سیاسییە بێ شەرمەکان!

مرۆڤ نازانێت باسی چ شەرمەزارییەکتان بکات

سیاسییە بێ شەرمەکان!

703 خوێندراوەتەوە

 شەپۆل عەلی عەسکەری

مێژووی بزوتنەوەی ڕزگاری گەلی کورد بەکۆمەڵێ هەورازو نشێودا ڕۆیشتووە لەهەر چوار پارچەکەی کوردستان، بەبێ جیاوازی‌و تا ئەمڕۆشی لەگەڵدا بێت، ئەم بزوتنەوانە پێکهاتبوون لەمرۆڤی خاوەن بیرو بۆچوون‌و ئایدۆلۆژیای جیاواز، لەهەمانکاتدا ئەم مرۆڤانە لایەنی دەروونی‌و فەسلەجی جیاوازیشیان هەبوو، هەیە وەک حاڵەتێکی سروشتی مرۆڤ، تیایاندایە پاک‌و دڵسۆزو خەمخۆر ڕەوشتبەرز، خاوەن هەڵوێست‌و بۆچوونی بەرز بۆ ڕزگاری خاک‌و نیشتمان‌، بەڵام بەداخەوە لایەنێکی ڕەشی تێدایە شان بەشان دڵسۆزەکان خەڵکانێکی ١٠٠٪ پێچەوانەی بەرانبەرەکانیانن.

،،

فێڵ چه‌كێكی به‌هێزی سیاسییه‌ بێشه‌رمه‌كانه‌.!

 

 ئەوەی زیاتر جێی داخە کورد وتەنی " کێ ئەیکا و کێ ئەی خوا " ئەمانەن کە هەوڵی زۆر دەدەن بۆ ڕووخان و تێکدانی ئەوەی هاوڕێکانیان بنیادیان ناوە، کار و ویستی ئەمانە خۆی لە یەک شتدا دەبینێتەوە ئەویش " بەرژەوەندی خودی خۆی وبەس" کێشە نییە بەلای ئەوانە، نۆکەرایەتی دوژمن بکات یا کار ئاسانی بۆ تێکچوونی بارودۆخێک و خیانەت و دزی لەم بارودۆخەی، ئەمانە ئاسانترین کارە کە بیکەن.

 ئەم جۆرە سیاسیانە پێیان ئەوترێ سیاسی بێشەرم، لەبەر بێ شەرمییەکەیان و پێشئەوەی کە دەست بە کارە قێزونەکانیان بکەن جۆرەها جۆر پیلان دادەنێن یا خود بۆیان دادەنێن بۆ ئەوەی بگەنە دەسەڵات و هەنگاوەکان یەک لە دوای یەک دەنێن و فەزایەک بۆ خۆیان دروست دەکەن کە خەڵکانێکی زۆر بڕوایان پێدەکەن و فەریادڕەس و پاڵەوان ناویان دێنن، لەو حاڵەتەدا دەزانن کە بارودۆخیان لە بارە بۆ جێبەجێکردنی پلانەکانیان و پاراستنی خۆیان و بنەماڵەکانیان.

،،

هه‌وڵدان بۆ كورسی ده‌سه‌ڵات بووه‌هۆی براكوژی و ناكۆكی ناوخۆی، له‌هه‌رێمی كوردستان، كه‌تائێستاش كاریگه‌رێكانی ده‌بینرێت.

 

 لەدوای ناوەڕاستی شەستەکانەوە ململانێیەکی سەخت سەری هەڵدا لەدوای ساڵانێک لەقوڵپەی ڤایرۆسی دەسەڵات و سەرۆکایەتی حیزب، بوو بەکێشەیەکی گەورەی لەنێوان دووکەسایەتی ناو پارتی دواتر بەدو بەرە ناسراو دەستی پێکردو تا ئەمڕۆ میللەتی کورد پێوەی ئەناڵێنێ، پریشکی ئاگری ناکۆکی نێوان ئەم دوو بنەماڵە تەنها لەباشور نەمایەوە.

