بیرێک بۆ هەستانەوە

کۆنگرەی ئیسلامییەکان وەک جەژن و ئاهەنگێکی پیرۆزی لێهاتووە

 بیرێک بۆ هەستانەوە

202 خوێندراوەتەوە

 حەسەن مەحمود حەمە کەریم

لەگەڵ ئەوەى کە ئیسلامییەکانى کوردستان یەک لەشکرى گەورە کادیرى بانگخوازو ڕۆشنبیرو ئیعلامى و زانستى ڕەوشت بەرزو بۆ خوا سوڵحاویان هەیە، بەڵام هەستى گۆڕین و خۆ نوێکردنەوەیان بە گشتى کەمە، ئەوان هەمیشە لە کۆنگرەکان پەیمان نوێدەکەنەوە کە سوربن لەسەر دەستگرتن بە بڕیارە پێشوەکان و دانانەوەى کەسە کۆنەکان، هەمیشە لە کۆنگرەکان دوپاتى دەکەنەوە کە زیاتر لە جاران سورن لەسەر پەیڕەو و بڕیارەکان و پاراستنى سەوابیتەکان.

 لە کۆنگرەى ئیسلامیەکاندا هەمیشە هەست بە کەمترین دەنگ دەکەیت بۆ گۆڕانکارى، بەڵکو کۆنگرە وەک جەژن و ئاهەنگێکى پیرۆزى لێهاتووە، لە باتى ئەوەى بیرى بۆ بکەنەوەو کتێبى بۆ بخوێننەوەو دەنگ کۆکەنەوە بۆ گۆڕانکارى، قات و پێڵاوو بۆن و بۆینباخ و بیجامەى نوێى بۆ دەکڕن، هەر کە چوونە ژوورى کۆنگرە، گەرمترین پرۆسەى تەوقەو ماچ و موچ و پێکەنین و وینەگرتن و سێڵڤى باران دەست پێدەکات.

  دەڵێن ئەگەر کۆنگرە هەر ئەمەى کردبێ، ئەنجامە پیرۆزەکانى پێکاوە، بەڵکو زۆرى وا حاڵى دەبێت کە تەنها بۆ ئەوە دەچن دەنگ لەسەر کۆنەکان بدەنەوەو بۆ هەتا هەتایە لە شوێنە پیرۆزەکانیان دایاننێنەوە، بەڵکو زۆر لەوانەى دەچنە کۆنگرە، نازانن گۆڕانکارى چییەو دەبێ چى بگۆڕن، بەڵکو دەڵێن ئەمانە عەیبیان چیە؟

 

،،

ئیسلامییه‌كان وه‌ڵامیان بۆ پرسیار و كێشه‌كانی خه‌ڵك ڕوون نییه‌.!

 

 بەڵام ئەو نازانێ سەردەمەکەى چیەو، چى دەخوازێ، دەبێ چى بکات و، بۆ تەشریفی هاتوەتە ئێرە. من ئیسلامیەکانى کوردستانم نەدى خۆێندنەوەیەکى جدى بۆ حاڵى وەستاو و پاشەکشەو شکستخواردوى خۆیان بکەن، کوا هەڵسەنگاندنى دۆخ و ڕەخنە لە قۆناغەکەیان، کوا دەزگاو سەنتەرە فکریەکانیان، کوا تیپە هونەرییەکانى شانۆو مۆسیقاو دەنگ و ڕەنگەکانیان.

 کوا کۆمەڵە ئەدەبى و ڕۆشنبیری و کۆڕو سیمینارە بەهێزەکانیان، کوا مەشروعە بانگخوازەکەیان، کوا وەڵامى پرسیارەکانى گەنجان و لاوان، کوا پرۆژەیان بۆ ئافرەتان، چ وەڵامێکیان ئامادەکردوە بۆ ئەو هەموو پرسیارەى کە عەلمانى و دیندارو بێدینەکان دەیوروژێنن و بە دوایدا دەگەڕێن، بەشدارى چ کۆمەڵگەیەکى مەدەنى و سیمینارەکانی قاوەخانەو نادی و سەنتەرەکانیان کردووە.

 

 

پڕۆژه‌ی سێ حزبه‌ ئیسلامییه‌كه‌

 

  بڕۆ سەیرى کتێبخانەى ئیسلامى بکە لێى دەترسى، هەر باسى سیواک و ڕیش و تەڵاق و حەیزو نیفاس تەهارەو شمشیرو جیهادو سەلەفى و توندڕەویە، بەزۆریش هەر ئەو کتێبانە دەفرۆشرێت، کوا وتارە گرنگ و وتە بەپێزو هەنگاوە بەهێزو بیرۆکە نوێیەکانیان، کوا بەرنامە پێشکەوتوە گرنگەکانیان لەسەر ئاین و قورئان و ئیمان.

  ئادەى ئەو کتێبە زۆر گرنگانەم نیشان بدە کە سەرکردەکانى حیزب نوسیبێتى، چ تەنزیرێکیان بۆ حاڵى خۆیان و قۆناغ و ئاینەکەیان کردووە، ئەوان ئێستە نازانن چى بکەن و چۆن ئایین بە نەوەى نوێ بگەیەنن، هەتا ئێستە من لێم نەبینین بڵێن هۆى شکستیمان ئەوەیەو هەڵەکانمان دیاریکردوەو ئەوەش ئەنجامەکەى، نەمبینى بڵێن ئەوە نەخشەى ئایندەو پڕۆژەى هەستانەوە.

