هاوارێك بۆ گۆڕانخوازان

ئەگەر گۆڕان بیەوێت ڕێگا بە پەرتبوون بگرێت، ئەوا پێویستە ڕێز لە هەموو دەنگە ناڕازییەکان بگرێت

هاوارێك بۆ گۆڕانخوازان

449 خوێندراوەتەوە

 پارساڵ لەسەروبەندی نۆیەمین ساڵیادی سەرهەڵدانی گۆڕاندا، بەدیاریکراوی لەڕۆژی ۷/۷/۲٠۱۸دا چەند دێڕێکم لە فەیسبووك پۆست کرد بەناوی(بەڵێ گۆڕان کێشەی هەیە) داوام کردبوو کە گۆڕان خۆبەخۆ و لەمیدیاکانی خۆیەوە دەرفەت بدات بە هەڵسوڕاوەکانی تا باس لە کێشە ناوخۆییەکانی خۆی بکات بەدوایدا ڕادیۆی گۆڕان دەستپێشخەرییەکیان کرد بۆ ئەنجامدانی بەرنامەیەك بەناوی(پرس و ڕا)تا هەڵسوڕاوانی گۆڕان بانگهێشت بکات بۆ تاوتوێکردنی گرفت و ئاریشەکانی جەستەی گۆڕان، یەکەمین بەرنامەش لە ڕۆژی۱٤/۷/۲٠۱۸دا بە بەشداریی (هۆشیار عەبدوڵڵا، مەجید ساڵەح، بەندە) ئەنجامدرا، بەداخەوە تەنیا یەك بەرنامەیتر لەو پرۆگرامە پێشکەش کرا و بۆ هەمیشەش بەرد خرایە سەر کێشەکانی گۆڕان!

 

،،

درووستبوونی گۆڕان، به‌هۆی گوێنه‌گرتن بوو له‌ڕه‌خنه‌ی به‌رامبه‌ر له‌ناو یه‌كێتیدا، كه‌چی ئێستا گۆڕان ئه‌و ئه‌زموونه‌ شكستخواردووه‌ به‌رده‌وامی پێده‌دات.

 

 

 یەکێتی کاتێك بڕیاری بەستنی کۆنگرەی دوو ئەدات، لە کوردستانی نوێ سەکۆیەك دروست ئەکات بەناوی(بەرەو کۆنگرەی دوو)بەشێکی زۆر لەم برادەرانەی کە ئێستا ئەڵێن نابێت لەفەزای گشتیدا کادیر قسە بکەن و لەناوخۆشدا بەهیچ جۆرێك گوێت بۆ ناگرن و خەریکی ئیحتیواکردنی ناڕەزایەتییەکانن.

  ئەو کات بۆ خۆیان لەوێوە قسەیان ئەکرد! لە مانگی ۱۱ی۲٠٠٤دا کاتێك کە گروپی ئیمزا لەناو مەکتەبی سیاسی و سەرکردایەتی و کادیرە ناوەندییەکان ئیمزا بۆ چاکسازیی لەناو یەکێتیدا کۆئەکەنەوە، دیسان زۆرینەی ئەم بەڕێزانەی ئێستا بۆ خۆیان لەناو گروپی ئیمزادا بوون، پڕۆژەکە شەفافانە ئەخەنە ناو میدیاوە و داوا لە نووسەران ئەکەن پاڵپشتیان بکرێت!

 لەدروستبوونی باڵی ڕیفۆڕمەوە تا دروستبوونی گۆڕان، دەیان پڕۆژە لەلایەن سەرکردەکانی باڵی ڕیفۆڕمەوە پێشکەش بە مام جەلال و مەکتەبی سیاسیی کراوە و خراوەتە بەردەم ڕای گشتیی و ناو میدیاوە، تەنیا لە ماوەی هەژدە ڕۆژدا لە ۱٠/۱٠/۲٠٠۸ و ۲۸/۱٠/۲٠٠۸ دوو یاداشتی چاکسازیی لەلایەن چوار ئەندامی مەکتەبی سیاسی( عومەری سەید عەلی، عوسمانی حاجی مەحمود، مستەفا سەید قادر، جەلال جەوهەر) پێشکەش کراوە.

 

 

  گەورەترین سەرنج لەسەر یەکێتی ئەوسا (ڕێزنەگرتن بوو لە ڕای جیاواز) سەیرە ئێستا بەشێك لەم برادەرانە بۆ خۆیان میمۆری خۆیانیان لە باس و خواستی ڕای جیاواز پاك کردووەتەوە و گوێ نادەن بەهیچ پڕۆژە و یاداشتێك!!

