پارتى و یەکێتى لەسەر کاندیدێک، بۆ پارێزگارى کەرکوک رێک دەکەون

پارتى، نەرمى دەنوێنێ بۆ یەکێتى تاکو کابینەکەى مەسرور بارزانى پێکبێت

پارتى و یەکێتى لەسەر کاندیدێک، بۆ پارێزگارى کەرکوک رێک دەکەون

1108 خوێندراوەتەوە

 

دواجار یەکێتى و پارتى، لەژێر فشارى ناوخۆیی و دەرەکیدا لەسەر کاندیدێک بۆ پۆستى پارێزگارى کەرکوک رێک دەکەون، بەمەش پێکهێنانى کابینەى نوێ دەباتە قۆناغێکى پێشترو جدییەوە.

 

دوێنێ مەکتەبى سیاسی یەکێتى نیشتمانى کۆبوونەوەى نائاسایی خۆى ئەنجامدا، کە تیایدا بریار درا ئەو ٥ ناوەى دیارى کرابوون بۆ پۆستى پارێزگارى کەرکوک رادەستى لیژنەیەک بکرێت، تاکو لەگەڵ دەستیان بیبەن بۆ لاى پارتى و لەسەر ناوێک پرسەکە یەکلایی بکەنەوە.

 

 

،،

لیژنەکەى یەکێتى پێنج ناویان پێیە، کە ئەگەرى زۆرە یەکێکیان پارێزگارى داهاتووى کەرکوک بێت.!

 

لیژنەکە پێک دێت لە هەریەک لە (کۆسرەت رەسوڵ و بافڵ تاڵەبانى و ئەرسەلان بایز) کە پێشبینى دەکرێت، ئەمە لیژنەى یەکلاکەرەوە بێت و یەکێتى و پارتى لەبارەى پارێزگارى کەرکوکەوە رێک بکەون.

 

 

کاندیدەکانى یەکێتى کێن؟

یەکێتى نیشتمانى ٥ کاندیدى ئامادە کردووە تاکو لەسەر مێزى گفتوگۆکان نیشانى پارتیان بدات، بەپێى زانیارییەکانیش پێدەچێت هەر لەسەرەتاوە پارتى بەیەکێک لەکاندیدەکان رازى بووبێت. کاندیدەکانیش ئەمانەى خوارەوەن:

 

یەکەم: رەوەند مەلا مەحمود

 جێگرى بەرپرسى مەڵبەندى یەکێتى نیشتمانى کوردستان، یەکێکە لەو کاندیدانەى کە لەنێو جانتاى لیژنەکەى یەکێتیدایە بۆ لاى پارتى، بەڵام ناوبراو چانسێکى زۆر لاوازى هەیە تاکو بکرێتە پارێزگارى کەرکوک و رەزامەندى پارتیش بەدەست بهێنێت.

چونکە جێگرەکەى بەرپرسى مەڵبەندى یەکێتى، لاى پارتى دەموچاوێکى خۆشەویست نییە و تاوانبارە بە ١٦ى ئۆکتۆبەر، بۆیە پێ ناچێت بەهیچ شێوەیەک قبوڵى بکەن.

 

رەوەند مەلا مەحمود
،،

سیان لەکاندیدەکانى یەکێتى بۆ پارێزگارى کەرکوک لاى پارتى قبوڵکراو نین.!

 

دووەم: ئەحمەد عەسکەرى

کە پیاوێکى بەتەمەنە و لەنێو یەکێتییەکانى کەرکوکدا دیارە، و ئەندامى ئەنجومەنى پارێزگاى کەرکوک و بەرپرسى لیژنەى ئەمنى ئەنجومەنەکە بووە.

 

ناوبراویش بەهۆى زۆرى تەمەنەکەی و نەبوونى پشتگیرییەکى ئەوتۆ لەنێو مەکتەبى سیاسی یەکێتى نیشتمانى پێ ناچێت کاندیدێکى بەهێز بێت بۆ پۆستى پارێزگارى کەرکوک.

 

ئەحمەد عەسکەرى

 سێیەم: مامۆستا کاکە رەش

کە ناوى تەواوى (سدیق بکر)ە بەرپرسى لیژنەى ماددەى ١٤٠ بووە لە ئەنجومەنى پارێزگاى کەرکوکـ ( لە پشکى یەکێتى)، بەڵام ناوبراویش کاندیدێکى بەهێز نییە بۆ پۆستى پارێزگارى کەرکوک.چونکە کەسایەتییەکى سیاسی بەهێزو دیارى پارێزگاکە نییە.