 

،،

ئه‌وانه‌ی باسی كرانه‌وه‌ ده‌كه‌ن، خۆیان له‌هه‌قیقه‌تا باوه‌ڕیان به‌كرانه‌وه‌ نییه‌.

 

 

  من هەر دەبینم خۆیان دەپەڕێننەوەو دەستى دەرەکى تاوانبار دەکەن، دوور لەوان، ئەمانە وەک کۆمەڵە قەشەیەکى تازەیان لێهاتووە، کە بەناوى ئاینەوە دەژین، خەریکە حەقیقەتى دینداری و هۆى بوون و زەرورەتیان نامێنێ.!

 وتیان فڵان کتێبێکى نوسیوە باسى کرانەوە دەکات، وتم بۆ ئەو خۆى لە مرۆڤى ئەم سەردەمە دەچێت تا باسى کرانەوەمان بۆ بکات.؟ وتم بۆم باسکە چۆن چۆنى کراوەتەوە، بزانم کرانەوە فکرییەکەی چەندە کاریگەرى لەسەر دەرەوەى خۆی هەیە، وتى فەرمویەتى پاشگرى ئیسلامى لە حیزب دەکەمەوە، وتم بەخوا ئیسلامی شکڵیشى لێبکاتەوە.

 گۆڕانکارى ڕاستەقینە لەودا ڕوونادات، من لە دەرو ناوى ئەودا تاشە بەردێکى ڕەق دەبینم، کە بە گۆچانەکەى موساش تەڕایی لێ نایەت، بەخوا هەرچى سفورى دونیاش هەیە بیهێنێـتە ڕیزى خۆى، ناتوانێ گۆڕانکارى دروست بکات، خۆ گۆڕانکارى قسەی ڕووت و سادە نییە، ئەوە کردارێکى فیزیکیە، قەناعەتە، لە ناخدا ڕودەدات و لە دەرەوە دەبینرێ.

  خۆزگە ڕاست بوایەو وابوایە، بەڵام ئەو عەقڵە، قابڵۆغیشى بگۆڕن جەوهەرى نەگۆڕە، ئەگەر دەتەوێ گۆڕانکارى ڕوبدات، ئەوان بگۆڕە ، هەتا ئەمانە لەسەرەوەبن هیچ ناگۆڕێ و هەر ئەوە دەبێ کە بووە، ئەمانە چیان پێبووە لە قۆناغەکانی پێشوودا خوا قبوڵی کردبێ خستویانەتە ڕوو پاداشتی خۆیان وەرگرتوە، گرفتی ئەمانە ئەوەیە نەیانتوانی خۆیان نوێ بکەنەوە.

 

 

 

  هەربۆیە پێیان نەماوە، پەنجا ساڵى تریش بمێننەوە هەر ئەوەت پێدەڵێن ، بەڵام زۆر سەرکردەی پیر لەو دونیایەدا هەیە، بەردەوام جۆگەى فکرى خۆیان پاکدەکەنەوەو نوێیدەکەنەوە، شت دەخوێننەوەو بیردەکەنەوەو عەقڵیان لە گەشەدا ئیش دەکات، ئیبداع و داهێنان دەبەخشن ، بەس ئەمانە ، نە دەخوێننەوەو نە گوێدەگرن.نە بڕوایان بە بەرامبەر هەیە، نە قبوڵى ڕەخنەو تێبینى و پێشنیار دەکەن، سەد پرۆژەیان بخەیتە بەردەست، مەسروفەکەشیان بدەرێ، مردارى دەکەنەوە. پڕۆژەیەکى ئەمریکى هەیە، لە داڕشتنى بونەتەوەو لە سەرەتاى جێبەجیکردنیدان، بەتەمان چەند لایەن و کەسایەتى میانڕەو بخەنە لیستى تیرۆرەوەو کارو چالاکیان بوەستێنن.


دۆخێکى خراپ دەبێت، ئەگەر ئەمانەى خۆمان، بیرکردنەوەو دڵسۆزیان هەبوایە، هەموو لەسەر سفرەیەکى گونجاو کۆدەبونەوە، بیریان لە حاڵى خۆیان و ئیشەکەیان دەکردەوە، شتێکیان بۆ ئەم پەرتەوازەییە دەکرد.

 بۆ نمونە : پڕۆژەو حزبێکى سێبەریان دامەزراندایە، بە فکرو قیادەى نوێ و جیاوازەوە، کە ئەمان یاساغکران، ئەو ببێتە سێبەرو جێگر و بەدیل، دەبوو شتێکى حازریان هەبوایە، بەسەرکردایەتی و نەمەت و شێوازو پرۆگرامى نوێوە، پاشگرى ئیسلامی نەبێ، هەتا سبەى خەڵک هەست نەکات بێ لانەو بێکەس و تەنهایە.

 

author photo

تایبه‌ت به‌ دیپلۆماتیك