وازهێنان لە جگەرەکێشان، چۆن بتوانیت بەردەوامبیت؟

مامەڵەكردن لەگەڵ رۆژە سەختەكانی سەرەتای وازهێنان لە جگەرەكێشان

وازهێنان لە جگەرەکێشان، چۆن بتوانیت بەردەوامبیت؟

260 خوێندراوەتەوە

 د. سه‌روه‌ر سالار چوچانى

بەشێكی بەرچاوی جگەرەكێشەكان، چەندین هەوڵی شكستخواردووی وازهێنانیان هەیە، بەجۆرێك زۆرێكیان دەتوانن بڕیار بدەن وازی لێبهێنن، بەڵام دوای ماوەیەك تێهەڵدەچنەوە.

 

،،

بۆ ئه‌وه‌ی به‌رده‌وام بیت له‌نه‌كێشانی جگه‌ره‌، زوو زوو ده‌م و ددانت بشۆ.

 

  بۆ مامەڵەكردن لەگەڵ رۆژە سەختەكانی سەرەتای وازهێنان لە جگەرەكێشان، ئەم رێنماییانە یارمەتیدەرن:

 

1- ئاوی سارد و وردە بەركوڵ: هەڵمژینی ئاوی سارد بە لوولە (قەسەب) جۆرێكە لە جێگاگرتنەوەی هەڵمژینی جگەرە. دەركەوتووە هەڵمژینی ئاوی سارد یاریدەی دەردانی دۆپامینیش دەدات لە مێشكدا، كە ماددەیەكە وات لێدەكات هەست باشی و ئارامی بكەی و ئەو خراپی میزاجە كەم بكاتەوە كە لە سەرەتای وازهێنان لە جگەرەوە تووشت دەبێت. هەروەك خواردنی وردە بەركوڵ و ژەمی بچوك بچوك، ئەو پاڵنەرە دەروونییە كەمدەكاتەوە كە بۆ گەڕانەوە بۆ جگەرە نزیك دەبێتەوە. بەڵام ئەو خۆراكانە هەڵبژێرە كە وزەی كەمیان تێدایە و قەڵەوت ناكەن.

 2- سوودەكانی بە بیر بهێنەوە: لیستێك بنووسە كە لەو سوودانە پێكهاتبێت كە دوای جگەرەكێشان دەستت كەوتوون، وەكوو: هەستكردن بە بەهێزی و خۆ كۆنترۆڵكردن، گەڕانەوەی ئەو پاریەی لە جگەرە خەرجت دەكرد، هەبوونی بۆنێكی خۆشتری دەم و هەناسە، زۆرتر تامكردنی خواردن، بەهێزبوونەوەی جەستە و پاكتربوونەوەی سنگ. كاتێك پاڵنەرە دەروونییەكە بۆ جگەرەكێشان پەیدابووەوە، تەماشایەكی لیستەكە بكە.

 

 

 3- زوو زوو ددانت بشۆ: هەبوونێكی دەم و ددانێكی پاك و پاككردنەوەی بەردەوامی، جگەرەكێشانت زیاتر لەلا نەشیاو دەكات. 4-دوور بكەوە لە كحول: كحول هەستی خۆكۆنترۆڵكردن لاواز دەكات و وات لێدەكات بگەڕێیتەوە سەر جگەرەكێشان.

 5- روو بكە ئەو شوێنانەی جگەرەیان تێدا ناكێشرێت: كاتێك پاڵنەری دەروونی بۆ گەڕانەوە بۆ جگەرە چووە بنكڵێشەت، روو بكە ئەو زۆنانەی جگەرەیان تێدا ناكێشرێت وەك كتێبخانە یان شوێنە گشتییە هاوشێوەكان.

 

،،

بۆئه‌وه‌ی ده‌مت سه‌رقاڵ بكه‌یت، بنێشت بجوو.

 

 

 6- هۆكارەكانی وازهێنان لە هەموو شوێنێك بنووسە: ئەو هۆكارانەی وایان لێكردیت لە جگەرەكێشان دور بكەویتەوە بكە بە لیستێك و لە هەموو شوێنێك هەڵی بواسە: مەتبەخ، ئۆفیسەكەت، ئاوێنەی خۆ ئامادەكردنەكەت. بەوەش هەموو كاتێك لەبیرت دەبێت كە بۆچی وازت هێناوە و نابێت بگەڕێیتەوە سەر ئەو خووە ناتەندروستە.