 بەڵکو تەشەنەی کردو پارچەکانی تریشی گرتەوە بەداخەوە ئەم دو بنەماڵەیە بوونە ڤایرۆسێکی خۆێناو‌ و، بوون بەهەوێنی برا کوژی لەوڵاتدا، لەنێوانیاندا بەهەزارەها گەنج‌و خەڵکانی تێکۆشەر بوونە سوتەمەنی، دوای ئەوەی یەکتریان بۆ لەناونەبراو بەهەوڵی چەندین کەسایەتی تواندرا کە دو باڵەکە یەک بگرنەوە تا ساڵی ١٩٧٥.

 

 

 

 

 دوای ئەوەی کە لە ١٩٧٥ کە کورد بۆ یەکەمجار یەک دەنگ‌و یەک ڕەنگ بوو خاوەن چەك‌و بڕوایەکی بەرز بوو، بووە قوربانی سەرکردەیەک هەمو غەم‌و وستی ئەو مانەوەی خۆی‌و بنەماڵەکەی‌و ئەو بڕە پارە زۆرەی کە دەستیکەوتبوو، بەدەست ماچکردنێکی شای ئێران هەمووی خەون و ئارەزوو خوێنی شەهیدانی کردە قوربانی خۆی و بنەماڵەکەی و بەئاشبەتاڵێک چرایەکی پڕشنگداری کوردایەتی کوژاندەوە.

،،

یه‌كێتی دوای ڕێكه‌وتنامه‌ی له‌گه‌ڵ پارتی، ئیراده‌شی ته‌سلیمی ئه‌و پارته‌ كرد.

 

 سەیری یەکێتی، دوێنێ و ئەمڕۆ چ جیاوازیەکی گەورە بەسەریا هاتووە، حزبێک خاوەنی هەزارەها شەهیدو جێ دەستی لەهەر چوار پارچەی کوردستان دیار بوو، ببووە نموونەی خەبات‌و تێکۆشان ئەمڕۆش بوونەتە حزبێکی لۆکەڵ کە تەنها لەبەشێکی هەرێم خۆیان قەتیس کردووە کۆمەڵێ خاوەن بەرژەوەندی تایبەت لەلوتکەی دانیشتون‌و بڕیار لەئەمڕۆو ئایندەی ئەدەن.

 باسی پارتی ناکەین لەبەر ئەوەی ئەوان لەئەوەڵەوە بەمجۆرە هێناویانە. لەساڵی ٢٠٠٢ەوەو بە تایبەتی لەدوای ڕێکەوتنە ستراتیجیەکەی نێوان تاڵەبانی‌و بارزانی یەکێتی بەتەواوی چارەنووسی خۆی خستە ژێر دەستی پارتی‌و دواتر پاش سەردانی تاڵەبانی بۆ سەر قەبری مەلا مستەفاو ئیدریس‌و پەشیمانی‌و بێئاگایی خۆی لەسەر هەموو بەسەرهاتەکانی ڕابردو ڕاگەیاند، لەوکاتەوە هەموو ئەو کەسانەی لەبیرچوو کە بونە سوتەمەنی مانەوەی هەردو بنەماڵەو دەوڵەمەندبونیان لەسەر خوێنی هەزارەها تێکۆشەرو هەزارەها منداڵیان بێ باوکرد لە نێوانیاندا لەو کاتەوە سیستمێکی نوێ لەسیاسەت دەستیپێکرد.

 

،،

شه‌رمتان نه‌كردو كوردستانتان به‌سه‌ر دوو زۆندا دابه‌ش كرد.

 

 ئێوە شەرمتان لەمیللەت نەکرد لەوکاتەی کە شەڕی برا کوژیتان دەستپێکردەوە، شەرمتان لەکەسوکاری شەهیدان نەکرد کە لێتان پاڕانەوە کە چیتر مەبن بە باعیسی نەهامەتی زیاتر و جەرگسووتانی دایکانی دیکە لەوە زیاتر کە جێی شەرمەزاری بوو کە بە شەقی ئەمریکا دانیشتن دوای گوێڕاکێشان و ترسی لە دەستدانی پایەی خۆتان، ناچار ڕێکەوتن بەڵام دایکی شەهیدان هاتن بۆلاتان شەرمتان لەوان نەکرد بەڵام ملتان بۆ مادلن ئۆڵبرایت وەزیری دەرەوەی ئەمریکا دانەواند..!