  ئەگەر ئەم حیزبە ئەیەوێت بە یەکگرتوویی بمێنێتەوە و ئەو سەرمایە بە بەها مرۆییەی کە هەیەتی لەلای گرنگە، ئەوا ئەکرێت میدیا و ئۆرگانەکانی شەفافانە بەڕووی ئەندام و دەنگدەر و پشتیوانانیدا بکاتەوە و دیالۆگی چارەسەری گرفتەکانی ڕێك بخات و گۆڕان لە پەرتەوازەیی بپارێزێت، بۆ ئەم مەبەستەش ئەکرێت هەردوو لایەنی (بڕیاردەر و ناڕازیی، یان ئەوەی ناونراوە گۆڕانی گردەکە و گۆڕانی خوار گردەکە) بانگهێشت بکات بۆ گفتوگۆی شەفافانەی کێشەکان.

 خۆ ئەگەر بەڕێگا ئسوڵیی و دیسپلینکراوەکەی ناو خانەی ڕاپەڕاندن و جڤاتەکان و ژوور و مەکۆکان گوێ لەهیچ پڕۆژە و یاداشتێك نەگیرێت و میدیاکانیشت کڕوکپ بن لەسەر ئەم بابەتە و ئەسڵەن بەشێکی زۆر لە سەرکردە و هەڵسوڕاو و پەرلەمانتاران بایکۆت کرابێت و خرابنە بلاك لیستەوە، چاوەڕێن کەس لە هەژمار و پەیجی خۆی و میدیاکانیترەوە قسە نەکات؟!

 

،،

نه‌وشیروان مسته‌فا باوه‌ڕی ته‌واووی بائازادی ڕاده‌ربڕین و دیالۆگ هه‌بووه‌.

 

 لە چەند ڕۆژی ڕابردوودا هەندێ لە هەڵسوڕاوانی ناڕازیی گۆڕان لە (ئێن ئاڕ تی)ـیەوە لەسەر کابینەی نوێ و متمانەدان بە نێچیرڤان قسەیان کرد، شەپۆلێك لە تەشهیر و قسەی نابەجێیان ئاراستەکردن، بە پاساوی ئەوەی کە لە میدیای شاسوارەوە ڕەخنەیان لە گۆڕان گرتووە!! نازانم ئەمە چ نەنگییەکی تێدایە؟!

 کاك نەوشیروان (یادی بەخێر)لەپاش وازهێنانیشی لەیەکێتی گفتوگۆی ڕۆژنامەوانیی تەنانەت لەگەڵ میدیاکەی مەلا بەختیاریش ڕەد نەکردووەتەوە، بۆ ژمارە ۷٤ی ڕۆژی دوو شەممەی ۲٤/٤/۲٠٠٦ قسەی کردووە، هەروەك دەستی بەڕووی میدیاکانی پارتیشەوە نەناوە و گفتوگۆیەکی تولانیی کە نزیکەی سی لاپەڕەیە لەژمارە ۷٠۷ی گۆڤاری گوڵان لە۳/۱۱/۲٠٠۸دا ئەنجام داوە، لەهەریەك لەو چاوپێکەوتنانەدا بەڕوونی دەستی خستووەتە سەر کێشەکانی هەناوی یەکێتی و بگرە باسی گرفتە فیکرییەکانی نێوان خۆی و مام جەلالیشی کردووە.

 

 

 ئاخر چ ڕەوایە سەرکردایەتی گۆڕان بیەوێت هەموو جیاوازییەکان بسڕێتەوە و بەشێك لە لایەنگرانیشی سەرزەنشتی هەر ڕەخنە و سەرنجێك بکات کە دەیان جار و بە چەندین دەستەواژە لەناوخۆ و ژووری تاریکدا پێشکەش کراوە و گوێی لێ نەگیراوە و ئێستا لێرە و لەوێ ئەوترێت؟!

،،

گۆڕان ئه‌گه‌ر ده‌یه‌وێت په‌رت نه‌بێت، ده‌بێ گوێ له‌ڕه‌خنه‌گرانی ناو بزوتنه‌وه‌كه‌ی بگرێت.

 

 ئەگەر گۆڕان بیەوێت تەلاری ڕێکخراوەیی و ماڵەکەی بە یەکگرتوویی بمێنێتەوە و ڕێگا بە پەرتبوون بگرێت، ئەوا پێویستە ڕێز لە هەموو دەنگە ناڕازییەکان بگرێت و دیموکراتیی و شارستانیانە بەرخوردیان لەگەڵ بکات، خۆ ئەگەر ناتوانێت پێویستە لەلایەن ڕای گشتیی و هەڵسوڕاو و دەنگدەرانییەوە سەرکۆنە بکرێت، نەك گلەیی و گازاندە لە دەنگە بوێر و ناڕازییەکان بکرێت!

 گۆڕان کە خۆی بەخاوەنی راستەقینەی دەڤەری سەوز ئەزانێت، هەر بە ڕاستیش سەردەمێك زۆرینەی ڕەهای زۆنەکە و بەشێکی باشی هەولێر و دهۆکیشی لەگەڵ بوو، لەبری نیگەران بوون لە دروست بوونی هێزی وەك (نەوەی نوێ و هاوپەیمانیی)، ئەتوانێت خەڵکیتر ناچار نەکات بەدروستکردنی هێزی نوێ.