 7- چالاكی جەستەییت بپارێزە: وەرزش هۆكارێكی بەهێزە بۆ بیرچوونەوەی پاڵنەرە دەروونییە نەرێنییەكان. هەروەك وەرزشكردن وادەكات ماددەگەلێكی سروشتی لە مێشك و دەمارەكان دەربدرێن كە فشاری دەروونی كەمدەكەنەوە و میزاج باش دەكەن. بۆیە لە یەكەمین مانگی دوای وازهێنان لە جگەرەكێشاندا وەرزش زۆر پێویستە.

 

 

 

 8- خشتەی كارەكانت قەرەباڵخ بكە: لە هەفتەكانی یەكەمی وازهێنان لە جگەرەدا، خشتەیەكی پڕ كار درووست بكە، وەك: سەردانی ئازیزان، نان خواردن لەگەڵ خانەوادە، سەردانی نێوەندەكانی وەرزش و یۆگا و سرووتی ئایینی و كۆمەڵایەتی. هەتا زیاتر سەرقاڵ بیت، كەمتر بیر لە جگەرە دەكەیتەوە.

 9- شوێنی جگەرە بگرەوە: بەشێكی زۆری جگەرەكێشەكان بەوە راهاتون هەمیشە دەمیان كار بكات، بۆیە باشترە لە مانگی یەكەمی وازهێناندا بنێشت، كاندی یان هەر شتێكی هاوشێوە بەردەوام لە دەمیاندا بێت.

 

 

10- لەسەر هێل بە: هیڵێكی پەیوەندی بهێڵەوە لەگەڵ كەسێك كە هانی داوی بۆ وازهێنان لە جگەرە، یان كەسێك كە پێشووتر وازی لە جگەرەهێناوە، یان هەركەسێك كە بۆی گرنگە تۆ جگەرەنەكێشیت.

 

،،

هاوڕێیه‌تی هاوڕێ جگه‌ره‌ كێشه‌كانت، كه‌م بكه‌ره‌وه‌.

 

 11- كافاین كەم بكەوە: لە هەندێك كەسدا كافاین خەو كەمدەكاتەوە و فشاری دەروونی و راڕایی زیاد دەكات. بۆیە باشترە لە مانگی یەكەمی وازهێنان لە جگەرەدا كافاین كەم بكەیتەوە، كە لە قاوە و چا و خواردنەوە وزە بەخشەكان و هاوشێوەكانیاندا هەیە

 12- میزاجی خراپ تێپەڕێنە: فشاری دەروونی، تووڕەیی و نائومێدی لە پاڵنەرە باوەكانن بۆ گەڕانەوە بۆ جگەرەكێشان. هەموومان تووشی ئەو میزاجە خراپانە دەبین، بەڵام گرنگە تێیان پەڕێنین بە وەرزشكردن و تێكەڵبوونی خەڵكی و هەر چالاكییەك كە خۆشحاڵت دەكات.

 13- لە جگەرەكێشەكان دووركەوە: هەندێك جار كەسانێك هەن كە خۆشحاڵ نین بەوەی تۆ وازت لە جگەرەهێناوە. بۆیە هەوڵدەدەن لە گرنگی بڕیارەكەت كەم بكەنەوە. باشترە لەوانە دووركەویتەوە.

 

 

 14- دان بە شکستدا مەنێ: ئەگەر جارێك كەوتیتە هەڵەوە و جگەرەیەكت كێشایەوە، ددان بە شكستدا مەنێ‌، بەڵكو وەها بیركەوە كە وەك ئەو هەموو هەڵەیەی پێشووتر كردووتە، ئەوەش جۆرە هەڵەیەكە كە نابێت هەرگیز دووبارە ببێتەوە.

  15- چەند هەفتەیەک نیکۆتین: ئەگەر وازهێنان لە جگەرە تووشی بارێکی دەوونیی و جەستەیی ئەوتۆی کردی کە زۆر بۆت سەخت بوو بەرگەی بگریت، بۆماوەی چەند هەفتەیەک نیکۆتین بەشێوەی بنێشت یان لەزگە بەکاربهێنە، لەو چەند هەفتەیەدا (بۆ نموونە هەشت هەفتە) نیکۆتین بەکاربهێنە، سەرەتا بڕی زۆرتر و هەر دوو هەفتە جارێک بڕەکە بکە بە نیوەی ئەوەی پێشووم تاوەکوو دەگەیتە سفر لە هەفتەی نۆهەمدا.

 

author photo

تایبه‌ت به‌ دیپلۆماتیك