ئەگەر PKK لە قەندیل شکا

ئەگەر PKK لە قەندیل شکا

802 خوێندراوەتەوە
د. فایەق گوڵپی
هێرشی ئەمجارەی سوپای تورکیا تەنها بۆ لێدانی PKK نییە، بۆ داگیرکردنی باشوری کوردستانیشە، بۆ ئەوەیە کەرکوک لە باشوری کوردستان داببڕیت، بۆ ئەوەیە سیستەمی فیدراڵی عێراق و هەرێمی فیدراڵی کوردستان هەڵوەشێنتەوە.

 

،،

ئه‌گه‌ر بێت و په‌كه‌كه‌، له‌قه‌ندیل وه‌ده‌ربنرێت، جێگره‌وه‌كانی داعش و هاوشێوه‌كانی ده‌بن.!

 

  عێراق بگەڕێنێتەوە بۆ وڵاتێکی ناوەندی وەک تورکیاو دەستکەوتەکانی گەلی کورد لەناو بچن. ئەگەر PKK لە قەندیل بشکێت و دەربکرێت، کۆڵەکەیەکی ئەستوری پاراستنی دەستکەوتەکانی هەرێمی کوردستان دەڕوخێت، ئاسایشی هەرێمی کوردستان و هاوپەیمانانی، بەر هەڕەشەی مەترسیداری هێزە تیرۆریستیەکانی ناوچەکە دەکەوێت، گەل روبەرووی ئەنفال و هەڵەبجە و شەنگال دەبێتەوە.

  لەبەر ئەوەی دوای دەرچوونی PKK لە قەندیل، شوێنەکانی گەریلا بە داعش و نمونەکانیان پڕدەکرێتەوە. تا دێت هێرشەکانی سوپای تورکیا بۆ سەر باشوری کوردستان فراوانتر دەبن، کەسیش ناتوانێت بڵێت ئەوەی بۆ ئەنجامی هێرشەکانی تورکیا وێنای دەکەم وا نییە.

،،

گومانده‌كرێت، ڕێكه‌وتن له‌نێوان توركیا و به‌رپرسانی هه‌ولێردا هه‌بێت.!

 

 کەچی دەسەڵاتدارانی هەرێم و نوێنەرانی کورد لە عێراق، بە تایبەتی سەرۆکی هەرێمی کوردستان و سەرۆککۆماری عێراق، تا ئیستە بێدەنگیان هەڵبژاردوە، وەک بڵێی ڕێکەوتنێکی نهێنی لە نێوان تورکیا و بەرپرسانی کوردا، بۆ گۆرینی داگیرکەرێک بە داگیرکەرێکی تر، واتە گۆرینی تورکیا بە عێراق لە سنوری هەرێمی کوردستان و کەرکوک و موسڵدا هەبێت.

 

 نازانن ئەو جۆرە سیاسەتە شەڕی گەورە و ماڵوێرانکەر و لەناوچوونی دەستکەوتەکانی گەلی کوردی بە دوادا دێت، وەک چۆن ساڵی ١٩٨٨ هێزەکانی باشوری کوردستان لە شاری هەڵەبجە و هەندێک ناوچەی ئازادکراوی باشوری کوردستاندا، عێراقیان دەرکرد و ئێرایان هێنایە شوێنی، داگیرکەری عێراقیان بە داگیرکەری ئێران گۆڕی، ئەوە ئەنفال و کیمیابارانی هەڵەبجەی لێکەوتەوە.

 

 

 

 ئەگەر دەسەڵاتدارانی هەرێم گڵۆپی سەوزیان بۆ تورکیا هەڵکردبێت بۆ ئەوەی PKK لە قەندیل دەربکات، وابزانن دوای لێدانی PKK سوپای تورکیا بۆ ناو خاکی تورکیا پاشەکشە دەکات و هەرێمی کوردستان بۆ ئەوان بەجێدەهێڵێت، ئەوەیە خەونی شاعیرانە، ئەوەیە ساویلکەیی سیاسیی، ئەوەیە بێکەسی کورد، لەبەر ئەوەی هەر سوپایەک بە خوێنی سەربازەکانی ناوچەیەک داگیربکات.

 

  بە خوێن نەبێت ئەو ناوچەیە چۆڵناکات، مەرج و سیاسەتی خۆشی بەسەر دەوروبەریدا دەسەپێنێت. ساڵی ٢٠١٤ تورکیا ویستی لە رێگەی داعشەوە دەستکەوتەکانی باشوری کوردستان و رۆژئاوای کوردستان لە ناوبەرێت، بەڵام سەرکەوتوو نەبوو، دوای ئەوە هەوڵی زۆریدا راستەخۆ لە رێگەی سوپای خۆیەوە دەستکەوتەکانی رۆژئاوای کوردستان لە ناوبەرێت.

 

 

 

  هیزە نێودەوڵەتیەکان تەنها رێگەی داگیرکردنی عەفرینیان پێدا. وادیارە بەرپرسانی کورد لە هەرێم و عێراق، رێگەیان بە تورکیا داوە هێرش بۆ سەرPKK بکات، بەڵام لای تورکیا مەسەلەکان بە تەنها بە PKK وە ناوەستێت، ئەگەر عێراق و ئێران بە هێرش و داگیرکاری تورکیا رازیبن، شەرەکە بە داگیرکردنی باشوری کوردستان و هەڵوەشاندنەوەی هەرێمی فیدراڵی باشور کۆتاییدێت.

،،

پێویسته، هه‌موو كورد یه‌ك بگرێت، بۆ دژایه‌تی داگیركه‌ری توركیا.

 

  خۆ ئەگەر عێراق و ئێران دژی داگیرکردنی بەشیکی عێراق( باشوری کوردستان بووەستنەوەو بە هێرشی تورکیا ڕازی نەبن، باشوری کوردستان دەبێتە مەیدانی شەڕی ئەو هێزە ناوچەییانەو دوور لە خاک و گەلی خۆیان لە سەر خاک و گەلی کورد شەڕی یەکدی دەکەن و ناکۆکی و ململانێکانیان یەکلایی دەکەنەوە.

 

 بۆیە گرنگە گەلی کورد بە هەموو پێکهاتەکانیانەوە، لە هەرچوارپارچەی کوردستان و لە درەوەی کوردستان، بێنە لای یەک، بە بەرنامەیەکی توکمە و بە تێکۆشانێکی بێوچان، ئاستی خەباتی جەماوەری و دبلۆماسی و پەرلەمانی بەرزبکەنەوە و ڕێگە لە هێرش و داگیرکاریەکانی سوپای تورکیا بگرن.

 

author photo

تایبه‌ت به‌ دیپلۆماتیك