 

 

 ئێوە ٣١ی ئابتان کرد سەدامتان هێنایەوە بۆ سەر خاکی ڕزگارکراو، بەمەش نەوەستان (تورکیا و ئێران)تان هێنا، هەر سوودی نەبوو شەرمی ئەوەتان نەکرد کە بە درێژایی ٣٥ساڵ حوکمرانی سەدام نەیتوانی میللەت جیابکاتەوە بەڵام ئێوە ئەمەشتان کرد کردتانە ئەمبەر دێگەڵە و ئەوبەر دێگەڵە، شەرمی دەستبەسەراگرتنی بیرە نەوتەکانی هەرێم و دابەشکردنی سەروەت و سامانی وڵات بەسەر خۆتاندا.

 

31 اب

 

 

 مرۆڤ نازانێ باسی چی لە شەرمەزاریەکانتان بکات لە دزینی داهات و بڕینی مووچەی فەرمانبەران بۆ نیوە یا بە ڕفراندۆمە بێ بنەماکەی بارزانی یا ١٦ی ئۆکتۆبەری نەوەکانی تاڵەبانی یا لاوازی و کەم تەرخەمی ئۆپۆزیسیۆن یا شەرمەزاری لە دەستدانی هەموو ناوچە دابڕاوەکانی هەرێم.

 خەڵک نازانێ کە ڕێکنەکەوتنی ئێوە لەسەر پارەی نەوت ئەو ناوچانەتان لە دەستدا، واتانکرد کە حەشدی شەعبی سووکایەتی بە کوردانی دانیشتووی ئەو ناوچانە بکات و تازەترین شەرمەزای بارودۆخی کەرکوکە و سووتانی دەغڵ و دانی جوتیاران و تەقینەوەکانی دوێنێ شەوو٣٠-٥-٢٠١٩.

،،

سیاسه‌ت، شه‌رمی تێدانه‌بێت ده‌بێته‌ جه‌نگه‌ڵستانە.

 

 سنووری تەماعتان نازام گەیشتۆتە لوتکە یا هێشتا ماوتانە لەوە زیاتر کاولی بکەن ، هەموو هێڵە سوورەکانتان بەزاند و نرختان بۆ هیچ شتێک نەهێشتەوە و ناخی گەنجەکانتان ڕوخان، ئەمڕۆیەکی شکستخواردووتان بە دیهێنا و بەرەو ئاسۆیەکی نادیار ئەم میللەتە بەڕێوە دەبەن.

  لیرەدا دەبێ ئیستێک بکەن تۆزێک بیر بکەنەوە شەرم بتانگرێ ئەگەر بۆ جارێکیش بێ، چونکە بەڕاستی سیاسەت ئەگەر ڕەوشتی تیا نەبێ دەبێتە جەنگڵستان وەک ئێستا کە ئێوە بەرپایدەکەن، بێبەرهەم دەبێ لە نەهامەتی زیاتر هیچیتر نابێ.

 
 
 
ئه‌مڕۆش ئەو ناکۆکی و قسە و قسەڵۆکانەی کە لە میدیاکانەوە بە یەکتری دەڵێن، هەمووی قسەی بێئەرزشن، هیچ قورسای نییەو بڵقی سەرئاون، لە بەر ئەوەی هەموو میللەت لێتان شارەزا بووەو دەزانن کە کەستان ئامادەنین واز لە بەرژەوەندییە تایبەتییەکانی خۆتان بهێنن بۆ هیچ مەبەستێک.
 
لەبەر چاوی ڕەشی یەکتری نا، بەڵام لە بەر قەبارەی دەسکەوتە مادییەکان لە کۆتایی ئەم درامایە ڕێکەوتنێک واژۆ دەکەن، ئەیخەنە خانەی بەرژەوەندی میللەتەوەو وەک هەموو جارێک میللەت قەرزاربار دەکەن.
 
ئێستا بۆتان دەرکەوت کە ئێوە سیاسی بێ شەرمن...!