 

مامۆستا کاکە رەش

 

چوارەم: عومەر ئینجە

 کاندیدى چوارەم لە کاندیدەکانى یەکێتى بۆ پۆستەکە، کەسێکە بەناوى عمر ئینجە کە جێگرى سەرۆکى زانکۆى کەرکوکە و ئەندامێکى دیارى یەکێتى نیشتمانییە لە پارێزگاکەدا.

 

یەکێکە لە کاندیدە بەهێزەکان بەهۆکارى ئەوەى لاى پارتى کەسێک نییە لە سەرانى ١٦ى ئۆکتۆبەر وەهەروەها لەگەڵ کارى سیاسیدا سەرقاڵى بابەتى زانستى بووە و لەگەڵ هێزو لایەنە سیاسییەکان پەیوەندییەکى دبلۆماسى هەبووە.

 

عمر ئینجە

 

پێنجەم: لیوا جەمال تاهیر

پێدەچێت کاندیدى پێنجەم کە یەکێتى دیارى کردووە تاکو بیدات بە پارتى، کۆتا کاندید بێت و هەردولاش رێک بکەون لەسەرى.

لیوا جەمال، بەرپرسى پێشووى پۆلیسى کەرکوک بووە، لەگەڵ پارتییەکان دۆستاییەتى هەبووە و تاوانبار نەکراوە بە ئەنجامدانى ١٦ى ئۆکتۆبەر و بەهۆکارى کارەکەى بێ لایەنى خۆشى پاراستووە.

 

،،

هەندێک خاڵى بەهێزى لیوا جەمال دەبنە هۆى ئەوەى پێش کاندیدەکانى دیکە بکەوێت!.

 

بەڵگەکان:

چەند بەڵگەیەک دەبنە پاڵنەرێک کە ناوبراو ببێت بە پارێزگارى کەرکوک:

١/ بە حیمایەو کەسێکى نزیک لە کۆسرەت رەسوڵ دادەنرێت، ئەمەش وا دەکات کۆسرەت رەسوڵ لە دانوستانەکاندا پشتگیرى تەواوى بکات و هەرکەسێکیش ناوبراو پشتگیرى بکات پێ ناچێت پارتى لارى هەبێت لەگەڵیدا.

 

٢/ لیوا جەمال، لە بنەرەتدا خەڵکى هەولێرەو لەگەڵ زۆرێک لە بەرپرسەکانى پارتى پەیوەندى هەیە و نەیهێشتووە ناکۆى لەنێوانیاندا روو بدات.

 

٣/ دۆستێکى نزیکى ئەرسەلان بایزە، کە ناوبراویش یەکێکە لە ئەندامەکانى لیژنەکە و پشتگیرى تەواوى دەکات.

لیوا جەمال تاهیر

٤/ لەگەڵ ماڵى تاڵەبانى پەیوەندى دۆستایەتى هەیە و لەلایەن کورەکانى تاڵەبانییەوە دڵخوازى بەدەست هێناوە.

 

٥/ بەپێى زانیارییەکان لەتەواوى کاندیدەکان بەهێزترە لەرووى پشتگیرى کردنى لەناو یەکێتى و پارتیشیەوە.

 

٦/ هەروەها بە ناراستەوخۆ و نارەسمى، سەرکردەکانى پارتى ئەو پەیامەیان گەیاندووە بە سەرکردەکانى یەکێتى کە ئەوان لاریان لەگەڵ لیوا جەمال تاهیر نییە.

 

 

بریارە سبەینێ پارتى و یەکێتى لەسەر ئەم ناوانە کۆببنەوە، بۆ ئەوەى پێش مەراسیمى سوێندخواردنى سەرۆکى هەرێم بابەتەکە یەکلایى ببێتەوە و بەرچاوى هەردولاش روون بێت بۆ بەشدارى کردنى یەکێتى لە مەراسیمەکەدا، تا وەکو دەنگدان بۆ سەرۆکى هەرێمى لێ نەیەت کە یەکێتى هۆڵەکەى بەجێهێشت.

 

بۆیە ئەگەرى زۆرە لەسەر ئەو ناوەى کە باسکرا رێک بکەون و چى دى ئەم بابەتە بە هەڵواسراوى نەمێنێتەوە، چونکە پارتى لە ئێستادا دەیەوێ نەرمى بنوێنێت بۆ یەکێتى تاکو کابینەکەى (برا گەورە) مەسرور بارزانى رووبەرووى کێشە نەبێتەوە دەنگى تەواو (بە تایبەت یەکێتى) بەدەست بهێنێت.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان