مناڵ و مەزنی ناشارەزا و تازە پیاکەوتوو بگرێت وەزعەکەیان تێکدا ! .

 + کە بەڕیز یوسف محەمەد، سەرۆکی پەرلەمان بوو، ڕکی گرتبوو لە کاک مەسعود و دەیووت: بە نەخوێندەوار حوکمڕانی ناکرێت ، کە ئەمساڵ چاوپێکەوتنی لە گەڵ کرا ئەیووت: ناوی کەسم نەبردوە ! .

 

 

نما و چیا

 

،،

ئەو سەركردە لاوانەی ئێستا، خۆیان بەپێشەوای ئێستاو ئایندەی ئەم وڵاتە دەزانن.

 

 ئەم کارەساتە ناخۆشانە، بە توونی بابا و ئاوی ئاموون بڕۆن و قەت نەیەنەوە ... ئێستا بافڵ تاڵەبانی ئەڵیت: کاک مەسعود کارێزامایە و مامی منە ! دڵنیام چیای کاک نەوشیروانیش مام جەلال بە مام و هێرۆخان بە ئامۆژن دەزانێت ! کەواتە ئێوە هەموو بەرە باب و ئامۆزای یەکتر و سەرۆکی ئێستاو داهاتووی ئێمەشن ... .

 ئێمەش هەندێکمان لەوە تێگەیشتوین کە: دەروێش دەبێت بە خەلیفە، بەڵام قەت نابێت بە شێخ. مسکێن دەبێت بە سەرکار و تا کوێخاش دەڕوات ، بەلام هەرگیز نابێت بە ئاغا و بەگ ! ئێمەش تا سەرکردایەتی و مەکتەب سیاسی حیزبەکانی ئێوە(گەر گوێ لە مستی ئێوە بین) هەڵدەکشیین، بەلام قەت نابین بە پیاو ! .

 بۆیە لە ڕۆژهەڵاتا حیزب هی کەسی یەکەمەو بەس... حیزب هی خێزانەکانەو بەس ! . قوربانی لوتفتان بین ... وەک ئێمە ئەقڵمان نی یە، ئێوە بەزەیتان بە ڕەعیەتەکانی خۆتاندا بێتەوە و (هەرسێ ئامۆزاکە) لەسەر "ئەوی بۆ ئێوە باشە" ڕێک بکەون و جەنابی کاک مەسعود، وەکومەرجەع و مامی گەورەتان، بە جێگا پرس و ڕاتان دیاری بکەن و هەر یارییەک کە ئەیکەن پیرۆزتان بێت،،، ئێمەی گەلی گێلیش تۆپەکەتان بۆ ئەهێنینەوە ! .

ئێوە دانیشن بە خێر... ئێمەش دەستەوەستان لە حوزوردا ڕاوەستاوین!

 تێبینی/ کە مەسعود حەیدەر وتی: کاک مەسعود بارزانی مەرجەعە، یەک ملێۆن جنێوی بۆ چوو ! کەچی کە بافڵ تاڵەبانی دەڵێت: کاک مەسعود کارێزماو مامی منە، یەک پیاوم ئەوێ لە ناو یەکێتیدا بڵێ: (لەل) ! کە چیای کاک نەوشیروانیش هەر بڕیارێک دەردەکات، یەک گۆرانم دەوێت بەومەرجەی لەناو گۆڕان بمێنێتەوە، بڵێت: (نیوو - لەل) دیارە برایانی پارتیش لەوە تێگەیشتوون، (لەل) چەندە کارەساتبارە ! مولاحەزە/(لەل) وەک ووشە، مانایەکی دیارو سەربەخۆی نیە ، بەلام ماناکەی ئاوایە، وەک کورد دەڵیت: پیاوم ئەوێ بکۆکێت.

 

author photo

تایبه‌ت به‌ دیپلۆماتیك