وەڵامى بارزانى بۆ نامەکەى کۆسرەت رەسوڵ چییە؟

پارتى بۆ یەکێتى: هەرکاتێک بارەگاکانمان لە شارەکە کرانەوە پارێزگاریش دادەنێین

وەڵامى بارزانى بۆ نامەکەى کۆسرەت رەسوڵ چییە؟

1240 خوێندراوەتەوە

 

بارزانى وەڵامى کۆسرەت رەسوڵ و یەکێتى دەداتەوە، کە ئەوان هیچکاتێک رازى نابن پارێزگارێک بۆ کەرکوک دابنێن لەکاتێکدا لق و بارەگاکانیان لەشارەکە چۆڵکراون.

 

هەرچەندە یەکێتى بەبێ پرسى کەرکوک وەک بابەتێکى سەرەکى لەگەڵ پارتى رێکەوتنى کۆتایی واژۆ کرد، بەڵام کەرکوکیەکانى نێو حزبەکە جارێکى دیکە بابەتەکە گەرم دەکەنەوە و داوایان لە یەکێتى کردووە کە بەمەرج بەشدارى لە دەنگدان بۆ سەرۆکى هەرێم و پێکهێنانى حکومەت بکەن.

 

،،

کۆسرەت رەسوڵ، داوا لە بارزانى دەکات بەڵێنەکەى بباتەسەر.

 

 

کۆسرەت رەسوڵ چى بە پارتى وتووە؟

 

لەنامەیەکدا کە دوێنێ کۆسرەت رەسوڵ ئاراستەى پارتى کردووە، داوا دەکات پێش پێکهێنانى کابینەى نوێ پارێزگارێک بۆ کەرکوک لەسەر پشکى یەکێتى دابنرێت.

ئەم نامەیەى ناوبراویش دواى فشارى کەرکوکییەکانى نێو یەکێتى دێت کە لەکۆبوونەوەى هەفتەى پێشوو داوایان لە حزبەکەیان کردووە ئەم بابەتە یەکلایى بکرێتەوە.

 

 

لەنامەکەشدا ئەوە نوسراوە کە، بۆ ئەوەى ئەندام پەرلەمانەکانى یەکێتى بەشدارى کۆبوونەوەى سێ شەممە بکەن کە تایبەتە بەدەنگدانى سەرۆکى هەرێم، باشترە ئەنجومەنى پارێزگاى کەرکوک کۆببێتەوە پارێزگار دابنرێت.

 

بارزانى چۆن وەڵامى نامەکەى کۆسرەت رەسوڵى داوەتەوە؟

بەپێى زانیارییەکان هەر دوێنێ مەسعود بارزانى سەرۆکى پارتى، وەڵامى نامەکەى کۆسرەت رەسوڵى داوەتەوە بە راشکاوانە ئەوەى نوسیوە: پارتى پێکهێنانى حکومەتى لە دانانى پارێزگارى کەرکوک بەلایەوە گرنگترە، بۆیە بابەتى کەرکوک لەوە ئاڵۆزترە بەچەند رۆژێک چارەسەر بکرێت.

 

هەروەها بارزانى لەرێگەى سەرکردەکانى پارتییەوە ئەوەشیان بە یەکێتى راگەیاندووە: کە هەرکاتێک حکومەت پێک هات ئەوکاتە سەرۆکى دەستەى ناوچە کوردستانییە کێشە لەسەرەکان، دەدرێت بەیەکێتى با لەرێگەى ئەو پۆستەوە یەکێتى لەگەڵ بەغداد وتوێژ بکات و کێشەى ئەمنى کەرکوک چارەسەر بکات، تاکو پارتى بتوانێ بارەگاکانى لە شارەکە بکاتەوە.

 

،،

مەرجەکانى یەکێتى و پارتى بۆ دانانى پارێزگارێک بۆ کەرکوک، بابەتەکە لە هەڵواسراوى رادەستى قەدەرێکى نادیار دەکات.

 

 

بەکورتى مەرجەکانى پارتى لەبەرامبەر پۆستى پارێزگار چین؟

 

هەرچەندە یەکێتى مەرجى هەیە بۆ بەشدارى کردن لە کابینەى نوێ، بەڵام لە ئێستادا بابەتەکە پێچەوانە بۆتەوە و پارتیش مەرجى خۆى هەیە بۆ پێدانى پۆستى پارێزگار بە یەکێتى. ئەوانیش:

 

یەکەم: دۆخى ئەمنى شارەکە

 

پارتى داوا دەکات لەیەکێتى دۆخى ئەمنى شارەکە با بگەرێتەوە بۆ پێش رووداوەکانى ١٦ى ئۆکتۆبەر، تا ئەوان بتوانن بارەگاو لقەکانیان لە کەرکوک بکەنەوە، چونکە پێیانوایە هیچ گرنتییەک نییە کە دواى دانانى پارێزگاریش ئەندام و لایەنگرانى لەشارەکە سەلامەت بن.

 

دووەم: کابینەى نۆیەم گرنگترە

 

پارتى، پێکێهانى حکومەتى بەلاوە گرنگترە لەهەموو پرسەکان، و نایەوێت کابینەى نوێ کە مەسرور بارزانى سەرۆکایەتى دەکات لەوە زیارت دوا بکەوێت.بۆیە هەموو پرسەکان دەکات بەقوربانى بۆ کابینەى نۆیەم.

 

سێیەم: دروستکردنى لیژنە

 

هەروەها پارتى دەیەوێت دواى پێکهێنانى حکومەت لەرێگەى پێکهێنانى لیژنەیەکى هاوبەش لەنێوانیان پرسەکە یەکلاى بکرێتەوە، کە تیایدا کەرکوکییەکان رۆڵى سەرەکى ببین لە لیژنەکەدا.

 

 

پێدەچێت، سەرەراى مەرجەکانى هەردوولایان، کابینەى نوێ پێک بێت و دواتر کێشەى کەرکوک وەک بابەتێکى هەڵواسراوى لەنێوانیان بمێنێتەوە چارەسەرکردنیشى تاکو هەڵبژاردنى نوێ بۆ ئەنجومەنى پارێزگاى شارەکە بخایەنێت.